Unimwaane Christophe G. Giraud-Carrier

Mataniwi ni Kabuta ae te Itingaun

Ngke e a roko n te roro n ikawai, e korakora ana iango Unimwaane Christophe G. Giraud-Carrier—e moana ana reirei n te kuura, e karekea te reta ni kariaia man te tabo n reirei n taona ana reirei ibukin karaoan ana mwakuri ni mitinare ae bwanin taina, e mare ma buroon nanona ma ngke te kairake ngaia, ao imwiina e katea ana utu ma nakoana ae te n intinia iaon abana ae Buranti.

Ngke e nakoraoi mwiin ana mwakuri ni mitinare ma ana mare, ana kaataninga tabeua a bon aki koro nanoia. Taonakin ana tai n reirei e aki koro nanona, ma kamwaingakina nako Brigham Young University (BYU) e nakoraoi, n rimwiaki ma nanona ni kan anga reirei n te kuura ae rietaata. Aron te mwakuri n te reirei ae rietaata i Buranti e bon karako ibukin temanna are e bane ana reirei itinanikun te aba, ngaia are karikirakean te utu, karekean te mwakuri ae kaokoro, ao ni beku n te Ekaretia a reke n aaba aika a kakaokoro ao n ana tai te Uea.

“Te koaua ikai bwa tabeua raoi bwaai a riki n te anga are ti bairei iai e kariaira bwa ti na kona n ataia bwa ngkana ti kariaia te Uea ni karaoi oin Ana bwai ao ni kairiira nakon taabo, ao ngkanne anne te tabo ae E tangiria bwa ti na mena ia ao ikanne naba ae ti na kona iai ni beku,” e taku Unimwaane Giraud-Carrier. “E a tia ni buokiira n reiakinna bwa ti na onimakinna, ni kakoaua bwa E kona ni kanakoraoi maiura nakon are ti kona.”

E bungiaki Christophe Gérard Giraud-Carrier n Tianuare 21, 1966, i Lyon, Buranti, irouia Gérard Giraud-Carrier ao Annie Giraud-Carrier. Imwiin ana mwakuri ni mitinare ae bwanin i Canada Montreal Mition, e mareaki ma Isabelle Sophie Mauclair n Turai 1988 i Cholet, Buranti. A kabaeaki teniua te bong imwiina n te Bern Switzerland Tembora. Boni kaaro irouia natiia aika waniman.

Imwiin reken ana bachelor, ana master, ao ana beeba n taokita iaon te computer science mai BYU, e mwakuri Unimwaane Giraud-Carrier bwa te tia reirei ibukin ana Reirei ae Rietaata Engiran i Bristo ao te manatia ibukin Switzerland’s ELCA Informatique imwaain kabanean 19 te ririki bwa te burobeetia n te computer science i BYU.

N tai are e weteaki bwa e na riki bwa te Mataniwi ni Kabuta ae te Itingaun, Unimwaane Giraud-Carrier e mwakuri bwa te beretitenti n te titeiki i Provo Utah YSA ka 16 n Titeiki. Nakoana ake mai imwaaina n te Ekaretia n raonaki ana mwakuri n ibuobuoki ngkai e riki bwa te beretitenti n te France Lyon Mition, kauntira ae rietaata, ao te bitiobi.