“Beretitenti Emily Belle Freeman,” Riaona, Meei 2023.
Beretitenti Emily Belle Freeman
Beretitenti ni Kabuta irouia Kairake n Ataeinnaine
Tao a mwaiti aomata ae a tia n tataneiei ma Emily Belle Freeman bwa te tia taetae, tia korokaraki, te podcaster, ao te tia reirei. Ma ibukiia naake a tuai kinaa—ao ibukiia naba ake a kinaa—e kantaningaia Beretitenti Freeman bwa te moan bwai are a kinaa iai bwa iai ana koaua ae korakora ao ni matoa iroun Iesu Kristo.
“Bon rinanon taneiai aika a onoti ma Ngaia are I a ataa iai Tamara are i Karawa ao ni karekea te kaotioti,” e taku Beretitenti Freeman. “Anne e riki bwa te bwai ae rangi ni kakawaki inanon maiu—te iraorao ane e teimaan anne ma Ngaia.”
Ngke e moana ana mwakuri bwa te tia korokaraki ao te podcaster, e titirakinna irouna bwa tera ae tangiria ni kabanea ana iango iaona. Te kaeka bon kakoauaan Iesu Kristo ao Ana Mwakuri ni Kamaiu.
E bungiaki n Ritembwa 31, 1969, i Boston, Massachusetts, USA, ngke tamana, ae McKinley McVichie Oswald, e reirei i Harvard University. E taku Beretitenti Freeman bwa tinana, ae Leslie James Oswald, bon ngaia temanna mai buakoia aine “ae e rangi ni korakora ao e mwaiti ana tangira.”
Beretitenti Freeman, bon te ikawai ngaia ibuakoia onoman ataei, e ikawairake i Sandy, Utah. E bitaki maiuna ngke e roko n te roro ni ikawai nte kauarinan ngke a weteaki ana karo bwa a na kairiiri n te Mition i California Ventura. Ngaia ma tarina ao mwaanea iai naba tibwangaia ae a karaoia n taian mition, zone, ao ni maungatabu n titeiki ma aia karo. Imwiin te kaurinan, e kitana California bwa n reita ana kamatebwai i Brigham Young University.
Ngke Gregory Garth Freeman, are e beku n te California Ventura Mition, e okira mweengana i Bountiful, Utah, a tuangnga ana taan kairiiri n te mition bwa e na nako ni mataku iroun natiia te aine n teuana ana marooro i Utah. A moanna aia iraorao Emily ao Gregory n te tai ae waekoa imwiina ao n mareaki n Ritembwa 1989 n te Los Angeles California Tembora. Iai natiia aika niiman.
Amwaiti boki ae koreia Beretitenti Freeman ao n tia n anga ana marooro n taian maungatabu aika a kakaokoro, bootaki n angareirei, ao bobootaki. E angareirei inanon ririki aika a mwaiti n ana Bootaki n Reirei te Ekaretia ao e tia ni beku bwa te tia reirei n Reirein te Euangkerio ao te beretitenti n Bootaki n Ataeinaine ao Bootaki n Aine n te uoote.