Uringnga Tera ae Kakawaki Riki
Te bwai ae moan te kakawaki riki bon arora n reitaki ma Tamara are i Karawa ao Ana Rikitemanna, ara utu, ao kaain rarikira, ao ni kariaia Tamnein te Uea bwa e na kairiira.
Ngkai ti uringa rinin te Tia Kamaiu i Ierutarem ni banen te wiiki aei e aki maan imwain Ana angakarea ni kamaiu, I kan manga taekin Ana taeka n ana kaantaninga ao ni karaunano: “Boni Ngai te mangauti, ao te maiu; ane onimakinai, ngkana tao e boni mate, ao e na boni manga maiu.”1
I Tangiria. I Kakoaua. I kakoaua bwa Ngaia bon te Mangauti ao te Maiu.
E a tia te kakoaua aei ni karaua nanou ao ni kakorakoraai inanon ririki aika aua ao te iterana n nako imwiin maten kaain abau, Barbara. I ururingnga n taainako.
N taainako, ao I rangi n iaiangoa ara mare ae akea tokina ao maiura ni bootaki.
I a tia n tibwaua arou mai imwaina ngke I moan ni kaitibo ma Barbara ao aron te taneiai anne n reireinai ni kabongana te rabakau “ni kakaraoan” te bwai ae I a tia n reiakinna n au mition. I karokoai irouna n te tai ae waekoa imwiin ara moan ni kaitibo ibukina bwa e botonaine, e kinaaki, ao n rangi n tatabetabe. E rangi ni korakora nanou irouna ibukina bwa e aki kakaomataa ao n rangi n tatangira. I rangi ni kamoamoa ibukin raoiroina. I namakinna ae ngai ma ngaia ti tangiriira ibon imarenara E taraa ni bebete anne n au iango.
I bobontaeka ma Barbara, ao ara iraorao e a moanna n rikirake, ma e aki koaua ngkana ngai katauana.
E aki tau ae N na ataia; e riai Barbara n ataia bon irouna. I ataia bwa ngkana ti kabanea ara tai n aki mamatam ao n tataro ibukin te bwai aei, ao e na kona Barbara ni karekea te kaeka mairoun Tamara are i Karawa.
Ti kabanea te wiikiente n akea te boon taeka bwa ti aonga ni karaoa ara aki mamatam ao n tataro ibon iroura bwa ti na ataia ibon iroura. Bon te kakabwaia aei ibukiu, bwa e karekea te kaeka naba are I karekea. Ake imwiina, n aron are a taku, e a ururingaki
Ngke e mate Barbara, natira a katoka iaon te ruanimate tabeua reirei ake e tangiria Barbara bwa a na ururingngi. Teuana mai ibuakon reirei aikanne bon “te bwai ae kakawaki riki bon te bwai ae ti na ururingnga riki.”
N te bong aei N na tibwauaia mai inanou tabeua namakin ao iango iaon bwaai aika kakawaki riki.
Te moan, te reitaki ma Tamara are i Karawa ao Natina, te Uea Iesu Kristo, e bon rangi ni kakawaki. E rangi ni kakawaki te bwai aei ngkai ao n akea tokina.
Te kauoua, te reitaki n te utu a mena ibuakon bwaai ake a rangi ni kakawaki riki.
Inanon au tai ni mwakuri, I a tia ni kawariia n tatabemaniia nako ao utu ake a rootaki man urubekebeke aika kakamaaku. A mwaiti aika a birinako, a baki, ao ni maaku. A kainnanoa te ibuobuoki n te onaoraki, te amwarake, ao aia tabo ni kataniia.
A kainnanoia naba aia utu.
I ataia ae tabeman a tuai ni karekei kakabwaia mairouia kaain aia utu aika tangiraki, ngaia ae I a kariniia utu, raoraoia, ao riki utu n te uoote bwa te “utu.” Reitaki aikai a kakawaki ibukin marurungin te iango ao te rabwata.
A kona reitaki aikai n anga naba te tangira, te kimwareirei, te kukurei, ao te nano ni kan reitaki.
Kanakoraoan reitaki aika kakawaki aikai bon te rinerine. Te rinerine ni kan riki bwa kaain te utu e kainnanoa te motinnano, te tangira, te taotaonannano, te reitaki, ao te i kabwarabure.2 E na iai taai aika ti na aki boraoi n iango ma temanna te aomata, ma ti kona ni karaoia n akean te aki boraoi n iango. N tain te kareke tangira ao te mare, ti aki tangira ke ni bwara ara tangira ae kanga bwaai aika a kamwaingaki iaon te bwai ni bwaarawa. Ti rineia bwa ti na tangira ao ni boutokaira n ara iango ibon iroura. Ti karaoa naba anne n reitaki n utu ake tabeua ao ma raao aika ti tebo ma kaain ara utu.
E taekinaki n te katanoata nakon te utu ae “ana babaire te Atua ibukin te kakukurei e karekea te konaa irouia utu ni kateimatoa aia itoman imwiin te mate. Otenanti ao berita aika a tabu ake a kona n reke inanon tembora aika tabu are e a karekea te anga ibukira n tatabemaniira ni kona n oki nakon te Atua, ao ibukiia utu bwa a na katiteuanaaki n akea tokina.”3
Teuana riki te bwai ae moan te kakawaki bon irakin ana wirikiriki te Tamnei n ara reitaki ae moan te kakawaki ao n ara kekeiaki n tangiriia kaain rarikira ao bon ngaira, n raonaki n ara mwakuri ibon iroura ao te botanaomata. I reiakina te reirei aei ni moantaai ni maiu ngke I beku bwa te bitiobi.
Ni bwakanakon te tairiki teuana, ae kamwaitorotoro n tinoo, I kitana au aobiti ni bitiobi ngke I karekea te namakin ae korakora bwa N na riai ni kawara te aine ae akea buuna ae e a kara n te uoote. I taraa au tai—ao e a bo 10:00 n te tairiki. N au iango ao I taku bwa e a bwakanako te tai ni karaoa te kakawari anne. Ao irarikina, e bon rangi ni korakora te tinoo. I iangoia bwa N na kawara te aine ae tangiraki aei te moan ni bwai n te moaningabong nakon ae N na aki karaua n te bwakanako n tai aei. I okira mweengau ao n nakon au kainewene ni iangoa matu ma I aki rau ni matu n te tairiki anne ibukina bwa e wirikiriki te Tamnei nakoiu bwa N na riai n nakon te aine are akea buuna.
I uti ni moantaai n te moaningabong anne, ao ni buti n au ka ni kaineta mweengan te aine are akea bunna anne. E kaeka natina te aine man te mataroa ao e taku ma rannimatana aika waanako, “O, Bitiobi, ko rabwa n rokom. E mate tinau uoua te aoa n nako”— E a rangi n uruaki nanou. N na bon aki kona ni mwaninga au namakin n te tai anne. I tang. Antai iaon riki te aine aei ae akea buuna ae tangiraki ae e bon riai bwa e na taua baina ana bitiobi, ni kamwengaraoia, ao tao n anganna te kabanea ni kakabwaia? I kabua te tai anne ibukina bwa I a tia n aki tabeakina ana wirikiriki te Tamnei ae korakora aei.4
Tariu ao mwaneu, ataeinimwaane ao ataeinnaine, ao ataein te Moanrinan, I kakoauaa ae irakin ana wirikiriki te Tamnei bon teuana mai ibuakon bwaai ae moan te kakawaki inanon ara reitaki ni kabane.
Kabaneana, n te wiikeente n Tabatin te Toa aei, I kakoaua bwa ngkai ko a tia n rairaki nakon te Uea, ni kaota am kakoaua Nakoina, ao ni beku Ibukina a bane ni mena naba ibuakon bwaai aika kakawaki riki.
Te onimaki iroun Iesu Kristo bon aan ara kakoaua. Te kakoaua bon te koaua ke kamatoaan te koaua ae akea tokina ae katukaki i nanoia ao tamneia n tatabemaniia nako rinanon te Tamnei ae Raoiroi. Te kakoaua iroun Iesu Kristo, e anganiira ao e kakorakoraaki man te Tamnei, bitii maiu—e bita arora n iango ao arora ni maiu. Te kakoaua e rairiira nakon Tamara are i Karawa ao Natina te Mwaane mai i karawa.
Aramwa e reirei:
“Nooria, I kaotiota te koaua nakoimi bwa I bon atai bwaai aikai ake I taekin bwa a koaua. Ao kam kanga n taku bwa I atai koauaia?
“Nooria, I taku nakoimi bwa a kaotaki koauaia nakoiu iroun tamnein te Atua ae Tabu. Nooria, I a tia n aki mamatam ao n tataro i nanon boong aika a mwaiti bwa I aonga n atai bwaai aikai I bon irou. Ao ngkai I ataia irou bwa a koaua; ibukina bwa te Atua e a tia ni kaoti nakoiu n Tamneina ae Raoiroi.”5
Karekean te kakoaua n tingaia e bon aki tau. Ara marooro ma Iesu Kristo e rikirake, ti tangiria ni kaota Koauana—Raoiroina, ana tangira, ao ana akoi.
N tainako n ara bootaki ni kaoti koaua n taian Tabati, ti rangi n ongoongo riki taeka n aron “I kakaitau” ao “I tangiria” nakon riki are ti ongo kibuntaeka aika “I ataia” ao “I kakoaua.”
I kaoi ngkami bwa kam na kakaota amikoaua iroun Iesu Kristo. Kaota am koaua n te bwai ae ko ataia ao ni kakoaua ao ae ko namakinna, tiaki n ti te bwai ae ko kakaitau ibukina. Kaota am taneiai n ataakin ao tangiran te Tia Kamaiu, ao ni maiuakinan Ana reirei, ao Mwaakana ni kabooan maiura ao ni kakorakorako inanon maium. Ngkana ko kaota am kakoaua n te bwai ae ko ataia, ko kakoaua, ao n namakinna, e na kamatoa te koaua te Tamnei ae Raoiroi nakoia ake a kakauongo raoi nakon am kakoaua. A na karaoia ibukina bwa a tia n tarataraiko n riki bwa a na tia iriira Iesu Kristo ae rau. A na noria bwa tera ae nanonaki bwa ko na riki bwa Ana reirei. A na namakina naba te bwai teuana ae a tuai man nanamakinna mai imwaina. Te kakoaua ni koaua e roko man te bitaki n nano ao e kona ni uotaki iroun te Tamnei ae Raoiroi nako nanoia tabeman ake a tauraoi ni karekea.
Naake a namakina te bwai teuana imwiin am kaoti koaua a kona ngkanne n tuanga te Uea n te tataro ni kamatoa koauan am kakoaua. A kona ngkanne n ataia ibon ibukiia.
Tariu ao mwaneu, I kaota au koaua ao ni kakoaua nakoim bwa I ataia bwa Iesu Kristo bon te Tia Kamaiu ao te Tia Kabooa te aonaaba. E maiu. Bon Natin te Atua ae mangauti, ao aio Ana Ekaretia, ae kairaki iroun Ana burabeti ao abotoro. I tataro bwa n te bong teuana ngkana I mate, I kona ni karaoia ma au kakoaua ae matoatoa.
N au mwakuri n ibuobuoki, I a tia n reiakina te bwai ae kakawaki riki iroun Tamara are i Karawa ao Ana Rikitemanna, ara utu, ao kaain rarikira, ao kariaiakan Tamnein te Uea bwa e na kairiira n taian reitaki aikanne bwa ti aonga ni kakoauai bwaai aika a kakawaki riki ao n teimaan. N aran Iesu Kristo, amen.