« Elder Denelson Silva », Liahona, Mē 2022.
Elder Denelson Silva
Hitu ’Ahuru huimana fa’atere rahi
Nā terā tere ho’i mai e 4 000 maile (6 400 km) mai Luanda (Anatora), haere mai i São Paulo (Peretīria), i hōro’a ia Elder Denelson Silva ’e tāna vahine fa’aipoipo, ’o Regina, i te taime nō te ’aro i te hō’ē muhumuhura’a. I muri a’e i tōna tāvinira’a ’ei peresideni misiōni, ’ua tupu te mana’o i roto ia Elder Silva ē, ’eiaha rāua tāna vahine e ho’o mai i te hō’ē fare.
’Ua ho’o atu rāua i tō rāua fare hou ’a reva ai i tā rāua misioni. ’Ua ’ōpua rāua e ho’o mai i te hō’ē fare ’āpī ’ia ho’i mai rāua, terā rā, ’ua fa’auruhia rāua ’ia tīa’i. « E ’ere te mau fare i Peretīria i te hō’ē tao’a tā ’oe e tu’u nō te ho’o ’e e riro ’oi’oi noa », te parau ïa a Elder Silva. « E nehenehe e haere e rave rahi mahana, e rave rahi ’āva’e ’aore rā e rave rahi matahiti. »
’Ua parau te tuahine Silva ē, ’ua rōtahi rāua i ni’a i te parau ē, ’ua arata’i te Metua i te ao ra ia rāua hou tā rāua misioni ’e nō reira, e arata’i fa’ahou ’oia ia rāua. « ’Ua fa’aoti a’era māua e tīa’i nō te hō’ē taime », tāna ïa parau. ’Ua mā’iti rāua e tārahu i te hō’ē fare.
Mai te ho’ora’a i te hō’ē fare i Peretīria, ’aita te pāhonora’a i tae mai i roto i te tahi mau mahana ’aore rā, i te tahi mau ’āva’e ’e ’aore rā, i te hō’ē matahiti. ’Ua tae mai te pāhonora’a hau atu i te piti matahiti i muri mai, ’a fāri’i ai ’o Elder Silva i te hō’ē pi’ira’a ’ia tāvini ’ei Hitu Ahuru huimana fa’atere rahi.
« E ti’a ia māua ’ia feruri ē, mai te mea e ani mai ’oia ia māua ’ia rave i te hō’ē mea, e ’ē tā māua pāhonora’a i te mau taime ato’a », te parau ïa a Elder Silva. « Mai te mea ē, e ’ere te pāhonora’a i te ’ē i te mau taime ato’a, e vai ïa te vāhi nō te ‘’aita’ ’aore rā, te ‘pēnei a’e’. » Nō te Fa’aora rā, tē fa’ata’a nei ’oia, « ’aita ïa e vāhi nō te ‘’aita’ ’aore rā nō te ‘pēnei a’e’ i Getesemane. »
’Ua fānauhia ’o Denelson Urbano da Silva i te 4 nō Tiurai 1965, i Recife, i Peretīria, nā Domingos Urbano da Silva ’e Maria José de Almeida Silva. ’Ua pa’ari ’oia i Recife ’e ’ua tā’atihia ia Regina Maria de Carvalho Silva i roto i te hiero nō São Paulo (Peretīria) i te ava’e Mē 1987. E piti tā rāua tamari’i.
Tē vai ra tāna parau ’aravihi tuatoru nō te fa’aterera’a i te ’ohipa putu faufa’a (fa’a’ohipara’a putura’a ’ā). ’Ua rave ’oia i te ’ohipa i roto i te ’ohipa rātere e 30 matahiti te maoro.
Mai te matahiti 2016 ē tae atu i te matahiti 2019, ’ua tāvini ’o Elder Silva ’ei peresideni misiōni ’e tāna vahine i roto i te misiōni nō Angola Luanda. ’Ua tāvini ato’a ’oia ’ei Hitu ’Ahuru ārea, ’ei peresideni titi, ’ei ’episekōpo, ’ei melo āpo’ora’a teitei ’e ’ei misiōnare rave tāmau i roto i te misiōni nō Brazil Curitiba.