« Elder Mark D. Eddy », Liahona, Mē 2022.
Elder Mark D. Eddy
Hitu ’Ahuru huimana fa’atere rahi
I te pu’e tau māhanahana nā mua a’e i te matahiti hope’a o Elder Mark D. Eddy i te ha’api’ira’a tuarua, ’ua ani te hō’ē ’orometua ha’api’i nō te séminaire iāna ’e i te tahi atu mau melo o tā rātou ’āpo’ora’a pīahi nō te séminaire ’ia tai’o i te Buka a Moromona. E rave rahi taime tōna tai’ora’a i te reira ’e tōna ’utuāfare, teie rā tōna taime mātāmua ’oia ana’e.
’Ua fa’aoti ’oia e pure nā mua a’e ’e i muri a’e i tōna tai’ora’a i te mahana tāta’itahi. ’Ua ti’aturi ’oia ē, e tae mai te hō’ē pāhonora’a pāpū nō ni’a i te parau mau o te buka i roto hō’ē ’aore rā e piti hepetoma. I muri a’e i te tai’ora’a hau atu i te piti ’āva’e, ’aita ā ’oia i fāri’i i tāna ha’apāpūra’a i ’ōpuahia.
Tau hora nā mua a’e i te purera’a « fāri’i-poupou-ra’a » nō te séminaire i reira ’oia i te anira’ahia ’ia fa’a’ite i tōna ’itera’a pāpū, ’ua tae ’oi’oi mai ’o Elder Eddy nō te tauturu i te fa’anahora’a. I muri iho, ’ua ’itehia iāna te hō’ē vāhi hau nō te tai’o i te Buka a Moromona ’e nō te pure.
« I reira tō’u fāri’ira’a i taua mana’o māramarama ra ’e te pāpū maita’i ē, e parau mau te reira », tāna ïa parau. « ’Ua tae mai te reira i te taime tano nō’u nō te fa’a’ite i tō’u ’itera’a pāpū i taua pō ra. ’Ua tītau tāua mana’o ra i te hō’ē ’ohipa rahi nō te fāri’i i te reira ’e ’ua vai noa i te hō’ē maorora’a tano ’ia ’ore ’ia mo’ehia iā’u. »
’Ua fānauhia Elder Mark David Eddy i Long Beach, i California, i Marite, i te 30 nō Māti 1973, nā Richard Cleighton Eddy ’e ’o Mary Louise Savage Eddy. ’Ua pa’ari ’oia i Orem, i Utaha, ’e ’ua fa’aipoipo ia Annette « Annie » Allen i roto i te hiero nō Provo (Utah, Marite) i te ava’e ’Ātete 1994. E ono tamari’i tā rāua.
’Ua noa’a ia Elder Eddy te parau ’aravihi tuatoru nō te tūreiara’a i te fare ha’api’ira’a tuatoru nō Brigham Young University i te matahiti 1996 ’e te parau tū’ite nō te ture i BYU i te matahiti 2001. Mai te reira taime ’ua rave ’oia i te ’ohipa pāruru ’e te ’ohipa fa’atere ’ohipa putu faufa’a.
’Ua tāvini Elder Eddy ’ei Hitu ’Ahuru ārea, ’ei peresideni nō te misiōni nō Uruguay Montevideo, ’ei tauturu i roto i te hō’ē peresidenira’a titi, ’ei ’episekōpo, ’ei melo āpo’ora’a teitei, ’ei tauturu i roto i te hō’ē ’episekōpora’a, ’ei peresideni Feiā ’Āpī Tamāroa pāroita ’e ’ei misiōnare rave tāmau i roto i te misiōni nō te Rēpupirita Tominita Santo Domingo Hiti’a o te rā.