E ha’apūai ’e e tāvini te mau tuahine

Nā ni’a i te mau rāve’a ha’apararera’a sōtiare ’e ma te tere tino atu, ’ua tamau noa te peresidenira’a rahi nō te Sōtaiete Tauturu i tā rātou ’ohipa nō te ha’apūai i te mau ’utuāfare ’e i te mau ta’ata ’e nō te tāvini i te mau tamari’i a te Atua nā te ao ato’a nei.

I te ’āva’e Māti 2022, ’ua paraparau te peresideni Jean B. Bingham nō ni’a i te 180ra’a o te matahiti o te ha’amaura’ahia te Sōtaiete Tauturu. ’Ua parau ’oia ē, i teie mahana, tē vai nei e hitu milioni ’e te ’āfa tuahine e tāmarū nei i te māuiui, e fa’aora nei i te mau vārua, ’e e rave nei i te hō’ē ā mau fā i ravehia na e te Sōtaiete Tauturu i ha’amauhia i te matahiti 1842.

’Ua haere te peresideni Bingham ’e te tuahine Sharon Eubank, tauturu hō’ē i roto i te peresidenira’a rahi nō te Sōtaiete Tauturu ’e peresideni nō te pū tōtauturu a te feiā mo’a i te mau mahana hope’a nei, i roto e rave rahi fenua piri hiti’a o te rā. I Cairo (’Aiphiti), ’ua parau te peresideni Bingham ē, ’ua fa’ahiahia ’oia i « te here mau o te feiā mo’a nō te tahi ’e te tahi ». ’Ua haere ato’a te peresideni Bingham ’e te tuahine Eubank e māta’ita’i i te hō’ē pūhapara’a tītīhoria i Kurdistan, i reira tō te ’Ēkālesia tauturura’a i te hōro’ara’a i te vāhi fa’aeara’a.

’Ua tere atu te tuahine Reyna I. Aburto, tauturu piti, i te fenua Paniōra ’e te tuahine Michelle D. Craig, tauturu mātāmua i roto i te peresidenira’a rahi nō te Feiā ’Āpī Tamāhine. « E vai noa te hau a te Atua ’e e mea hau a’e ho’i i te mau mea ’ino ato’a i roto i te ao nei », te parau ïa a te tuahine Aburto i roto i te hō’ē purera’a nō te mau tamari’i ’e te feiā ’āpī.

Nā roto i te rāve’a ha’apararera’a sōtiare, ’ua pia te peresidenira’a rahi nō te Sōtaiete Tauturu i te mau parau poro’i nō ni’a i te mā’a, te orara’a maita’i, ’e te ea o te tamari’i, ma te fa’aau ’e te piha ’ohipa a te ’ohipa tōtauturu ’e te fa’arava’ira’a iāna iho nō te fa’atae i te mau parau poro’i i te mau metua nō ni’a i te mau maita’i o te horoira’a i te rima, te pape inu mā, te mā’itira’a i te mau mā’a maita’i, te fa’a’amura’a i te ’aiū, te pātia ārai, te tāmāra’a, ’e te mau hi’opo’ara’a i te fare ma’i.

’Ua fa’aitoito ato’a te peresidenira’a i te mau tuahine ’ia fa’a’ite mai i tō rātou mau mana’o nō ni’a i te mau mea e fa’aitoito atu ā ia rātou ’ia ’āmui hope atu i roto i te Sōtaiete Tauturu ’e nāhea i te fa’ariro i te Sōtaiete Tauturu ’ei rāve’a fa’aō atu ā i te mau tuahine ’e te pāturu.