Kam Butimwaeaki Nakon te Beeba ni Kaongora Aei
Baika a Raka Aroia n te ka 193 ni Maungatabu ni Kabuta n te Ririki
“Ti a rangi n nuai ni kamwarakeaki n te maiu n tamnei inanon uoua te bong n nako, ” e taku Beretitenti Russell M. Nelson n tain te kainiin n te ka 193 ni Maungatabu ni Kabuta n te Ririki n Ana Ekaretia Iesu Kristo ibukiia Aika Itiaki ni Boong aika Kaitira (taraa iteraniba 127). Te baka n amwarake anne kanoana bon taeka n reirei ni katotonga maiun te Tia Kamaiu Iesu Kristo—n oneamwiin te kakauntaeka n te tangira ae kororaoi, te nanoanga, ao te rau (taraa Beretitenti Nelson, iteraniba 98; taraa naba Unimwaane Christofferson ao Soares, iteraniba 77 ao 85).
“I kaoko bwa ko na tiribaaea arom ae ana reirei Kristo ni kaineti ma arom n tabeakiniia tabeman,” e taku Beretitenti Nelson. I kakabwaiako bwa ko na kaetii aika tao a kainnanoaki bwa e aonga ni kamoamoaaki arom, ni karineaki, ao te tia tei ibukin iriiran ni koaua Iesu Kristo” (iteraniba 98)
Ma Beretitenti Nelson, tabeman taan kairiiri n te Ekaretia a taku bwa kaekaan ara titiraki, kakaewenako, karawawata, ao ake a bua mairoura e kuneaki n ana katooto, angareirei, Mwakuri ni Kamaiu ao Mangautin te Tia Kamaiu Iesu Kristo, are e anganiira “te bwaintangira ae te rau” (Beretitenti Eyring, iteraniba 29; taraa naba Beretitenti Oaks, iteraniba 102; Beretitenti Johnson, iteraniba 81; ao Unimwaane Meurs, iteraniba 39). A kaungaira taan taetae bwa ti na kabanea ara iango iaon te Tia Kamaiu (taraa Unimwaane Camargo, iteraniba 64), taromauriia (taraa Unimwaane Stevenson, iteraniba 6), nakomai Nakoina (taraa Beretitenti Cordon, iteraniba 10), kakorakora ara kakoaua Ibukina (taraa Beretitenti Ballard, iteraniba 105), karaoa te ibuobuoki n aron are E na karaoia (taraa Unimwaane Gong ao Uceda, iteraniba 16 ao 70), ao ni katamaroai arora n riki bwa ana reirei (taraa Unimwaane Bednar, Rasband, ao Bragg, iteraniba 123, 108, ao 60).
A kaungaira naba taan kairiiri bwa ti na kawakina raoi ara kakabwaia n tamanuea. Naake a tuai n reke aia kakabwaia n tamanuea a reireinaki bwa a na tataroakinna “ngkana e riai te tai” ni karekea (taraa Unimwaane Bennett ao Yamashita, iteraniba 42 ao 88).
Beretitenti Nelson, are e katanoata katean 15 tembora aika a boou, e kauringiira, “Iesu Kristo boni ngaia oin bukin katean taian tembora” (iteraniba 127; taraa naba Unimwaane Renlund, De Hoyos, ao Duncan, iteraniba 35, 52, and 95).
Ti kamatoaia niman Mataniwi ni Kabuta n te Itingaun aika a boou, te Beretitentii ni Kabuta ae boou n te Bootaki n Ataeinnaine, ao te membwa ae boou n te Beretitentii ni Kabuta n te Bootaki n Ataeinimwaane, ao n anga ara kakaitau ae nako mai nanora nakoia ake a motirawa man nakoaia ke a na kamotirawaaki n Aokati 1, 2023.
Ngkai ti a manga okira riki te maungatabu ni kabuta, kamatebwai taian rongorongo, ao “iangoi raoi koaua ake a reiakinaki” (Beretitenti Nelson, iteraniba 127), ti na, namakinna ma naake a marooro, te kan taekina, kimwareirei, n taetaekina taekan, ao ni kakoaua Iesu Kristo—bon ngaia oin kamaiuakira (taraa 2 Nibwaai 25:26).