Elder Isaac K. Morrison

Hitu ’Ahuru huimana fa’atere rahi

Tē parau ra ’o Elder Isaac K. Morrison ē, e mea iti roa tō rāua ’o tāna vahine taime ta’otora’a mai te taime ’a pi’i ai te peresideni Russell M. Nelson ia Elder Morrison ’ia tāvini ’ei Hitu ’Ahuru huimana fa’atere rahi.

« ’Ua ’ite māua ē, e riro teie ’ei tere nō maua », tāna ïa parau. « Tē ti’aturi nei māua i ni’a i te Fatu nō te fa’a’ite ia māua i te ’ohipa tā māua e rave. »

’Ua pi’ihia ’o Elder Morrison ’ei peresideni titi i te matahiti 2014, ’ei Hitu ’Ahuru ārea i te matahiti 2018, ’e ’ei peresideni nō te misioni nō Ghana Cape Coast i te matahiti 2020.

« ’Ua tae mai te mau fa’auera’a ’ohipa i te mau taime ’aita roa vau i feruri noa a’e », tē nā reira ra ’oia. « Tē ti’aturi nei rā vau i ni’a i te Fatu ’eiaha i ni’a i tō’u iho nei ’aravihi. »

E parau tū’ite master nō te ihi tā Elder Morrison i roto i te rāve’a ti’a’aura’a ’e te fa’aterera’a ’aravihi tei roa’a mai iāna i te fare ha’api’ira’a teitei nō Kwame Nkrumah University of Science and Technology i Ghana. ’Ua rave ’oia i te ’ohipa nā te ’Ēkalesia i roto i te mau ti’ara’a rau mai te matahiti 2004 mai ā, ’e ’aita i maoro a’e nei, ’ei arata’i ’e ’ei ti’a tauturu i te feiā fa’atere ’e te mau melo nō ’Āfirita Tō’o’a o te rā.

’Ua fānauhia ’o Isaac Kofi Morrison i te 25 nō Novema 1977, i Takoradi, i Ghana, nā Joseph Kojo Morrison ’e ’o Mary Efua Obua Sarfo.

I tōna tamari’ira’a, ’ua haere Elder Morrison ’e tōna ’utuāfare i te mau purera’a a te tahi atu ha’apa’ora’a. I te haerera’a ’oia ’e te ’utuāfare o tōna metua tāne fēti’i i te ha’api’ira’a tuarua, ’ua haere ’oia i te mau rurura’a a te feiā mo’a i te mau mahana hope’a nei, ’e i muri iho i te mau purera’a i tāna ’ēkālesia. ’Ua ani te hō’ē ’orometua séminaire po’ipo’i iāna ’ia haere i te séminaire, i reira ’oia i te fārereira’a ia Hannah Nyarko.

« E mea māramarama roa ’oia ’e e hōro’a ’oia i te mau mana’o maita’i roa », tāna ïa parau. « ’Ua hōro’a mau mai te reira iā’u i te hina’aro e tuatāpapa rahi atu ā i te mau mea. » I muri a’e i tōna tai’ora’a i te Buka a Moromona i taua matahiti ra, ’ua parau ’oia : « ’Ua ineine au nō te bāpetizora’a. »

I te 18 nō Tītema 2004, ’ua fa’aipoipohia rāua ’o Hannah i Takoradi ’e ’ua tā’atihia e toru mahana i muri iho i roto i te hiero nō Accra (Kana). E toru tā rāua tamāroa.

Ta’a ē atu i teie mau pi’ira’a tōna, ’ua tāvini ’o Elder Morrison ’ei tauturu i roto i te peresidenira’a titi, ’ei ’episekōpo, ’ei tauturu i roto i te ’episekōpora’a, ’ei peresideni pupu peresibutero, ’ei ’orometua ha’api’i nō te piha feiā pa’ari, ’ei ’orometua ha’api’i séminaire ’e ’ei misiōnare rave tāmau i Nītēria.