Mwakuri n Ibuobuoki

Iroun Unimwaane Gerrit W. Gong

Man te Kooram n Abotoro n te Tengaun ma Uoman

Ti a reitaki nakoia tabeman ao n ibuobuoki n ai aron te Tia Kamaiu, riki nakoia naake tibwangara bwa ti na buokia ma te tangira.

Tariu ao mwaneu aika kam tangiraki, ti butimwaai ngkami nakon te maungatabu ni kabuta!

Imwin te maungatabu ni kabuta n Okitobwa ae nako, Titita Gong ao Ngai, ti ririaki inanon te auti ni maungatabu ni kamauri ao n ongora aron ami taneiai n te euangkerio.

Ara membwa mai Mexico e taku, “Hoy es el tiempo de Mexico.”

Ti ataia bwa ngaia Gilly ao Maria bon raao mai Engiran. Ngke e kaaina te Ekaretia Maria, e bua ana tabo ni maeka. E kakao Gilly nakon Maria bwa e na maeka i rarikina. E onrake n te onimaki ngke e kangai Gilly, “I tuai man nanokokoraki bwa e raonai te Uea.” N tain te maungatabu, E a manga kaitiboaki Gilly ma te mitinare n aine are e reireinna 47 te ririki n nako.

Jef ao kainnaba, Melissa, aio ana moantai ni kaea te maungatabu ni kabuta. Te tia takakaro Jeff n te baseball (nnena ae te rawebooro) ao ngkai e a riki bwa taokitan te iti ni kamatu. E taku nakoiu, “I rangi ni mimi, I a waaki ngkai nakon au bwabetito ibukina bwa I namakinna ae bon aio te aroaro ae koaua man eti.”

Imwain aei, e kabwarabure Melissa nakon toan Jeff ni kakawari, “Jeff e aki tangiriia aomata aika ‘kabaraaki mainaina’ n ara auti.” E taku te tari n ibuobuoki aei, “N na kakaea au anga.” Ngkai Jeff ma ngaia a riki bwa raao ni koaua. Ngke e bwabetioaki Jeff, I kaitibo ma kaain te taromauri Aika Itiaki ni Boong aika Kaitira ake a tangiraki irouia Jess, Melissa, ao natiia te aine ae Charlotte.

Ngaira taan iriira Iesu Kristo, ti ukora aron buokaia aomata n aron are E karaoia ibukina bwa iai aika kakantaninga ni kan bitaki.

Ngke e tuangai Peggy bwa kainnabana ae Ioane, imwin 31 aia ririki n tekateka, bwa e nang bwabetitoaki, I titiraki bwa tera te bitaki.

E taku Peggy, “Ngai ao Ioane ti kamatebwaia te Nu Tetemanti Nakomai, Iriirai, ao e titiraki Ioane iaon ana reirei te Ekaretia.”

E taku Peggy, “Ti a kaoia mitinare.”

E taku Ioane, “I aki kan kaoia mitinare—ma ti ngkana e raonai raoraou.” E a tia te tia kakawara Ioane n riki bwa raoraona ae onimakinna, iaon 10 te ririki. (I taku inanou, Tera ae e na riki ngke arona bwa e toki rorokon te tia kakawaria imwiin teuana, uoua, ke ruaiwa te ririki?)

E ongora Ioane. E wareka Ana Boki Moomon ma nanona ni koaua. Ngke a kakao mitinare nakon Ioane bwa e na bwabetitoaki, e kangai, eng. E taku Peggy “I bwaka man au kaintekateka ao n tang.”

E taku Ioane, “I bitaki ngke I kaniai nakon te Uea.” Imwiin aei, Ioane ao Peggy, a kabaeaki n te tembora ae tabu. Ritembwa ae nako, e mate Ioane n ana ririki ae 92. E taku Peggy, “E bon rang tamaroa teuae Ioane, ma e bitaki nakon te aroaro ae tamaroa imwiin bwabetitoakina.”

Titita Gong ao ngai ti kaitibo ma Meb ao Jenny rinanon te reitaki n te intanete n tain te COVID. (Ti kaitibo ma taanga aika tamaroa ao aomata rinanon te reitaki n te intanete n tain te COVID, ike a kabwarabwaraki iroun aia beretitenti n te titeiki.)

Meb ao Jenny a taku bwa raraomaia ni maiuia e karika iangoana ngkana aia mare n te tembora e na teimatoa, ao ngkana e kona, tera arona. A kakoauaa bwa ana Mwakuri ni Kamaiu Iesu Kristo ao aia berita aika tabu a kona ni buokia.

Iangoa kimwareireiu ngke Meb ao Jenny a karekei aia beba ni kariaia n rin n te tembora ao ni manga uaia ni kawara ana auti te Uea. Imwiina ao e kuri ni mate Meb. Bon te kakabwaia bwa Meb ao Jenny a tia ni manga kamatoa aia reitaki inanon te berita ma te uea ao bon imarenaia, ao a namakina te boutoka mairouia raoraoia.

N te tabo are I nako iai, I reireiaki irouia naake a ibuobuoki ao n tabeakiniia aomata n aron are E karaoia te Tia Kamaiu.

I Peru, Titita Gong ao Ngai, ti kaitibo ma Salvador ao tarina ma mwanena.¹ Salvador ao tarira ma mwanena bon akea aia karo. E roko ana rekenibong Salvador. Taan kairiri n te Ekaretia ao membwa ake a kawara te utu aei a anganai te unga n nano. “Te aro ae itiaki man aki barekabon … bon aei, Kawaraia naake akea tamaia ao aine ake a mate buuia,”² “buokaia ake a mamaara, tabeki baai ake a bwaka, … kakorakorai bubuaniwae ake a tura.”³

I Hong Kong, te beretitenti n te kooram n unimwane, e taekinna bwa e teimatoa aia kooram ni karekea 100 te betienti ngkana a intawiu ibukin te mwakuri n ibuobuoki. “Ti tataromwaaka ni baireia bwa antai aika a na itoatoa bwa a aonga aomata n ibuobuoki ao ni buokaki,” e taku. “Ti teimatoa n titirakiniia taan ibuobuoki aikai bwa antai ake a tia ni buokiia. Ti aki kabwara baera, ma ti buokiia taan ibuobuoki ake a tabe ibukiia ara botanaomata.”

I Kinshasa, Democratic Republic of the Congo, Beretitenti Bokolo, e karakina kaainakin te Ekaretia i Buranti irouna ma ana utu. N te bong teuana, ngke e wareka ana kakabwaia mairoun te tamanuea, e kairaki te Tari Bokolo iroun te Tamnei bwa e na oki ma ana utu nako DR Congo. E ataia Te Tari Bokolo ae a na kaitara ma kakaewenako aika bati ngkana a oki rikaki. Ao aia ekaretia, Ana Ekaretia Iesu Kristo ibukiia Aika Itiaki ni Boong aika Kaitira, e tuai n tei i Kinshasa.

Ma, inanon te onimaki, n aroia aomata aika bati, te utu ae te Bokolo a ira ana kaetieti Tamnein te Uea. I Kinshasa, a buokiia ao ni kakabwaiaia kaain rarikiia, n tokanikai iaon aia kangaanga, ma ni karekei kakabwaia n rabwata ao n tamnei. N te bong aei, a kimwareirei ngkai e a tei ana auti te Uea i abaia.⁴

Te aomata ae rairaki e buokaki man te banna ae tamaroa. Ngke te ataeinimwaane, e kabanea ana tai n tetekateka iaon te bike. N te bong teuana, e taku, “I noora te ataeinnaine ma oneana ae raba raoi iai.” Ibukin mimiina, e nako n titirakina te ataeinnaine ae botonaine aei bwa bukin tera e kunnikainna n oneana arei. Ngaia boni kaain Ana Ekaretia Iesu Kristo ibukiia Aika Itiaki ni Boong aika Kaitira ao e titirakinna ma te moangare, “Ko aki kan roko n taromauri n te Tabati?” E kangai, eng.

Ririki aika a nako, ngke ti uaia ni mwananga ni karaoi taber, Unimwaane L. Tom Perry e karakina ana ibuobuoki ma toana nakon te aine are e maeka n tii ngaia n te tabo ae Boston. Ngke a kawaria Unimwaane Perry ma toana, e kauringiia te aine aei, “Karina ami beba ni kariaia n rin n te tembora iaan te mataroa.” E tii kona ni kauka te roka ae koro matoana ao ni kauka te mataroa ngkana e noora te beeba aei.⁵ Eng, I aki kangai bwa taan ibuobuoki a riai n iai aia beba ni kariaia nakon te tembora. Ma e kan te iango ae kangai bwa inanon aia ibuobuoki naake a kawakini aia berita, a uki rokan mweenga ma naano.

Unimwaane Perry, e anga naba te reirei ae kangai. E taku, “Anganiia taan ibuobuoki tabeia ae bon tau, are e a tia n tataroakinaki, man kaan nakoia n te aro bwa e angaraoi te mwamwananga nako iai.” E na bae n anga ana reirei, “Waaki moa ma naake a rangi ni kainnanoa te kakawari. Ao kaireitia ngkanne ma naake a tauraoi ni butimwaai ao ni kukurei ni kawaraki.” Aio ana motika, “Te kakaonimaki ae reitinako e karokoi kakai.”

Te ibuobuoki ae rietaata man tabu riki⁶ e reke ngkana ti tataro ibukin “ana tangira ae kororaoi Kristo”⁷ ao ni iriira te Tamnei. E reke naba ngkana beretitentii n kooram n unimwane ao Bootaki n Aine, iaan ana kairiiri te bitiobi, a tararua birin te mwakuri n ibuobuoki. Taiaoka anganiia ataeinimwaane ma ataeinnaine te tibwanga are a na katoaia man reireiaki irouia taan ibuobuoki, mwaane ao aine aika mwaatai. Ao taiaoka anganiia te roro ae rikirake te tibwanga ni kaungaia taan ibuobuoki mwaane ma aine.

N taabo tabeua n te Ekaretia, iai te kabwaka n te ibuobuoki. E taku riki bwa a ibuobuoki nakon ae a buokaki. Ti aki tangira te kabwara bae. Ao n angin te tai ti riai ni karaka ara ibuobuoki nakon ae tii te kamauri ke te titiraki ae kangai “Tera iangoaki?” n tain te kaitibo. N taabo aika mwaiti, ti kona ni reitaki, ao n ongora kawaia aomata, ao ni karekea te reitaki ae tamaroa ngkana ti kabatiaa riki ara kakawari nakon mwengaia. A kona ni biti maiu taian kakao. Ngkana a buokira taian kakao ni karaoi man kawakini ara berita aika tabu, ti kaania te Uea ao ti itangitangiri imarenara.

E taekinaki bwa naake a ataa raoi aan te mwakuri n ibuobuoki e raka riki ae a karaoia nakon are mai mwaina nakoia naake a aki oota iai. Ti a kakorakora riki, n aron are e na karaoia te Tia Kamaiu. N aron mwanewen kunara ae kangai, bon “kakabwaiakira te ibuobuoki ao te tangira.”⁸

Kauntira n te uote, kooram n unimwaane ao Bootaki n Aine, taiaoka kakauonga nakon te Tia Kawakin Tibu ae Raoiroi ao buokiia n “ukeriia akana a bua, … ni kaokiia ake a tiotionako, … ni kabaea are e uruaki, … kamarurunga ane e aoraki.”⁹ Ti kona ni mwaneia “anera ake aki ataia”¹⁰ ngkana ti karekei ruu n Ana auti n iruwa ibukiia ni kabane.¹¹

Te ibuobuoki ae nanonaki raoi e kakabwaiaia utu ao aomata n tatabemaniia; e kakorakorai naba uoote ao mwaanga. Iangoa am uoote ke am mwaanga bwa kanga te tabo ae tabu. Ngkana ti taraia man te kabotau ae te kai te oriwa n Ana Boki Moomon, Uean te nne ni kurebe ao ana toro a uoti uaa aika kakawaki ao a kakorakorai aroka naba man te ikarekebai inanon korakoraia ao mamaraia aroka nako.¹² E aki toki n kangai Uean te nne ni kurebe ma Ana toro, “Tera riki ae I kona ni karaoia?”¹³ A uaia, ni kakabwaiai aomata ma mweenga, uoote ma mwaanga, rinanon te ibuobuoki ae nanonaki man iangoaki raoi.¹⁴

Te ibuobuoki—te kawakin tiibu—e karika ara nne ni kurebe bwa “teuana te rabwata”¹⁵—te buakonikai ae tabu. Aroka nako n ara buakonikai bon te riki n te utu ae maiu. Wakaa ao mwaanga a bae. Te ibuobuoki e kakabwaiaia rooro nako. Ngkana e kainnanoaki te ibuobuoki, bitiobi aika rabakau, ao beretitentii n kooram n unimwaane ao Bootaki n Aine a tabeka ae kangai, “Antai taan n ikatoatoa n te mwakuri n ibuobuoki?” Kauntira n Uoote ao intawiu ibukin ibuobuoki a aki tii ukeri kakaewenako ma kangaanga ma a karekea te konabwai n noori ma ni kimwareirei ni bain te Uea n akoi inanon maiura n ara ibuobuoki n aron are E na karaoia Ngaia.

Ara Tia Kamaiu bon te banna nakoira ae kororaoi.¹⁶ Ibukina bwa E raoiroi, E kona ni waaki ni karaoa ae raoiroi.¹⁷ E kakabwaia temanna ao ake 99. E kaota bannan te ibuobuoki. Ti riki n ai aron Iesu Kristo ngkana ti ibuobuoki “nakoia … ake a mangori” n aron are E na karaoia,¹⁸ ngkana ti tangiriia kaain rarikira n ai aron tangirara i bon iroura,¹⁹ ngkana “ti itangitangiri imarenara; n aron are E tangiriira,”²⁰ ao ngkana “iai ane rietata ibuakomi, karikia bwa ami tia ibuobuoki.”²¹

E ibuobuoki Iesu Kristo. A ibuobuoki anera.²² Taan iriira Iesu Kristo “a ibuobuoki imarenaira,”²³ “a kimwareirei ma naake a kimwareirei, ao a tang ma naake a tang,”²⁴ “a tararuai [ao] … a kamwarakeia [te botanaomata] ni bwaai ake a irekereke ma te raoiroi,”²⁵ “uringiia … ake aki kaubwai ao ake a kainnano, aoraki ake a rootaki,”²⁶ kaota Arana bwa e na kinaaki rinanon ara ibuobuoki.²⁷ Ngkana ti ibuobuoki n ai Arona, ti noori Ana kakai ao ana kakabwaia.²⁸ Ti karekea “te ibuobuoki ae rianako tamaroana.”²⁹

E na roko te kua n rabwatara. Ma inanon ana mwakuri ti “aki kua ni karaoan ae raoiroi.”³⁰ Ti karaoa ara kabanea n tamaroa, ma ti aki kabirimwakaira riaon korakorara,³¹ ma ti kakoauaa, ana reirei te Abotoro Bauro, bwa “Te Atua e tangira te tia angaanga ae kukurei.”³² Bwa te Atua “ae e anga te koraa nakon te tia ununiki e anga naba te kariki ibukin te amwarake, ao ni kamwaita are e karekea te koraa.”³³ Are nanona bwa, Te Atua, e kabatiai “bwaai n te mwaiti ae rawata.”³⁴ Naake “a kabatiaa n unikia, a karekea naba ae bati.”³⁵

N taabo ake ti mena iai n tain te Itita aei, ti riai n reitaki ao n ibuobuoki n aron ae karaoia ara Tia Kamaiu, riki nakoia naake ti na buokiia ma te tangira. Ni karaoan anne, ti na kaniira riki nakon Iesu Kristo ao nakoira n tatabemaniira, n riki n ai Arona ao taan iriira Iesu Kristo are E tangiria bwa ti na riki nako iai. N arana ae E tabu, Iesu Kristo, amen.

Bwaai aika a na taraaki

1. Titita Gong ao ngai ti reitaki ma Unimwaane Enrique ao Titita Ruth Fallabella n te mwananga aei. Salvador ao tarina ma mwanena a ikawai ngkai nakon tamnei aikai ma bon kaain naba te kaawa n ibuobuoki irouia taari ao mwaane ake a ibuobuoki ma te akoi ae aki bwaka.

2. Iakobo 1:27.

3. Reirei ao Berita aika Tabu 81:5.

4. Tamnein Beretitenti Bokolo ao ana utu n te tai are Titita Gong ao Ngai ti kaitibo ma ngaiia.

5. Taraa L. Tom Perry, “Strive to Be Temple Worthy” (Ricks College devotional, Sept. 19, 1989), byui.edu/devotionalsandspeeches.

6. Taraa Russell M. Nelson, “Ministering,” Liahona, May 2018, 100.

7. Taraa Moronaai 7:47–48; taraa naba kiibu 4–8.

8. “Have I Done Any Good?,” Hymns, no. 223.

9. Etekiera 34:16. Inanon Etekiera 34, e kamatoa ana kauring te Uea nakoia taan kawakin tibu i Iteraera te bwai ae e na riki ngkana a aki taraaki tiibu ke ni kamwarakeaki.

10. Ebera 13:2.

11. Taraa Ruka 2:7, 10:33–34.

12. Te botoniango aei e kaoti inanon Iakobwa 5, n reitaki ma kiibu 17–18, 20, 24, 75. Kiibu 28 E kauringira bwa “Ao e koro bukina bwa a uaaia Uean te nne ni kurebe ma te tia mwakuri n ribanai ni kabane uaan kaai i nanon te nne ni kurebe.” (kamatataki riki).

13. Uoua ana titiraki te Uea ni kangai, “Tera ae I kona ni karaoia riki ibukin au nne ni kurebe?” (Iakobwa 5:41, 49; kamatataki) ao teuana, “Tera ae I kona ni karaoia riki n au nne ni kurebe?” (Iakobwa 5:47; kamatataki).

14. N te oi n iango n Motiaea 18:21 ao Mataio 25:40.

15. Taraa Iakobwa 5:74: “A riki bwa teuana te rabwata; a boraoi uaa”; naba, n aron, 1 I-Korinto 12:12: “Ngkai ti teuana te rabwa, ao bwain te rabata ni kabane, ngkai a boni bati, bon te rabwata ae ti teuana; ao ai aron naba Kristo.”

16. E kaonaki koroboki aika tabu n katoton aron ana ibuobuoki Te Tia Kamaiu. N aron, ibuakon te natanaomata, E ibuobuoki nakon te aine are e taua rabin Ana kunnikai, ao E anga te kamarurungaki nakon te aine anne (taraa Mareko 5:24–34). Ke, ngke “a rang tabe ao e aki reke aia tai n amwarake” (Mareko 6:31), Iesu ao Ana reirei a bon rangi ni kua rabwataia ao a kakaea aia tabo ni motirawa. Ma, ngke e noora te natanaomata ae akea aia tia kawakin tibu, ara Tia Kamaiu e kamaiuia, e reireia, ao e kamwarakeia. E bobotii bwaene ni bwerena ao n ika imwina (taraa Mareko 6:31–44).

17. Taraa Mwakuri 10:38.

18. Taraa Mataio 25:35–40.

19. Taraa Mareko 12:31.

20. Ioane 13:34.

21. Mataio 20:26; taraa naba Ruka 22:26–27.

22. Taraa, n aron te katoto, Mataio 4:11; Ruka 22:42–44; Mwakuri 10:1–7; 12:5–11; 2 Nibwaai 32:3; Moronaai 7:22, 29–30.

23. 3 Nibwaai 26:19.

24. Romans 12:15; taraa naba Motiaea 18:9.

25. Motiaea 23:18.

26. Reirei ao Berita aika Tabu 52:40.

27. Taraa Aberaam 1:19.

28. Mwakuri 26:16 e taetae iaon te riki bwa “te tia ibuobuoki ao te tia kakoaua” n ana bwai te Uea.

29. Ebera 8:6.

30. Reirei ao Berita aika Tabu 64:33; taraa naba Aramwa 37:34.

31. Taraa Motiaea 4:27.

32. 2 I-Korinto 9:7.

33. 2 I-Korinto 9:10.

34. 2 I-Korinto 9:11.

35. 2 I-Korinto 9:6.