“Titita Andrea Muñoz Spannaus,” Riaona, Meei 2023.
Titita Andrea Muñoz Spannaus
Kauoman ni Kauntira n te Beretitentii ni Kabuta n te Bootaki n Ataeinaine
Ngke a maeka bwa ataei i Argentina, Andrea Veronica Muñoz ao tarina te ikawai a reirei n reirein te Katorika. A bon tuai n taneiai ma waaki n angareirei n aaro tabeua ni karokoa ruaiwa ana ririki Andrea. Anne ngke a moana aia angareirei mitinare ibukiia Aika Itiaki ni Boong aika Kaitira nakoia ana utu taekan te euangkerio ae e a tia ni kaokaki.
Imwiin naba anne ngke e bane aia reirei mitinare ao a nako, e kamataata tinan Andrea bwa a rangi ni mwaiti aaro ao tiaki tii teuana. E titirakina tinana Andrea bwa tera te aro ae raoiroi riki n ana iango ae e tei ibukin te Atua. E kaeka tinana, “I taku bwa bon ae teuana aei raoi”—Ana Ekaretia Iesu Kristo ibukiia Aika Itiaki ni Boong aika Kaitira, are a bon tibwa reireinaki rongorongona irouia mitinare.
Inanon maiuna, n taainako ao Andrea “ e tangiria bwa e na kakukureia nanon te Atua,” ngaia are kanga e raraoma ngkai e nang manga kamatoa ana onimaki ae boou. Ana namakin aei bon tii inanon tabeua te miniti, e ngae n anne, ao e oneaki mwiina man te nano ni kan reiakina riki taekan te Ekaretia.
E a bwabetitoaki ara utu, “ao ti a moana maiura ae boou,” e taku Titita Spannaus. “E bon rangi n tamaroa aron bitakin maiun ara utu ibukira ni kabane.”
E bungiaki Andrea Veronica Muñoz Spannaus ni Meei 18, 1968, i Buenos Aires, Argentina, irouia Carlos Alberto Muñoz ao Elida Menicucci. E ikawairake i Béccar, Argentina. E mareaki ma Alin Spannaus n te Buenos Aires Argentina Tembora n Okitobwa 1992. Boni kaaro irouia natiia aine aika uoman.
E reke ana beeba ae bubura Titita Spannau iaon te angareirei ibukia ataei aika a uarereke, ao e kamatebwaia te korobanna ao katamaroa inanon auti. E beku n te tai aei bwa te mataniwi ni Kabuta n te Bootaki n Aine. Mai imwaaina, e beku n te Komete Ibukin Kakorakoraia Kairake n te Tabo ae South America South Area, ao buuna bwa te tia kairiiri n te Mition i Mexico Cuernavaca Mition.
E a tia naba ni beku bwa te beretitenti n Bootaki n Aine n te uoote, n te Bootaki n Ataeinnaine, ao n te Moanrinan, te tia reirei n te moaningabong n te tieminari, te aetuwaitia ibukiia Kairake n Ikawai n te uoote ibukin te taetae n Tibaeniti, ao te mitinare n te Argentina Resistencia Miition.