Elder James W. McConkie III

Hitu ’Ahuru huimana fa’atere rahi

I te tāpaera’a Elder James W. McConkie III i Tchécoslovaquie i te matahiti 1990 ’ei taure’are’a misiōnare, ’ua matara mai te fenua i rāpae i te fa’aterera’a kōmūnī ’e ’ua ineine nō te ha’amata i te tuatāpapa fa’ahou i te parau nō te ha’apa’ora’a fa’aro’o ’e te fa’aro’o. « Tei te vāhi ti’a vau i te taime ti’a i rotopū i te mau ta’ata ti’a », tāna ïa parau.

I muri a’e, ’ua ho’i atu ’oia i taua vahi ra ’ei taure’are’a ti’ara’a tōro’a, ’ua ha’amau nā muri i te tahi ta’ata i te hō’ē taiete ’imi ’ore i te ’āpī ’e i muri iho ’ua tāvini ’ei peresideni nō te misiōni Tēhetia/Torovātia.

I te 12ra’a o tōna matahiti, ’ua ani tōna nā metua iāna ’ia tuatāpapa i te mau buka a te feiā fa’atere o te ’Ēkālesia ’e ’ia ’āparau i muri iho i te mea tāna i tai’o. « ’Ua ti’aturi tō’u pāpā ’e tō’u māmā i te faufa’a rahi nō te ha’api’ira’a i tā rāua mau tamari’i i te ’evanelia, mai tei fa’a’itehia i roto i Te Ha’api’ira’a Tumu ’e te mau Fafaura’a », te parau ïa a Elder McConkie. « Tē ani nei te tuha’a 68 i te mau metua ’ia ha’api’i i tā rātou mau tamari’i i ‘te ha’api’ira’a tumu nō te tātarahapara’a’ ’e ‘te fa’aro’o i te Mesia’ (’īrava 25). ’Ua ha’apa’o roa tō’u nā metua i te reira parau. »

Tōna ’ite nō te mana o te ’evanelia nō te taui i te ta’ata, ’ua tomo roa te reira i roto i tōna vārua. ’Ua ’ite ato’a ’oia i te reira ’ohipa i te tupura’a i ni’a i te feiā mo’a i te Rēpūpirīta Tēhetia ’e i Torovātia.

’Ua fānauhia ’o Elder James Wilson McConkie III i Roto Miti, i Utaha, i Marite, i te 27 nō ’Ātete 1971, nā James Wilson McConkie II ’e Judith Miller McConkie. ’Ua fa’aoipoipo ’oia ia Laurel Springer i te ’āva’e Tiurai i te matahiti 1995, i roto i te hiero nō Roto Miti. E maha tamari’i tā rāua.

’Ua roa’a ia Elder McConkie te parau ’aravihi tuatoru i roto i te ’ā’ai i te matahiti 1995 i te fare ha’api’ira’a tuatoru ra University of Utah ’e te hō’ē parau tū’ite i te pae o te ture i te matahiti 1999, i te National Law Center i George Washington University. ’Aita i maoro a’enei, ’ua rave ’oia i te ’ohipa ’ei pāruru i Workman Nydegger ’e ’ei upo’o fa’atere nō te Wallace Toronto Foundation, tāna i tauturu ’ia ha’amau.

Tē tāvini ra Elder McConkie ’ei peresideni titi i te taime ’a pi’ihia ai ’oia. ’Ua tāvini ato’a ’oia ’ei ’episekōpo, ’ei melo āpo’ora’a teitei, ’ei tauturu i roto i te ’episekōpora’a, ’ei fa’atere ’ohipa misiōnare pāroita, ’ei tauturu i roto i te peresidenira’a pupu peresibutero, ’ei ’orometua fa’aineinera’a misiōnare, ’ei ’orometua ha’api’i nō te piha feiā pa’ari, ’e ’ei peresideni feiā āpī tamāroa nō te pāroita.