Rongorongon te Ekaretia
Taraakin ana Ibuobuoki Beretitenti Russell M. Nelson ae Nimaua Ririkina Ngkai te Beretitenti n te Ekaretia
N ana moan maroro nakoia te botanaomata ngkai te ka 17 ni beretitenti n Ana Ekaretia Iesu Kristo ibukiia Aika Itiaki ni Boong aika Kaitira, are e anga nimaua te ririki n nako, Beretitenti Russell M. Nelson e anai nanoia te koraki mairouna nakon Iesu Kristo ao e ingainga nakon are imwiina.
“N taainako ao te Uea e na kaetiia ao ni kairiia Ana burabeti n taainako,” e kabwarabwara. “Te Uea ngaia ae e Kairiiri. Ngaira ake ti a tia ni katabuaki bwa ti na kaota koauan Arana ae tabu ni kabutaa te aonaaba ti na teimatoa ni ukoukora Ana kaantaninga ao n iriria” (“As We Go Forward Together,” Riaona, Eberi 2018, 6).
Karekean te Kaotioti ni Kaira te Ekaretia
E a tia Beretitenti Nelson ni karaoa nanon ana kaetieti te Uea ngkai e kawari 35 aaba, ni barongai ana bootaki te Ekaretia, ni kabonganaakin Rabakau aika a boou ni tibwaua te euangkerio, ni kaira te Ekaretia rinanon te butinaoraki, ni kanakoi beeba ni kakao aika a kakaongora, ao ni karaoi reitaki aika tamaroa.
N nakoana ngkai e riki bwa te beretitenti n te Ekaretia, e maroro Beretitenti Nelson ma tebubua ngaa n aomata Aika Itiaki ao ni kaoiia uea, beretitenti, ao buraiminitita. E a tia ni karaui nanoia aomata ake a rootaki ni korakoran te kakeru ao tabeman riki ake a nanokawaki ao ni kananoi aia reitaki ma taan kairiiri ake a rietaata ni Bootakin te Aba ibukin karikirakeaia Aomata ake a Kaokoro Kuniia (NAACP), n reken ana beeba ni kakao bwa e na taetae n te 2019 NAACP convention i Detroit, Michigan, USA.
Man te kaotioti ao man aia boutoka ae bwanin te Moan Beretitentii ao te Kooram n Abotoro n te Tengaun ma Uoman, e a tia ni karaoi bitaki aika bati ni kaeti ma kaetieti inanon te Ekaretia.
Iaan ana kairiiri ae kairaki mairoun te tamnei, taan kairiiri irouia Aika Itiaki a karaoa te mweenga ao te kakawari n reirei nakon te mwakuri ni ibuobuoki; ni kangaraoa tain bootaki n taromauri n te Tabati ni kamweengaraoi taabo ae boboto iaon te mweenga, kamatebwaian te euangkerio ae boutokaaki n te Ekaretia, ao n tuangiia kaain te aro bwa a na kabongana raoi aran te Ekaretia n etina ao ni kabwaninna. E a tia te Ekaretia ni karina ana tua bwa e kariaia taanga ake a tia ni mare n te tua bwa a na kabaeaki n te tembora n te tai are a tauraoi iai, ni korea aran rinanoakin te kabwianibwai bwa te katanoata ibukin kabwianibwai, ao ni katea te kaetieti ni butimwaeia aine bwa a na mwakuri bwa taan kakoaua ibukin te kabaebae n te tembora ao aine, kairake, ao ataei aika kaain te Ekaretia ake a tau ni mwakuri bwa taan kakoaua ibukin mwakuri ni bwabetito.
“Teuana te bwai ae kaokiokia te Tamnei iaon au iango inanon nakoau ae boou n riki bwa te Beretitenti n te Ekaretia bwa e na kanga te Uea ni kaota ana iango ao ana kantaninga,” e taku Beretitenti n tain te maungatabu n Eberi 2023 (“Revelation for the Church, Revelation for Our Lives,” Riaona, Meei 2018, 94).
N 2020 e a tia te Ekaretia ni bukamarua kauringaan te kauabubua n ririki ibukin ana Moan Kaotioti Iotebwa Timiti, tiaki n te bukamaru ae rangi ni bubura ma taan kairiiri ake a kaoiia Aika Itiaki ni kabuta te aonaaba n reirei ao n ongo raoi bwanaan te Uea n ae tamaroa riki ao n te tai ae mwaiti. N ana marooro n te maungatabu ni kabuta n Eberi 2020, e anga te katanoata Beretitenti Nelson iaon ae moan te kakaongora, “Kaokan Bwaninin ana Euangkerio Iesu Kristo:Te Kauabubua n Ririki ni Katanoata nakon te Aonaaba” (taraa “Ongo Irouna,” Riaona, Meei 2020, 91–92).
Kairan te Ekaretia rinanon te COVID-19
N ana taneiai te bwaeoniia ae te tia korokoro iaon te buroo ma ai moarara riki ngkai ana burabeti te Uea n te aro ni kabuta te aonaaba, Beretitenti Nelson e kaira te Ekaretia rinanon butin te aoraki ae te COVID-19 are e moan riki n 2020.
Te kaeka man aia mwakuri n tangira Aika Itiaki nakon te butinaoraki e riki bwa te kaeka ae moan te bubura ae taubobonga raoi n rongorongon te Ekaretia, ma buoka ake a katauraoaki man aaba aika e riaon 150 mwaitina.
N te intawiu ni Meei 2020 ma ana Rongorongo te Ekaretia, E taku Beretitenti Nelson, “E ngae ngke rinanon taian karawawata, e na iai te tamaroa ae na kuneaki inanon tain te kangaanga” (in Sarah Jane Weaver, “Video: President Nelson Talks about the ‘Painful’ Decision to Close Temples amid COVID-19,” Rongorongo man te Ekaretia, Turai 27, 2020, thechurchnews.com). Te tamaroa are e na kuneaki ibukin butin te aoraki, e taku, bon kunean kawai ni ikoikotaki ma Aika Itiaki n aki toka iaon te wanikiba. Rinanon rabakau aika a boou, e maroro Beretitenti Nelson ma Aika Itiaki i Venezuela ao Eurobe n ai aroia naba ake i California, Canada, ao Oklahoma. E taetae naba nakoia kairake n ikawai ni kabuta te aonaaba.
N Aokati 2022, e mwananga Beretitenti Nelson itinanikun Utah n te moantai n te tai are e roko ni korakorana butin te aoraki aei ni Maati 2020 ibukin manga kaatabuan ao onobwaian Washington D.C. Tembora.
Karekean te Gandhi-King-Mandela Peace Prize
Te Kuura ae Morehouse, rongorongon te kuura ibukia Ibwatabwata i Georgia, USA, e katanoataaki bwa e na anga ana kawaninga ae te Gandhi-King-Mandela Peace Prize nakon Beretitenti Nelson. Te reirei aei e anga te karineaki aei n ana ka 98 n ririki te burabeti n Eberi 13, 2023, n te Worldhouse Interfaith ao Interdenominational Assembly i Martin Luther King Jr. Umwantabun te Aba i Atlanta.
E ingoanaki te kaniwanga aei imwiin aran Mahatma Gandhi, Martin Luther King Jr., ao Nelson Mandela. E baireaki, e taku te reirei, ibukin temanna are e katanoata te rau ao bitaki aika a nakoraoi ibukin te botanaomata rinanon te aki kariwee ao ni kabongana aia kairiiri n te aonaaba ae bwanin ni kamatoa te rau, te motiraoi, te kakaokoro, ao kurubu aika mwaiti.
E butimwaea te kaniwanga Beretitenti Nelson rinanon te witeo, ao te Tabaenako Kuaea n te Tembora Tikuea e karaoaki naba i aonraain.
Ana mwakuri te burabeti ae nimaua te ririki e kaonaki ma kaungaakin te tangira ao te karinerine nakoia aomata ni kabane. N tain te bukamaru n 2018 ni kauringaan te ka 40 n ririki are e karaoaki n 1978 n te kaotioti iaon kakabwaia ibukin te nakoanibonga anganaki membwa ni kabane ake a tau ibukin reeti nako, reireiniia Aika Itiaki bwa a na “katea aia buriiti n ikarekebai ma tiaki te kakaokoroaki” (“Building Bridges,” New Era, Aug. 2018, 6).