I aroha mai te Atua i tō te ao
I aroha mai te Atua ia tātou, ē ’ua tono mai i tāna Tāmaiti fānau tahi—’eiaha nō te fa’autu’a ia tātou nō te fa’aora rā ia tātou.
« I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore » (Ioane 3:16). Te taime mātamua ’a hi’o maita’i ai au i teie ’īrava, e ’ere i te fare purera’a ’aore rā i roto i te pō ’utuāfare. Tē māta’ita’i ra vau i te hō’ē ’ohipa e tupu ra nō te ha’a tū’aro i roto i te ’āfata teata. ’Aita e hi’ora’a e aha te hono tūreiara’a tā’u i māta’ita’i ’e ’aita ato’a e hi’ora’a e aha te tū’aro, tē vai ra hō’ē ta’ata e tāpe’a ra i te hō’ē paruai e tāi’ohia « Ioane 3:16 ».
’Ua au ato’a vau i te ’īrava 17 : « ’Aore ho’i te Atua i tono mai i tāna Tamaiti i te ao nei e fa’ahapa mai i tō te ao ; ’ia ora rā tō te ao iāna ».
’Ua tono mai te Atua ia Iesu Mesia, tāna Tāmaiti ’ōtahi i roto i te tino tāhuti, ’ia hōro’a ’oia i tōna ora nō tātou tāta’itahi. ’Ua rave ’oia i te reira nō te mea ’ua here ’oia ia tātou ’e ’ua hāmani i te hō’ē fa’anahora’a nō tātou tāta’itahi, nō te ho’i atu i te fare iāna ra.
E ’ere rā te reira i te fa’anahora’a tāpo’i pauroa ’e te haru pauroa ’e te hi’o haere i tōna tano. Nō te ta’ata iho te reira, ’ua fa’anahohia e te hō’ē Metua here i te ao ra, tei ’ite maita’i i tō tātou ’ā’au, tō tātou i’oa, ’e te mea tāna e hina’aro ’ia rave tātou. Nō te aha tātou e ti’aturi nei i te reira ? Nō te mea tē ha’api’ihia nei te reira ia tātou i roto i te mau pāpa’ira’a mo’a.
’Ua fa’aro’o pinepine Mose i te Metua i te ao ra i te paraura’a i teie parau « e Mose, tā’u tamaiti » (hi’o Mose 1:6 ; hi’o ato’a mau ’īrava 7, 40). ’Ua ha’api’i mai Aberahama ē, e tāmari’i ’oia nā te Atua, tei mā’itihia nō tāna misiōni hou ’oia ’a fānauhia mai ai (hi’o Aberahama 3:12, 23). Nā te rima o te Atua, i tu’u ia Esetera i ni’a i te hō’ē ti’ara’a teitei nō te fa’aora i tōna nūna’a (hi’o Esetera 4). ’E ’ua ti’aturi te Atua i te hō’ē poti’i ’āpī, hō’ē tāvini, tei fa’a’ite pāpū nō te hō’ē peropheta ora ’ia ti’a ia Naamana ’ia fa’aorahia (hi’o 2 Te mau Ari’i 5: 1–15).
’Ua au ta’a ’ē au i teie ta’ata poto maita’i roa, ’o tei pa’i’uma i ni’a i te hō’ē tumu rā’au nō te hi’o atu ia Iesu. ’Ua ’ite te Fa’aora tei reira ’oia, ’ua fa’aea ihora, ’ua hi’o atu i ni’a nā roto i te mau ’āma’a, ’e ’ua parau atu ra i teie mau parau : « E Zakaio, ’ei tō fare ra ho’i au parahi ai ’ā’uanei » (Luka 19:55). ’E e’ita e mo’ehia ia tātou i te tamaiti 14 matahiti, tei haere i roto i te uru rā’au ’e ’ua ’apo mai ē nōna iho mau te fa’anahora’a : « [Iosepha], ’O tā’u Tāmaiti Here teie. ’A fa’aro’o iāna ! » (Iosepha Semita—’Ā’amu 1 : 17).
Te mau taea’e ’e te mau tuahine, o tātou te tumu nō te fa’anahora’a a te Metua i te ao ra ’e te tumu nō te misiōni a tō tātou Fa’aora. ’O tātou tāta’itahi, te ta’ata hō’ē, ’o tā rāua ïa ’ohipa ’e tō rāua hanahana.
Nō’u nei, ’aita e buka pāpa’ira’a mo’a e hau atu i te fa’ahōho’ara’a i te reira ma te māramarama, i tā’u tuatāpapara’a i te Faufa’a Tahito. Te pene i muri iho i te pene, e ’ite mai tātou i te mau hi’ora’a e nāhea te Metua i te ao ra ’e ’o Iehova i te ō mai ma te here i roto i tō tātou orara’a.
’Ua tuatāpapa iho nei tātou nō ni’a ia Iosepha, te tamaiti here a Iakoba. Mai tōna iho ā ’āpīra’a, ’ua here-rahi-hia Iosepha e te Fatu, ’ua fa’aruru rā ’oia i te mau tāmatara’a rarahi i te rima o tōna mau tua’ana. I nā hepetoma e piti i mā’iri a’e nei, e rave rahi o tātou tei putapū nā roto i te huru o Iosepha i te fa’a’orera’a i te hara a tōna mau tua’ana. I roto te Mai, pe’e mai e tai’o tātou : « E rave rahi te mau tū’atira’a o te orara’a o Iosepha i tō Iesu Mesia. Noa atu ’ua fa’atupu tā tātou mau hara i te māuiui rahi i ni’a iāna, tē pūpū nei te Fa’aora i te fa’a’orera’a hara, e fa’aora nei ia tātou pā’āto’a i te hope’ara’a ino atu ā i te o’e. Noa atu e tītauhia ia tātou ’ia fāri’i i te fa’a’orera’a hapa ’aore rā ’ia fa’a’ore i te hapa—i te reira taime, e tītauhia ia tātou ’ia rave i nā mea e piti—tē fa’afāriu nei te hi’ora’a o Iosepha ia tātou i ni’a i te Fa’aora, te puna mau o te fa’aorara’a ’e te fa’ahaura’a ».1
Hō’ē ha’api’ira’a tā’u i au i roto i teie ’ā’amu nō roto mai ïa i te taea’e o Iosepha, ’o Iuda, tei rave i te hō’ē ’ohipa i roto i te fa’anahora’a a te Atua nō Iosepha. I te taime ’a ha’avarehia ai Iosepha e tōna mau taea’e, ’ua tāparu Iuda ia rātou ’eiaha e taparahi pohe iāna, e ho’o ra iāna ’ei tītī (hi’o Genese 37:26–27).
Tau matahiti i muri mai, ’ua tītauhia ia Iuda ’e tōna mau taea’e e hōpoi i tō rātou teina ia Beniamina i ’Aiphiti. I te ha’amatara’a ’ua ha’apa’ari Iakoba. ’Ua fafau rā Iuda ia Iakoba—e fa’aho’i mai ’oia ia Beniamina i te fare.
I ’Aiphiti, ’ua tāmatahia te fafaura’a a Iuda. ’Ua pari-ha’avare-hia Beniamina i te hō’ē hara rahi. ’O Iuda, tei tāpe’a i tāna fafaura’a, ’ua pūpū iāna ’ei mono nō Beniamina i roto i te fare tāpe’ara’a. « Nō te mea », ’ua parau ’oia, « e aha ho’i au e ti’a ai ’ia haere i tā’u metua rā, ’ia ’ore ’ia tae ato’a te tamaiti nei ? » (hi’o Genese 44:33–34). ’Ua hina’aro mau Iuda e tāpe’a i tāna fafaura’a ’e ’ia fa’aho’i ia Beniamina ma te maita’i. ’Ua fāri’i ānei ’outou nō vetahi ’ē i te mana’o tā Iuda i fāri’i nō Beniamina ?
E ’ere ānei i te mana’o tā te mau metua e feruri nei nō tā rātou mau tāmari’i ? E aha te mana’o o te mau misiōnare nō te feiā tā rātou e tāvini nei ? E aha te mana’o o te feiā fa’atere Paraimere ’e te feiā ’āpī nō te mau ta’ata tā rātou e ha’api’i nei ’e i here ?
Noa atu ’o vai ra ’outou ’aore rā te huru o tō ’outou orara’a, tē fāri’i pāpū nei te hō’ē ta’ata i teie mana’o nō ’outou. Tē hina’aro nei teie ta’ata e ho’i i te Metua i te ao ra ’e ’outou.
Tē mauruuru nei au i te feiā ato’a tei ’ore roa i fa’aru’e ia tātou, ’o tē tāmau nei i te pure onoono nō tātou, ’e ’o tē tāmau nei i te ha’api’i ’e i te tauturu ia tātou ’ia ti’a ia tātou ’ia ho’i atu i te fare a tō tātou Metua i te ao ra.
’Aita i maoro a’e nei, ’ua tāpe’ahia te hō’ē hoa herehia e 233 mahana i roto i te fare ma’i nō te Tovi–19. I roto i te reira taime, ’ua haere mai tōna metua tāne tei pohe e fārerei iāna, tei ani atu e fa’a’ite atu i te hō’ē parau poro’i i tāna mau mo’otua. I muri mai ato’a i te pāruru, ’ua hina’aro teie pāpā rū’au maita’i e tauturu i tāna mau mo’otua ’ia ho’i mai i tō rātou fare i te ao ra.
Pinepine, te mau pipi a te Mesia i te ha’amana’o i te mau « Beniamina » i roto i tō rātou orara’a. ’Ati a’e te ao nei, ’ua fa’aro’o rātou i te ta’ira’a pū a te peropheta ora a te Atua, te peresideni Russell M. Nelson. ’Ua fa’aō mai te feiā ’āpī tamāroa ’e te feiā ’āpī tamāhine i roto i te pupu rauhitu [bataillon] a te feiā ’āpī a te Fatu. Tē toro nei te mau ta’ata ’e te mau ’utuāfare i te rima ma te vārua aupuru—ma te here, ma te hōro’a, ’e ma te tītau manihini i te mau hoa ’e te feiā fātata mai, ’ia haere mai i te Mesia ra. Tē ha’amana’o nei te feiā ’āpī ’e te feiā pa’ari i tā rātou mau fafaura’a ’e tē fa’aitoito nei i te ha’apa’o i te reira—ma te fa’a’ī i te mau hiero a te Atua, ma te ’imira’a i te mau i’oa o tō rātou mau fēti’i tei pohe ’e te ravera’a i te mau ōro’a nō rātou.
Nō te aha tei roto ato’a i te fa’anahora’a a te Metua i te ao ra te tauturura’a ia vetahi ’ē ’ia ho’i mai iāna ra ? Nō te mea, mai te reira tātou e riro ai mai ia Iesu Mesia. Nō te reira, tē ha’api’i nei te ’ā’amu o Iuda ’e o Beniamina ia tātou nō ni’a i te fa’atusiara’a a te Fa’aora nō tātou. Nā roto i tāna tara’ehara, ’ua hōro’a mai ’oia i tōna ora nō te fa’aho’i ia tātou i te fare. E fa’a’ite ra te mau parau a Iuda i te here o te Fa’aora : « E aha ho’i au e ti’a ai ’ia haere i tā’u metua ra, ’e ’aore [’oe] iā’u nei ? » ’Ei ta’ata ha’aputupu ia ’Īsera’ela, e riro ato’a te reira ’ei parau nā tātou.
Tei roto i te Faufa’a Tahito te rahira’a o te mau temeio ’e te aroha mau tei riro ’ei tapa’o nō te fa’anahora’a a te Metua i te ao ra. I roto i 2 Te mau Ari’i, pene 4, te pereota « ’e tae a’era i te hō’ē mahana » ’ua fa’a’ohipahia ïa e toru taime, iā’u nei, nō te ha’apāpū ē, tē tupu nei te mau ’ohipa ta’a ’ē faufa’a roa mai te au i te tārena a te Atua, ’e ’aita te hō’ē fa’a’itera’a e mea ha’iha’i nōna.
Tē fa’a’ite pāpū nei tō’u hoa ’āpī ’o Paul i teie parau mau. ’Ua pa’ari Paul i roto i te hō’ē ’utuāfare i te tahi taime e mea hāmani ’ino ’e te rahira’a taime e au ’ore i te ha’apa’ora’a fa’aro’o. ’A haere ai ’oia i te fare ha’api’ira’a i ni’a i te hō’ē tahua fa’ehau i Heremani, ’ua ’ite atu ’oia e piti tuahine e au ra iāna, tei roto ia rāua te vārua māramarama. Te anira’ahia rāua, nō te aha e mea ta’a ’ē rāua, ’ua pāhonohia mai ïa nō Te ’Ēkālesia a Iesu Mesia i te Feiā Mo’a i te mau Mahana Hopeʼa nei rāua.
’Aita i maoro roa, ’ua ha’amata Paul i te fārerei atu i te mau misiōnare ’e ’ua ani-manihini-hia ’oia ’ia haere mai i te fare purera’a. Te sābati i muri mai, ’a pou mai ai ’oia nā ni’a mai i te pere’o’o mata’eina’a, ’ite atu ra ’oia e piti tāne ’ahuhia i te ’ahu tāne ’uo’uo ’e te tā’amu arapo’a. ’Ua ui atu ’oia ia rāua e misiōnare ānei rāua nō te ’Ēkālesia. ’Ua pāhono mai rāua, ’ē, pe’e atu ra Paul ia rāua.
I roto i te purera’a, ’ua fa’atoro atu te ta’ata a’o i te feiā o te ’āmuira’a ma te ani ia rātou ’ia fa’a’ite te ’itera’a pāpū. ’Ia hope te ’itera’a pāpū tāta’itahi, e tūpa’i hō’ē ta’ata ha’uti i te fa’atete arohara’a ’e e pi’i hua te ’āmuira’a ē, « ’āmene ».
’A fa’atoro ai te ta’ata a’o i ni’a ia Paul, ’ua ti’a mai ’oia ’e ’ua parau atu : « ’Ua ’ite au e peropheta mau Iosepha Semita ’e e parau mau te Buka a Moromona ». ʼAita te fa’atete arohara’a i ’oto, ’aita ato’a e ’āmene. ’Ite a’e ra ’o Paul ē ’aita ’oia i te vahi tāno ’ua hape ’oia i te ’ēkālesia. ’Aita i maoro, ’ua ’itehia mai ia Paulo tōna ’ē’a i te vāhi mau ’e ’ua bāpetizohia ’oia.
Te mahana o tōna bāpetizora’a, ’ua parau mai te hō’ē melo tāna i ’ore i mātau ē : « ’Ua fa’aora ’oe iā’u ». Tau hebedoma nā mua atu, ’ua fa’aoti teie ta’ata e ’imi i te tahi atu ’ēkālesia ’e ’ua haere atu i te hō’ē purera’a e fa’a’oto ra i te fa’atete ’e te ’āmene. I te fa’aro’ora’a teie ta’ata ia Paul i te fa’a’itera’a i tōna ’itera’a pāpū nō Iosepha Semita ’e te Buka a Moromona, i reira tōna ’itera’a ē ’ua ’ite mau te Atua iāna, ’ua ’ite i tōna mau fifi, ’e e fa’anahora’a tāna nōna. Nō Paul ’e teie ta’ata, « ’e tae a’era i te hō’ē mahana » ïa, ’oia mau roa ïa !
’Ua ’ite ato’a tātou ē, e fa’anahora’a nō te ’oa’oa tā te Metua i te ao ra nō tātou tāta’itahi. Nō te mea ’ua tono mai te Atua i tāna Tāmaiti fānau tahi nō tātou, te mau temeio ’o tā tātou e hina’aro « e tae [mai ïa] i te hō’ē mahana [mau] » e tītauhia nō te fa’atupu i tāna fa’anahora’a.
Tē fa’a’ite pāpū nei au ē i teie matahiti, e nehenehe tātou e ha’api’i hau atu nō ni’a i te fa’anahora’a a te Atua nō tātou i roto i te Faufa’a Tahito. Tē ha’api’i nei teie buka mo’a i te ti’ara’a o te mau peropheta i te mau tau pāpū ’ore, ’e te rima o te Atua i roto i te hō’ē ao huehue ’e te pe’ape’a. Nō ni’a ato’a i te feiā fa’aro’o ha’eha’a e tīa’i nei ma te ha’apa’o i te taera’a mai o tō tātou Fa’aora, mai tā tātou e tīa’i nei ma te fa’aoroma’i ’e te fa’aineinera’a ia tātou nō tōna tae-piti-ra’a mai—tōna ho’ira’a mai hanahana tei tohu-maoro-hia.
Tae roa mai i teie mahana, e’ita paha tātou e ’ite, i tō tātou mata tahuti nei, i te ’ōpuara’a a te Atua nō te tā’āto’ara’a o te huru o tō tātou orara’a (hi’o Te Ha’api’ira’a Tumu ’e te mau Fafaura’a 58:3). Terā rā, e nehenehe tātou e ha’amana’o i te pāhonora’a a Nephi i mua i te tahi mea ’o tāna i ’ore i hāro’aro’a maita’i : ’aita ana’e ’oia i ta’a maita’i i te aura’a o te mau mea ato’a, ’ua ’ite ’oia ē ’ua here te Atua i tāna mau tāmari’i (hi’o 1 Nephi 11:17).
’O tō’u ïa ’itera’a pāpū i teie po’ipo’i sābati nehenehe mau. ’Ia pāpa’i ana’e te reira i roto i tō tātou ’ā’au ’e ’ia fa’ati’a i te reira ’ia fa’a’ī i tō tātou vairua i te hau, i te tīa’ira’a ’e i te ’oa’oa mure ’ore : I aroha mai te Atua ia tātou ē, ’ua tono mai ’oia i tāna Tāmaiti fānau tahi, ’eiaha nō te fa’autu’a ia tātou nō te fa’aora rā ia tātou. I te i’oa o Iesu Mesia, ’āmene.