Elder Ryan K. Olsen

Hitu ’Ahuru huimana fa’atere rahi

’A pa’ari ai Elder Ryan K. Olsen i Sandy, i Utaha, i Marite, ’aita roa tōna nā metua i vaiiho iāna ’ia fa’aru’e i te fare ma te fa’aha’amana’o ’ore i teie parau : « ’A haamana’o ’o vai ’oe. »

« E mea riri roa nā’u te reira parau i tō’u ’āpīra’a », tāna ïa parau, ma te ’ata. « Terā rā, ’ua tauturu te reira mau parau iā’u ’ia ha’amana’o i tō’u hīro’a hanahana. ’Ua tauturu te reira mau parau iā’u ’ia ha’amana’o ē, e Metua i te ao ra tō’u ’o tē here nei iā’u, ’e ’o te Fa’aora tō’u hoa rahi roa a’e. Te mau mea ato’a tā tātou e nehenehe e ti’aturi e rave ’aore rā, e fa’aoti, e mea nā roto noa ïa iāna. »

Taua hīro’a tāmarū ra, ’e te mau hi’ora’a o tōna nā metua, o tōna mau hoa misiōnare, o te mau ’āpiti nō te ’Ēkālesia ’e o te mau fa’aa’o arata’i nō te ’ohipa putu faufa’a, ’ua riro ïa ’ei mauha’a faufa’a rahi tā Elder Olsen e fa’a’ohipa ’a ha’amata ai ’oia i tāna tāvinira’a ei Hitu Ahuru huimana fa’atere rahi.

Fānauhia i te 11 nō ’Ātopa 1974, ’e ’ua pa’ari i roto i te ’Āfa’a nō Roto Miti i Utaha, e tamaiti ’o Ryan Kirk Olsen nā Kirk ’e ’o Cathy Olsen.

’Ua mau pa’ari maita’i te here o Elder Olsen nō Amerika Latino ’e nō te reo pāniora ’a tāvini ai ’oia ’ei misiōnare rave tāmau i roto i te misiōni nō Rāparata Resistencia. I muri a’e, ’ua tāvini ’āmui ’oia ’e tāna vahine ’o Julie Dorrington Olsen a peresideni ai ’oia i te Misiōni nō Uruguay Montevideo West mai te matahiti 2016 ē tae atu i te matahiti 2019.

’Ua fa’aipoipo rāua te tuahine Olsen i te 20 nō Novema 1998 i roto i te hiero nō Roto Miti. E nā metua rāua nō nā tamari’i e pae.

I te taime ’a pi’ihia ai ’oia ’ei Hitu ’Ahuru huimana fa’atere rahi, tē tāvini ra ’o Elder Olsen ’ei Hitu ’Ahuru ārea. ’Ua tāvini ato’a ’oia ’ei peresideni titi, ’ei peresideni misiōni tītī’, ’ei melo ’āpo’ora’a teitei, ’ei ’episekōpo, ’ei tauturu i roto i te hō’ē ’episekōpora’a, ’e ’ei tauturu i roto i te peresidenira’a Feiā ’Āpī Tamāroa nō te pāroita.

’Ua roa’a ia Elder Olsen te parau tū’ite nō te tūreiara’a rahi i te fare ha’api’ira’a teitei University of Uta ’e ’ua rave ’oia i te ’ohipa i roto i te mau taiete putu faufa’a rau. E peresideni ārea ’oia nō Arthur J. Gallagher & Co., e taiete pāruru nā te ao nei, ē tae roa i te taime ’a pi’ihia ai ’oia ’ei peresideni misiōni. I te taime ’a pi’ihia ai ’oia i roto i te Hitu ’Ahuru, tē rave ra ’oia i te ’ohipa ’ei mono peresideni matahiapo nō taua taiete ra.