Toro i te rima i tō te ao ato’a nei

Tē tāmau noa nei te mau melo nō te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo i tā rātou tāvinira’a ’ei peropheta, ’ei hi’o ’e ’ei heheu parau, ma te fa’a’ite pāpū nā te ao tā’āto’a nei nō ni’a i te fa’aho’i-fa’ahou-ra’a-hia mai te ’evanelia ’e te mau ha’amaita’ira’a nō te pe’era’a i te Fa’aora. Teie noa te tahi mau mea tā rātou i rave mai te ’āmuira’a rahi i ma’iri a’enei.

Te mau melo nō te Peresidenira’a Mātāmua

’Ei ha’apotora’a nō te tāvinira’a a te peresideni Russell M. Nelson mai te ’āmuira’a rahi i ma’iri a’enei, ’a hi’o i te ’api 135.

’A paraparau ai ’oia i roto i te hō’ē fare ha’api’ira’a tuatoru nō Roma i ’Ītāria, ’ua parau te peresideni Dallin H. Oaks, tauturu mātāmua i roto i te Peresidenira’a Mātāmua ē, e hōpoi mai te ti’amāra’a pae fa’aro’o i te mau maita’i e rave rahi i roto i te tōtaiete, ’e ’ua fa’aitoito ’oia i te mau ta’ata fa’aro’o ’ia « ’imi i te mau rāve’a nō te ha’api’i mai roto mai i te tahi ’e te tahi ’e nō te ha’apūai fa’ahou i te mau mana’o ’āmui e tāpe’a ’āmui nei ia tātou ».

Mau melo nō te pupu nō te Tino ’Ahuru Ma Piti ’āpōsetolo

’Ua tāvini te peresideni M. Russell Ballard, peresideni mono, ’e ’o Elder Jeffrey R. Holland ’e ’o Elder Quentin L. Cook i te fenua Peretāne, ma te fārerei i te mau misiōnare ’e te mau melo o te ’Ēkalesia. ’Ua tāvini nā ta’ata e toru ’ei misiōnare i te fenua Peretāne i tō rātou ’āpīra’a, ’e ’ua riro ’o Elder Holland ’e ’o Elder Cook ’ei hoa misiōnare.

’Ua paraparau ’o Elder David A. Bednar i roto i te hō’ē purera’a i Ioridana. I te Hau ari’i ’ārapia ’āmui, ’ua fārerei ’oia i te feiā fa’atere nō te titi nō Abu Dhabi ’e ’ua tere rātou i te vāhi fa’a’ite’itera’a, i reira ho’i te hō’ē hiero e vai ai ’ia tae i te hō’ē mahana. I Bahrain, ’ua fārerei ’oia i te mau melo nō te pāroita Manama ’e ’ua fa’atupu i te hō’ē purera’a nō te feiā ’āpī.

’Ua riro Elder D. Todd Christofferson ’ei ’āpōsetolo mātāmua tei tere atu i te Rēpupirita nō Gambia. ’Ua fārerei ’oia i te peresideni, te vahine mātāmua, ’e te mono peresideni nō te rēpūpirīta ’e ’ua paraparau nō ni’a i te hō’ē tauto’ora’a ’āmui i roto i te ’Ēkālesia ’e te fa’anahora’a a te vahine mātāmua nō te tauturu i te feiā nava’i ’ore. ’Ua tere ato’a Elder Christofferson i te Fenua ’Īvori, i Nītēria ’e i Ghana.

I roto i te mau rurura’a ’e te ha’api’ipi’ira’a i Toromepia ’e i te fenua Ētuatōria, ’ua ha’amana’o Elder Neil L. Andersen i te mau melo e rave rahi o te ’Ēkālesia tei pohe i roto i te ma’i pe’e COVID. ’Ua fārerei ’oia i te mau misiōnare, e 36 peresideni misiōni ’e tā rātou vahine fa’aipoipo, ’e te feiā fa’atere titi, e nā roto i te reo pāniora i te rahira’a taime. I roto i te hō’ē purera’a i Toromepia, ’ua paraparau ’oia nō ni’a i te ha’apūaira’a i te mau fa’aipoipora’a ’e te mau ’utuāfare.

I Panama, ’ua riro Elder Gary E. Stevenson ’ei ’āpōsetolo mātāmua tei haere i te motu nō Carti Tupile i roto i te ta’amotu nō San Blas, i roto i te mata’eina’a nō te mau ta’ata tumu Guna Yala, fātata e piti hora ’e te ’āfa nā te ’oire nō Panama atu.

’Ua paraparau Elder Gerrit W. Gong i te feiā ’āpī i te fenua Firipino nō ni’a i te ravera’a i te mau fa’aotira’a pa’ari ’e nō ni’a i te ravera’a i ni’a iho ia rātou i te i’oa o Iesu Mesia. ’Ua farerei ’oia i te mau misiōnare ’e, i roto i te hō’ē ha’apurorora’a ’ati a’e te fenua Firipino, ’ua paraparau ’oia i te feiā ’āpī pa’ari ’ōtahi.

I tōna fenua ’āi’a ’o Peretīria, ’ua a’o Elder Ulisses Soares i te feiā ’āpī pa’ari ’ia fa’atumu i tō rātou orara’a i ni’a i te Fa’aora. ’Ua parau ’oia i te mau misiōnare ’ia fa’a’ohipa i te fa’aro’o ia Iesu Mesia ’e ’ia vai-niu-hia i ni’a i te parau mau. Tau ’āva’e i muri mai, ’ua ho’i Elder Soares i Peretīria nō te paraparau i roto i te hō’ē ’ōrerora’a parau nō ni’a i te ti’amāra’a pae fa’aro’o. ’Ua fārerei ato’a ’oia i te mono peresideni nō te Rēpupirita Tominita ’e i te ti’a hau nō Kuba, i te reira fenua. Hō’ē mata’eina’a ’e maha ’āma’a tā te Ēkālesia i Kuba.

I roto i te mau rurura’a nā te ātea noa, ’ua paraparau Elder Dieter F. Uchtdorf i te feiā ’āpī, i te mau misiōnare ’e i te feiā fa’atere o te ’Ēkālesia i Asia ; Elder Quentin L. Cook i te feiā ’āpī pa’ari i Europa, i Europa Hiti’a o te rā, i ’Āfirita ’e te mau fenua piri Hiti’a o te rā ; Elder D. Todd Christofferson i te feiā ’āpī pa’ari e paraparau i te reo Pōtītī ; Elder Neil L. Andersen i te feiā ’āpī pa’ari e ora ra i Amerika Latino ’e i Pāniora ; Elder Ronald A. Rasband i te feia ’āpī pa’ari reo peretāne ; ’e Elder Dale G. Renlund i te feiā ’āpī pa’ari reo farāni.