Imwiin te Kaaua ni Bong
Ngkana ti na waaki ma te onimaki iroun Iesu Kristo, te kaaua ni bong e na roko n tainako. E na roko n tainako ni buokiira.
Ngkai ti a tia ni kauringaki n te ingabong aei, bwa te bong aei bon Taabatin te Palm, are e mwaakena rinin Iesu i Ierutarem ao ni moana te wiiki ae tabu ni karaoan ana Ana Mwakuri ni Kamaiu, are e na raonaki ma Rawawatana, Taurakina, ao Manga utina.
E aki man imwiin taetae ni burabetiana bwa e na rin n te kaawa, e bati ana mwakuri Iesu Kristo ae karaoia ngke E ongo mairouia raraona aika a tangiraki irouna aika Maria ao Mareta bwa e aoraki mwaneia are Rataro.1
E ngae ngke e rangi ni kaakaiaki aorakin Rataro, e bon tiku te Uea uabong n te tabo are e mena iai. Imwiin arei ao e taku nakoia ana reirei, Ti nangi manga nako Iutaia.”2 Imwain mwanangana nakon mwengaia raoraona i Betania, mangaia are E taku Iesu nakoia [Ana reirei], E boni mate Rataro.”3
Ngke e roko Iesu i Betania ao e kaitibo moa ma Mareta ao imwiina Maria, tao ibukin uniia ae korakora ngkai E rimwii n roko, a butimwaaia ao n taku, “Te Uea, ngke ko mena ikai, ao e bon aki mate mwaneu.”4 E manga taetae ma te tang Maria, “N te tai aei e a mwaung: bwa ai ana kaabong aei ni mate.”5
E rangi ni kakaawaki boong aika abong aikai nakon Maria ao Mareta. Ni kaineti ma aia reirei taan rabakau n te iango mai Iutaia, e kakoauaaki bwa tamneia te aomata are e mate e tiku n rabwatana i nanon teniua te bong, n te kaantaninga bwa e konaa ni maiu. E ngae n anne, n te kaaua ni bong ao te kaantaninga anne e aki kona ni kakoauaaki, tao bukina te rabwata e a moanna ni mka ao ni “boiraa”6
Maria ao Mareta a rotaki n te rawawata. “Ngke Iesu e noora [Maria] n tang,… e ngira i nanona, ao … n tang,
“Ao E taku, Kam kaki ia? A taku nako Ina, Te Uea, mai noria”7.
N te tai aio ngke ti a nora iai teuana te kakai ae korakora i nanon Ana tai ni mwakuri i aon te aba. Te moan e taku te Uea, “Kaki atibuna.”8 Ngkanne, Imwiin katituaraoan Tamana, “e taetae n te bwana ae korakora, Rataro, ooti mai.
“Ao e oti nako teuare e mate, ao a kabaeaki baina ao waena n te kunnikai: ao e kabaeaki matana n te kaoanimaono. Iesu e taku nakoia, Kabwara, ao kanakoa.”9
N ai aroia Maria ao Mareta, ti rinanon waaki ni kabane n te maiu aei, n aron te karawawataaki10 ao te mamaara.11 Ngaira ni kabane ngaira ana kai nanora ngkana e bua temanna ae ti tangiria. Ni mwanangara n te maiu aei ti rinanon te aoraki ae korakora ke aorakia aika ti tangiriia; n aron te nanokawaki ae korakora, rotakin te iango, ao aorakin te iango tabeua; akean te mwane; kamwane; ao te bure. Ao n tabetai a raonaki aikai ma namakinan te bwara n nano. I aki kaokoro ngai. N aromi, I a tia n rinanon kakaewenako aika a kakaokoro ake a kantaningaaki n te maiu aei. E anaaki nanou n rongorongon te tia Kamaiu aei ao ana reirei nakoiu ibukin reitakiu ma Ngaia.
N ara tai n raraoma, ngaira, n aron Maria ao Mareta, ti ukora te Tia Kamaiu ke ti bubuti buokara mairoun te Tama. Karakinan Rataro e reireinira te reirei bwa ti kona ni maiuakinna ngkana ti kaaitarai kakaewenako n tatabemaniira.
Ngke e roko te tia Kamaiu i Betania, ni kabane a bwara nanoia ni kamaiuan Rataro—ai aua te bong, ao e a mate. N tabetai n ara tai ni kangaanga, ti namakinna bwa e a oimwii Iesu ao ara kaantaninga ao ara onimaki a rootaki. Au kaotioti ao kakoaua bwa ti na waaki ma te onimaki iroun Iesu Kristo, te kaaua ni bong e na bon roroko. E na bon roroko ni buokira ke n karekea ara kaantaninga nakon te maiu. E a tia ni berita:
“Kabebetea nanom.”12
“I bon aki kitani ngkami ni motiki romi: I a okiri ngkami.”13
N tabetai ti taku bwa E aki roko nakoira ni karokoa te kaaua ni bong, ngke a bua ni kabane ara kaantaninga. Ma tera bukin te rimwii? E reirei Beretitenti Thomas S. Monson, “”Tamara are i Karawa, are e anganiira te kukurei ae bati, e ataia naba bwa ti reiakinaki ao ni rikirake ao n korakora riki ngkai ti kaaitarai ao n tokanikai man taian kataaki aika ti riai n rinanoi.”14
N aron te Burabeti Iotebwa Timiti e a tia n rinanon te kaaua ni bong ae korakora. Kam uring Ana bubuti? “O te Atua, ko mena iaa? Ao e ngaa te umwa ae rabuna te tabo ae ko karabako iai?”15 Ngkai ti onimaki i Rouna, ti kaantaninga ana kaeka ae kangai: “Natiu te mwaane [ke te aine], e na mena te rau n tamneim; am kangaanga ao karawawatakim a na riki ma tii n te tai ae uarereke.”16
Teuana riki te rongorongo ae ti kona n reiakinna man karakinan Rataro bon tibwangara n te buoka mai karawa are ti ukorii. Ngke e roko n te nne ni mate Iesu, E taku moa nakoia ake a mena ikekei, “Kaki atibuna.”17 Ma te mwaaka are iroun te tia Kamaiu, e kona Ngaia ni kamwainga te atibu n akean te ibuobuoki? E na bon kamiimi nooran aei ao n riki bwa te tai ae na ururingaki, ma E taku nakoia tabeman, “Kaaki atibuna.”
Te kauoua, e takaarua te Uea, “ma te bwana ae korakora, Rataro, ooti mai.”18 E na aki rangi ni kamimi ngke arona bwa te Uea, i bon i Rouna, e katuka rabwatan Rataro n mataroan te nne ni mate bwa e na waekoa n nooraki irouia aomata ngke e kaakaki atibuna?
Te kateniua, ngke e otinako Rataro, e bon “kabaeaki baina ao waena n te kunikai ni mate: ao e kabaeaki matana n te kaoanimaono. E taku Iesu nakoia, Kabwara, ao kanakoa.”19 I koaua bwa te Uea e bon konaa ni katea Rataro n mataroan te bwaro, ni kaman itiaki ao ni kawaraki, ma kunikaina ni mate ae rukumaki raoi.
Tera kakaawakin kaotan aaro aikai? Bwaai aika teniua aika iai baika a titebo iai—akea kabonganaan mwaakan Iesu mai karawa iai. Are a konaa ni bon karaoia ana reirei, E tuangiia bwa a na karaoia. A karaoa te mwakuri ana reirei ni kamwaingan te atibu; Rataro, imwiin kautana man te mate, e bon kona n tei irouna ao ni kaotia ni mataroan te bwaro; ao naake a tangira Rataro a buokia ni kabwarai onea ni mate ake iaona.
E ngae n anne, bon ti Kristo aei iai mwaakana ao kariaiakana ni kauta Rataro man te mate. Aio ni mimiu bwa te tia Kamaiu e kaantaningaira bwa ti na karaoi ni kabane ake ti kona ni karaoi, ao Ngaia e na karaoa bon ti are E kona ni karaoia.20
Ti ataia bwa te “onimaki [iroun Iesu Kristo] bon te tua ae na mwakuriaki”21 ao kakai a aki karekea te onimaki, ma te onimaki ae matoa e rikirake man te ongeaba nakon ana euangkerio Iesu Kristo. N taekana teuana, e roko te onimaki man te raoiroi.”22 N teimatoara ni karaoa te raoiroi man karaoan ao kaawakinan berita aika a tabu ao maiuakinan ana reirei Kristo n maiura, e na bon ti tau ara onimaki ni uotira nakon te kaaua ni bong, ma ana buoka te Uea e na kamwaingi naba atibu are a tuka kawaira, ake a rikirake man mamaraara, ao kabuaan nanora ni bwaai ni kabane ake a kabaeira. Ngkai e kaantaningaia ibukira te Uea “ni karaoi bwaai ni kabane ake ti kona ni korakoraara,”23 ururinga bwa E na katauraoa te buoka ae kainnanoaki ni bwaai ni kabane ngkai ti onimaki i Rouna.
Ti na kanga ni kamwaingi atibu ao ni kateitei i aon Ana bwaa?24 Ti konaa man taian reirei mairouia ara burabeti.
N aron aio, n Okitobwa ae nako e bubuti nakoira Beretitenti Russell M. Nelson bwa ti na tararuai ara kakoaua iroun te Tia Kamaiu ao Ana euangkerio, ni mwakurii ao ni ribanai, ni kaoni n te koaua, ao n aki urui man wanawanaia taan kakoaua n te aonaaba aika a kaairua. E berita nakoira n tatabemaniira, Ngkai ko reitinako ni kamatoa am koaua iroun Iesu Kristo bwa am moanibwai, taratarai kakai ake a na riki inanon maium.25
Ti kona ni karaoa aei!
Ti na kanga n kakorakoraira ao ni karokoira? Ti kona ni raira nanora ma te kimwareirei ao rineia n ongotaeka nakon tuua. E taku te Uea, “Ane iai i rouna au tua nako, ane e tau, ao bon ngaia ane e tangirai: ao ane e tangirai ao e na tangiraki i roun Tamau, ao Ngai N na tangiria, ao N na kaotai nako ina.”26 Ti na teimatoa n rairi nanora ni katoabong ao ni kukurei ni waaki nako ma te nano n tangira ae kukurei ibukin te Uea.
Ti kona ni karaoa aei!
Ti na kangaa ngaira, ma ana buoka te Uea, ni kaakeaira nakon ni kabane ake a kabaaira? Ti kona ma nanora ni kabaeira moa ao n aki toki nakon Tamara are i Karawa ao Natina, Iesu Kristo, rinanon berita ae tabu. E reirei Unimwaane D. Todd Christofferson: “ Tera raoi oin [arora] n te maiu ao te mwaaka ni maiun tamneira, ao ti na kanga ni karekea? “Buokara bon te Atua. Karekean te mwaaka anne iroura bon rinanon ara berita ma Ngaia. … I nanon boraraoi mai karawa aikai, E kabaea te Atua bwa E na boutoka, katabua, ao ni karietataira ibukin nanomwaakara ni beku i Bukina ao ni kawakini Ana tua27 Ti konaa ni karaoi ao ni kawakini berita aika a tabu.
Ti kona ni karaoa aei!
“Kaki Atibuna.” “Ooti mai.” “Kabwara, ao kanakoa.”
Taian reirei, tuua, ao berita aika a tabu. Ti kona ni karaoa aei!
E berita Unimwaane Holland, “Tabeua kakabwaia a waekoa n roko, tabeua a oimwi n roko, ao tabeua a bon aki roko; ma ibukiia naake a kawakina ana euangkerio Iesu Kristo, a roko28
Ao kabaneana, “Ma ngaia are, kukurei, ao tai maaku, bwa Ngai te Uea I mena iroumi, ao n tei ibukimi.”29
Aio au kaotioti ao kakoaua, n arana ae tabu are E na bon roko n taai nako, n aran Iesu Kristo, amen.