Tracy Y. Browning

Tauturu piti i roto i te peresidenira’a rahi nō te Paraimere

15 matahiti tō Tracy Y. Browning ’a ’ite ai tōna metua vahine i te hō’ē parau fa’atīanira’a nō te Buka a Moromona i roto i te ’āfata teata i te maorora’a pō, ’e ’ua poro’i ’oia i te hō’ē buka tāmoni ’ore.

Tau taime poto noa, ’ua pātōtō mai te mau misiōnare feiā mo’a i te mau mahana hope’a nei i tōna ’ōpani, ’ua hōro’a mai ra i te Buka a Moromona, ’e ’ua ha’amata a’era i te ha’api’i iāna i te ’evanelia a Iesu Mesia.

I taua taime ra, tē ora ra Tracy i New Jersey, i Marite, ’e tōna metua tāne, terā rā, e mea pinepine ’oia i te haere e fārerei i tōna metua vahine i New York. I roto i tōna mau tere fārerei, ’ua hi’ohi’o noa ’o Tracy ma te ānoenoe i tōna metua vahine ’ia fa’aineine iāna nō te bāpetizora’a.

I haere ’o Tracy nā muri iho i tōna māmā rū’au i te hō’ē ’ēkalesia keretesiano, i reira ho’i tōna ha’api’ira’a mai i te mau ti’aturira’a tumu o te ha’api’ira’a keresetiano. ’Aita i maoro ’ua ha’amata Tracy i te haere i te mau purera’a a te Feiā Mo’a i te mau Mahana Hope’a nei ’e tōna metua vahine.

’Ua tupu te ’ohipa fa’ahiahia rahi i te taime ’a haere ai te metua vahine ’e te tamāhine i te ha’utira’a ’ā’amu i ni’a i te ’āivi nō Cumora. Nā roto i te ti’ara’a i roto i te uru rā’au mo’a, te haerera’a i te purera’a, ’e te fa’aro’ora’a i te mau parau poro’i o te ’evanelia i roto i te mau rāve’a ’āpī, ’ua ha’aputapū te reira iāna. ’Ua parau ’o Tracy i tōna metua vahine ē, ’ua ineine ’oia nō te ha’api’i hau atu ā nō ni’a i te ’Ēkālesia.

« ’Ua tu’u ’oi’oi a’era ’oia iā’u i mua i te mau misiōnare i muri noa a’e i te reira », te parau ïa a te tuahine Browning.

’Ua fānauhia ’o Tracy Yeulande Browning i New Rochelle, i New York, i te 9 nō ’Ātopa 1976, nā Clive Adams ’e ’o Sharon Cox. ’Ua pa’ari ’oia i Jamaica, i New Jersey, ’e i New York. ’Ua fa’aipoipo ’oia ia Brady Browning i roto i te hiero nō Roto Miti i te 2 nō Mē 1997. E piti tā rāua tamari’i.

’Ua haere te tuahine Browning i te ha’api’ira’a i te fare ha’api’ira’a teitei nō St. John. 15 matahiti tōna ’ohipara’a i roto i te mau taiete ti’a’aura’a moni, ’e i teienei, e ti’a fa’atere ’oia i roto i te tuha’a fa’atere nō te piha ’ohipa ha’apararera’a a te ’Ēkālesia. ’Ua hōro’a ato’a te tuahine Browning i tōna taime i roto i te fa’anahora’a National Multiple Sclerosis Society, ’e te Habitat for Humanity, ’e te United Way’s Day of Caring.

’Ua tāvini te tuahine Browning ’ei tauturu nō te peresidenira’a Sōtaiete Tauturu pāroita ’e te titi, ’ei ’orometua ha’api’i nō te Sōtaiete Tauturu ’e nō te Ha’api’ira’a Sābati, ’e i roto i te fa’anahora’a Feiā ’Āpī Tamāhine. (Tē tāvini ra ’oia i roto i te ’āpo’ora’a tauturu rahi a te Sōtaiete Tauturu i te taime ’a pi’ihia ai ’oia i roto i te peresidenira’a rahi nō te Paraimere.