“Akea Riki Te Bwai Ae E Rianako ma ni Karewerewe n Aiaron Kimwareireiu”

Iroun Unimwaane Craig C. Christensen

Man te Itingaun

Te rairannano ni katoa bong ao kawaran Iesu Kristo bon te kawai n rinanon te kimwareirei—te kimwareirei ae riaon ara iango.

Inanon Ana tai n mwakuri iaon te aba, e kaota te nanoanga ae korakora te Tia Kamaiu ibukiia natin te Atua ni kabane—riki ake a korakai ke ni bwaka. Ngke e kabuakaaki irouia Bwaritaio ibukin arona ni ikotaki ao n amwarake ibuakoia taan bure, e kaeka Iesu man reireiniia teniua karaki ni kaikonaki.¹ I nanon kaikonaki aikai, E katuruturua kakaawakin ukoukoraia ake a bua ao te kimwareirei are e namakinaki ngkana a manga oki. Te katooto, n te kaikonaki ibukin te tiibu are e bua ao E taku, “[E na mwaiti riki] te kimwareirei i karawa iaon temanna te tia bure are e raira nanona.”²

Nanou n te n te bong aei bon kakorakoraan te reitaki imarenan te kimwareirei ao te rairannano—ni kamataata riki, te kimwareirei are e roko ngkana ti raira nanora ao namakinan te kimwareirei are e reke iroura ngkana ti kaoia tabeman nakon Kristo ao ni karekea Ana mwakuri ni kamaiu n maiuia.

Ti Riki Ngaira Bwa Ti Aonga Ni Karekea Te Kimwareirei

N koroboki aika a tabu, te taeka ae kimwareirei nanona ae bati riki nakon taai ake e reke iai te rau ke namakinan te kukurei. Te kimwareirei ae nanonaki ikai bon te anua ni maiu, ae kuneaki n kororaoina ngkana ti okirakaaki ni maeka i matan te Atua.³ E nano riki, karietaata, reitinako, ao ni bita te maiu nakon kakukurei riki tabeua ke te rau ae kona n anga te aonaaba aei.

Ti karikaki bwa ti na karekea te kimwareirei. Bon arora ae katauaki ngkai natin Tamara are i Karawa ae tatangira. E tangiria n tibwaa Kimwareireina ma ngaira. Te burabeti are Riaai e reirei bwa ana babaire te Atua ibukira n tatabemaniira bwa “ti aonga ni karekea te kimwareirei.”⁴ Ibukina bwa ti maeka n te aonaaba ae bati iai te buakaka, n teimatoa inanon te kimwareirei ke te kimwareirei ae akea tokina e taraa ni kangaanga rerekena iroura. Ma, n te kibu raoi are imwiina, e reitia Riaai man kamataatakina bwa “[e na roko] te Mesia … ni kabooi [ra] man te bwaka.”⁵ Kabooan maiura, iroun ao rinanon te tia Kamaiu ae Iesu Kristo, e karekea te kimwareirei.

Rongorongon te euangkerio bon te rongorongo ibukin te kaantaninga, ae “raoiroi ae kakimwareirei,”⁶ ike a kona iai aomata ni kabane n rinanon te rau ao taai ni kimwareirei n te maiu aei ao ni karekea kororaoin te kimwareirei n te maiu ae na roko.⁷

Te kimwareirei ae ti taekinna bon te baintangira ibukia aika a kakaonimaki, ma e roko ma uaana ngkana e mwakuriaki. E aki kaireke te kimwareirei ke ni kai anganaki temanna. Ma, e kabooaki “n raraan [Iesu] Kiristo ae moa kakawaki.”⁸ Ngkana ti oota raoi ni koauan, kimwareirein te atua, tina aki tuukaki man kanakoan bwain nako te aonaaba ke ni karaoi bitaki ni maiura aika a riai bwa ti aonga ni karekea.

Te uea ae korakora ma n nanorinano n ana Boki Moomon e oota n aei. “Tera ae N na karaoia,” e titiraki, “bwa I aonga ni manga bungiaki iroun te Atua, bwa e na koutaki nako te tamnei ae buakaka aei inanou, ao ma ni butimwaea Tamneina, bwa I aonga n onrake n te kimwareirei …? Nooria, e taku, N na anganako au bwai ni kabane, eng, N na mwanuokina ueau, bwa I aonga ni karekea te kimwareirei ae korakora aio.”⁹

Ni kaekaan ana titiraki te uea, e taku te mitinare ae Aaron, “Ngkana ko tangira te bwai aei, … bobaraaki i matan te Atua … [ao] n rairananom man am bure ni kabane.”¹⁰ Te rairannano bon te kawai nakon te kimwareirei¹¹ bukina bwa aio bon te kawai are e kairiiri nakon te tia Kamaiu ae Iesu Kristo.¹²

E Roko te Kimwareirei rinanon te Rairannano ni Koaua

Irouia tabeman, iangoan te rairannano bwa te kawai nakon te kimwareirei e taraa n totoko. Te rairannano, n taai tabetai, e kona ni kammaraki ao ni kangaanga. E kainnanoa kaotakina raoi bwa tabeua ara iango ao ara mwakuri—ao tabeua ara kakoaua—a tia ni kaairua. Te rairannano e kainnanoa naba te bitaki, are, n taai tabetai, e kona ni kamwengabuaka. Ma te kimwareirei ao te raunnano bon tiaki bwaai aika a titeboo aroia. Te bure—ni ikotaki ma te bure n tauan nanom i bon iroum—e totokoa kimwareireira.

N aron ae kaotaki iroun te tia Areru, “tao e tang e kona n riki n te tairiki, ma te kimwareirei e roko n te ingabong.”¹³ Ngkai ti rairi nanora man ara bure, ti riai ni iangoa raoi te kimwareirei ae korakora imwiina. E taraa n abwabwaki roon te bong, ma e na roko tamaroan te ingabong, ao O, ai bon tamaroara te rau ao te kimwareirei ae akea n ai arona are ti namakina iai ana mwakuri ni kamaiu te tia Kamaiu bwa e kainaomataira man ara bure ao korakaira.

Akea Riki Te Bwai Ae E Rianako ma ni Karewerewe

Iangoa te bwai are e rinanona Aramwa n Ana Boki Moomon. E “kammarakaki n te karawawataki,” ao tamneina e “korakora rawawatana ma kammarakana” man ana bure ni kabane. Ma ngkana e okira te tia Kamaiu ibukin te nanoanga, e “aki mangauring1 maraki[na].”¹⁴

“Ao o, te kimwareirei teraa,” ao te oota ae tamaroa teraa are I a nooria; eng, … akea te bwai ae e rianako ma ni karewerewe n aiaron kimwareireiu.”¹⁵

Aio te aeka ni kimwaireirei ae tauraoi nakoia ake a roko nakon Iesu Kristo rinanon te rairannano.¹⁶ N aron ae reirei Beretitenti Russell M. Nelson:

“Te rairannano e kaunga kawaira nakon mwaakan ana Mwakuri ni Kamaiu Iesu Kristo. …

Ngkana ti rineia bwa ti na rairi nanora, ti rineia bwa ti na bitaki! Ti kariaia te Tia Kamaiu bwa e na bitiira nakon te kabanea n tamaroa. Ti rineia bwa tina rikirake n te maiu n tamnei ao ni karekea te kimwareirei—te kimwareirei ibukin te kamaiuaki Irouna. Ngkana ti rineia bwa tina rairi nanora, ti rineia bwa tina riki n ai aron raoi Iesu Kristo!”¹⁷

Te Rairannano e uota te kimwareirei ibukina bwa e katauraoa nanora ni karekea ana anai nano te Tamnei ae Raoiroi. Te kaonaki n te Tamnei ae Raoiroi nanona te kaonaki n te kimwareirei. Te kaonaki n te kimwareirei nanona te kaonaki iroun te Tamnei ae Raoiroi.¹⁸ E rikirake kimwareireira ngkai ti mwakuri n katoa bong ni karokoa te Tamnei inanon maiura. N aron ae reireiaki iroun te burabeti Moomon: “Aki toki n aki mamatam ao ma n tataro, ao a rikirake ni matoatoa ma ni matoatoa riki n aia nanorinano, ma n nene ao n nene riki n [aia] onimaki [iroun] Kristo, n onrake tamneia n te kimwareirei ma te raunnano.”¹⁹ E berita te Uea nakoia ni kabane ake a mwakuri n Iriiria, “N na kaota nakoim …Tamneiu, are e na kaotaa am iango, are e na kaona tamneim ma te kukurei. ”²⁰

Te Kimwareirei ni Buokaia Tabeman n Rairi Nanoia

Imwiin namakinan te kimwareirei iroura are e roko man te rainannano ni koaua, ti kona n tangiria n tibwaa te kimwareirei anne ma tabeman. Ao ngkana ti karaoia, ana kabatiaki kimwareireira. Anne raoi te bwai ae e riki nakon Aramwa.

“Ao aio au kakatonga, bwa N na kona n riki bwa te bwai ni mwakuri i nanon bain te Atua bwa N na kairia aomata tabemwaang nakon te rairannano; ao aio kimwareireiu.

Ao nooria, ngkana I nooria tariu aika a mwaiti bwa a bon raraoma raoi, man roko nakon te Uea ae Atuaia, ao ngkanne e kaonaki tamneiu n te kimwareirei; Ao ngkanne I uringnga bwa tera are e a tia ni karaoia te Uea ibukiu, … eng, are e a tia naba n ongo au tataro; eng, ao ngkanne I a uringa baina n nanoanga are e aroria nako[iu].”²¹

Buokaia tabeman n rairannano bon kaotan ara kakaitau nakon te tia Kamaiu, ngkai bon ngaia oin te kimwareirei ae korakora. E a tia ni berita te Uea:

“Ao ngkana ngaia bwa kam na … uota, ni kaira ti temanna te aomata nakoiu, ai korakora ra kimwareireimi ma ngaia n abanuean Tamau!

“Ao ngkai, ngkana kimwareireimi e korakora ma temanna te aomata are kam kairia nakoiu n uean Tamau, ai korakora ra riki kimwareireimi ngkana kam kairiia aomata aika mwaiti nakoiu!”²²

Ai Korakorara Kimwareireina iroun Temanna Are e Rairananona

I kunea bwa e ibuobuoki kataan iangoan kimwareirein te tia Kamaiu ae riai n namakinna ni katoaa te tai are ti karekei kakabwaia man Ana mwakuri ni kamaiu ni maiura.²³ N aron ae taekinaki iroun Beretitenti Nelson,²⁴ te Abotoro Bauro n ana reta nakoia I-Ebera e tibwaa ana atatai ae nano: “Kaki rawawatara ni kabane … bure ae kai nimtira, … tarataraa Iesu are te tia karika ara onimaki; are ibukin te kimwareirei are kamenaki i mwaina taona nanona nakon te kaibangaki … ao E tekateka i angaatain ana kaintokanuea te Atua.”²⁵ Ti taetaekina te maraki ma te korakai i Ketetemwane ao i Korokota, ma tiaki rangi n tataekina te kimwareirei ae korakora are e riai ni kaantaningaia te tia Kamaiu ngke E anga Maiuna ibukira. E mataata, Marakina ma Korakaina bon ibukira, bwa ti aonga n rinanon te kimwareirei n okirikaaki ma Ngaia nako matan te Atua.

Imwiin reireiaia aomata i Amerika ngkoa, e kaota Ana tangira ae korakora ibukia man taekinan:

“Ao ngkai, nooria, e a korakora au kimwareirei, n te aro are e a onrake, ibukimi …;eng, ao e bon kimwareirei te Tama, ao ana anera aika a tabu ni kabane. …

“… I [roum] e [bon] bwanin kimwareireiu .”²⁶

Nakomai nakon Kristo ao Karekea Kimwareireina

Tariu ao mwaneu, I kainiin ma tibwaan au kakoaua, are I atongnga bwa te bwaintangira ae tabu. I kakoaua bwa Iesu Kristo bon te Tia Kamaiu te Tia Kabooi Maiura n te Aonaaba. I ataia bwa E tangiriira ni kabane. Ae bane nanona iai, Ana “mwakuri ao mimitong[na],”²⁷ bwa e na buokiira ni karekea bwaninin Kimwareireina. Ngai te tia kakoaua bwa te rairannano ni katoa bong iroun Iesu Kristo bon te kawai n rinanon te kimwareirei—te kimwareirei ae riaon ara iango.²⁸ Anne bukina ngkai ti mena iaon te aba. Anne bukina ngkai te Atua e katauraoa Ana babaire ni kakukurei are e korakora ibukira. Iesu Kristo bon te “kawai, te koaua, ao te maiu”²⁹ ao akea riki “te ara are e a tia n taekinaki i aan karawa are e na kona ni kamaiuaki iai te aomata i nanon uean te Atua.”³⁰ I kakoaua n aran Iesu Kristo ae tabu, amen.

Bwaai aika a na taraaki

1. Taraa Ruka 15.

2. Ruka 15:7.

3. Taraa Taian Areru 16:11.

4. 2 Nibwaai 2:25.

5. 2 Nibwaai 2:26.

6. Ruka 2:10.

7. Taraa Motiaea 3:13–19.

8. 1 Betero 1:19.

9. Aramwa 22:15.

10. Aramwa 22:16.

11. Inanon ririki aikai, a mwaiti burabeti ao abotoro ae a tia ni katuruturua te kimwareirei man te rairannano. Taraa, ibukin te katooto, Russell M. Nelson, “Ti Kona ni Karaoa ae Tamaroa ao ni Katamaroa Riki,” Riaona,Meei 2019, 67–69; Dallin H. Oaks, “Kaitiakaki man te Rairannano,” Riaona, Meei 2019, 91–94; Dale G. Renlund, “Repentance: A Joyful Choice,” Liahona, Nobembwa 2016, 121–24; D. Todd Christofferson, “The Divine Gift of Repentance,” Liahona, Nov. 2011, 38–41.

12. E reirei Beretitenti Nelson: “E roko te kimwareirei mairoun ao ibukin [Iesu Kristo]. Bon Ngaia oin te kimwareirei ni kabane. … Ibukiia Aika Itiaki ni Boong Aika Kaitira, Iesu Kristo bon te kimwareirei!” (“Joy and Spiritual Survival,” Liahona, Nov. 2016, 82).

13. Taian Areru 30:5.

14. Aramwa 36:12–19.

15. Aramwa 36:20–21; taraa naba kiibu 12–19.

16. Taraa Aramwa 27:18.

17. Russell M. Nelson, “Ti Kona ni Karaoa ae Tamaroa Riki ao ni Katamaroaki Riki,” 67.

18. Taraa Mwakuri 13:52; Motiaea 4:3.

19. Ereman 3:35.

20. Reirei ao Berita aika Tabu 11:13.

21. Aramwa 29:9–10.

22. Reirei ao Berita aika Tabu 18:15–16.

23. Taraa Reirei ao Berita aika Tabu 18:13.

24. Russell M. Nelson, “Joy and Spiritual Survival,”83.

25. Ebera 12:1-2; kairaki katuruturuana.

26. 3 Nibwaai 27:30–31. Teniman man ana reirei te tia Kamaiu aika Nibwaite a tangiria n tiku n te aonaaba ma tabeia bwa kairaia aomata Nakoina. E taetae Iesu, nakoia taan iriiria aika kakaonimaki, “Ao ibukin aio e na reke iroumi bwaninin te kimwareirei; ao kam na tekateka n uean Tamau; eng, e na onrake kimwareireimi, n aron te Tama ngke e anganai bwaninin te kimwareirei; ao kam na riki n arou”.(3 Nibwaai 28:10).

27. Mote 1:39.

28. “Baika e tua n nori te mata, ao e tuai ongo te taninga, ao a tuai n rin inanon te aomata, boni baika E katauraoi te Atua i bukiia ake a tangiria”(1-I Korinto 2:9).

29. Ioane 14:6.

30. 2 Nibwaai 31:21.