Susan H. Porter

Peresideni rahi nō te Paraimere

« Hō’ē mea tei ha’aputapū i tō mātou ferurira’a i te matahiti i ma’iri a’enei, ’oia ho’i, nāhea e ti’a ai ia tātou ia ha’apūai i te mau tamari’i i te pae vārua ? » te parau ïa a te tuahine Susan H. Porter. « ’Ia parau ana’e tātou nō ni’a i te ha’apūaira’a i te fa’aro’o o te u’i ’āpī e ti’a mai nei, e ha’amata te reira i roto i te Paraimere ».

Tē ’ite nei te tuahine Porter i te mau ha’amaita’ira’a e tae mai i te mau tamari’i tei bāpetizohia ’a rave ai rātou i te ’ohipa ’ei melo nō te fafaura’a i roto i te ’Ēkālesia.

« E mea pinepine e nā roto i te ’ohipara’a ’e te tāvinira’a e tupu ai i te rahi tō tātou ’itera’a pāpū », tāna ïa i fa’ata’a mai. « E nehenehe te mau tamari’i e ha’api’i mai ’ia ’imi i te fa’aurura’a nō te ra’i mai ».

Hou ’a pi’ihia ai ’oia ’ei peresideni rahi nō te Paraimere, ’ua tāvini na te peresideni Porter ’ei tauturu mātāmua i roto i te peresidenira’a rahi nō te Paraimere, hō’ē matahiti te maoro.

’Ua parau ’oia ē, e rave rahi tamari’i ’o tei ’ore e nehenehe e ’āmui atu i roto i te Paraimere i te taime nō te ma’i pe’e COVID-19. ’Ua ’ite ato’a ’oia i te mau tāmatara’a tei fa’aruruhia ’e te mau vahine ’ōtahi. ’Ua pohe tāna tāne fa’aipoipo, ’o Elder Bruce D. Porter nō te Hitu ’Ahuru, i te matahiti 2016.

« E rave rahi sābati ’aita vau i fāri’i i te ’ōro’a mo’a », tāna ïa parau.

’A fa’a’ite ai ’oia i te ’ohipa i tupu nōna, ’ua parau mai te tahi atu mau vahine iāna ē, « Nō te mea tē tāvini nei ’oe i roto i te ’Ēkalesia, tē horo’a mai nei te reira iā’u i te hō’ē ’itera’a maita’i a’e ē, tē hina’aro nei te ’Ēkālesia iā’u ».

’Ua fānauhia ’o Susan Elizabeth Holland Porter i te 31 nō Tiurai 1955, i Ponca City, Oklahoma, i te Fenua Marite, nā Hans J. rāua ’o Charlene Coleman Holland ’e ’ua pa’ari i New York, i te Fenua Marite.

’Ua fa’aipoipo ’oia ia Elder Porter i te 2 nō Fepuare 1977 i roto i te hiero nō Washington D.C. (Marite). ’Ua aupuru rāua i tā rāua nau tamari’i e maha i te pae hiti’a o te rā nō te Fenua Marite, i Heremani ’e i Utaha ’e ’ua rave i te mau ’ohipa a te ’Ēkālesia i te fenua nō Europa Hiti’a o te rā.

’Ua roa’a te parau ’aravihi tuatoru nō te ihi hīmio i te tuahine Porter i te fare ha’api’ira’a tuatoru Brigham Young University. ’Ua rave ’oia i te ’ohipa ’ei tauturu piha mā’imira’a nō te Massachusetts Institue of Technology ’e ’ei ’orometua ha’api’i nūmera. ’Ua hōro’a ato’a ’oia i tōna taime i roto i te mau fa’anahonahora’a rau nō te huira’atira ’e nō te tīvira.

’Ua tāvini te tuahine Porter i roto i te ’āpo’ora’a tauturu rahi a te Sōtaiete Tauturu, ’e te tahi atu mau pi’ira’a i tahito ra, mai te tauturu i roto i te peresidenira’a Sōtaiete Tauturu o te titi, peresideni nō te Sōtaiete Tauturu ’e nō te Feiā ’Āpī Tamāhine nō te pāroita, e ’orometua ha’api’i nō te ha’api’ira’a tumu o te ’evanelia, ’e e ti’a fa’atere hīmene nō te paraimere.