J. Anette Dennis

Tauturu hō’ē i roto i te peresidenira’a rahi nō te Sōtaiete Tauturu

I muri a’e i tōna orara’a i te mau vāhi rau o te Fenua Marite i tōna ’āpīra’a, ’ua mana’o roa te tuahine Jeannie Anette Dennis ē, ’ua tupu tōna mau moemoeā i te taime ’a fa’anu’u ai tōna ’utuāfare i Cottonwood Heights, i Utaha.

« ’Ua mana’o vau ē, e mau melo nō te ’Ēkālesia ana’e i Utaha ’e e riro teie vāhi ’ei ha’apūra’a nō’u », tāna ïa parau.

I te mau mahana mātāmua i te ha’api’ira’a tuarua, ’ua ’oa’oa roa ’oia i te ani-manihini-ra’a-hia ’oia ’ia haere atu i te hō’ē ’āru’i fa’a’oa’oara’a. Terā rā, ’ua fa’aara mai i te hō’ē tamāhine, tei riro mai ’ei hoa rahi roa nōna ē, te mau ta’ata i roto i te ’āru’i fa’a’oa’oara’a, e fa’a’ohipa rātou i te rā’au taero.

« ’Oi’oi roa tō’u itera’a ē, tei te mau vāhi ato’a te ’ino », tāna ïa parau. Terā rā, nā tōna ’itera’a pāpū ’e te hō’ē ’utuāfare tei fa’atumuhia i ni’a i te ’evanelia, i ha’apūai noa iāna i te roara’a o tāna ha’api’ira’a tuarua.

Fānauhia i Provo, Utaha, i te ’āva’e tiunu 1960, ’o Jeannie Anette Herrin te matahiapo o nā tamari’i e hitu a Curtis Lamar ’e ’o Patricia Joanne Herrin. ’Ua arata’i te tōro’a ’ohipa a tōna metua tāne i te ’utuāfare i Mississipi, i Tennessee, i Iowa, i Nebraska ’e i Utaha.

’Ua haere ’oia i te ha’api’ira’a tuatahi i te fare ha’api’ira Brigham Young University ’e ’ua noa’a mai te hō’ē parau tū’ite i roto i te reo paniōra. I roto i te hō’ē tere o te piha ha’api’ira’a i Mēhiko, ’ua fārerei ’oia ia Jorge Dennis, ’e ’ua ha’amata rāua i te ’āparau nā roto i te rata.

I te fa’anu’ura’a ’oia i Roto Miti hō’ē matahiti i muri mai nō te tuatāpapa i te reo peretāne, ’ua ha’amata rāua i te arapae. Tau ’āva’e noa i muri iho, ’ua mōmo’ahia rāua. ’Ua fa’aipoipo rāua i roto i te hiero nō Roto Miti, i te 4 nō Tetepa 1980. E 4 tā rāua tamari’i ’e e 9 mo’otua. Tē ora nei rātou i Bountiful, i Utaha.

E ha’amata te tuahine Dennis, tei pāturuhia i te 2 nō ’Ēperēra, i te tāvini ’ei tauturu hō’ē i roto i te peresidenira’a rahi o te Sōtaiete Tauturu i te 1 nō ’Ātete. ’Ua tāvini ’oia i roto i te ’āpo’ora’a rahi tauturu a te Paraimere, ’e i roto i te ’āpo’ora’a ha’apararera’a parau nō te mata’eina’a nō Davis, rāua ’o tāna tāne.

Mai te matahiti 2013 ē tae atu i te 2016, ’ua tāvini ’oia ’e tāna tāne fa’aipoipo, ’a peresideni ai tāna tāne i te misiōni nō Ecuador Guayaquil West. ’Ua tāvini ato’a ’oia ’ei tauturu nō te matarona o te hiero nō Guayaquil Equador, ’ei papa’i parau nō te Sōtaiete Tauturu o te titi, ’ei peresideni Paraimere pāroita, ’ei tauturu nō te peresidenira’a Sōtaiete Tauturu ’e nō te peresideniraa Feiā ’Āpī Tamāhine o te pāroita, ’ei ’orometua nō te Sōtaiete Tauturu, ’e ’ei rave ’ohipa ’ōro’a hiero.