« Amy A. Wright », Liahona, Mē 2022.
Amy A. Wright
Tauturu hō’ē i roto i te peresidenira’a rahi nō te Paraimere
Tē ha’amana’o nei te tuahine Amy A. Wright i te hō’ē pō e rave rahi matahiti i ma’iri a’enei, tei roto ’oia i te utuutura’a a te taote nō te hō’ē māriri ’ai’ovari fāito 4. Nō tōna māuiui rahi, ’aita ’oia e ’ite fa’ahou i te hō’ē mea. Noa atu tōna ’itera’a pāpū ’e tōna fa’aro’o i te Metua i te ao ra, i te Fa’aora, ’e i te ’ōpuara’a nō te fa’aorara’a, ’ua hina’aro ’oia i te hō’ē mea.
I tōna tamari’iri’ira’a, ’ua ha’api’ihia te tuahine Wright nā tōna metua vahine ’e nā te feiā fa’atere nō te Paraimere ē, ’ia ri’ari’a ana’e ’oia, ’ia vai ’ōtahi noa ’aore rā ’ia hina’aro i te Vārua, e hīmene ’oia i te hō’ē hīmene Paraimere.
« Nō te mau tamari’i rā te reira », tōna ïa mana’o i teienei. « E tano mau ānei te reira nō’u ? »
I muri iho, ’ua tae mai te pāhonora’a—’e te hīmene.
« E tamari’i ato’a vau nā te Atua », tē ha’amana’o ra te tuahine Wright. « Nō reira, ’ua ha’amata a’era vau i te hīmene i roto i tō’u ferurira’a, ‘E te Metua i te ao ra, tei reira mau ānei ’oe ?’1
« I reira noa vau. ’Ua vehihia te mau uaua ato’a o tō’u tino i te here o te Atua. E nehenehe e tāpe’a, ’ua riro ïa ’ei mea huru ’ē mau nō te mea ’aita tā’u e nehenehe e ’ite i te tahi atu mea. ’Ua ’ite au ē, tei reira ’oia, ’ua ’ite mau ’oia i te mea tā’u e fāri’i ra, ’e e Atua here ’oia. »
’Ua fānauhia Amy Eileen Anderson i te 6 nō Tēnuare 1972, i Roto Miti, i Utaha, i te Fenua Marite, nā Joy Bailey ’e ’o Robert Anderson. ’Ua fa’aipoipo ’oia ia James McConkie Wright i te 24 nō Tiunu 1994, i roto i te hiero nō Roto Miti. E toru tā rāua tamāroa.
’Ua fāri’i te tuahine Wright i te parau ’aravihi tuatoru nō te ha’amāhie i te ta’ata ’e te tuatāpapara’a ’utuāfare i te fare ha’api’ira’a tuatoru ra University of Utah, i te matahiti 1998. ’Ua rave ’oia i te ’ohipa i roto i te tuha’a fa’atere nō te rāve’a ha’apararera’a a te pīahi i te tuha’a fare ha’api’ira’a ra College of Communication nō te fare ha’api’ira’a tuatoru ra Marquette University, tē haere ra ïa tāna tāne i te ha’api’ira’a taote niho.
’Ua tāvini te tuahine Wright ’ei tauturu piti i roto i te peresidenira’a rahi o te Paraimere nō te matahiti i ma’iri ’e nā mua atu, i roto i te āpo’ora’a tauturu rahi a te Feiā Āpī Tamāhine e toru matahiti te maoro. Teie tāna mau pi’ira’a tahito, ’oia ho’i, peresideni nō te Paraimere titi ’e pāroita, tauturu i roto i te peresidenira’a Sōtaiete Tauturu ’e Paraimere nō te pāroita, ’orometua ha’api’i nō te Sōtaiete Tauturu, ’orometua ha’api’i nō te feiā pa’ari ’e fa’atere nō te mau louvetaux.