’A poupou tō ’oe ’ā’au ’e ’a ’oa’oa
’Ua fānauhia tātou i teie ’anotau nō te hō’ē tumu hanahana, te ha’aputuputura’a ’ia ’Īsera’ela.
Ma te paraura’a ia Thomas B. Marsh, e melo fa’afāriu-’āpī-hia, ’ua parau te Fatu ma te fa’aitoito, « ’a poupou tō ’oe ’ā’au ’e ’a ’oa’oa, nō te mea ’ua tae i te hora nō tā ’oe na ’ohipa » (Te Ha’api’ira’a Tumu ’e te mau Fafaura’a 31:3).
Tē ti’aturi nei au ē, e riro teie tītaura’a manihini ’ei fa’aurura’a nō te tā’ātoara’a o te mau melo nō te ’Ēkālesia. ’Ia hi’ohia, ’ua fāri’i tātou tāta’itahi nō ’ō mai i te Metua i te ao ra i te misiōni nō te ha’aputuputura’a o ’Īserā’ela i nā pae e piti o te pāruru.
« Teie ha’aputuputura’a », ’ua parau te peresideni Russell M. Nelson « ’o te ’ohipa faufa’a roa a’e ïa ’o tē tupu nei i ni’a i te fenua i teie mahana. ʼAita e ʼohipa ʼē atu e faʼaauhia i te rahi, ʼaita e ʼohipa ʼē atu e faʼaauhia i te faufaʼa rahi, ʼaita e ʼohipa ʼē atu e faʼaauhia i te hanahana ».1
Pāpū roa, tē vai ra nā te ao nei e rave rahi mau tumu maitata’i. E’ita e nehenehe e fa’ahiti ia rātou pā’āto’a. ’Āre’a rā ’aita ānei ’outou e hina’aro e ’āmui mai i roto i te hō’ē tumu rarahi e roa’a ia ’outou ’ia rave ’e i reira tā ’outou tūtavara’a e ’āfa’i mai ai i te tauira’a faufa’a a’e ? E hope’ara’a mure ’ore tō te ha’aputuputura’a nō te tā’āto’ara’a. E nehenehe te mau ta’ata nō te mau matahiti ato’a e ’āmui mai i teie ’ohipa, noa atu te huru ’o tō rātou orara’a ’e te vāhi tā rātou e ora ra. ’Aita e ’ohipa ’ē atu mai teie te huru i te ao nei ’o te fa’aō rahi mai i te ta’ata.
’Ua parau ta’a ’ē te peresideni Nelson i te feiā ’āpī iho ā rā, « ʼua faʼaherehere tō tātou Metua i te ao e rave rahi o tāna mau vārua hau atu i te hanahana—penei aʼe … tāna pupu maitaʼi roa aʼe—nō teie tuhaʼa hopeʼa. Taua mau vairua hau atu i te maita’i ra—taua feiā ha’uti maitaʼi roa aʼe, taua mau ’aito ra—ʼo ’outou ïa ! »2
’Oia mau, ’ua fa’aineinehia ’outou nā mua a’e i teie orara’a ’e ’ia fānauhia mai i teienei nō te ’āmui i roto i te ’ohipa hanahana nō te ha’aputuputura’a o ’Īsera’ela i nā pae e piti o te pāruru i teie mau mahana hope’a nei (hi’o Te Ha’api’ira’a Tumu ’e te mau Fafaura’a 138:53-56).
Nō te aha teie ’ohipa e mea faufa’a roa a’e ? Nō te mea « e faufa’a rahi tō te mau vairua ta’ata i tō te Atua hi’ora’a mai » (Te Ha’api’ira’a Tumu ’e te mau Fafaura’a 18:10). ’E nō te mea « ’o ’oia ’o tē ti’aturi mai ia [Iesu Mesia] ra, ’o tē bāpetizohia ra, e fa’aorahia ïa ’oia ; ’e … tē fāri’i i te bāsileia o te Atua ra » (3 Nephi 11:33). Hau atu, « te mau mea ato’a a tō’u Metua i te ao ra, e hōro’ahia ïa » i te feiā e fāri’i i tāna mau ’ōro’a ’e e ha’apa’o i tāna mau fafaura’a (Te Ha’api’ira’a Tumu ’e te mau Fafaura’a 84:38). Teie ato’a, « tē iti nei rā te feiā ’ō’oti » (Luka 10:2).
Tei roto ana’e i Te ’Ēkālesia a Iesu Mesia i te Feiā Mo’a i te mau Mahana Hope’a nei e ’itehia ai ia tātou te mana, te ha’amanara’a, ’e te rāve’a nō tē pūpū i teie huru ha’amaita’ira’a ia vetahi ’ē, ’o tē ora nei ’aore rā tei pohe.
Mai tā te peresideni Nelson i parau : « I te mau taime atoʼa e rave ʼoutou i te tahi mea ʼo te tauturu i te mau taʼata atoʼa—i nā pae e piti o te pāruru—ʼia tu’u hō’ē ta’ahira’a i mua nō te ravera’a i te mau fafauraʼa ʼe te Atua ʼe te fāriʼiraʼa i tō rātou mau ʼōroʼa faufaʼa rahi nō te bāpetizoraʼa ʼe te mau ʼōroʼa hiero, tē tauturu ra ïa ʼoutou i te haʼaputuputura’a ia ’Īserāʼela. E mea ’ōhie roa ».3
Noa atu tē vai ra e rave rahi rāve’a nō te tauturu i te ha’aputuputura’a, tē hina’aro nei au e paraparau nō te hō’ē rāve’a ta’a ’ē mau : Tē tāvinira’a ’ei misiōnare rave tāmau. Nō ʼoutou e rave rahi, te aura’a ’ia riro ’ei misiōnare poro ’evanelia. Nō te tahi atu e rave rahi, te aura’a ’ia riro ’ei misiōnare tāvini. Tē tāmata nei te ao nei i te fa’anevaneva i te feiā ’āpī nō teie hōpoi’a mo’a rahi, nā roto i te fa’a’ohipara’a i te mata’u ’e te pāruru ’ore.
Te tahi o te mau fa’anevanevara’a o te ma’i pe’e ïa, te fa’aru’era’a i te hō’ē ’ohipa maita’i, te fa’ataimera’a i te tau ha’api’ira’a, ’aore rā te fa’ahina’arora’a i te hō’ē ta’ata. Te ta’ata e tōna iho ’āruru tāmatara’a. E tupu mai teie huru fa’anevanevara’a i te taime iho ā, ’a haere atu ai i roto i te tāvinira’a i te Fatu ’e te mau mā’itira’a tei riro e mea pāpū nō a muri a’e, e ’ere ïa i te mea ’ōhie noa i taua taime ra.
’Ua ’ite au nā roto i te ’ohipa i tupu te mana’o tapitapi o te hō’ē ta’ata ’āpī roa. ’A fa’aineine ai au i te haere i tā’u tau misiōni, ’ua tāmata te mau pūai māere i te ha’aparuparu iā’u. Hō’ē ’o tō’u ïa taote niho. I tōna hāro’aro’ara’a ē, tā’u tūtavara’a ’ia riro vau ’ei misiōnare, ’ua tāmata ’oia i te fa’atūrorirori i tō’u mana’o nō te tāvini. ’Aita roa vau i ’ite noa a’e ē, ’aita tō’u taote niho e ’āfaro roa ra i te ’Ēkālesia.
’Ua riro ato’a te fa’aeara’a vau i tā’u tau ha’api’ira’a ’ei ’ohipa fifi ato’a. I tō’u anira’a i te tahi tau fa’aeara’a e piti matahiti noa nō te ha’api’ira’a tuatoru, ’ua parauhia mai iā’u ’aita roa e ti’a. E ’ere au i tō’u pārahira’a i te fare ha’api’ira’a tuatoru, mai te peu ’aita vau e ho’i atu i muri iho hō’ē matahiti. I Peresiria, e ’ohipa fifi mau te reira, nō te fa’aō atu i roto te ha’api’ira’a tuatoru tītauhia ’ia rave i te hō’ē hi’opo’ara’a pa’ari mau ’e te ’ume’ume ho’i.
I tō’u onoono-noa-ra’a, ’ua parauhia mai au ma te pāto’i ē, i muri a’e hō’ē matahiti fa’aeara’a e nehenehe au e ani i te hō’ē tītaura’a nō te mau tumu ta’a ’ē mau. E fa’ati’ahia paha ’aore rā ’aita. ’Ua taiā vau ’ia rave fa’ahou i te hi’opo’ara’a pa’ari mau i muri a’e e piti matahiti fa’aeara’a i tā’u ha’api’ira’a.
Tē fa’ahina’aro ato’a rā vau i te hō’ē tamāhine ’āpī. E rave rahi o tō’u mau hoa e fa’ahina’aro ra i taua tamāhine ra. ’Ua feruri au, « mai te peu e haere au i te misiōni, e ha’afifi te reira iā’u ».
Terā rā, ’ua riro te Fatu Iesu Mesia ’ei fa’aurura’a rahi nō’ū, ’ia ’ore e mata’u nō tō’u ’ananahi ’a tūtava noa ai au i te tāvini iāna mai tō’u ’ā’au ato’a.
E misiōni ato’a tāna e fa’aoti. Nā roto i tāna iho parau, ’ua fa’ata’a mai ʼoia ē, « i pou mai nei ho’i au mai te ra’i mai e haʼapa’o i tō tei tono mai iā’u nei hina’aro, ʼeiaha tōʼu iho hinaʼaro » (Ioane 6:38). E mea ’ōhie ānei tāna misiōni ? ’Aita roa atu. Tōna māuiui, tei riro ’ei tuha’a faufa’a rahi nō tāna misiōni tei fa’atupu iāna, « ’oia ’o te Atua, ’o tei hau a’e i te mau mea ato’a ra, i te rurutaina nō te māuiui, ’e ’ua tahe mai ra te toto nā te mau poa ato’a, ’e ’ua māuiui i te tino ’e te vairua ato’a ho’i—’e ’ua hina’aro ho’i ’ia ’ore au ’ia inu i te ’āu’a maramara ’e ’ōriorio atu—
« ’Āre’a rā, ʼei hanahana tō te Metua, ʼe ’ua inu [’oia] ʼe ’ua faʼaoti hoʼi i [tāna] mau faʼaineineraʼa i te tamariʼi a te taʼata nei » (Te Ha’api’ira’a Tumu ’e te mau Fafaura’a 19:18–19).
E mea fifi paha nō tātou te tāvinira’a i te misiōni rave tāmau. Penei a’e t tītauhia ia tātou ’ia fa’aru’e i te mau mea faufa’a a’e nō te tau poto. ’Ua ’ite pāpū roa te Fatu i te reira, ’e e vai noa mai ’oia i pīha’i iho ia tātou.
’Oia mau, i roto i tā rātou poro’i i te mau misiōnare i roto i te ’Ia Poro Haere i tā’u nei ’Evanelia, tē fafau nei te Peresidenira’a Mātāmua, « e ha’amāuruuru ’e e ha’amaita’i-rahi-hia ’outou ’a tāvini ai ’outou iāna ma te ha’eha’a ’e te pure tāmau ».4 E parau mau roa ’ua ha’amaita’ihia te mau tamari’i ato’a a te Atua, i terā rāve’a ’e te tahi atu, tē vai ra rā te ta’a-’ē-ra’a i rotopū ’ia ha’amaita’ihia ’e ’ia ha’amaita’i-rahi-hia i roto i tāna tāvinira’a.
Tē ha’amana’o ra ’outou i te mau fifi ’o tā’u i mana’o e fa’aruru vau hou tā’u misiōni ? Tō’u taote niho ? ’Ua ’itehia mai iā’u te tahi atu. Tā’u ha’api’ira’a tuatoru ? ’Ua ravehia te hō’ē tītaura’a nō’u. Tē ha’amana’o rā ’outou i terā tamāhine ? ’Ua fa’aipoipo ’oia i hō’ē o tō’u mau hoa maita’i.
Terā rā ’ua ha’amaita’i-rahi-hia vau. ’E ’ua ha’api’i mai au ē, e tae mai te mau ha’amaita’ira’a a te Fatu ma te rāve’a ta’a ’ē mai te au i te mea tā tātou e tīa’i nei. ’Oia mau e ’ere tōna ferurira’a mai tō tātou ferurira’a (hi’o Isaia 55:8–9).
I roto e rave rahi ’e te faufa’a o te ha’amaita’ira’a tāna i hōro’a nō’u nō te tāvinira’a iāna ’ei misiōnare rave tāmau, tē vai ra hō’ē fa’aro’o rahi a’e ia Iesu Mesia ’e i tāna tara’ehara, ’oia ato’a te hō’ē māramarama ’e te ’itera’a pāpū nō tāna mau ha’api’ira’a, e ti’a ’ia ’ore au ’ia ’āueue noa « i te mata’i ra i terā parau ’e terā parau » (Ephesia 4:14). ’Ua ’ore tō’u mata’u ’ia ha’api’i. ’Ua mara’a tō’u ’aravihi nō te fa’aruru i te mau tāmatara’a mā te mana’o ’ana’anatae. Nā roto i te hi’ora’a i te mau ta’ata ’e te mau ’utuāfare ’o tā’u i fārerei ’aore rā i ha’api’i ’ei misiōnare, ’ua ha’api’i mai au ē, e parau mau te mau ha’api’ira’a a te Atua ’a parau ai ’oia ē, ’aita te hara e hōro’a mai i te ’oa’oa mau, ’e tē ha’apa’ora’a i te mau fa’auera’a a Atua e tauturu te reira ia tātou ’ia manuia i nā pae e piti, te pae tino ’e te pae vārua (hi’o Mosia 2:41 ; Alama 41:10). ’Ua ha’api’i mai au nā roto iā’u iho ē, te Atua e Atua ’oia nō te mau temeio (hi’o Moromona 9).
’Ua riro teie mau ’ohipa ’ei mau mauiha’a nō tō’u fa’aineinera’a nō te orara’a ta’ata pa’ari, ’oia ato’a te fa’aipoipora’a ’e te rirora’a ’ei metua, te tāvinira’a i roto i te ’Ēkālesia ’e i te pae o te ’ohipa ’e te orara’a huira’atira.
I muri mai tā’u misiōni, ’ua fāna’o vau ma tō’u itoito rahi ’ia fa’a’ite atu iā’u iho ’ei pipi ha’apa’o nā Iesu Mesia ’e nō tāna ’Ēkālesia i roto i te mau huru tupura’a ato’a ’e te mau ta’ata ato’a, ’oia ato’a tē fa’a’itera’a i te ’evanelia i te hō’ē vahine nehenehe tei riro mai ’ei hoa fa’aipoipo tei ’ī i te poupou, te pa’ari, te ’oa’oa, ’e hō’ē hoa here mure ’ore, te hihi mahana nō tō’u orara’a.
’Oia mau, ’ua ha’amaita’i-rahi-hia vau e te Atua, hau a’e i tā’u i mana’o na, mai tāna ato’a e nā reira ia rātou pā’āto’a tei « tāvini iāna ma te ha’eha’a ’e te pure ». E māuruuru mure ’ore tō’u i te Atua nō tōna maita’i.
’Ua hāmani maita’i roa te ’ohipa misiōnare i tō’u orara’a. ’Ua ha’api’i mai au ē, e faufa’a tō tē tūtavara’a ’ia ti’aturi i te Atua, ’ia ti’aturi i tōna pa’ari ’e tōna aroha ’e i tāna mau fafaura’a. I ni’a i te mau mea ato’a, ’o ’oia tō tātou Metua tāne, ’e ma te mana’o fēa’a ’ore, tē hina’aro nei ’oia i tō tātou maita’i.
E te feiā ’āpī here ’ati a’e te ao nei ē, tē fa’atae atu nei au i te hō’ē ā tītaura’a manihini ’o tā tō tātou peropheta, te peresideni Nelson i hōro’a ia ’outou pā’āto’a « ’ia tomo mai i roto i te nuʼu uʼi ʼāpī a te Fatu nō te tauturu i te haʼaputuputura’a ia ’Īserāʼela ». ’Ua parau te peresideni Nelson :
« ʼAita e ʼohipa faufaʼa rahi roa aʼe. ʼAita roa atu.
« Teie haʼaputuputuraʼa e ti’a ’ia riro ’ei ’ohipa mau nō ʼoutou. E misiōni teie i tonohia mai ai ʼoutou i niʼa i te fenua nei ».5
’Ua fānauhia tātou i teie ’anotau nō te hō’ē tumu hanahana, te ha’aputuputura’a ’ia ’Īsera’ela. ’Ia tāvini ana’e ’ei mau misiōnare rave tāmau, e tāmatahia tātou i te tahi taime, terā rā ’o te Fatu tō tātou hi’ora’a rahi ’e tō tātou arata’i i roto i te reira huru tupura’a. ’Ua ’ite ’oia e aha te hō’ē misiōni fifi. Nā roto i tāna tauturu, e nehenehe tātou e rave i te mau ’ohipa pa’ari. E vai mai ’oia i pīha’i iho ia tātou (hi’o Te Ha’api’ira’a Tumu ’e te mau Fafaura’a 84:88), ’e e ha’amaita’i rahi mai ’oia ia tātou ’a tāvini ha’eha’a ai tātou iāna.
Nō teie mau tumu ato’a, ’aita vau e maere nei ē, ’a parau ai te Fatu ia Thomas B. Marsh ’e ia tātou pā’āto’a, « ’a poupou tō ’oe ’ā’au ’e ’a ’oa’oa, nō te mea ’ua tae i te hora nō tā ’oe na ’ohipa ». I te i’oa o Iesu Mesia, ’āmene.