Kristin M. Yee

Tauturu piti i roto i te peresidenira’a rahi o te Sōtaiete Tauturu

I roto i te hō’ē ao tē rahi noa atu ra te tāpa’o nō te ’āmahamahara’a ’e te mo’emo’e, ’ua ’ite te tuahine Kristin M. Yee i te mau rā’au fa’aora nō taua mau ma’i sōtiare ra nā roto i te ’evanelia a Iesu Mesia ’e te Sōtaiete Tauturu.

« E fa’atāhō’ē te Sōtaiete Tauturu ia tātou i raro a’e iāna », tāna ïa parau. « I te mau vāhi ato’a tā’u i rātere nā te ao nei, e ’imi au i tō’u mau tuahine nō te Sōtaiete Tauturu, ’e e ’ite ’oi’oi au ē, ’ua herehia ’e ’ua ’itehia vau. Tē vai ra te hō’ē autahira’a nō te Mesia ’e i roto i tō tātou ’itera’a pāpū nō ni’a iāna. »

’Ua tāvini na te tuahine Yee i roto i te ’āpo’ora’a tauturu rahi o te Paraimere, ’e tē ha’amata nei ’oia i tōna pi’ira’a ’āpī ’ei tauturu piti i roto i te peresidenira’a rahi nō te Sōtaiete Tauturu ma te ’ite pāpū ē, e’ita ’oia e rave i te ’ohipa ’oia ana’e.

« Nā te Fatu e fa’atere nei, ’e tē ti’aturi nei au iāna », tāna ïa parau. « Tē mana’o pūai ato’a nei au ē tē hina’aro nei tātou i te mau ta’ata ato’a i roto i tāna ’ohipa. E ’ohipa tā tātou pā’āto’a, ’e e nehenehe tātou e riro ’ei tuha’a nō teie ’ohipa ’āmui. E māuruuru rahi ho’i tō’u nō teie rāve’a tāvinira’a. »

’Ua fānauhia ’o Kristin Mae Yee i te 5 nō Mē 1981, i Sacramento, i California, i Marite, nā Ryan R. Yee ’e ’o Jaydean Fox McKay. I muri a’e, ’ua fa’anu’u atu ’oia i Idaho, i Marite ’e i muri iho, i Utaha.

I tōna ’āpī-roa-ra’a tōna ’itera’a i tōna here ’e tōna tārēni nō te anoihi, tei arata’i iāna i roto i tāna ha’api’ira’a ’e tāna ’ohipa. ’Ua haere ’oia i te fare ha’api’ira’a tuatoru Brigham Young–Idaho ’e i Brigham Young University ’e ’ua noa’a mai tāna parau tū’ite nō te anoihi. I te matahiti 2019, ’ua noa’a iāna te parau tū’ite master nō te fa’aterera’a huira’atira i BYU.

Nā te mau ’aravihi anoihi o te tuahine Yee ’e tōna huru tūtonu i arata’i iāna i ni’a i te hō’ē ti’ara’a anoihi ’e e ta’ata fa’anaho ’ohipa hāmanira’a hōho’a i Disney Interactive Studios, i reira ’oia i te ravera’a i te ’ohipa 13 matahiti te maoro. I teienei, tē fa’atere nei ’oia i te pupu hāmani hōho’a a te ’Ēkālesia. Tāna mau hoho’a pēni nō ni’a i te ’evanelia ’o te mau hoho’a ïa nō ni’a i te tau tāvinira’a a te Fa’aora i ni’a i te fenua nei.

’Ua tāvini te tuahine Yee i roto i te mau pi’ira’a e rave rahi nō te ’Ēkalesia, mai te peresideni Sōtaiete Tauturu o te titi, tauturu nō te peresidenira’a Sōtaiete Tauturu o te pāroita ’e ’orometua ha’api’i nō te Sōtaite Tauturu, peresideni feiā ’āpī tamāhine nō te pāroita, ’orometua ha’api’i nō te ha’api’ira’a tumu nō te ’evanelia, misiōnare pāroita, ’e rave ’ohipa ’ōro’a hiero.