« Camille N. Johnson », Liahona, Mē 2022.
Camille N. Johnson
Peresideni rahi nō te Sōtaiete Tauturu
Nō Camille N. Johnson « mai te huru ē, tei te fare noa iho ’oia » i roto i te Sōtaiete Tauturu.
« ’Ua ’itehia iā’u te autuahinera’a i rotopū i te mau vahine tei ta’a ’ē iā’u », tāna ïa parau nō ni’a i te mau mea tāna i ’ite i roto i te Sōtaiete Tauturu, hau i te 30 matahiti i roto i te mau pāroita ’utuāfare i te Fenua Marite ’e i Pērū. « E mea here nā’u te itoito ’e te pa’ari o te mau vahine i roto i te Sōtaiete Tauturu. »
’Ua ’itehia iāna te mau arata’i ’e te mau hoa i roto i te Sōtaiete Tauturu, ’e tae noa atu i te tahi mau ta’ata pa’ari a’e ’e te ’āpī a’e iāna.
« E mau tuahine ana’e tātou pā’āto’a ma te ’itera’a ’āmui nō te hina’aro ’ia ho’i fa’ahou i tō tātou fare i te ra’i ra, ma te ’itera’a ta’a ’ē rā ’o tā tātou e nehenehe e fa’a’ohipa nō te tauturu te tahi i te tahi », te parau ïa a te tuahine Johnson.
’Ua tāvini te tuahine Johnson ’ei peresideni rahi nō te Paraimere mai te matahiti i ma’iri. E ha’amata ’oia i tāna tāvinira’a ’ei peresideni rahi nō te Sōtaiete Tauturu i te 1 nō ’Ātete.
Hō’ē o tāna mau pi’ira’a au roa a’e ’o te ha’api’ira’a ïa i roto i te Sōtaiete Tauturu.
« ’Ua here roa vau i te taime paraparaura’a i te mau tuahine ’e ’ia ha’api’ihia e te Vārua ’e te tahi ’e te tahi i roto i taua hora mo’a ra i roto i te Sōtaiete Tauturu. I reira tātou e paraparau ai nō te Mesia ’e e ’oa’oa ai i roto i te Mesia ’e e fa’a’ite ai i te mau mea nō te ’ā’au. »
’Ua fānauhia Camille Neddo Johnson i te ’āva’e Tetepa 1963, nā Hal ’e Dorothy Neddo i Pocatello, i Idaho, i te Fenua Marite. ’Ua fa’aipoipo ’oia ia Douglas R. Johnson i te 31 nō Tiurai 1987 i te hiero nō Roto Miti. E piti ta rāua tamaiti ’e e pae mo’otua.
’Ua fāri’i ’oia i te parau tū’ite nō te reo peretāne i te fare ha’api’ira’a tuatoru University of Utah i te matahiti 1985, ’e i te fare ha’api’ira’a tuatoru University of Utah S. J. Quinney College of Law i te matahiti 1989. ’Ua ’ohipa ’oia hau atu i te 30 matahiti ’ei ’auvaha ture ’e ’ua riro ’oia ’ei peresideni nō te taiete ’auvaha ture Snow Christensen & Martineau.
’Ei peresideni tahito nō te feiā ’āpī tamāhine nō te pāroita, ’ua tāvini ato’a te tuahine Johnson ’ei melo nō te mau peresidenira’a Sōtaiete Tauturu ’e Paraimere pāroita ’e ’ei ’orometua ha’api’i nō te piha ha’api’ira’a a te feiā pa’ari ’e nō te Sōtaiete Tauturu. ’Ua tāvini ato’a ’oia i pīha’i iho i tāna tāne mai te matahiti 2016 ē tae atu i te matahiti 2019 ’a peresideni ai ’oia i te misioni nō Pērū Arequipa.