Parau poro’i ’ōmuara’a
Tē fa’atura nei mātou i te mau tamāhine a te Atua i roto i teie tuha’a purera’a ta’a ’ē, ma te tūtonura’a i ni’a i tō rātou mau māna’ona’ora’a ’e te feiā o tā rātou mau pupu tauturu.
E tō’u mau tuahine here, ’a ha’amata ai tātou i teie tuha’a purera’a ta’a ’ē nō te ’āmuira’a rahi a te mau vahine, tē ’oa’oa nei au ’ia fa’atae atu i teie parau poro’i ’ōmuara’a nā te Peresidenira’a Mātāmua.
E ’ā’amu tō tā tātou mau tuha’a purera’a nō te mahana mā’a ma te mau ’ōpuara’a rau ’e te naho’a ta’ata rau. I teie ’āru’i, tē ’āmui nei tātou i te reira ’ā’amu ’a tomo ai tātou i roto i te hō’ē ’ōpuara’a ’āpī ’e te hō’ē fa’anahora’a ’āpī nō te hō’ē tau i fa’ata’ahia. E’ita te ’evanelia a Iesu Mesia e taui. Eʼita te ha’api’ira’a tumu o te ’evanelia e taui. E’ita tā tātou iho mau fafaura’a e taui. Terā rā i te roara’a o te mau matahiti, e taui te mau putuputura’a tā tātou e fa’anaho nō te fa’a’ite i tā tātou mau parau poro’i, ’e e mea pāpū roa e tāmau noa ā te reira i te taui i te roara’a o te mau matahiti.
Nō teie taime, teie putuputura’a nō te pō mahana mā’a e tuha’a purera’a ïa nō te ’āmuira’a rahi, ’e ’ere i te hō’ē tuha’a purera’a nō te tahi noa pupu tauturu. Mai te mau tuha’a purera’a ato’a o te ’āmuira’a rahi, nā te Peresidenira’a Mātāmua e fa’ata’a i te fa’anahora’a, te mau ta’ata a’o ’e te mau hīmene.
’Ua ani mātou i te peresideni Jean B. Bingham, peresideni rahi nō te Sōtaiete Tauturu, ’ia arata’i i teie tuha’a purera’a. I te mau tau i muri nei, e riro te mau tuha’a purera’a nō te pō mahana mā’a i te arata’ihia e te hō’ē o te mau ti’a fa’atere rahi o te ’Ēkālesia, mai te mau melo o te mau peresidenira’a rahi o te Sōtaiete Tauturu, o te Feiā ’Āpī Tamāhine, ’e o te Paraimere, fa’ata’ahia e te Peresidenira’a Mātāmua.
I teie pō, e fa’atumuhia teie tuha’a purera’a nō te pō mahana mā’a o te ’āmuira’a rahi, i ni’a i te mau māna’ona’ora’a o te feiā mo’a vahine i te mau mahana hope’a nei. Tei roto i te reira te ha’api’ira’a tumu a Te ’Ēkālesia a Iesu Mesia i te Feiā Mo’a i te mau Mahana Hope’a nei, te mau ture a te ’Ēkālesia e fa’ahiti ta’a ’ē nei nō te mau vahine, ’e te mau hōpoi’a rahi ’e te ’ohipa a te mau pupu tauturu tei roto te mau vahine ’e te mau tamāhine o te ’Ēkālesia. Noa atu e ha’aparare-ti’a-hia teie tuha’a purera’a i te mau ta’ata ato’a nā te ao nei, mai te mau tuha’a purera’a ato’a o te ’āmuira’a rahi, te mau ta’ata tei anihia ’ia parahi mai i roto i te pū ’āmuira’a nō teie tuha’a purera’a, ’o te mau vahine ïa ’e te mau tamāhine mai te 12 matahiti ’e hau atu. ’Ua fa’aō mai mātou i te tahi mau ti’a fa’atere o te autahu’ara’a e peresideni nei i ni’a i te mau pupu tauturu e ’āmui mai nei.
Te mea tā mātou e ha’amata nei i’ō nei e pāhonora’a ïa i te mau rāve’a nō te ’āparaura’a e roa’a i teienei i te feiā fa’atere ’e i te mau melo o te ’Ēkālesia a te Fatu nā te ao nei. Nō te mau ta’ata ato’a te ha’api’ira’a tumu o te ’evanelia a Iesu Mesia, ’o te reira ïa tō tātou mana’o tumu ’e te fāito o te ha’apūrorora’a. Tē fa’atura nei mātou i te mau tamāhine a te Atua i roto i teie tuha’a purera’a ta’a ’ē, ma te tūtonura’a i ni’a i tō rātou mau māna’ona’ora’a ’e te feiā o tā rātou mau pupu tauturu.
Tē māuruuru nei mātou ē, nā roto i te ihi anoa ha’a o te ha’apararera’a e hōro’a te reira i te feiā fa’atere o te ’Ēkālesia ’ia fa’atupu i te hō’ē ha’api’ipi’ira’a pāpū, nō te mau ta’ata ta’a ’ē maita’i i terā ’e terā vāhi. Tē ’oa’oa ato’a nei mātou i te mea ē, ’ua mara’a iho nei te mau rāve’a nō te rāterera’a. E fa’ati’a te reira ia mātou ’ia tono i te feiā fa’atere o te ’Ēkālesia i terā ’e terā vāhi, nō te fa’anaho tāmau i te mau ha’api’ipi’ira’a nā te feiā fa’atere.
Teie te ’ohipa a te Fatu ’o Iesu Mesia. E tāvini mātou iāna, aratai’hia e tōna Vārua Maita’i. Tē ti’aoro nei mātou i te mau ha’amaita’ira’a o te Fatu i ni’a iho i te feiā fa’atere o teie nau pupu ’e tae noa atu i te mau vahine ’e te mau tamāhine fa’aro’o e tāvini ra i reira, ’e i roto ato’a i tō rātou orara’a tāta’itahi. I te i’oa o Iesu Mesia, ’āmene.