Tē hōro’a nei te ’Ēkālesia i te tauturu, te tāmarūra’a
Nā te ao ato’a nei, tē rave itoito nei te feiā mo’a i te mau mahana hope’a nei i te mau tauto’ora’a tāmarūra’a nō te mau tītīhoria. I Europa, tē tauturu nei rātou i te hōro’ara’a i te mā’a, te ’ahu, te mau tauha’a nō te mau ’aiū, te fa’aeara’a, ’e tē vai atu ra, nō te tauturu i te mau ta’ata tei fa’aātea-’ē-hia i tō rātou nohora’a. ’Aita i maoro a’e nei ’ua hōro’a te ’Ēkālesia e 2 mirioni tara marite i te United Nations High Commissioner nō te mau tītīhoria ’e te tahi fa’ahou 2 mirioni tara marite i te World Food Programme. E tauturu te mau ō i te WFP ’ia hōro’a i te mā’a nō te rahira’a e 11 000 ta’ata nō te roara’a e maha ’āva’e.
« Tē vai nei tō tātou mau melo i roto i te mau fenua ato’a tei ro’ohia i te fifi », te parau ïa a te tuahine Sharon Eubank, tauturu mātāmua i roto i te peresidenira’a rahi nō te Sōtaiete Tauturu, ’e peresideni ho’i nō te pū tauturu rahi a te Feiā Mo’a i te mau Mahana Hope’a nei (LDS Charities). Nō te mea tē vai ra tā te ’Ēkālesia hō’ē ’āfata moni fa’aherehere, ’ua ti’a ïa iāna ’ia fa’ata’a i te mā’a ’e te pape hou i te ’ōmuara’a o te ’ati i ’Ūterenia, tāna ïa parau, ma te parau ē, ’ua fafau te ’Ēkālesia ’ia pāhono i te mau hina’aro nō te tau roa nō te mau fenua tei ro’ohia i te fifi.
I Paratue ’e i Pērū, ’ua tauturu te faufa’a moni a te ’Ēkālesia i te hōro’ara’a i te mau tauiha’a rapa’aura’a nō te mau fare ma’i, ’e i Pērū, ’ua hōro’a te ’Ēkālesia i te mau mātini ha’apūva’iva’i, te mōrī, te mau pa’epa’e, te mau pārahira’a, te mau tauha’a tāmā fare, ’e e hitu mātini rorouira i te mau taiete e tāvini ra i te mau tamari’i ’e i te feiā ruhiruhiā, i te hō’ē ’āpo’ora’a ha’apa’ora’a fa’aro’o rau, ’e i te hō’ē ha’apūra’a nō te mau tamāhine. I Toromepia, ’ua fa’a’ohipahia te moni ha’apaera’a mā’a nō te hōro’a 1 200 ’āfata mā’a ’e te mau tauha’a nō te feiā nava’i ’ore. I Pānāmā, ’ua hōro’a te ’Ēkālesia i te mau tauha’a nō te tauturu i te fa’aherehere i te mau pātia ārai nō te COVID-19.
’Ua haere te ta’ata i roto e 10 ’oire nō te Fenua Marite e hi’o i te hō’ē mātini hōro’a tao’a nō te ’ōpuara’a Tūrama i te ao nei, i te pu’e tau Noela nō te matahiti 2021, ’e ’ua noa’a mai i tā rātou mau ō e 5,8 mirioni tara marite. Nā roto i te mau mātini, e ho’o mai te ta’ata i te mau tao’a (mai te ’ahu, te mā’a, te pape mā, ’e te mau ’ānimara fa’a’amu) ’o tē ’ōperehia i muri iho nā roto e 44 pū tauturura’a i te Fenua Marite ’e nā reira ato’a e pae pū tauturura’a nā te ao ato’a nei.
’Ua tauturu ato’a te ’Ēkalesia i te feiā tei ro’ohia i te mata’i pū’āhiohio i te pae tō’o’a o te rā o te Fenua Marite, te hō’ē mata’i rorofa’i i te fenua Firipino, ’e te hō’ē mou’a auahi i pa’a’ina ’e te miti fa’a’ī i te fenua Tona.