Tai Bwarannano n Tibwanga ake Kona Kakoaua iai Kristo
Te kukurei ni koaua e boboto iaon tatauraoira n kaniia Kristo ao ni kakoaua ibon iroura.
Nimaua te ririki n nako n te bong aei, ti kateibai ni kamatoa ara burabeti ae tangiraki, Beretitenti Russell M. Nelson, bwa te Beretitenti n ana Ekaretia Iesu Kristo ibukia Aika Itiaki ni Boong aika Kaitira―ana tia taetae te Uea ibukin te tai n rikirake ae tamaroa aio ao te kaotioti. Irouna, ti karekei kakao aika mwaiti ao ni beritanaki kakabwaia aika kakukurei ngkana ti kabotoa maeura iaon ara Tia Kamaiu, Iesu Kristo.
N 2011, ngke I mwakuri ma kainnabau bwa te tia kairiri n te mition n te tabo ae rangi n tamaroa ae Curitiba, Brazil, e a tang au tareboon inanon ara tai ni bowi. I rangi ni katawe bwa N na kakea tangina, ao I a noria bwa te tareboon e roko mairoun tamau. I kawaekoaai ni kitana te bowi ao ni kaekaa: “Mauri, Tamau!”
N aki kantaningaaki, e rootaki bwanaana: “Mauri, Bonnie. Iai te bwai ae I kan tuangko. E a reke irou te aoraki ae te ALS.”
E a mangaongao au iango, “Tataninga! “Teraana?”
E kabwarabwara tamau, “Are au iango e bon nakoraoi ma rabwatau e kekerikaaki teutana imwiin teuana n aki kakamwakuri.”
I namakinna bwa e a moanna ni bitaki au aonnaba ngke I karekea rawawatan te rongorongo ae e kananokawaki aei. Ma n te bong ae I aki kona ni mwaninga aei, bon ana kabanea ni kibuntaeka ae tiku ni matoa inanou. E taetae ma te kawaekoa tamau ae tangiraki, “Bonnie, tai bwarannanoi tibwanga aika kakoaua ibukin Kristo.”
I a tia ni iangoa ao n tataroakina ana reirei Tamau. I aki toki n titikirakinai ngkana I ataia ni koaua bwa tera nanon tai bwarannano n tibwanga aika kakoaua ibukin Iesu Kristo.
N ai aekami, I a tia n tabetai n teteirake ni moan Tabatin te namakaina ao ni kaota au kakoaua ibukin Kristo. A mwaiti taai aika I a tia ni kakoaua ibukin koauan te euangkerio n tain te angareirei. I a tia naba n ninikoria n reiakina te koaua ao n taetaekina rongorongon Kristo ngke I karaoa ana mwakuri ni mitinare.
Ma ngkai te bubuti aei e rangi n onoti ibukiu! Kanga ai aron ae kangai, Bonnie, kataia bwa e na aaki konako te aonnaba! Teimatoa kokoaua nakon am berita aika tabu ma te Tia Kamaeu. Ukora maiuakinan ana kakabwaia ni katoa bong, ao kona konaa ni kakoaua rinanon mwaakan te Tamnei ae Raoiroi ao kaotina ni maiura!”
Ti maeka n te aonnaba ae aki kororaoi, ma kaanganga aika a katika matara ma nanora ao ni uotira rikaaki ma tiaki nako karawa. N aiaroia Nibwaite n 3 Nephi 11, ti kainnanoa Iesu Kristo. Ko kona ni iangoia ngkana ngkoe, ibuakoia aomata ake a tia ni mena inanon te mangaongao ma te uruaki? E na aekakira ongoraean ana kakao te Uea iroum:
“Teirake ao nakomai nakoiu, bwa kam na karini baimi irarikiu, ao bwa kam aonga n namakin naba mwiin te nera i baiu ao i waeu, bwa kam aonga n ataia bwa boni ngai … Atuan te aonaaba, ao I a tia n tiringaki ibukin buren aonaaba.
“Ao … naake a ikoikotaki a otinako … temanna imwiin temanna … ao n tia n nooria ni mataia ao n namakinna ni baia, ao n tia n ataia … ao n tia ni kakoaua bon irouia1
Nibwaite aikai a ingainga ni kan mwananga ni karina baia irarikina ao n namakina mwiin te nera i Baina ao waena bwa aonga ni kona ni kakoaua ibon irouia ae ngaia bon te Kristo. Aekakin naba aei, a mwaiti aomata aika taan onimaki aika a tia ni kamatebwaia te Nu Tetemanti nte ririki aei a bon rangi ni ingainga n tataninga rokon Kristo. Ngaia are a mwaing nako man aia marae, aia tabo ni mwakuri, ao aia taibora ni katairiki ao ni iriria, n teimatoa n nim ma ngaia, ibetutu ma ngaia, ao n tekateka ma ngaia. Ao ngaira ti ingainga ni kan kakoaua ibon iroura n aekaia aomata aika uanao ake a taekinaki ni booki aika tabu? Aekakira kainanoan kakabwaia ake ti ukoukori ma ake irouia?
Ngke e kawariia Nibwaite Kristo n aia tembora, ao n ana kakao e aki tei ni kararoaa bwa a na taraia, ma a bon taua, n namakinna ibon irouia ae bon ngaia ni koaua te Tia Kamaiuia botannaomata. Tina kanga ni kaniira riki ao ni karekea ara kakoaua iroun Iesu Kristo? Aio tao bon iteran teuana te bwai are e kataia n reireinai iai tamau. E ngae ngke tao tiaki karekea te kukurei n aroia naake a bon tena n rabwataia ao n nakonako ma Kristo inanon ana tai ni mwakuri ni mitinare iaon te aba, rinanon te Tamnei ae Raoiroi ti kona n namakina Mwakana ni katoabong! E korakora riki nakon are ti kainanoia!
Ataeinaine ni katobibia te aonaaba a tia n reiakinai ae bati ibukin ukoran Kristo ao karekean ni katoabong, au kakoaua Irouna. Kariaia bwa N na tibwaua aia atatai uoman mai ibuakoia:
Livvy e a tia ni mamataku n te maungatabu ni kabuta inanon maiuna. Ni bon arona, ni mwengana ao a na riai ni botaki n aia utu ni mataku ni kabanea te tetere are nimaua. Inanon taai aika a tia n nako, te maungatabu iroun Livvy e reke bwa ana tai ni koro banna ao ni mwaninga nako ni matuu ae eaki kantaningaia. Ma te maungatabu n Okitobwa ae e nako e bon rangi ni kaokoro. E a bon onoti nakoina.
N te tai aio ao Livvy e a iangoia bwa e nang riki bwa te tia ongora ae tauraoi raoi. E kakeaa tangin taian kauring ake a roroko n ana tareboon ao n rawei rongorongo ake e riinga nanona mairoun te Tamnei. E rangi ni kukurei ngke e namakinna bwa iai baika a onoti ake e a tia te Atua n tangiria bwa e na ongora iai ao mani karaoi. Te babaire aio e a tia ni bita maeuna n te tai ae moan te tawe.
Tabeua te bong imwiina ao a kaoa raoraona nakon te tamnei ae e aki raoiroi. E ururing, “I namakin taian taetae ao tamnein te maungatabu bwa a okioki inanou, ao I ongo bwanaan nanou ae e karautaeka.” E reke naba ninikoriana n tibwaua ana koaua iaon te Tia Kamaiu n ana uoote.
Imwiin bwaai aikai, e taekinna, “Te bwai ae e rangi ni kakukurei bon, ngke I ongora bwanaau ae I kakoaua ae Iesu bon te Kristo. I namakinna bwa te Tamnei ae Raoroi e kamatoaa riki aei ibukiu”
Livvy e aki titiku man irirakin te maungatabui; e iangoia raoi, nanona ao tamneina, ao ni kunea te Tai Kamaeu ikekei.
Ao ngkanne ai manga Maddy. Ngke a toki ana utu man irirakin te taromauri, Maddy e rotaki n te mangaongao ao n aki koaua raoi bwa tera ae e na karaoia. E kunea bwai iai te bwai ae kakawaki ae bua. Ngke, ai 13 ana ririki, Maddy e a moana irakin te taromauri n ti ngaia. E ngae ngke te maroaa e kangaanga ao n aki karaua n tabetai, e ataia bwa e kona ni kunea te Tia Kamaiu n te taromauri ngaia are e tangiria bwa e na mena n te tabo are E mena iai. E taku, “N te taromauri, ao nanou e namakinna ae titebo ma I mena ni mwengau.”
E teimatoa Maddy n te kantaninga ae ana utu a tia ni kabaeaki ni kabane ibukin te maiu are akea tokina. E a moanna ni kairiiria mwanena ake a uarereke nakon te taromauri ao ni kamatebwai booki aika tabu ma ngaiia ni mwengaia. N tokin te tai ao e a manga iriia tinaia. Maddy e kaongoa tinana ana iango ni kan mwakuri ni mitinare ao ni butiia tinana ngkana e tauraoi nakon te tembora ma ngaia.
N te bong aei ao Maddy e a roko n te tabo ni kataineiai ibukin te Mwakuri ni Mitinare. E a mwakuri. E a kakoaua ibukin Kristo. Ana katooto e buokia ni kairiia ni kauoman ana karo bwa a na okira te tembora ao ana okira naba Kristo.
N aron Livvy ao Maddy, ngkai ti rineia bwa ti na ukoukora Kristo, te Tamnei e na bon kakoaua ibukina n aanga aika kakaokoro. Kakoauan te Tamnei aei e riki ngkana ti aki mamatam, tataro, tataninga, ao n teimatoa ni waaki nako. Arora ni kaan ma Kristo e rikirake rinanon taromauri aika bati nte tembora, rairannano ni katoabong, kamatebwaian booki aika tabu, irirakin taromauri ao reirei n Tabati, iangoan raoi ara kakabwaia n tamanuea, karekean berita aika tabu, ao kawakinan berita aika tabu. Aikai ake a bane ni kaoa te Tamnei bwa e na kaotaa ara iango, ao ni uota riki te rau ao te kawakinaki. Ma ti kawakinna n ai aron tibwanga aika tabu ni kakoauaa Kristo?
E mwaiti te tai ae i nanakon te tembora iai, ma ngkana I nebonebo n ana auti te Uea, ao e bitai. N tabetai ngkana I aki mamatam, I kunea bwa e kakai roko te baki irou, ma tabeua taai, I bwarua te Tamnei n iai bukina. N taai tabetai ao I a mwanewei naba tataro aika a okioki, ao I a tia naba n roko ao n ingainga ni karekea te reirei mairoun te Uea rinanon te tataro.
Iai te mwaaka ni karaoan waaki aika tabu bwa a na aki riki bwa kanoan baika ti korei bwa ti na karaoi ma a na kona n riki bwa bwaai ni kakoaua. Karaoana e na rangi ni waeremwe ma e na rikirake ni katoabong, ma ara kakaonimaki ni iririi ao ni iai bukina ae riai ma Kristo. Ngkai ti teimatoa ni kamwakura ana reirei, ti karikirakea ara koaua Irouna; Ti katamaroa reitakira ma ngaia ao Tamara are i Karawa. Ti kataia n riki n ai Arona.
Teuare e buakaka e karaoi beroro aika mwaiti n te aro are ena kanganga iai ongoraean bwanaan te Uea. Ara aonnaba, kakaewenakoara ao arora a na bon aki kona n rau, ma ti bon kona ao n riai ni baki ao n taka imwiin baike tina ongo iroun Kristo ma te matata raoi.2 Ti tangiria bwa tina katamaroai anuara ibukin ara koaua n te aro bwa tina kona ni kabotoa ara iango iaon ara Tia Kamaiu ni katoa bong.
E a tia ni bua Tamau inanon 11 te ririki ngkai, ma ana taeka a tiku ni maiu inanou. “Bonnie, tai bwarannanoi tibwanga ake kona kakoaua iai Kristo.” I kaoi ngkami bwa kam na raonai ni butimwaea ana kakao. Taratara Kristo n taabo ni bane―I berita bwa e bon mena ikekei!3 Te kukurei ni koaua e boboto iaon tatauraoira n kaniia Kristo ao ni kakoaua ibon iroura.
Ti ataia bwa n te kabanea ni bong ao, “ni kabane bubuaniwae a na katorobubua ao newe ni kabane a na taekinna” bwa Iesu bon te Kristo.4 I tataro bwa te bwai ni kakoaua aei e na riki bwa ara taneiai ao bon baika ti riai n rinanona ibukira ngkai—n aron ae ti butimwaai tibwanga aikai ma te kukurei ao ni kakoaua Iesu Kristo bwa e maiu!
O, I Tangiria. Ai kukureira ngaira n ana Mwakuri ni Kamaiu ara Tia Kamaiu, are e “karekea te maiu ae akea tokina ao te maiu ae mamate [ibukira] ni kabane.”5 I kakoaua raoiroina ao tamaroana ae bati inanon arana ae tabu, Iesu Kristo, amen.