“Ko na Mena i Rou, ao Ngai i Roum; Ngaia are, Nakonako ma Ngai”
Ana berita te tia Kamaiu ae na mena iroura bwa e bon koaua ao n tauraoi nakon te membwa ae kawakina ana berita ae tabu n Ana Ekaretia ae kaokaki.
Te burabeti ni kawai ae Enoka, e kabwarabwaraaki n te O Tetemanti, Reirei ao Berita aika Tabu, ao Bwaeao ae Bati Boona,1 bwa e kammwakuraki ni katean te kaawa are Tion.
Te rongorongo man te koroboki ae tabu ni wetean Enoka bwa e na beku e kaotia bwa “e ongo te bwana mai karawa, ae kangai: Enoka, ae natiu, taetae ni burabeti nakoia te botanaomata aei, ao taekina nakoia—Raira nanomi, … bwa a moanna ni matoatoa nanoia, ao taningaia aikoa ongo, ao mataia aikoa noora ae raroa.”2
“Ao ngke e ongo taeka aikai Enoka, e bobaraki nako aontano … ao e taetae i matan te Uea, ni kangai: E aera ngkai I karekea te akoaki i matam, ao ngai bon te teinimwaane, ao a bane aomata n riribaai; bwa I aki kona n taetae raoi; e aera ngkai ngai am tia mwakuri?”3
Taiaoka ataia bwa n te tai are e weteaki iai Enoka bwa e na beku, e atai raoi mamaraana ma kabwakana. Ao I taku bwa ngaira ni kabane n te tai teuana ke teuana n ara beku n te Ekaretia bon aron raoi are e reke iroun Enoka. Ma I kakoauaa ana kaeka te Uea nakon ana titiraki ni bubuti Enoka bwa e boongana ao ni kaineti nakoira ni kabane n te bong aei.
“Ao e taku te Uea nakon Enoka: Waaki nako ao karaoa are I a tia n tuangko, ao akea te aomata ae e na niniko. Kauka wim, ao e na kanoaaki, ao N na anganiko te konabwai n taetae. …
“Nooria e mena Tamneiu i aom, ngaia are am taeka ni kabane N na kariaia; ao a na mwaing maunga imwaaim, ao karaanga ana bita kawaia; ao ko na mena irou, ao Ngai iroum, ngaia are nakonako ma ngai.”4
E riki Enoka bwa te burabeti ae korakora ao tabonibain te Atua ni katiaan te mwakuri ae korakora, ma e aki moana ana mwakuri n te aro anne! Ma, e rikirake ana konabwai inanon taina ngke e reiakinna bwa e na tiku ao n nakonako ma natin te Atua.
I tataro mwaaka ibukin ana ibuobuoki te Tamnei ae Raoiroi ngkai ti kaai n iangoa te reirei are e anganaki Enoka iroun te Uea ao tera nanona ibukim ao ibukiu n te bong aei.
Ao Ko na Mena Irou
E kakao nakoira ni kabane te Uea ae Iesu Kristo bwa ti na mena Irouna.5 Ma ti na kanga raoi n reiakinaki ao n roko n mena Irouna?
Te taeka ae mena e kaota te tiku n nene ao n teimatoa n akea te bwara n nano. E kabwarabwara Unimwaane Jeffrey R. Holland bwa “menara” ngkai te mwakuri nanona “‘[n] tiku—ma [n] tiku nako n akea tokina.’ Anne ana wewete n te rongorongo n te euangkerio nakoia … aomata … n te aonaaba. Nakomai, ma nakomai n tiku. Nakomai ma te onimaki ao te teimatoa. Nakomai ni koaua, ibukim ao ibukiia ni kabane rooro ake a riai n rimwiim.”6 Ngaia are, mena iroun Kristo ngkai ti teimatoa n ara taromauri nakon te tia Kabooi Maiura ao Ana mwakuri ae tabu, n taai aika raraoi ao n buakaka.7
Ti moana tikura iroun te Uea man mwakurian inaomatara n rinerine ni katokaa iaora Amona8 rinanon berita aika a tabu ao otenanti n te euangkerio ae kaokaki. Reitakira n ara berita ae tabu ma Tamara are i Karawa ao Natina ae tangiraki are e manga uti bon te kairi mai karawa n te nonoori, te kaantaninga, te mwaaka, te rau, ao te kimwareirei ae reitinako; bon te bwaa ae matoa9 are ti na katea iai aan maiura.
Ti tiku i Rouna man kateimatoaan kakorakoraara n ara reitaki n ara berita aika a tabu ma te Tama ao te Nati. N aron, tataro mwaaka nakon te Tama n aran Natina ae Tatangiria e kakorakora ao ni kamatoa ara reitaki n ara berita ma Ngaia.
Ti mena i Rouna man tauan ana taeka Kristo ni koaua. E kaanira ana reirei te Tia Kamaiu, ngkai naati ni berita ngaira, ae ti kaan Nakoina10 ao e na tuangira baike ti riai ni karaoi.11
Ti mena i Rouna man tauraoira ni mwakuri mwaaka n te otenanti n toa, rinanon ao uringan ara berita aika a tabu ao n rairi nanora ni koaua. Taura ni kanakin te toa bon te kakoua nakon te Atua bwa ti bon kukurei ni katokaa iaora aran Iesu Kristo ao n teimatoa n “aki toki n ururingnga”12 imwiin te tai ae uarereke ae baireaki ni ira buakon te otenanti ae tabu anne.
Ao ti mena i Rouna man ara beku nakon te Atua ngkai ti beku ibukiia Natina ao n ibuobuoki nakoia tarira ao mwanera.13
E taku te Tia Kamaiu, ”Ngkana ko kawakina au tua, ko na kabaeaki n au tangira; n aron ae I kawakina ana tua Tamau, ao e kabaeai n ana tangira”14
I a tia ni kakimototoa kabwarabwaraan tabuea kawai ae kona te Tia Kamaiu n mena iroum ao irou. Ao ngkai I kaoi ngkami ae Ana reirei n bubuti, ukeuke, ao karebwerebwe, ao n reiakinna iroum man mwaakan te Tamnei ae Raoiroi kawai riki ake ti kona ni karika Iesu bwa boton maiura n bwaai ake ti karaoi.
Ao Ngai i Roum
Ana berita te Tia Kamaiu nakoia taan iririia bon uoua arona: ngkana ti mena i Rouna, E na mena i roura. Ma e bon kona ni mena iroum ao irou Kristo—n tatabemanira ao irou? Te kaeka nakon te titiraki aei bon eng!
Ti reiakinna n ana Boki Moomon, ana reirei ao ana kakoaua Aramwa nakoia ake a akea aia bwai are rawawataia e totokoiia bwa ana nanorinano. N ana kaetieti,e kabotaua te taeka nakon te koraa ae riai n unikaki ao ni kamwarakeaki, ao e kabwarabwara “te taeka” bwa te maiu, mition, ao ana mwakuri n anga karea Iesu Kristo.
E taku Aramwa, “Ngkana ngaia anne, e na bwakaringkami te rekenikai; ma ngkana e aki, ao a na taratara nako matami ao moanna ni kakoaua Natin te Atua, bwa e na roko ni kabooia ana botanaomata, ao bwa e na maraki ma ni mate bwa e na karaoa te mwakuri ni kamaiu ibukin aia bure; ao bwa e na mangauti riki man te mate, ae e na kakoroa bukin te mangauti, bwa aomata ni kabane a na tei i matana, bwa a na motikaki taekaia n te kabanea ni bong ni motikitaeka, ni kaineti ma aia mwakuri.”15
Anganakira kabwarabwaraan “te taeka” iroun Aramwa, taiaoka iangoa te reitaki n te kairiiri ae kaungaaki are e kaotia imwiina.
Ao ngkanne … I tangiria bwa kam na unika te taeka aio inanomi, ao ngkana e moanna n riki rake kamwarakea n ami onimaki. Ao nooria, e na riki bwa te kai, ae bwebwe rake i nanomi nakon te maiu are aki totoki. Ao ngkanne ke e anganingkami te Atua kabebetean uotami, rinanon ana kimwareirei Natina. Ao kam kona ni karaoi aikai ni kabane ngkana nanomi.”16
Te koraa ae ti riai n unikia i nanora bon te taeka—bon te maiu, mition, ao ana reirei Iesu Kristo. Ao ngkana e ribanaaki te taeka man te onimakim e na riki n aron te kai ae rikirake i nanora nakon te maiu ae akea tokina.17
Tera ngkoa te kanikina ae te aroka n miin Riaai? Te aroka e kona ni kabotauaki bwa e tei ibukin Iesu Kristo.18
Tariu ao mwaneu aika kam tangiraki, e bon mena te Taeka i nanora? A bon koreaki inanora koaua man ana euangkerio te Tia Kamaiu19 Ti nakoina teutana imwiin teutana bwa ti aonga n riki n ai Arona? E rikirake i nanora arokan Kristo? Ti teimatoa n riki bwa “[aomata] aika a boou”20 i Rouna21
Tao mwaakan te korakora aei ae kaira Aramwa n titiraki, “Ko a tia ni bungian te tamnei mairoun te Atua? Kam a tia ni karekea tein tarakina i moami? Kam a tia n rinanon te bitaki ae korakora aio inanomi?”22
Ti riai n taainako n uringa ana kaetieti te Uea nakon Enoka: “Ko na Mena Irou, ao Ngai iroum.”23 I kakoaua ana berita te tia Kamaiu ae na mena iroura bwa e bon koaua ao n tauraoi nakon te membwa ae kawakina ana berita ae tabu n Ana Ekaretia ae kaokaki.
Ngaia are Nakonako ma Ngai
Te Abotoro Bauro e kauringiia taan kakoaua ake a tia n karekea te Uea: “Ngaia are kam na nakonako naba i nanona.”24
Te nakonako inanon ao iroun te Tia Kamaiu e kaoti uoua aron te reirei ae kakawaki: (1) ongotaeka nakon ana tua te Atua, ao (2) ururinga ao karinei berita aika a tabu ake a reitira ma te Tama ao te Nati.
E taekinna Ioane:
“Ao aio te aro ae ti ataira iai bwa ti bon ataia, ngkana ti kawakina ana tua.
“Ao e kangai, I ataia, ma e aki tau ana tua nako, ao bon te tia kewe ngaia, ao e aki mena te koaua i nanona.
“Ma ane taua ana taeka, i nanona ao e bon kakoroaki raoi tangiran te Atua: ti ataira iai bwa ti mena i nanona.
“Ane e taku bwa e maeka i nanona ao e riai bwa e na nakonako, n te aro are e nakonako iai Teuarei.”25
E weteira Iesu, “Nakomai, Iriirai”26 ao “Nakonako ma Ngai.”27
I kakoauaa bwa ngkana ti waaki nako n te onimaki ao n nakonako n te nimamannei n tamnein te Uea,28 ti kakabwaiaaki ma te mwaaka, kairiiraki, kawakinaki, ao te rau.
Te Kakoaua ao te Berita
E kabwarabwara Aramwa te bubuti ae mangori mairoun te Uea nakoia aomata ni kabaneia:
“Nooria, e kanakoa te kakao nakoia aomata ni kabaneia, bwa te bai n nanoanga e aroraki nakoia, ao e taku: Rairinanomi, ao N na butimwaeingkami.
“… Nakomai nakoiu ao kam na kana uaan te kai ni kamaiu; eng, kam na kanna ma ni mooi n te kariki ao n te ran ni kamaiu n akea tukami.”29
I katuruturua ana bubuti te Tia Kamaiu. E korakora nanona ni kakabwaia ma Ana akoi ao nanoanga ni kabaneia aomata ake a maiu ngkai, ake a tia n maiu ngkoa, ao ake a na manga maeka iaon te aba.
Tabeman kaain te Ekaretia a kakoauaa te reirei, tuua, ao kakoaua aika a kaokiokaki man te tabo n taetae aei n te tabo ni maungatabu ao n taabo ni bootaki ni kabuta te aonaaba—ma a bae ni korakai ni kakoauai koaua mai karawa aikai ni maiuakinna ao n aroia nako. A kakoaua raoi ao ni beku raoi, ma reitakin aia berita ae tabu ma te Tama ao Natina are te Tia Kabooua Maiura e tuai raoi maiuakinaki ao n karikaki ni koaua ni maiuia.
I berita bwa man mwaakan te Tamnei ae Raoiroi, ko na ataia ao n namakaina koauan te euangkerio ae I kataia ni kabwarabwara ibukim—ibukim ngkoe ao n tatabemani ngkami.
I kimwareirei n taekinna bwa Iesu Kristo bon Tia Kamaiu ae maiu ao Tia Kabooi maiura. Ngkana ti mena i Rouna, E na mena i Roura.30 Ao ngkai ti nakonako ma Ngaia, e na kakabwaiaira n uoti uaa aika a bati. I kakoaua n arana ae tabu te Uea Iesu Kristo, amen.