I teienei te taime
I teienei te taime e nehenehe ai tātou e ha’api’i mai. I teienei te taime e nehenehe ai tātou e tātarahapa. I teienei te taime e nehenehe ai tātou e ha’amaita’i ia vetahi ’ē.
E au mau taea’e ’e mau tuahine here, ’ua riro teie ’āmuira’a e mea fa’ahiahia mau nō te mau tumu e rave rahi. ’Ua ha’amaita’ihia tātou nā roto i te mau pure, te mau parau poro’i ’e te mau hīmene. ’Ua fa’auruhia tātou e te mau tāvini o te Fatu.
’Ua fāri’i tātou i te arata’ira’a faufa’a mau nō a muri a’e. Tā’u pure ’ia paraparau ’āfaro ti’a mai te Vārua ia ’outou nō ni’a i te mau mea tā te Fatu e hina’aro ’ia rave ’outou.
E mea pāpū ’ore noa ā te a muri a’e. E taui te huru o te reva. E mea tāuiui noa te terera’a o te fa’arava’ira’a faufa’a. E nehenehe te ’ati nātura, te mau tama’i, te mau ’ati, ’e te mau ma’i e taui ’oi’oi noa i te orara’a. E’ita teie mau ’ohipa e roa’a i tā tātou araira’a. Tē vai nei rā te tahi mau ’ohipa e nehenehe tātou e arai, mai tō tātou fa’a’ohipara’a i tō tātou taime i te mahana tāta’itahi.
E mea au roa nā’u teie pehepehe tā Henry Van Dyke, tei piahia i ni’a i te hō’ē tāpura mahana, i te fare ha’api’ira’a tuarua nō Wells i New York. Tē nā ’ō ra ē :
Tē tāpo’i nei te ata o tō’u rima
Tei fa’ata’a ’ē i te tau i mua i tei ma’iri ra :
Hou te reira, ’a ta’oto nā mua i te hora
I roto i te pōuri, ’e nā ni’a a’e i tō’u pūai :
I muri mai i tōna rēni ho’i-’ore-ra’a mai,
’Ua mo’e te hora, e ’ere fa’ahou ïa nā ’oe :
Hō’ē ana’e hora toe i tō ’apu rima ra,—
’O TEIENEI ïa, ’e ’ua tāpo’ihia i te ata.1
’Oia mau, e ti’a ia tātou ’ia ha’api’i mai nō ni’a i te tau nō mūta’a iho ra, ’e ’oia mau, e ti’a ia tātou ’ia fa’aineine nō te tau a muri a’e. ’Ia rave rā i te reira i teienei e ti’a ai. I teienei te taime e nehenehe ai tātou e ha’api’i mai. I teienei te taime e nehenehe ai tātou e tātarahapa. I teienei te taime e nehenehe ai tātou e ha’amaita’i ia vetahi ’ē ’e « e ’āfa’i i nā rima i fa’atautauhia i raro ra i ni’a ».2 Mai tā Moromona i a’o atu i tāna tamaiti ia Moroni, « e rave itoito tāua i te ’ohipa […] e ’ohipa ho’i tā tāua e rave ’a parahi ai tāua i roto i te ti’ahapa araea nei, ’oia ïa, ’ia vī te ’enemi i te mau parauti’a ato’a ia tāua ’e ’ia roa’a te fa’aeara’a nō tō tāua vārua i te bāsileia o te Atua ra ».3
E’ita te ’enemi e ta’oto. E vai te pāto’ira’a i te parau mau i te mau taime ato’a. Tē fa’ahiti fa’ahou nei au i tā’u fa’aitoitora’a i teie po’ipo’i ’ia rave i te mau mea e ha’amara’a i tō ’outou haerera’a maita’i i mua i te pae vārua, terā mara’ara’a tā Elder Dieter F. Uchtdorf i parau, ’o te tauturu ia ’outou ’ia haere i mua i roto i te mau tāmatara’a ’e te mau rāve’a e fā mai.
E mara’a te haerera’a maita’i i mua i te pae vārua ’ia ha’amori ana’e tātou i roto i te hiero, ’e e tupu rahi tō tātou māramarama nō te ’ā’ano ’e te hōhonu nehenehe o te mau ha’amaita’ira’a tā tātou e fāri’i i reira. Tē tāparu nei au ia ’outou ’ia pāto’i i te mau rāve’a a tō te ao nei ma te fa’atumu i ni’a iho i te mau ha’amaita’ira’a mure ’ore o te hiero. E hōpoi mai tō ’outou taime i reira i te mau ha’amaita’ira’a nō te tau a muri noa atu.
’A tupu noa ai te ’Ēkālesia i te rahi, tē fa’aitoito nei tātou i te pe’e i teie tupura’a nā roto i te patura’a i te tahi atu mau hiero. E maha ’ahuru ma maha hiero e patuhia ra i teie taime. Vetahi e fa’a’āpīhia ra. Tē pure nei au nō te mau ta’ata ’aravihi e ha’a nei i ni’a i teie mau ’ōpuara’a nā te ao ato’a nei.
Ma te vārua māuruuru rahi ’e te pure, tē ’oa’oa nei au ’ia fa’aara atu i tā tātou ’ōpuara’a nō te patura’a i te hō’ē hiero i te mau vāhi i muri nei : Wellington, Niu Terani ; Brazzaville, Rēputirita nō Tōneto ; Barcelona, Pāniora ; Birmingham, Royaume-Uni ; Cusco, Peru ; Maceió, Peretīria ; Santos, Peretīria ; San Luis Potosí, Mēhiko ; Mexico City Benemérito, Mēhiko ; Tampa, Florida ; Knoxville, Tennessee ; Cleveland, Ohio ; Wichita, Kansas ; Austin, Texas ; Missoula, Montana ; Montpelier, Idaho ; ’e Modesto, Californie.
E ha’amaita’i teie nā 17 hiero i te orara’a e rave rahi i nā pae e piti o te pāruru. ’Ua here au ia ’outou, e tō’u mau taea’e ’e mau tuahine here. Te mea faufa’a roa atu, tē here nei te Fatu ia ’outou. ’O ’oia tō ’outou Fa’aora ’e tō ’outou Tāra’ehara. Nāna e fa’atere nei ’e e arata’i nei i tāna ’Ēkālesia. E mata na tātou ’ia riro ’ei mau ta’ata ti’amā nō te Fatu, tei parau ē, « ’ei ta’ata ’outou nō’u ’e ’ei Atua vau nō ’outou ».4
Nō te reira, tē pure nei au i te i’oa o Iesu Mesia, ’āmene.