Parau ’āpī nō te mau hiero
’Ua fa’aara te peresideni Russell M. Nelson i te mau ’ōpuara’a e patu fa’ahou e 17 hiero, nā roto i te reira, ’ua tae’ahia ïa te 100 hiero tei fa’aarahia mai te taime ’a riro mai ai ’oia ’ei Peresideni nō te ’Ēkālesia.
E patuhia te mau hiero i Wellington ’aore ra i pīha’i iho (Niu Terani) ; i Brazzaville (Repupirita nō Congo) ; i Barcelone (Pāniora) ; i Birmingham (Peretāne mā) ; i Cusco (Peru) ; i Maceió ’e Santos (Peretīria) ; i San Luis Potosí ’e i Mexico City Benemérito (Mēhiko) ; ’e i Marite, ’oia ho’i i Tampa (Florida) ; i Knoxville (Tennessee) ; Cleveland (Ohio) ; Wichita (Kansas) ; Austin (Texas) ; i Missoula (Montana) ; i Montpelier (Idaho) ; ’e i Modesto (California).
Te tahi atu mau fa’atanora’a ’āpī
Mai te ’āmuira’a rahi i ma’iri a’enei, ’ua ha’amo’ahia ’aore rā ’ua ha’amo’a-fa’ahou-hia te mau hiero, ’ua fa’aarahia te mau ’ōpani ’īriti, ’e ’ua tārenahia te mau tāpūra’a repo mātāmua ’ati a’e te ao nei.
’Ua ha’amo’a-fa’ahou-hia te hiero nō Winnipeg (Manitoba, Tanata) ’e te hiero nō Pocatello (Idaho, Marite), ’e ’ua ha’amo’a-fa’ahou-hia te hiero nō Mesa (Arizona, Marite). ’Ua fa’aarahia te mau tai’o mahana ha’amo’ara’a ’e ’aore rā ha’amo’a-fa’ahou-ra’a ’e te mau ’ōpani ’īriti nō te mau hiero i Yigo (Guam) ; i Praia (Cap-Vert) ; i Rio de Janeiro (Peretīria) ; i Washington, D.C. (Marite) ; ’e i Tokyo (Tāpōnē).
’Ua tāpūhia te repo mātāmua nō te hiero nō Casper (Wyoming, Marite), te hhiero nō Pago Pago (Hāmoa Marite), te hiero nō Bacolod (Firipino), ’e te hiero nō Freetown (Sierra Leone). ’Ua tārenahia te tāpūra’a repo mātāmua nō te mau hiero i te mau vāhi i muri nei nō te Fenua Marite : Grand Junction (Colorado) ; Lindon (Utah) ; Farmington (New Mexico) ; Elko (Nevada) ; Burley (Idaho) ; Yorba Linda (California) ; ’e Smithfield (Utah).
’Ua fa’aarahia te mau vāhi, ’e ’ua hōro’ahia te fa’ahōho’ara’a a te ’ainihi nō te hiero nō Cape Town (’Āfirita Apato’a), te hiero nō Querétaro (Mēhiko) ’e te hiero nō Ephraim (Utah, Marite).
Mau fa’a’āpīra’a
Tē tāmau noa nei te ’ohipa patura’a ’e te fa’a’āpīra’a i ni’a i te tahi mau hiero nā te ao ato’a nei, tae noa atu te fa’a’āpīra’a i te hiero nō Roto Miti ’e tōna mau ’āua, nā reira ato’a te vāhi e ti’ahia ra e te fare nō te mau piha tōro’a o te ’Ēkālesia. E ha’amaita’i, e fa’aoraora, ’e e fa’anehenehe teie ’ōpuara’a ’ohipa i te hiero ’e te ’āua ’ati a’e i te reira, e mono te reira i te mau fa’anahora’a tahito, ’e e pāhono ho’i i te mau fifi ’e te pārurura’a i te mau ’āueuera’a fenua.
Tē ha’apa’ari-fa’ahou-hia nei te hiero ’ia vai pāpū noa te reira i roto i te hō’ē ’āueuera’a fenua i te fāito 7.2 ; tē ha’apa’arihia nei te niu ’ia ’ore ’ia fifi i roto i te ’āueuera’a fenua ; tē fa’a’āpīhia nei te mau fa’anahora’a nō te terera’a uira ’e te pape ; tē patuhia nei te mau tomora’a ’āpī ; tē tauihia nei te mau vāhi ’ua pāpararī te tima ’e tē fa’a’āpīhia nei te ’āua nō te fa’aiti i te teimaha o te tahua repo i ni’a i te mau patura’a i raro a’e i te repo ; ’e e fa’anaho-fa’ahou-hia te ’āua o te hiero ’e te vāhi ti’ara’a o te fare nō te mau piha tōro’a nō te fa’ariro i te reira vāhi ’ei vāhi matara a’e, ’e te fāri’i maita’i a’e. ’Ua ha’amata te fa’a’āpīra’a i te matahiti 2020, ’e ’ua tārenahia te hopera’a o te te reira i te matahiti 2025.
Tē tāmau noa ato’a nei te mau fa’a’āpīra’a i ni’a i te hiero nō Hamilton (Niutirani) ; nō Hong Kong (Taina) ; ’e nō Columbus (Ohio), ’e nō St. George ’e nō Manti (Utah), i te Fenua Marite. Nō te parau nō te hāmanira’a nō te tahi atu mau hiero, ’a hi’o i te hono i raro nei.
Te ho’ira’a i ni’a i te terera’a mātarohia
I roto i te hō’ē rata i te feiā fa’atere o te ’Ēkālesia tei pāpa’ihia i te 15 nō Māti 2022, ’ua fa’aara te Peresidenira’a Mātāmua ē, e ho’i marū noa mai te mau hiero nā te ao ato’a nei i ni’a i te terera’a mātarohia. ’Oia ho’i te fa’aru’era’a i te mau pāruru vaha ’e te mau fa’aitira’a ta’ata, mai te au i te huru o te orara’a o te fenua iho. Nā te mau peresideni hiero ’e te mau peresidenira’a ārea e fa’ata’a i te ’ohipa e rave nō te hiero tāta’itahi, ma te paraparau atu i te tuha’a fa’atere nō te hiero.