Te ’ē’a nō te fafaura’a : Te ’ē’a e tae atu ai i te ora mure ’ore

Nā Elder Adeyinka A. Ojediran

Nō te Hitu ’Ahuru

Te ’ē’a nō te maita’i-roa-ra’a ’o te ’ē’a ïa nō te fafaura’a, ’e ’o Iesu Mesia te pū nō te mau ’ōro’a ’e te mau fafaura’a ato’a.

’Ua hina’aro te hō’ē ari’i pūai ’ia fa’atere tāna tamaiti i te hō’ē o tōna mau bāsileia. E ti’a i te tamaiti huiari’i ’ia ha’api’i ’e ’ia tupu i te pa’ari nō te pārahi i ni’a i te terōno. I te hō’ē mahana, ’ua fārerei te ari’i i te tamaiti huiari’i ’e ’ua fa’a’ite i tāna ’ōpuara’a. ’Ua fāri’i rātou ē e haere te tamaiti huiari’i i te hō’ē ’oire ’ē ’e e noa’a mai te tahi mau ’aravihi. E fa’aruru ’oia i te mau fifi ’e e fāna’o ato’a ’oia e rave rahi mau mea maitata’i i reira. ’Ua tono atu ra te ari’i iāna i te ’oire ra, i reira te tamaiti huiari’i e tītauhia ai ’ia ha’apāpū i tōna ha’apa’o maita’i i te ari’i ’e ’ia fa’a’ite ē, ’ua ti’a iāna ’ia fāna’o i te mau maita’i ’e te mau hōpoi’a tā te ari’i i fa’aherehere nōna. ’Ua hōro’ahia i te tamaiti huiari’i te ti’amāra’a nō te mā’iti ’ia fāri’i i teie mau fāna’ora’a ’e teie mau hōpoi’a ’aore rā, ’aita, tei te huru ïa o tōna mau hina’aro ’e tōna ha’apa’o maita’i. ’Ua pāpū iā’u ē ’ua hina’aro ’outou ’ia ’ite i te ’ohipa i tupu i ni’a i te tamaiti huiari’i. ’Ua ho’i ānei ’oia nō te fāna’o i te bāsileia ?

Te mau taea’e ’e te mau tuahine here, e mau huiari’i tāne ’aore rā e mau huiari’i vahine tātou tāta’itahi. ’Ua tonohia mai tātou i te tāhuti nei e te hō’ē Metua here i te ao ra nō te ’oa’oa i te ha’amaita’ira’a nō te hō’ē tino ’o tē riro mai ’ei mea tāhuti ’ore nā roto i te Tāra’ehara ’e te Ti’afa’ahoura’a o Iesu Mesia. ’Ua tītauhia ia tātou ’ia fa’aineine nō te ho’i i mua i te aro o te Atua ma te ha’apāpū ē e « ha’apa’o ānei [tātou] i te mau mea ato’a tā te Fatu [tō tātou] Atua i fa’aue mai ia [tātou] » (Aberahama 3:25).

Nō te tauturu ia tātou, ’ua haere mai te Fa’aora nō te fa’aora ia tātou ’e nō te fa’a’ite i te ’ē’a nō te ho’i i te Atua ra. ’Ua tītau-manihini-hia te mau tamari’i a te Atua ’ia haere mai i te Fa’aora ra ’e ’ia maita’i roa i roto iāna. I roto i te mau pāpa’ira’a mo’a, tē ’ite nei tātou i te anira’a nō tātou ’ia haere mai i te Fatu ra tei fa’ahiti-fa’ahou-hia hau atu i te 90 taime, ’e hau atu i te ’āfara’a o te reira e mau anira’a manihini ïa nō ’ō mai i te Fatu iho. Te fāri’ira’a i te anira’a a te Fa’aora ’o te ravera’a ïa i tāna mau ’ōro’a ’e te ha’apa’ora’a i tā tātou mau fafaura’a ’e ’ōna. ’O Iesu Mesia « te ’ē’a, te parau mau ’e te ora » (Ioane 14:6), ’e tē ani nei ’oia ia tātou « ’ia haere mai iāna ra, ’e ’ia rave i tōna ra maita’i ; ’e ’aita roa ’oia e fa’a’ore i te hō’ē tei hina’aro iāna ra » (2 Nephi 26:33).

Nā tā tātou ha’api’ira’a mai ’e te ha’api’ira’a atu i te ’evanelia e fa’ahōhonu i tō tātou fa’afāriura’a i te Metua i te ao ra ’e ia Iesu Mesia ’e e tauturu ia tātou ’ia riro atu ā mai ia rāua ra te huru. Noa atu ē, ’aita te mau mea ato’a i heheuhia mai nō ni’a « i te taime ’e te huru e hōro’ahia mai ai te mau ha’amaita’ira’a o te fa’ateiteira’a », ’ua ha’apāpūhia mai rā ia tātou te reira (M. Russell Ballard, « Ti’aturi i te Mesia », Liahona, Mē 2021, 55).

’A ha’api’i ai ’oia i te fenua ra i Zarahemela, ’ua fa’ati’a Alama te tahu’a rahi i te hō’ē anira’a hōhonu a Iesu Mesia :

« ’Inaha, tē fa’atae mai ra ’oia i te parau anira’a i te mau ta’ata ato’a, ’oia ho’i tē fa’atorohia ra te rima o te aroha ia rātou ra, ’e tē nā ’ō mai ra ho’i ’oia ē : ’A tātarahapa, ’e e fāri’i au ia ’outou.

« ’Oia ïa, tē nā ’ō mai ra ’oia : ’A haere mai ’outou iā’u nei, ’e e fāri’i ’outou i te mā’a nō te tumu rā’au o te ora » (Alama 5:33–34).

Tē ani mai nei te Fa’aora iho ia tātou ’ia haere mai iāna ra ’e ’ia rave i tāna zugo i ni’a ia tātou ’ia ti’a ia tātou ’ia fa’aea i roto i teie ao ’ārepurepu (hi’o Mataio 11:28–29). E haere tātou i te Mesia ra ma « te fa’a’ohipara’a i te fa’aro’o iāna, te tātarahapara’a i te mau mahana ato’a, te ravera’a i te mau fafaura’a ’e te Atua ’a fāri’i ai tātou i te mau ’ōro’a nō te fa’aorara’a ’e te fa’ateiteira’a, ’e te tāpe’ara’a e tae noa atu i te hope’a nā roto i te ha’apa’ora’a i taua mau fafaura’a ra » (Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 1.2.1, ChurchofJesusChrist.org). Te ’ē’a nō te maita’i-roa-ra’a ’o te ’ē’a ïa nō te fafaura’a, ’e ’o te Mesia te pū nō te mau ’ōro’a ’e te mau fafaura’a ato’a.

’Ua ha’api’i mai te ari’i Beniamina ē, nā roto i te mau fafaura’a tā tātou e rave, e riro mai tātou ’ei mau tamaiti ’e ’ei mau tamāhine nā te Mesia, tei fānau ia tātou i te pae vārua, ’e i raro a’e i tōna upo’o tē fa’ati’amāhia nei tātou, nō te mea, « ’aita atu ho’i e i’oa i fa’a’itehia mai e tae mai ai te fa’aorara’a » (hi’o Mosiah 5:7–8). E fa’aorahia tātou mai te mea e tāpe’a māite tātou e tae noa atu i te hope’a nā roto i te « pe’era’a i te hi’ora’a o te Tamaiti a te Atua ora » (2 Nephi 31:16). ’Ua a’o mai Nephi ē, e’ita te mau mea ato’a e ravehia nā roto noa i te haerera’a nā ni’a i te ’ē’a tītī’aifaro ’e te piriha’o ; e ti’a ia tātou « ’ia haere ti’a atu i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua ’e te ta’ata ato’a » (hi’o 2 Nephi 31:19–20).

E tauturu mai te ha’api’ira’a tumu a te Mesia ia tātou ’ia ’ite ’e ’ia fa’aea noa i ni’a i te ’ē’a o te fafaura’a, ’e ’ua fa’anahohia te ’evanelia ē ’ia fāri’ihia te mau ha’amaita’ira’a a te Fatu tei fafauhia nā roto i te mau ’ōro’a ’e te mau fafaura’a mo’a. ’Ua a’o mai te peropheta a te Atua, te peresideni Russell M. Nelson ia tātou i roto i tāna a’ora’a i te 16 nō Tēnuare 2018 nā roto i te ’āfata teata ’ia « fa’aea noa i ni’a i te ’ē’a nō te fafaura’a. Nā tā ’outou fafaura’a ’ia pe’e i te Fa’aora ma te ravera’a i te mau fafaura’a ’e ’ōna ’e i muri iho te ha’apa’ora’a i te reira mau fafaura’a, e ’īriti i te ’ūputa nō te mau ha’amaita’ira’a pae vārua ato’a ’e te faufa’a e vai ra nō te tāne, te vahine ’e te tamari’i i te mau vāhi ato’a […] Te hope’a tā tātou tāta’itahi e tūtava nei ’o te fāri’ira’a ïa i te mana i roto i te hō’ē fare a te Fatu, ma te tā’atihia ’ei ’utuāfare, ma te ha’apa’o maita’i i te mau fafaura’a i ravehia i roto i te hiero ’o te fa’aineine ia tātou nō te hōro’a rahi roa a’e a te Atua, ’o te ora mure ’ore » (« ’A haere ’āmui ai tātou i mua », Liahona, Ēperēra. 2018, 7).

E’ita te Atua e fa’aru’e i tōna aura’a ’e, ’aore rā e ’ore e hōro’a i tāna mau ha’amaita’ira’a i fafauhia nō te ora mure ’ore, i te hō’ē o te tīa’i ha’apa’o maita’i o te fafaura’a. ’E ’ia ha’apa’o ana’e tātou i te mau fafaura’a mo’a, e ha’afātata atu tātou ia tātou i te Fa’aora. ’Ua ha’api’i mai Elder David A. Bednar ia tātou inanahi ra ē, e ’ohipa te mau fafaura’a ’e te mau ’ōro’a o te ’evanelia i roto i tō tātou orara’a mai te hō’ē ’avei’a, nō te hōro’a mai ia tātou i te arata’ira’a fenua nō te haere i te Mesia ra ’e nō te riro hau atu mai iāna te huru.

E tāpa’o te mau fafaura’a i te ’ē’a nō te ho’i i te Atua ra. Nā te mau ’ōro’a o te bāpetizora’a ’e te fāri’ira’a i te hōro’ara’a a te Vārua Maita’i, te fa’atōro’ara’a i te autahu’ara’a ’e te ’ōro’a mo’a, e arata’i ia tātou i te hiero o te Fatu nō te rave i tāna mau ’ōro’a nō te fa’ateiteira’a.

Tē hina’aro nei au e fa’ahiti e piti na mea tā tō tātou Fa’aora i ha’apāpū mai nō te tauturu ia tātou ’ia ha’apa’o maita’i i te mau fafaura’a :

1. E nehenehe te Vārua Maita’i e ha’api’i ia tātou, e fa’aha’amana’o ia tātou i te mau ha’api’ira’a a te Fa’aora, ’e e fa’aea i piha’i iho ia tātou e a muri noa atu (hi’o Ioane 14:16, 26). E nehenehe ’oia e riro ’ei hoa tāmau nō tātou nō te arata’i ia tātou i ni’a i te ’ē’a nō te fafaura’a. ’Ua ha’api’i mai te peresideni Russell M. Nelson ē, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i, te fa’atere, te tāmāhanahana tāmau o te Vārua Maita’i » (« Heheura’a nō te ’Ēkālesia, heheura’a nō tō tātou orara’a », Liahona, Mē 2018, 96).

2. ’Ua ha’amau te Fa’aora i te ’ōro’a mo’a, ’ia ha’amana’o noa tātou iāna ’e ’ia vai noa tōna Vārua i roto ia tātou. Nā te bāpetizora’a e ’īriti i te ’uputa o te ora mure ’ore, ’e nā te ’ōro’a mo’a e tauturu ia tātou ’ia haere pāpū i mua i ni’a i te ’ē’a nō te fafaura’a. ’Ia rave ana’e tātou i te ’ōro’a mo’a, e riro ïa te reira ’ei fa’a’itera’a i te Metua ē, tē ha’amana’o tāmau noa nei tātou i tāna Tamaiti. ’E mai te mea e ha’amana’o tāmau noa tātou iāna ’e e ha’apa’o i tāna mau fa’auera’a, e pārahi mai ïa tōna Vārua i roto ia tātou. Ta’a ’ē noa atu i teie fafaura’a, e fa’a’āpī te Fatu i te fafaura’a nō te fa’a’orera’a hara mai te mea e tātarahapa tātou ma te ha’eha’a i tā tātou mau hara.

Ma te vai-ha’apa’o-noa-ra’a i tā tātou mau fafaura’a, e ti’a roa ia tātou ’ia tūtava i te fāri’i tāmau noa i te Vārua nō te fa’aineine ia tātou ’ia ’amu i te ’ōro’a mo’a ma te ti’amā, ’e ’oia ato’a, ’a rave tāmau noa ai tātou i te ’ōro’a mo’a e vai noa mai te Vārua i roto ia tātou.

I te paera’a o te matahiti o tā māua tamāhine, e pere’o’o putu uira na’ina’i tōna ’e e mea au roa nāna ’ia fa’ahoro i te reira nā roto i te fare. I te hō’ē ahiahi, ’ua haere mai ’oia iā’u ra ’e ’ua parau mai, « pāpā, e’ita tō’u pere’o’o e tere fa’ahou. E nehenehe ānei tā tāua e rave mai i te tahi māhu i roto i tō ’oe pere’o’o nō te tu’u i roto, ’ia nehenehe ’oia ’ia tere fa’ahou ? Peneia’e e hina’arohia te māhu mai tō ’oe pere’o’o ’ia tere te reira ».

’Ua ’ite atu ra vau i muri iho ē ’ua topa te pūai o te ’ōfa’i putu uira, ’ua parau atu ra vau e nehenehe māua e fa’ahoro fa’ahou te reira i roto noa hō’ē hora. Ma te ’oa’oa rahi, ’ua parau ’oia, « ’E ! E ’āfa’i tāua iāna i te fare tītōra’a māhu ». ’Ua pātia noa vau i te ’ōfa’i putu uira i ni’a i te uira nō te fa’a’ī, ’e i muri iho hō’ē hora, ’ua ti’a iāna ’ia fa’ahoro i te pere’o’o ma te tura’ihia e te ’ōfa’i putu uira i fā’a’īhia. I muri a’e, ’ua ha’api’i mai ’oia e mea faufa’a roa ’ia fa’a’ī noa i te ’ōfa’i putu uira nā roto i te pātiara’a i te reira i te hō’ē pū uira.

’A ha’api’i ai tā māua tamāhine i te aura’a i rotopū i te ’ōfa’i putu uira ’e te pūai nō te fa’ahoro i tōna pere’o’o ha’uti, mai te reira ato’a tātou ’ia ha’api’i mai nō ni’a ia Iesu Mesia, te ’ōro’a mo’a, ’e te Vārua. E hina’aro tātou i te Vārua nō te tauturu ia tātou ’ia rātere i te tāhuti nei, ’a ha’apa’o māite ai tātou i te mau fafaura’a ’e e hina’aro tātou i te ’ōro’a mo’a nō te ha’apūai i tō tātou huru pae vārua. E arata’i te fa’a’āpīra’a i tā tātou fafaura’a nō te bāpetizora’a ’e te ’amura’a i te ’ōro’a mo’a ia tātou i te ha’apa’o maita’i i te tahi atu mau fafaura’a ato’a. E roa’a mau te hō’ē hope’ara’a ’oa’oa ’a tuatāpapa ai tātou nā roto i te pure ’e te fa’atura i te anira’a manihini a te Fa’aora ’e e fana’o tātou i tāna mau ha’amaita’ira’a i fafauhia mai. ’Ua parau ’oia, « ’e ’ia ti‘a ia ’oe ’ia pāruru ia ’oe iho ’ia ’ore ’oe ’ia vi’ivi’i i te mau mea nō teie nei ao, e haere ïa ’oe i te fare purera’a ’a pūpū atu ai i tā ’oe ra mau ’ōro’a i tō’u ra mahana mo’a » (Te Ha’api’ira’a Tumu ’e te mau Fafaura’a 59:9).

Tē fa’a’ite pāpū nei au ē, ’ua fafauhia i te mau tīa’i o te fafaura’a « te hau i roto i teie nei ao ’e te ora mure ’ore i roto i te ao a muri atu » (Te Ha’api’ira’a Tumu ’e te mau Fafaura’a 59:23). Tē fa’a’ite pāpū atu nei au ē ’a rave tāmau noa ai ’outou i te tāpa’o o te Fa’aora nā roto i te ’ōro’a mo’a, e fāri’i ’outou i tōna Vārua nō te arata’i ia ’outou i ni’a i te ’ē’a nō te fafaura’a ’e ’ia vai ha’apa’o noa i tā ’outou mau fafaura’a. I te i’oa o Iesu Mesia, ’āmene.