A Kainnanoaki Taan Raoi
Iai inaomatam n rinea te kakauntaeka ke te raoi. I kaumakiko n rineia bwa ko na riki bwa te tia karika te raoi, ngkai ao n taainako.
Tariu ao mwaneu aika kam tangiraki, ai kakukureira raonakimi. Inanon onoua te namwakaina n nako, ao I a tia n ururing ngkami n au iango ao n au tataro. I tataro bwa te Tamnei ae Raoiroi e na tuangkami te bwai ae tangiria te Uea bwa kam ongo ngkai I taetae nakoimi ngkai.
N au tai ni kataneiai n te korokoro inanon ririki aika mwaiti n nako, I buoka te tia korokoro te mwaane ae korea te ranga ae rootaki n te aoraki ae kakaiaki. E matoatoa aron te korokoro. Ngkanne, te bwai ae kakorakora riki te kangaanga, bwa temanna kaain te tiim ae aki karaoa raoi ana mwakuri, ao tokina e a tatakarua n un te tia korokoro. I nanon ana tai n un, e karenakoa ana biti ni korokoro ae onrake n manin aoraki. E bwakara bubuan baiu!
Ni kabane ake a mena inanon te ruu ni korokoro—ma ti te tia korokoro are e bua ana iango—a bane n tounako man ana mwakuri ae kakamwaku n aki ira raoi tuan te korokoro. I kakaitau, bwa I aki rotaki n te aoraki. Ma te taneiai aei e tiku mwiina ae teimatoa iaou. N te tai naba anne, I berita bwa tera ae e na riki inanon au ruu ni korokoro, n na bon aki kabua au iango. I berita naba n te bong anne bwa n na aki manga karenakoi bwaai n au tai n un—tao biiti ni korokoro aika kakang ke taeka n un.
Riki ngkai, n ririki aika mwaiti imwiina, I aki koaua ngkana te biti ae kakang are e bwakara angau akea te kangaanga iai nakon taeka aika kamatauninga aika a roota ara marooro ma aomata ao n rang ni mwaiti ara reitaki bon iroura n te bong aei. E taraa n ae aomata aikoa rangi ni bwaina te karinerine ao te katei ae raoiroi n te tai aei ao n aki boraoi n aia iango ao n aia koaua.
Taetae ni kamatauninga, ni kewe, ao taekinan ae buakaka nakoia tabeman a bane ni bwainaki. A mwaiti taan rabakau, taan tautaeka, taan kamataku, ao taan anainano riki tabeman aika a teimatoa n tatakarua ngkana a un. I rang n tabeaianga bwa a mwaiti aomata aika a taraa ni kakoaua ae e butimwaeaki te motiitaeka, kamarakan, ao kakoauaan temanna are e aki boraoi ma ngaia. A mwaiti aika a korakora nanoia ni urua katein temanna ma taeka aika kananokawaki ao ni kammaraki!
E aki kona te un ni kairoro. Te mata n un e aki karikirakea aron temanna. Te aki boraoi n iango e aki kona ni kairiiri nakon katokana mairoun te tamnei. Te kananokawaki, bwa n tabetai ao ti noori katei aki boraoi bon nakoia kaain te Ekaretia. Ti ongo taekaia naake a kakeai bonganaia kainabaia ao natiia, aika a tatakarua n un ni kairiia tabeman, ao naake a katuaia kaain aia utu n te “aki kan taetae.” Ti ongo rongorongoia kairake ao ataei aika a buuri ao taan mwakuri aika a kabuakaia raoia n reirei.
Tariu ao mwaneu, e aki riai n riki aei. Ngkai ngaira ana reirei Iesu Kristo, ti riai n riki bwa banna ni katooto n arora n reitaki ma tabeman—riki ngkana iai kakaokoron ara iango. Teuana te kawai ae moan te bebete ni kina te tia irira raoi Iesu Kristo bon aron te aomata anne n tabeakiniia aomata ake tabeman.
E kaitiaka taekan aei te Tia Kamaiu n Ana taromauri nakoia taan iriiria n emitibiia (hemisphere) ake uoua aikanne. “A a kabwaia taan raoi,” E taku.1 “Ane boa tabam ane mai ataim, ao ko na raira tabam ane teuana nako ina.”2 Ao ngkanne, eng, E anga te kauring are e kaewenakoira ngaira n tatabemaniira nako: “Kam na tangiriia ami kairiribai, ao tataro i bukiia akana bainikirini ngkami.”3
Imwain matena, e tuangiia Ana Abotoro ake Tengaun ma Uoman te Tia Kamaiu bwa a na tangiriia bon irouia n aron are E a tia n tangiriia.4 Ngkanne E a manga reitia, “Ane a na ataingkami aomata ni kabaneia ba au reirei ngkami n aei, ngkana kam i tangitangiri.”5
E rangi ni mataata ana rongorongo te Tia Kamaiu: Ana reirei ni koaua a katea, uotia rake, kaunga, e anai nanoia, ao e kairiia—n aki tabe ma aron te kangaangan te kangaanga. Ana reirei ni koaua Iesu Kristo bon taan raoi.6
Aio bongin Tabatin te Palm. Ti a katauraoi n bukamarua te kabanea ni kakawaki ao n mimitong n tai are e koreaki taekana iaon te aba, are bon te Mwakuri ni Kamaiu ao Mangautin te Uea Iesu Kristo. Teuana te kawai ae moan te tamaroa ae ti kona iai ni karinea te Tia Kamaiu bon te riki bwa te tia karaoa te raoi.7
Ana Mwakuri ni Kamaiu te Tia Kamaiu e anganiira te kona n tokanikai iaon bwaai ni kabane aika buakaka—n raonaki ma te kakauntaeka. Karaoia ae a na akea burena: te kakauntaeka bon te bwai ae buakaka! E katanoata Iesu Kristo bwa naake iai irouia “tamnein te kakauntaeka” ao bon tiaki mai Irouna ma bon mai iroun te [riaboro], are taman te kakauntaeka, ao e kakiriweei nanoia aomata bwa a na itabaraaraa, i marenaia.”8 Naake a boutokaa te kakauntaeka a karaoa naba te bwai ae ti tebo ma are e karaoia Tatan. “Akea te aomata ae kona n toro irouia uoman tooka.”9 Ti aki kona ni boutokaa Tatan ma arora ni kakauntaeka ao n iangoia ae ti kona n teimatoa ni beku ibukin te Atua.
Tariu ao mwaneu, arora n tabeakiniira bon iroura e bon rangi ni kakawaki! Arora n taetae nakon ao ibukiia tabeman n te mweenga, n te taromauri, n te mwakuri, ao iaon te rain a bon rang ni kakawaki. N te bong aei, I titirakiniira bwa ti na reitaki ma tabeman n te kawai ae rietaata, ao ni mimitong riki. Taiaoka kakauongo raoi. “Ngkana iai te bwai ae raoiroi, ae kakateke, ke ae tamaroa rongorongona, ke e kamoamoaaki”10 are ti kona iai n taekina rongorongon riki temanna te aomata—tao n taekinna ma ngaia ke n taekinna n te tabo ae raba—are e na riai n riki bwa ara kainibaire n te reitaki.
Ngkana te taanga n am uoote a raure, ke te kairake ni mitinare e okira mweengana ni moantaai, ke te roronrikirake e nanououa n ana kakoaua, aki kainnanoa am motikitaeka. A kainnanoia n rinanon ana tangira ae e itiaki Iesu Kristo are e oti n am taeka ao n am mwakuri.
Ngkana iai raoraom iaon te bwai n reitaki ae e korakora ana noonori iaon taekan te tautaeka ma bwaai n reitaki ao e kakeai bonganan bwaai ni kabane ake ko onimakin, te kaeka ae akea te tangira iai ao ni kammaraki mai iroum e na aki ibuobuoki. Karaoan reitaki ao namakin aika raoiroi ma aomata tabeman e na kainnanoa ae bati riki mai iroum, ma anne te bwai ae tangiria raoraom.
Te kakauntaeka e kabirinakoa te Tamnei—n taai nako. Te kakauntaeka e kakorakora te iango ae bure are te kakauntaeka bon te kawai ni katoki kakaokoro n iango; ma e aki kona. Te kakauntaeka bon te rinerine. Karekean te rau bon te rinerine. Iai inaomatam n rinea te kakauntaeka ke te raoi. I kaumaki ngkami n rineia n riki bwa te tia karika te raoi, ngkai ao n taainako.11
Tariu ao mwaneu, ti kona ni bita te aonaaba—temanna te aomata ao teuana te reitaki n te tai teuana imwiin teuana. Ni kanga? Man kaotakin aron tararuaan kakaokoro n iango aika kororaoi ma te karinerine ao te reitaki ae karinerine.
Kakaokoron iango bon kanoan te maiu aei. I mwakuri ni katoa bong ma ana toro te Uea aika kakaonimaki aika a taraa te bwai ni kawaina ae ti teuana. A ataia ae I tangiria n ongo aia iango ao aia namakin aika koaua iaon bwaai aika ti maroroakin—riki iaon bwaai aika aki riai n taekinaki.
Au kauntira uoman aika mangori, Beretitenti Dallin H. Oaks ao Beretitenti Henry B. Eyring, bon banna ni katooto n aron kabwarabwarakin aia namakin—riki ngkana a kaokoro. A karaoia ma te tangira ae itiaki bon imarenaia. Ngaia e taku n ana iango bwa e atatai riki ao ngaia ae e riai ni kamanoa arona. Tao kakoauaan kainnanoan te kaiangatoa ma are temanna. Bukina bwa ngaia n tatabemaniia a kaonaki ma te tangira ae kororaoi, “ana tangira Kristo ae itiaki,”12 a kona ara marooro ni kairaki iroun Tamnein te Uea. E korakora au tangira ao au karinerine nakoia mwaane aika uoman aikai!
Te tangira ae kororaoi bon te kaeka nakon te itabaraara. Te tangira ae kororaoi bon ana bwaintituaraoi te tamnei are e buokiira n tokanikai i aon te aro n aomata, ae bangaaomata, e totoko, e kainikatonga, ao ni bakantang. Te tangira ae kororaoi bon katein raoi te aomata ae te tia iriira ni koaua Iesu Kristo.13 Te tangira ae kororaoi e kabwarabwara te tia tararua te rau.
Ngkana ti kananorinanoira imatan te Atua ao n tataro ma korakoran nanora ni kabane te Atua e na anganiira te tangira.14
Naake a kakabwaiaaki ma te bwaintituaraoi mai i karawa aei a taotaonaki n nano ao a atataiaomata. Aki ribaia tabeman ao aki ti tarai aron kakawakiia. Aki kakaiun ao aki iangoi buakakaia tabeman.15
Tariu ao mwaneu, ana tangira ae itiaki Kristo bon te kaeka nakon te kakauntaeka ae karika ara kangaanga n te bong aei. Te tangira ae kororaoi e kaungaira bwa ti na “katoka iaora rawawataia raora”16 nakon ae karikan ana kangaanga temanna bwa e na rangi ni kangaanga riki. Ana tangira ae itiaki Kristo e kariaira bwa “ti na tei bwa taan kakoaua ibukin te Atua n taainako ao ni bwaai nako”17—riki ni kangaanga aika aki ataaki. Te tangira ae kororaoi e kariaira bwa ti na kaotia bwa a kanga mwaane ao aine iroun Kristo n taetae ao ni mwakuri—riki ngkana ti kaitaraaki ma te ribaaki ae korakora.
Ngkai, I aki taetae iaon “te rau n aki tabe ma te bwai ae na riki.”18 I taetae iaon tabeakinaia tabeman n te aro are e na booraoi ma kawakinan am berita ae tabu ngkana ko taua te toa. Ko berita bwa ko na ururinga te Tia Kamaiu n taainako . N ni kangaanga aika a rangi ni kananokawaki ao ni kaonaki ma te kakaitara, I kaoi ngkami bwa kam na ururinga Iesu Kristo. Tatro bwa e na reke iroum te ninikoria ao te wanawana n taekina ke ni karaoa te bwaai ae E na karaoia. Ngkana ti ira te Uea n Raoi, ti na kona n riki bwa Ana taan karaoa te raoi.
N te tai aei ko na taku n am iango bwa e na kona te rongorongo aei ni buoka temanna ae ko ataia. Tao ko na kantaningaia bwa e na buoka teuanne ke neienne bwa e na rang n raoiroi riki nakoim. Au kaantaninga bwa e na riki! Ma I kaantaningaia naba ko na taraa raoi nanom n taraia ngkana iai teutana te kainikatonga ke te bakantang are e na tukiko man rikim bwa te tia karika te raoi.19
Ngkana iai raoi nanom ni buoka ikotan Iteraera ao ni karikirakea te reitaki are e na teimatoa nakon akea tokina, ngkai te tai ni katinanikui itabaraara. Aio te tai ae a nang kariaia are irou bwa iaki tangiria ni maroroakinna riki ma tabeman. Ngkai aio te tai ni katoki karaoan bwaai ake a na karikiia tabeman n rang ni karaurau n te bwai ae a na taekinna bwa a maaku bwa rimwi a na kauniko. Ngkai aio te tai n tauni ami bwai ni buaka.20 Ngkana e kaonaki n nen am bwai ni mwakuri ma taeka ni kabwainrang ao n taetae ni kabuakaka, ngkai aio te tai ae ko nang kaaki.21 Ko na teirake bwa te mwaane ao te aine iroun Kristo ae korakora n tamneina.
E kona te tembora ni buokiira n ara kakaae. Ti katabuaki ikekei ma mwaakan te Atua, are e anganiira te konabwai n tokanikai iaon Tatan, te tia karikii ni kabane kakauntaeka.22 Kararoa man am reitaki! Taraia naba bwa ti matoatoa n taetae nakoia taan kakaitara n tainako ngkana ti buoka te aki ota ke n rawa ni butimwaea te bukinaki. Ma, ti kona ni kaota te nano n tangira are a bwainna ana rerirei ni koaua Iesu Kristo. Taan raoi a kamanoia taan kakaitara.
Ti na riki ngaira aomata n riki bwa te taura ni koaua iaon te tabuki—te ota ae “aki kona ni karabaaki.”23 Ti a kaotia ae iai te kawai ae rau, ao n rine ni katoki kangaanga ao te kawai ae oota ni mwakurii itabarara. Ngkana ko kamataata te tangira ae kororaoi are a kakoauaa taan iriira ni koaua Iesu Kristo, ao te Uea e na kakorakora am mwakuri iaon ae ko kona n iangoia.
Ana karaun te euangkerio bon te kabanea ni bubura n nete n te aonaaba. E a tia te Atua ni kaoiia ni kabane bwa a na Nakoina, “ae bwatabwata ke ae mainaina, te toro ke ae inaomata, te mwaane ke te aine.”24 Iai n neia aomata nako. E ngae n anne, ao akea te ruu ibukin te motikitaeka, te kabuakaka, ke te itabarara n aekaia nako.
Tariu ao mwaneu aika kam tangiraki, a nang roko bwaai aika tamaroa riki ibukiia naake a kabanea aia tai ni maiuia ni kateiraoia ake tabeman. N te bong aei ao I kaoko bwa ko na taraa aron am anga reirei ni kaineti ma arom n tabeakiniia tabeman. I kakabwaiako bwa ko na karaoi kaetieti aika a na kainnanoaki bwa e aonga arom ni kamoamoaaki, ni karinerine, ao te tia tei ibukin irriran ni koaua Iesu Kristo.
I kakabwaiai ngkami bwa kam na bita te anua ni kan unuun ma te anua ni bubuti, te kairiribai ma atakina, ao te kakauntaeka ma te rau.
E maiu te Atua! Iesu bon te Kristo. E tei n atuun te Ekaretia aei. Boni ngaira Ana Toro. E na buokiira bwa ti aonga n riki bwa Ana taan karaoa te raoi. I kakoaua n aran Iesu Kristo ae tabu, amen.