Mau parau rahi nō te 192ra’a o te ’āmuira’a rahi nō ’Ēperēra

’Auē ïa ha’amaita’ira’a i roto i teie mau tau fifi, ’ia fāri’i i te arata’ira’a ’e te a’ora’a nō ’ō mai i te Fatu ra ia Iesu Mesia, ’o tē arata’i nei i tāna ’Ēkālesia tei fa’aho’i-fa’ahou-hia mai nā roto i te mau peropheta ’e te mau ’āpōsetolo ora.

I roto i te ’āmuira’a rahi, ’ua fa’atae mai te Fatu e rave rahi anira’a nā roto mai i tāna peropheta, te peresideni Russell M. Nelson. Teie te tahi ri’i noa :

1. Fa’a’ite i te mana ’e i te hau o Iesu Mesia

’Ua fa’aha’amana’o te peresideni Nelson i te mau melo i te mea ē, « tei ia tātou te hōpoi’a mo’a ’ia fa’a’ite i te mana ’e i te hau o Iesu Mesia i te mau ta’ata ato’a e fa’aro’o mai. » I roto i teie mau tau fifi, « e ti’a roa i te ta’ata tāta’itahi ’ia ’ite i hea e ’itehia ai ia rātou te hau ’o tei ‘[hau ’ē atu] i te ’ite ta’ata nei’ [Philipi 4:7]. »

Nō te tai’o i te pi’ira’a a te peresideni Nelson i te feiā ’āpī ti’a mā ’e ’o tē nehenehe, ’ia fa’aineine ’e ’ia tāvini i te hō’ē misiōni, hi’o « Porora’a i te ’evanelia o te hau » i te ’api 6.

2. Ha’amau i te haerera’a maita’i i mua i te pae vārua

’Ua ha’api’i te peresideni Nelson : « ’Aita ā tātou i hina’aro a’e nei i te haerera’a maita’i i mua i te pae vārua, hau atu i tō tātou hina’aro i te reira i teie mahana, nō te pāto’i i te tupura’a vitiviti rahi o te ’ino ’e te mau tāpa’o pōuri o te mau tau e pūai rahi nei. »

E hi’o mai i nā tītaura’a manihini e pae a te peresideni Nelson nō te ha’amara’a i tō tātou haerera’a i mua i te pae vārua i roto i « Te mana o te haerera’a i mua i te pae vārua » i te ’api 97.

3. Mā’iti e nāhea ’outou ’ia fa’a’ohipa i tō ’outou taime

’Ua fa’ata’a te peresideni Nelson ē, tē vai ra te mau ’ohipa e’ita e roa’a ia tātou ’ia ārai. « Tē vai nei rā te mau ’ohipa e nehenehe tātou e ārai, mai tā tātou fa’a’ohipara’a i tō tātou taime i te mahana tāta’itahi. »

Tai’o i te tītaura’a manihini a te peresideni Nelson ’ia fa’ata’a i te taime nō te rōtahi i ni’a i te mau ha’amaita’ira’a o te hiero i roto « I teienei te taime », i te ’api 126.

’A tai’o ai ’outou i teie mau tītaura’a manihini, tē ani nei mātou ia ’outou ’ia fa’a’ite i te ta’ata i te ’ohipa i tupu nō ’outou, i roto i te Liahona.

’A fa’a’ite mai i te mau ’ohipa i tupu nō ’outou !

« E ao tō ’outou, e te feiā i ’ite i teie nei mau parau, ’ia ha’apa’o ’outou i taua parau ra » (Ioane 13:17).

Tē hina’aro nei mātou e fa’aro’o i te huru ’outou i te ha’amaita’ira’ahia nō te fa’a’ohipara’a i te mea tā ’outou i ’apo mai i roto i te ’āmuira’a rahi.

E aha tā ’outou i ’apo mai ?
Tē nāhea ra ’outou i te fa’a’ohipa i te reira ?
’Ua nāhea te reira i te ha’amaita’ira’a ia ’outou ?

E nehenehe tō ’outou ’ā’amu e tauturu i te ta’ata ’ia ha’amata i te ’ite i te mau ha’amaita’ira’a nō te fa’a’ohipara’a i teie mau parau mau i roto i tō rātou iho orara’a. E hāpono mai i te rata uira nō te ’ohipa i tupu nō ’outou i te liahona@ChurchofJesusChrist.org.