“Te Tari Bradley R. Wilcox,” Riaona, Meei 2023.
Te Tari Bradley R. Wilcox
Te Moan Kauntira n te Beretitentii ni Kabuta n te Bootaki n Ataeinimwaane
Ririki ake mai imwaaina ngke e riki bwa te kauntira n te Beretitenti ni Kabuta n te Bootaki n Ataeinimwaane, te Tari ae Bradley R. Wilcox ao kainnabana, ae Debi, a kamwananga natia te mwaane ae 14 ana ririki ae tataua oin nanona bwa e na ira ana waaki te Roronrikirake (EFY) ae booaki i Brigham Young University.
A raraoma bwa “e aki namakina te tamnei inanona.” Iai kaokorona ngke e a okira mweengana—e a taua riki ma nanona ao ni kai karekei namakin aika a kaineti ma te maiu n tamnei. Ngkai, ririki ake imwiina, e beku n te bitiobiriki ao n reireiniia te roronrikirake n ana uoote.
Anne te bwai ae e nooria te Tari Wilcox ao ni kaokiokia n te tiamwa ae nako n tain te maungatabu ibukin Kakorakorakiia te Roronrikirake (FSY) ni kabuta te aonaaba ibukiia Aika Itiaki ni Boong aika Kaitira. Ni kaokiokia, koraki “ake aki koaua raoi bwa a tangiria bwa a na roko” a okira mweengaia n te aro ae rangi ni kaokoro ao a tamaroa riki.
Te Tari Wilcox—are e a tia ni beku bwa te Kauoman ni Kauntira n te Beretitentii ni Kabuta n te Bootaki n Ataeinimwaane n 2020 ao ni kamatoaki bwa te Moan Kaunitira n te maungatabu ni kabuta n Eberi 2023—e taku bwa e a tia n riki bwa te tai ae moan te kakukurei ngke e beku ibukiia te roronrikirake ni Boong aika Kaitira. Beretitentii ni Kabuta n te Bootaki n Ataeinimwaane ao Ataeinnaine a uaia ni mwakuri n aron ae taneiai te aba iai, ao “te maungatabu ibukin Kakorakoraia te roronrikirake ae te FSY, bwai ni kairi, ao maekatiin, a rangi ni uaana nakoia te roronrikirake ao a karekea te rikirake mai iai nakon are mai imwaaina.”
E bungiaki Bradley Ray Wilcox 63 ana ririki i Provo, Utah, USA, n Ritembwa 25, 1959, nakoia Ray T. Wilcox ao Val C. Wilcox. E ikawairake i Provo ma inanon ana tai n ataei e kabanea tabeua te ririki i Ethiopia.
Imwiin karaoan ana mwakuri ni mitinare ae bwanin taina i Chile Viña del Mar, e mareaki te Tari Wilcox ma Deborah Gunnell n te tembora i Provo Utah n Okitobwa, 1982. Bon kaaro aika aman natiia ao a maeka i Provo, Utah.
Te Tari Wilcox e reke ana beeba ae te bachelor ao te master mai Brigham Young University (BYU) ao ana beeba n taokita ibukin te reirei man te University i Wyoming. E riki bwa te burobeetia n te Tabo ni Mwakuri are e tararuai Booki aika Tabu ngkoa i BYU. N 1985, e a tia ni kababanea angin ana tai n tain te tiamwa nakon ana burokuraem BYU ae EFY.
E a tia n riki te Tari ae Wilcox bwa te bitiobi ao n te beretitentii n te titeiki, bwa te beretitenti n te Chile Santiago East Mition, ao n te baba n tararua ni kabuta n te Reirei n Tabati.