2022 Ribooti: Tabeakinaia Naake a Kainnano

Ana ribooti te Ekaretia n te ririki ibukin 2022 iaon tabeakinaia naake a kainnano e kaotia bwa te mwakuri aio e kaairaki inanona te mwaiti ae riaon $1 te birion te kabanemwane, 6.3 te mirion te aoa ni karaoan mwakuri n anganano, ao 3,692 mwakuri ni karikirake nakoia botanaomata inanon 190 aaba ma taabo ake a tautaekanaki.

E nako te mwane anne nakon te buoka man angabwai n aki mamatam, te buoka nakoia botanaomata, bwaai ake a tibwatibwaaki man ana auti ni kaikobwai te bitiobi ao titoa ni karaobwai man Deseret, ao taabo ni mwakuri n aron ribanaakin nanai ni man ao uanikai, taabo ni karao amwarake, Family Services counseling, ao taabo ni kabae ara ibukin karekean te mwakuri.

Te kabanea ni bubura n angamwane ae e anga te Ekaretia inanon 2022 e rin ibuakona $32 te mirion nakon te World Food Programme (WFP) ao $5 te mirion nakon ana burokuraem te UNICEF n te aonaaba ni kabuta ibukin amwarake aika bongana ni karikirakea marurungin te rabata, ike e na kona ni buokiia ataei ake a bakitaia rabwataia.

“Moan te marau nanon Iesu ma ana tangira ibukiia ataei aika a uarereke,” e taku te Beretitenti ni Kabuta n te Bootaki n Aine ae Camille N. Johnson ni katanoataakin te angamwane nakon te WFP. “E tang ngkana e nooria bwa a bora ni baki. Ao E kimwareirei ngkana iai naba teutana te mwakuri n ibuobuoki nakoia.”

Tabeua riki angamwane aika moan te bongana e kaairaki inanona $5.1 million nakon te American Red Cross (n raonaki ma ae riaon riki 1 te mirion te iunite mairouia ake anganano n anga raraaia irouia Aika Itiaki ni Boong aika Kaitira) ao irarikina riki $5 te mirion nakon te Rotary International ibukin Iti n totokoi aoraki ibukin te polio ao te tina ae aoraki inanon ana tai ni bikoukou ao te man n aoraki ae reke irouia ataei aika a tibwa bungiaki.

Iai naba ana angamwane te Ekaretia ni buoka rikiraken mwaitiia aomata ake a rootaki ni kabuanibwai aika a karina n riki ao te bobuaka imarenaia aomata ao waaki nikairiri ae bangaomata are a rootaki maiuia tabeman. Aei e raonaki ma kamanoakiia taan birinako mai Ukrain; naake a maiu imwiin ana urubwai te tsunami i Tonga; aomata ake a rootaki n te angaibuaka i Kentucky, Florida, ao South Africa; ao aomata ake a rootaki n te kamangao n te tua man te Democratic Republic of the Congo.

“Te tangira ao te nano ni kan ibuobuoki e taraa ni karawawata,” e taku Julia, kaain te Ekaretia i Austria are e buokiia taan birinako n tabeua aban Eurobe ake i Mainiku. “A katikaki nanoia aomata i bon imarenaia.”

Te Ekaretia e buoka naba karokoan te iti i Navajo community i Utah, ao kaain te Ekaretia a mwakuri n ibuobuoki ma Sikhs n te United Arab Emirates. Aika Itiaki ni Boong aika Kaitira ake a ikatoatoa ni mwakuri ma te NAACP iaon te mwakuri ni karikirake n te komiuniti ibukiia tiina ake a maeka i Memphis i Tennessee, USA, ao naake a kainnanoi amwarake ni kamarurung i San Francisco, California. Ao ni Kaotaa te Aonaaba ao iai taabo ni kanakoi angamwane ke ibukin rikoan taian angmwaane ibukin kabooan amwarake ao bwaai riki tabeua ibukiia naake a kainnano inanon 28 aaba ni kabuta te aonaaba.

E karaoaki 6.3 te mirion te aoa ni mwakuri n anganano n aki kabooaki n 2022 n ikotaki ma mwakuri n ibuobuoki n taabo n ribanaakin taian nanai ni man ao uanikai, orchard, tiin ni karaoa amwarake, ao ana titoa ni karaobwai Deseret; mition ake a tararuai maiuia ake a kainnano; ao te kaitiaki imwiin kabuanibwai aika a karina n riki.

N raonaki ma 3,692 karikirake ibukin te buoka nakoia botanaomata, iai 16,285 mwakuri ni karikirake aika a boou ake a tararuaaki man JustServe.org, n ana tabo te Ekaretia i aonraain ae akea boona ibukin te angnano e tauraoi inanon 14 aaba. E reitiia aomata aron bwaai ni mwakuri nakon tibwanga ni karaoan mwakuri n ibuobuoki are e bootau ma nanoia ao te tabo.

Te Bitiobi n Tararua ae Gérald Caussée e arana JustServe “te kakamwakuri ao te anga are ti kona ni maiuakin ara berita aika tabu” ao “ni kakabwaiai ao ni kakorakorai [ara] komiuniti” (in “The Blessings Will Follow: Benefits of Implementing JustServe” [video], ChurchofJesusChrist.org).

E a tia naba te Ekaretia n reitanako ana konabwai n te mwioko ni karaoan te beku iaon tararuaan ara otabwanin. Man 2018, e a tia ana etekuata te Ekaretia ni kakeerikaaka mwaitin kabonganaan te ran ni katoa ririki man 38 te mirion te kaaran. E riaon riki te mwaiti ae 500 autinibootaki ni kabuta te aonaaba aika a maiu aia iti man te solar ke man korakoran taai. E a tia ana tabo ni karaobwai Deseret ni karaoi 73 te mirion mwiin amwarake ake a mena n te kaokimaange bwa a na manga moan kabonganaaki. Ao ana Tabo ni Boreeti ao ana Tabo n Tibwatibwa te Ekaretia e karaoi kaokimaange iaon 4,000 te tan taian beeba, mwakoro ni biti, kaatibooti, ao te buraetitiki.