Te Kaeka n Tainako bon Iesu Kristo
Tao tera am titiraki ke am kangaanga, te kaeka e aki toki ni kuneaki ni maiun ao n ana reirei Iesu Kristo.
Tariu ao mwaneu aika tangiraki, e a tia ni kamwarakeaki tamneira inanon uoua te bong n nako. Te anene man te kuaea e rangi rianako. Naake a tia n taetae a tia n riki bwa baai ni mwakuri ibukin te Uea. I tataro bwa kam na ukora te Tamnei ae Raoiroi ni kairiko inanon am kamatebwai ngkai ko iangoi koaua ake a reiakinaki man te tabo n taetae aei. A bon tia ni karokoaki mai i karawa.
Teuana te wiiki ma ngkai ao ai Tabatin te Itita!. Bon te bong ae rangi ni kakawaki kauringana n aro nako irouia naake a iriira Iesu Kristo. Oin bukin ae ti bukamarua te Kiritimati bon ibukin te Itita. N te reirei n Nakomai, Iriirai n te wiiki aei e na anganiko kairam ni kamatebwaia rinin te Tia Kamaiu n tokanikai i Ierutarem, ngke E kaitiaka te tembora, Korakaina n te Onaroka are Ketetemwane, Taurakina, mimitongin Mangautina, ao kaotina rimwi nakoia naake a Iriria.1
Kawakin kiibu aika tabu aikai ao kakaei kawai ae ko kona iai ni kaitaua Tamara are i Karawa ibukin anganakira Natina ae te Rikitemanna.2 Ibukin Iesu Kristo, ti kona n rairi nanora ao ni kabwaraaki ara bure. Ibukina, ngaira ni kabane ti na manga kautaki.
I kaoi naba ngkami ni kamatebwaia riki rongorongon kaotin te Tia Kamaiu nakoia Nibwaite n te aono n Amerika, are e koreaki n te 3 Nibwaai. Teutana te tai imwaain kaotina, e ongo te aba Bwanaana ibuakoia aomata, ni irianaki ma taeka ni bubuti aikai:
“Kam aki okirai ngkai, ma n rairinanomi man ami bure, ma n rairaki, bwa I aonga ni kamarurung ngkami?
“… Nooria, e aroraki baiu ae nanoanga nakoimi, ao ane e roko nakoiu ao N na butimwaia.”3
Tariu ao mwaaneu aika kam tangiraki, e kanakoa naba te kakao anne Iesu Kristo nakoim n te bong aei. I bubuti ngkami bwa kam na Nakoina bwa E aonga ni kamaiuko! E na kamaiuko man am bure ngkai ko raira nanom. E na kamarurungko man te nanokawaki ao te maaku. E na kamarurungko man taian korakai man te aonaaba aei.
Tao tera am titiraki ke am kangaanga, te kaeka e aki toki ni kuneaki ni maiun ao n ana reirei Iesu Kristo. Reiakina riki aron Ana Mwakuri ni Kamaiu, Ana tangira, Ana nanoanga, ao Ana euangkerio ni kamarurung ae kaokaki, ao n rikirake. Rairaki Nakoina! Iriiria!
Iesu Kristo bon Ngaia bukin ae ti katei tembora. Ni kabane n tatabeua nako bon Ana auti ae tabu. Karaoan berita aika tabu ao karekean otenanti aika riai n te tembora, n raonaki ma kaaniara Nakoina n te tabo anne, e na kakabwaiaa maium ni kawai aika e na aki kona n reke n aekan nebonebo riki tabeua. Ibukin aei, ti a karaoi bwaai ni kabane ni korakorara ni karika ae kakabwaia n te tembora a na kai reke nakoia ara membwa ni kabutaa te aonaaba. N te bong aei, I kukurei ni katanoataa ara babaire ni katei tembora aika boou n taabo aikai:
-
Retalhuleu, Guatemala
-
Iquitos, Peru
-
Teresina, Brazil
-
Natal, Brazil
-
Tuguegarao City, Philippines
-
Iloilo, Philippines
-
Jakarta, Indonesia
-
Hamburg, Germany
-
Lethbridge, Alberta, Canada
-
San Jose, California
-
Bakersfield, California
-
Springfield, Missouri
-
Charlotte, North Carolina
-
Winchester, Virginia
-
Harrisburg, Pennsylvania
Tariu ao mwaaneu aika kam tangiraki, I kaota au koaua bwa Iesu Kristo e kaira waakin Ana Ekaretia. I kakoaua bwa Irirakina bon ti te kawai n teimatoa inanon te kukurei. I ataia bwa Mwaakana e ruo nako aoia Ana aomata ake a kawakin berita, “ao a otangaia n te raoiroi ma mwaakan te Atua ao te mimitong ae korakora.”4 I taekinna naba, ma au tangira ao au kakabwaia ibukimii n tatabemani ngkami nako, n aran Iesu Kristo, amen.