Fa’afāriura’a i te hina’aro o te Atua

Nā Elder Quentin L. Cook

Nō te pupu Tino ’Ahuru ma Piti ’āpōsetolo

I roto i tō tātou iho fa’afāriura’a tē vai ra te hōpoi’a o te fa’a’itera’a i te ’evanelia a Iesu Mesia i tō te ao nei.

Tē māuruuru nei au nō te pi’ira’a tohu pūai a te peresideni Russell M. Nelson nō te tāvinira’a misiōnare, ’e nō te mau parau poro’i misiōnare fa’auru a te peresideni M. Russell Ballard ’e te taea’e Aidukaitis i teie mahana.

Nō te hō’ē tonora’a misiōnare i te fenua Peretāne i te hope’a o te matahiti i ma’iri a’e nei, ’ua ti’a iā’u ’ia feruri i ni’a i te mau ’ohipa pae vārua faufa’a tei riro ’ei niu nō tā’u fa’aotira’a ’ia tāvini ’ei misiōnare.¹ I te 15ra’a o tō’u matahiti, e 20 ïa matahiti tō tō’u tuana matahiapo here, ’o Joe—e matahiti maita’i ïa nō te haere i te misiōni. I te fenua Marite, nō te pe’ape’a i te fenua Korea, e mea iti roa tei fa’ati’ahia ’ia tāvini. Hō’ē ana’e ’o te nehenehe e pi’ihia i roto i te pāroita tāta’itahi i te matahiti hō’ē.² ’Ua tupu te māere i te taime ’a ani ai te ’episekōpo ia Joe ’ia hi’opo’a i taua ’ohipa ra ’e tō māua metua tāne. Tē fa’aineine ra Joe nō te tāpa’o iāna nō te ha’api’ira’a taote. E ’ere tō māua metua tāne i te mea itoito roa i roto i te ’Ēkālesia, ’ua fa’aineine ’oia i te moni nō te tauturu ia Joe ’e ’aita ’oia i pāturu maita’i i te mana’o ’ia haere Joe i te misiōni. ’Ua parau pāpā ē, e rahi a’e te maita’i tā Joe e rave ma te haerera’a i te ha’api’ira’a taote. ’Ua riro te reira ’ei fifi rahi roa i roto i tō mātou ’utuāfare.

I roto i te hō’ē ’āparaura’a maita’i roa ’e tō’u taea’e matahiapo pa’ari ’e te hi’ora’a maita’i, ’ua fa’aoti a’era mātou ē, tē vai ra e toru uira’a nō ni’a i tāna fa’aotira’a ’ia haere i te misiōni ’e ’ia fa’atāere i tāna ha’api’ira’a : (1) E mea hanahana ānei Iesu Mesia ? (2) E parau ānei nā te Atua te Buka a Moromona ? ’e (3) E peropheta ānei Iosepha Semita nō te fa’aho’i-fa’ahou-ra’a mai ? Mai te mea e ’ē te pāhonora’a i teie mau uira’a, e mea māramarama maita’i ïa e rahi a’e te ’ohipa maita’i tā Joe e rave i roto i te hōpoira’a i te ’evanelia a Iesu Mesia i tō te ao nei, i te riro-’oi’oi-ra’a ’ei taote.³

I taua pō ra, ’ua pure au ma te ’ū’ana ’e te mana’o pāpū. ’Ua ha’apāpū maita’i mai te Vārua ma te pūai rahi iā’u ē, te pāhonora’a i teie nā uira’a e toru e ’ē. ’Ua riro mau teie ’ei ’ohipa faufa’a rahi nō’u. ’Ite a’era vau ē, te mau fa’aotira’a ato’a tā’u e rave nō te toe’a o tō’u orara’a, e fa’auruhia ïa e teie mau parau mau. ’Ua ’ite ato’a vau ē, e tāvini au i te hō’ē misiōni mai te mea e anihia mai au. I te roara’a o te hō’ē orara’a tāvinira’a ’e te mau ’ohipa pae vārua i tupu, ’ua tae mai te hāro’aro’ara’a iā’u ē, te fa’afāriura’a mau ’o te hope’ara’a ïa o te fāri’ira’a ma te ’ā’au tae i te hina’aro o te Atua, ’e e arata’ihia tātou e te Vārua Maita’i i roto i tā tātou mau ’ohipa.

’Ua roa’a a’ena tō’u ’itera’a pāpū nō te atuara’a o Iesu Mesia ’ei Fa’aora nō te ao nei. I taua pō ra, ’ua fāri’i au i te hō’ē ’itera’a pāpū pae vārua o te Buka a Moromona⁴ ’e te peropheta Iosepha Semita.

’Ua riro Iosepha Semita ’ei mauiha’a i roto i te rima o te Fatu

E ha’apūaihia tō ’outou ’itera’a pāpū ’ia ’ite ana’e ’outou i roto i tō ’outou māfatu nā roto i tā ’outou mau pure ē, ’ua riro te peropheta Iosepha Semita ’ei mauiha’a i roto i te rima o te Fatu. I roto i nā va’u matahiti i ma’iri a’e nei, hō’ē o tā’u fa’auera’a ’ohipa i roto i te Tino ’Ahuru ma Piti ’āpōsetolo ’o te hi’opo’ara’a ïa ’e te tai’ora’a i te mau pu’e parau fa’ahiahia ato’a a Iosepha Semita, ’e te mau parau ’e te mā’imira’a tei arata’i atu i te nene’ira’a o te mau buka Te feiā mo’a.⁵ ’Ua pūai rahi roa ’e ’ua maita’i roa atu tō’u ’itera’a pāpū ’e tō’u fa’ahiahia nō te peropheta Iosepha Semita, i muri a’e i tō’u tai’ora’a i te mau ha’apāpūra’a fa’auru o tōna orara’a ’e tāna tāvinira’a ’ei peropheta i fa’ata’a-a’ena-hia.

’Ua riro te ’īritira’a a Iosepha i te Buka a Moromona nā roto i te hōro’a ’e te mana o te Atua ’ei mea faufa’a rahi nō te fa’aho’i-fa’ahou-ra’a mai.⁶ E mea au maita’i, e mea pāpa’i-nehenehe-hia te Buka a Moromona, ’e tei roto te mau pāhonora’a nō te mau uira’a rarahi o te orara’a. ’O te tahi fa’ahou ïa ’ite nō Iesu Mesia. Tē fa’a’ite pāpū nei au ē, e ta’ata parauti’a Iosepha Semita, tei ’ī i te fa’aro’o, ’e e mauiha’a ’oia i roto i te rima o te Fatu nō te hōpoi mai i te Buka a Moromona.

E hōro’a mai te mau heheura’a ’e te mau tupura’a ’ohipa i pāpa’ihia i roto i Te Ha’api’ira’a Tumu ’e te mau Fafaura’a, i te mau tāviri, te mau ’ōro’a ’e te mau fafaura’a e tītauhia nō te fa’aorara’a ’e nō te fa’ateiteira’a. ’Aita te reira e fa’a’ite noa mai i te mau mea faufa’a e tītauhia nō te ha’amau i te ’Ēkālesia, tē hōro’a ato’a mai ra rā i te hō’ē ha’api’ira’a tumu hōhonu ’o te tauturu ia tātou ’ia māramarama i te fā o te orara’a, ’e e hōro’a mai ia tātou i te hō’ē hi’ora’a ātea mure ’ore.

Hō’ē ’o te mau hi’ora’a rau o te ti’ara’a peropheta o Iosepha Semita e ’itehia ïa i roto i te tuha’a 76 o Te Ha’api’ira’a Tumu ’e te mau Fafaura’a. E ’ā’amu māramarama maita’i nō te ’ōrama o te mau ao, tae noa atu i te mau bāsileia hanahana, ’o tā te peropheta Iosepha ’e Sidney Rigdon i fāri’i i te 16 nō Fepuare 1832. I taua tau ra, tē ha’api’i ra te rahira’a o te ’Ēkālesia ē, e’ita te tāra’ehara a te Fa’aora e hōro’a i te fa’ateiteira’a i te rahira’a o te ta’ata. ’Ua ti’aturihia ē, ’o te tahi noa pae ’o tē fa’aorahia, ’e te rahira’a o te ta’ata, ’ua fa’ata’ahia ïa nō te haere i hade ’e te ’anatemara’a, tae noa atu i te mau ha’amāuiuira’a hope ’ore « ma te pūai ri’ari’a ’e te fāito ’ore ».⁷

Tē hōro’a mai nei te heheura’a i roto i te tuha’a 76 i te hō’ē ’ōrama hanahana o te mau fāito o te hanahana, i reira ho’i te rahira’a o te mau tamari’i a te Metua i te ao ra tei vai itoito noa i roto i tō rātou huru hou te tāhuti nei, e ha’amaita’ihia ai i muri a’e i te ha’avāra’a hope’a.⁸ ’Ua riro te ’ōrama o nā fāito hanahana e toru, tera te mea ha’eha’a roa « tei hau a’e i te mau ’ite ato’a ra »,⁹ e pāto’ira’a ïa i te ha’api’ira’a tumu pūai i taua taime ra, e mea hape rā ’ia au i te parau ē, ’ua fa’ata’ahia te rahira’a o te ta’ata nō te haere i hade ’e i te ’anatemara’a.

’Ia ’ite ana’e ’outou ē, e 26 noa matahiti tō Iosepha Semita, e mea iti roa tōna ’ite i te pae ha’api’ira’a ’e e mea iti ’aore rā ’aita roa atu ’oia i ’ite i te mau reo tumu i ’īritihia ai te Bibilia, ’ua riro mau ’oia ’ei mauiha’a i roto i te rima o te Fatu. I roto i te ’īrava 17 o te tuha’a 76, ’ua fa’auruhia ’oia ’ia fa’a’ohipa i te ta’o ra parau ti’a ’ore ’eiaha rā ’anatemara’a mai tei fa’a’ohipahia i roto i te ’evanelia a Ioane.¹⁰

E mea ’ana’anatae mau ’ia ’ite ē, e 45 matahiti i muri mai, hō’ē ti’a fa’atere nō te ’Ēkālesia nō Peretāne, e ta’ata māramarama,¹¹ ’o Frederic W. Farrar, tei pāpa’i Te orara’a o te Mesia, ¹² ’ua ha’apāpū mai ’oia ē, te tātarara’a o te parau ’anatemara’a i roto i te pāpa’ira’a a te ari’i Iakobo o te Bibilia, ’o te hope’ara’a ïa nō te mau hape o te ’īritira’a nō te reo hebera ’e te reo hereni i roto i te reo peretāne.¹³

I tō tātou nei ’anotau, e rave rahi tei fāri’i i terā mana’o ē, ’aita tō te reira e hope’ara’a nō te hara. Tē pāturu nei rātou i te fāri’ira’a hope ’ore i te hara ma te tātarahapa ’ore. ’Aita tā tātou ha’api’ira’a tumu heheuhia mai e pāto’i noa nei i te mana’o ē, e fa’autu’ahia te rahira’a ta’ata i hade ’e i te ’anatemara’a, tē ha’api’i ato’a nei rā ē, e tītauhia i te hō’ē ta’ata ’ia tātarahapa hou ’a tomo ai i roto i te tāra’ehara o te Fa’aora ’e ’ia fāri’i i te bāsileia tīrētiēra.¹⁴ Tē fa’a’ite pāpū nei au ē, ’ua riro mau Iosepha Semita ’ei mauiha’a i roto i te rima o te Fatu nō te hōpoi mai i te fa’aho’i-fa’ahou-ra’a mai o tāna ’evanelia !

Maoti te fa’aho’i-fa’ahou-ra’a mai o te ’evanelia a Iesu Mesia, tē māramarama nei tātou i te faufa’a o te tātarahapa ’e « te mau ’ohipa parauti’a ».¹⁵ Tē māramarama nei tātou i te faufa’a rahi o te tāra’ehara a te Fa’aora ’e tāna mau ’ōro’a ’e mau fafaura’a fa’aora, ’e terā e ravehia nei i roto i te hiero.

’Ua riro « te mau ’ohipa parauti’a » ’ei mau hotu nō te fa’afāriura’a. E fa’atupuhia te fa’afāriura’a mau nā roto i te fāri’ira’a ta’a maita’i ’e te fafaura’a ’ia pe’e i te hina’aro o te Atua.¹⁶ Te mau hope’ara’a ’e te mau ha’amaita’ira’a i muri mai i te fa’afāriura’a, ’o te hau mau ïa ’e te vai māite ’e te fāri’ira’a i te ’oa’oa hope’a¹⁷—noa atu te mau vero o te orara’a.

E fa’ariro te fa’afāriura’a i te Fa’aora i te ta’ata tino ’ei ta’ata ha’amo’ahia, fānau-fa’ahou-hia, ’e te vi’ivi’i ’ore—hō’ē ta’ata ’āpī i roto ia Iesu Mesia.¹⁸

E rave rahi tē pārahi nei i te ātea ’ē i te parau mau nō te mea ’aita rātou i ’ite i hea e ’itehia ai te reira.

E aha te mau tītaura’a nō roto mai i te fa’afāriura’a ? I roto i te fare tāpe’ara’a nō Liberty, ’ua ’ite te peropheta Iosepha ē, e rave rahi « tei pārahi i te ātea ’ē i te parau mau nō te mea ’aita rātou i ’ite ē, i hea e ’itehia ai te reira ».¹⁹

I roto i te tuha’a ’ōmuara’a a te Fatu o te Ha’api’ira’a Tumu ’e te mau Fafaura’a, ’ua vauvauhia mai te hō’ē fa’ahitira’a parau rahi nō te ’ōpuara’a a te Fatu nō tātou. ’Ua parau ’oia, « nō reira, ’o vau ’o te Fatu, nō tō’u ’itera’a i te ’ati rahi ’o tē tae mai i ni’a i te mau ta’ata o te ao nei, ’ua ti’aoro atu vau i tā’u tāvini ia Iosepha Semita, tamaiti, ’e ’ua parau atu ra iāna mai te ra’i mai, ’e ’ua hōro’a atu i te mau fa’auera’a iāna ra ». ’Ua parau fa’ahou mai ’oia i muri a’e « ’ia porohia atu te ’īra’a o tā’u ’evanelia e te feiā paruparu ’e te mea ’ite ’ore ho’i i te mau hope’a o te ao nei ».²⁰ Tei roto te mau misiōnare rave tāmau. Tei roto tātou tāta’itahi. E ti’a ’ia riro te reira mai te hō’ē mōrī laser nō te mau ta’ata ato’a tei ha’amaita’ihia ’e te fa’afāriura’a i te hina’aro o te Atua. Tē ani manihini mai nei te Fa’aora ia tātou ’ia riro ’ei reo nōna ’e ’ei rima nōna.²¹ ’Ia riro te here o te Fa’aora ’ei mōrī arata’i nō tātou. ’Ua ha’api’i te Fa’aora i tāna mau pipi, « e haere ’outou e fa’ariro i te mau fenua ato’a ’ei pipi ».²² ’E ’ua parau ’oia ia Iosepha Semita, « ’a poro haere i tā’u ’evanelia nei i te mau ta’ata ato’a o tei ’ore i fāri’i i te reira ».²³

Hō’ē hepetoma i muri a’e i te ha’amo’ara’ahia te hiero nō Keterani i te 3 nō ’Ēperēra 1836, e sābati Pāsa ’e e Pāsa ato’a, ’ua fā mai te Fatu i roto i te hō’ē ’ōrama nehenehe ia Iosepha ’e ia Oliver Cowdery. ’Ua fāri’i te Fatu i te hiero ’e ’ua parau mai ra, « ’o te ha’amatara’a teie o te ha’amaita’ira’a ’o tē nini’ihia atu i ni’a i te mau upo’o o tā’u mau ta’ata ».²⁴

I te hopera’a teie ’ōrama, ’ua fā mai ’o Mose « ’e ’ua hōro’a mai ra … i te mau tāviri nō te ha’aputuputura’a o ’Īsera’ela mai te nā tuha’a e maha o te ao nei ’e nō tē arata’ira’a mai o te nā ’ōpū hō’ē ’ahuru ra mai te fenua i te apato’erau mai ra ».²⁵

Te peresideni Russell M. Nelson, tō tātou peropheta here i teie mahana, tē mau nei i teie ā mau tāviri, tei ha’api’i i teie po’ipo’i : « ’Outou, te feiā ’āpī tamāroa, ’ua fa’ahereherehia ’outou nō teie taime, i reira te ha’aputuputura’a o ’Īsera’ela tei fafauhia e tupu ai. ’A tāvini ai ’outou i tā ’outou misiōni, tē rave nei ’outou i te hō’ē ’ohipa faufa’a rahi i roto i teie ’ohipa, ’aita ā i ’itehia a’e nei ! »²⁶

Nō te fa’ariro i te tītaura’a a te Fa’aora ’ia poro i tāna ’evanelia ’ei tuha’a ’o vai mau tātou, e ti’a ia tātou ’ia fa’afāriuhia i te hina’aro o te Atua ; e ti’a ia tātou ’ia here i tō tātou mau ta’ata tupu, ’ia fa’a’ite i te ’evanelia a Iesu Mesia i fa’aho’i-fa’ahou-hia mai, ’e ’ia ani i te mau ta’ata ato’a ’ia haere mai ’e e hi’o. ’Ei melo nō te ’Ēkālesia, tē poihere nei tātou i te pāhonora’a a te peropheta Iosepha ia John Wentworth, ta’ata pāpa’i parau fa’atere nō te Chicago Democrat, i te matahiti 1842. Tē titorotoro ra ’oia i te mau ha’amāramaramara’a nō ni’a i te ’Ēkālesia. ’Ua ’ōpani Iosepha i tāna pāhonora’a ma te fa’a’ohipa i « te fa’anahonahora’a o te parau mau » ’ei ’ōmuara’a nō te hīro’a fa’aro’o ’ahuru ma toru. Tē fa’a’ite ra te fa’anahonahora’a, ma te māramarama maita’i, i te mau mea e ti’a ’ia ravehia :

« ’Aore roa e rima vi’ivi’i e nehenehe e tāpe’a i te ’ohipa ’ia haere i mua ; e tupu paha i te rahi te hāmani-’ino-ra’a, e ’imi paha te feiā ’ī’ino i te mau rāve’a pi’o, e ’āmuitahi te mau nu’u tama’i, e parauhia te parau fa’a’ino, ’āre’a te parau mau a te Atua ra, e haere tāmau ïa i mua ma te itoito, te hanahana ’e te ti’amā e tae roa atu i roto i te mau fenua ato’a, e fārerei i te mau vāhi ato’a, e tāmā i te mau fenua ato’a, e ’atutu i roto i te mau tari’a ato’ae tae roa atu i te taime e oti hope roa ai te mau ’ōpuara’a a te Atua, i reira ho’i ’o Iehova rahi e parau ai ē, ’ua oti te ’ohipa ».²⁷

Te pi’ira’a terā o te pū nō te mau u’i o te feiā mo’a i te mau mahana hope’a nei, te mau misiōnare iho ā rā. I roto i te vārua o te « fa’anahonahora’a o te parau mau », tē ’oa’oa nei mātou i te mea ē, i roto i te hō’ē ma’i pe’e nā te ao ato’a nei, ’ua fa’a’ite te mau misiōnare ha’apa’o maita’i i te ’evanelia. E te mau misiōnare, ’ua here mātou ia ’outou ! Tē ani mai nei te Fatu ia tātou tāta’itahi ’ia fa’a’ite i tāna ’evanelia nā roto i te parau ’e te ’ohipa. I roto i tō tātou iho fa’afāriura’a tē vai ra te hōpoi’a nō te fa’a’ite i te ’evanelia a Iesu Mesia i tō te ao nei.

I roto i te mau ha’amaita’ira’a nō te fa’a’itera’a i te ’evanelia tē vai ra te fa’arahira’a i tō tātou fa’afāriura’a i te hina’aro o te Atua ’e te vaiihora’a i te Atua ’ia upo’oti’a i roto i tō tātou orara’a.²⁸ E ha’amaita’i tātou ia vetahi ’ē ’ia fāri’i i te hō’ē « tauira’a rahi o te ’ā’au ».²⁹ Tē vai mau ra te ’oa’oa mure ’ore i roto i te tauturura’a ’ia arata’i mai i te mau vairua i roto i te Mesia.³⁰ Te ha’ara’a nō te fa’afāriu mai i te hō’ē ta’ata ’e ’ia vetahi ’ē ’o teohipa hanahana ïa.³¹ Tē fa’a’ite pāpū nei au i te reira i te i’oa o Iesu Mesia, ’āmene.