« Elder Jonathan S. Schmitt », Liahona, Mē 2022.
Elder Jonathan S. Schmitt
Hitu ’Ahuru huimana fa’atere rahi
Tē parau nei Elder Jonathan S. Schmitt ē, ’o « te vatara’a » tāna e hōpoi mai i tōna pi’ira’a ’ei Hitu ’Ahuru huimana fa’atere rahi pāturu-’āpī-hia.
« Terā ana’e tā tātou », tāna ïa i parau. « Te aura’a nō te parau te ’ā’au tātarahapa ’e te vārua marū ’o te tu’ura’a ïa ’oe i tō ’oe ’ā’au i ni’a i te fata ’e ’ia vaiiho i te Fatu ’ia rave i tōna hina’aro mai reira atu. »
’Ua parau fa’ahou Elder Schmitt ē : « E nehenehe te Fatu e hōro’a mai ia tātou i te pūai, te mau tārēni, ’e te mau hōro’a e tītauhia ia tātou nō te rave i tāna ’ohipa. Mai te mea rā ē, ’aita tātou e ha’avata ia tātou nōna, tē mā’iti ra ïa tātou ia tātou iho ’e ’aita ïa tātou e hōro’a ra iāna i te rāve’a nō te ha’amaita’i ia tātou i roto i tā tātou mau tauto’ora’a nō te tāvini iāna. »
’Ua fānauhia ’o Jonathan Stephen Schmitt i te 16 nō ’Ēperēra 1973, i Mesa, i Arizona, i te Fenua Marite, nā Robert Edward ’e ’o Dianne Lyda Schmitt. ’Ua pa’ari ’oia i Yuma, i Arizona. I te 21 nō Tiurai 1995, ’ua fa’aipoipo ’oia ia Alexis Swain Udall i te hiero nō Mesa (Arizona, Marite). E metua rāua nō e pae tamari’i.
’Ua noa’a ia Elder Schmitt te parau ’aravihi tuatoru nō te fa’aterera’a fa’a’apu ’e te terera’a fa’arava’ira’a faufa’a i te matahiti 1997 ’e hō’ē parau tū’ite nō te ture i te matahiti 2000, i te fare ha’api’ira’a teitei University nō Arizona.
I muri a’e i tōna tāvinira’a ’ei pāpa’i parau nō te tiripuna teitei nō Arizona, ’ua rave ’oia i te ’ohipa ’ei pāruru nō te taiete ture nā te ara a Akin Gump Strauss Hauer & Feld LLP. I muri a’e, ’ua ’ohipa ’oia ei pāruru ture ’e ’ei mana’o ’ohipa mārōhia nō Baker Hughes Incorporated. Ta’a ’ē atu i te reira, ’ua ’ohipa ’oia ’ei mono peresideni tauturu i te fare ha’api’ira’a teitei ra Arizona State University.
Tē tāvini ra Elder Schmitt ’ei Hitu ’Ahuru ārea i roto i te ārea nō Amerika Apato’erau Apato’a tō’o’a o te rā ’a pi’ihia ai ’oia ’ei Hitu ’Ahuru huimana fa’atere rahi. Teie tōna mau pi’ira’a tahito, te tāvinira’a ’ei peresideni nō te misioni nō California San Diego mai te matahiti 2014 ē tae atu i te matahiti 2017, ’ei peresideni titi, ’ei ’episekōpo, ’ei tauturu i roto i te peresidenira’a titi, ’ei melo ’āpo’ora’a teitei, ’ei peresideni pupu peresibutero, ’ei pāpa’i parau fa’atere nō te pāroita, ’ei tauturu i roto i te peresidenira’a feiā ’āpī tamāroa nō te titi, ’ei tīa’i pupu tahu’a rahi, ’ei ’orometua ha’api’i nō te fa’aineinera’a misiōnare titi, ’e ’ei misiōnare rave tāmau i roto i te misiōni nō California Fresno.