Iesu Kristo Bon Korakoraia Kaaro
Buokiia natimi ni katea aia onimaki iroun Iesu Kristo; n tangira ana euangkerio ao Ana Ekaretia, ao ni kautauraoi nakon maiuakinan ririnean aika raoiroi.
N te bong teuana, te karo e tauraoi ni mwananga nakon ana boowi te bitiobiriki n te tairiki. Natina te aine ae aua ana ririki e tei imatana, ma bwaina ni matu ao n taua te Boki ni Karaki n Ana Boki Moomon.
“Bukin tera kona nako ni boowi?” e titiraki.
“Ibukina bwa ngai te kauntira n te bitiobiriki,” e kaeka.
“Ma ngkoe tamau!” e ngurengure natina.
E katorobubua imatana. “Natiu,” e taku, “I ataia bwa ko tangirai bwa N na wareware nakoim ni buokiko ni kamatuko, ma n te tairiki aei I riai ni buoka te bitiobi.”
E kaeka natina, “Bwa akea taman te bitiobi ae e na buokia ni kamatuua?”
Ti rang kakaitau irouia membwa aika mwaiti ake a beku mwaaka n ana Ekaretia Iesu Kristo ni katoa bong. Ami anganano ni koaua e bon tabu.
Ma ngkai te ataeinnaine aei e tara n ataia, bwa iai bwaai aika a uaia n tabu—te bwai ae aki kona n oneaki mwiina—irouia kaaro n nabeakina te nati. E kaota te banna mai karawa.1 Tamara are i Karawa, Tamara ae Tabu, e bon rangi ni kukurei ngkana Natina a reiakinaki ao n nabeaki irouia aia karo i aon te aba.2
Kaaro, kam rabwa ibukin bwaai ni kabane ake kam karaoi ni kaikawaia natimi. Ao natira, kam rabwa ibukin bwaai ni kabane ake kam karaoi ni kaikawaia ami karo, ibukina ngkai a bon bane n ataia kaaro, ngaira n tabetai ti reiakina ae mwaiti mairouia natira ibukin te onimaki, kaantaninga, ao te tangira ae kororaoi ngkai a reiakinaki mairoura!3
Iai Tibwangaia Kaaro ae Tabu
Kam a tia n iangoa te kangaanga are e butimwaia Tamara are i Karawa ni katoa tai are e kanakoa iai te nati nako aon te aba? Aikai bon natina mwaane ao aine n tamnei. Iai aia konabwai ae akea tiana. A kantaningaaki bwa a na riki bwa aomata aika a mimitong n te raoiroi, nanoanga, ao te koaua. Ao e ngae n anne a roko iaon te aba n aroia n aki konabwai, kuri aki kona ni karaoa te bwai teuana irarikin te tang bwa a na buokaki. Uringan aia tai ni maeka ma te Atua e bon bua, n raonaki ma te atatai bwa antai raoi ngaiia ao antai aroia ngkoa are a na kona ni karekea. A katea aia atatai n te maiu, tangira, iroun te Atua, ao Ana baire are e boboto iaon te bwai are a nooria mairouia aomata ake a katobibiia—riki aia karo, ake ni koauana, a teimatoa ni kataia ni kakaea angana ibon irouia.
E a tia te Atua n anganiia kaaro “tabeia ae tabu ni karikirakeia natiia ma te tangira ao te raoiroi, ni katauraoi kainnanoia n rabwata ao n tamnei, ao n reireiniia … bwa a na karinei ana tua te Atua.”4
Akanne a tau ni kateimatoaia kaaro aika tamaroa bwa a na taratara n te tairiki.
Au rongorongo nakoia kaaro ni kabane, bon aio:
E tangiriko te Uea.
E memena iroum.
E tei irarikim.
Ngaia korakoram ni kairaia natimi ni karaoan rinerine aika raraoi.
Butimwaea te tibwanga aei ao te katabeaki ma te ninikoria ao te kimwareirei. Tai angan temanna te kakabwaia aei ae roko mai karawa. Inanon ana kainibaire te euangkerio ma ana reirei, bon ngkoe ae ko na kaira natim n arona nako ni babaire ni katoabong. Buokiia natimi ni katea aia onimaki iroun Iesu Kristo; n tangira ana euangkerio ao Ana Ekaretia, ao ni kautauraoi nakon maiuakinan ririnean aika raoiroi. Ni koauana, iai ana baire te Atua ibukiia kaaro.
E na kaitarako Tatan, kamangaoko, ni kataia ni kabwaraa nanom.
Ma ataei n tatabemaniia nako a tia ni karekea Otan Kristo bwa kairakiia nako karawa. Ao e na buokiko Te Tia Kamaiu, kairiko, ao ni kaunga nanom. Ukora ana ibuobuoki. Butiia te Uea!
N ai aron ae Iesu Kristo bon korakoraia kairake, Iesu Kristo bon korakoraia naba kaaro.
E Kakorakora te Tangira
N tabetai ti na bae n iangoia ngkana iai riki temanna ae e na kona n tau riki ni kairiia ao n reireiniia natira. Ma e ngae ngke am konabwai are ko namakinna eaki rang raoiroi, ma iai iroum te bwai ae onoti are ko tau iai: am tangira ibukin natim.
Ana tangira te karo nakon natina bon teuana te kabanea ni korakora n te aonaaba. Bon ngaia mai ibuakon bwaai aika karako iaon te aonaaba aei are e kona n teimatoa n akea tokina.
Ngkai, tao ko namakinna bwa reitakim ma natim e karako riki nakon are e kantaningaaki. Anne are e a roko iai mwaakan te Tia Kamaiu. E kamarurungiia aoraki, ao E kona naba ni kamarurunga naba ara reitaki. E karakai mwaitin kariki ao ika, ao E kona naba ni karaka te tangira ao te kimwareirei ni mweengam.
Am tangira nakoia natim e karekea te otabwanin n tangira ibukin reiakinan te koaua ao katean te onimaki. Karaoa mwengam bwa te auti n tataro, n reirei, ao n onimaki; Te auti ibukin karekean namakin aika kakukurei, te mwenga ae barongaki raoi, ae ana auti te Atua.5 Ao “tataro nakon te Tama ma angin nanom ni kabane, bwa ko aonga ni kaonaki n ana tangira, are e anga nakoia … taan iriira natina ae, Iesu Kristo.”6
E karakai mwakuri aika Uarereke man Beebete
Te korakora teuana are ko karekea, ngkoe te karo, bon te tibwanga ni katoabong, n reitinako ni karaoi bitaki. Raoraom, taan reirei, ao taan kareke rongorongo a roko ao a nako. Ma ko kona n teimatoa n riki ba te tia kaunga natim inanon maiuna.
Am beku e kona n taraa n uarereke ni kabotauaki ma takaruan bwanaiia natim are a ongo n te aonaaba. N te tai teuana ma teuana n te namakin e aki rangi ni mwaiti ae ko a tia ni karaoia. Ma uringnga bwa “man bwaai aika uarereke ao e a kona iai te Uea ni karaoi bwaai aika korakora.”7 Te kainutu n te tairiki teuana, maroroakinan te euangkerio teuana, ke te katooto ae tamaroa teuana e kona n aki bita maiun natim n te tai ae uarereke, nakon are e raka iaon te timna te karau e na waekoa ni kaikawa te aroka. Ma teimatoan te bwai ae uarereke man beebete, te bong teuana imwiin teuana, e na kamwarakea natim n ae tamaroa riki nakon te ieka are ririki.8
Anne ana kawai te Uea. E taetae nakoim ao natim ma te bwanaa ae beebete, ae maraara, tiaki te bwanaa ae kanga te baa.9 E kamarurunga Naaman tiaki rinanon “tabeua bwaai aika korakora” ma rinanon ae beebete, kaokioka tebotebona.10 Ataein Iteraera a kukurei ni kamwarakeaki ni mannikiba n te rereua, ma te bwai are kateimatoa maiuia bon te kakai ae karako man beebete n te maana—kanaia ni katoabong.11
Tariu ao mwaneu, te kariki e tauraoi ni katoabong n tibwatibwaaki n te mweenga. Te onimaki ao kakoaua a maiuakinaki n te aro ae tataneiai te aba iai, teutana imwiin teutana, n taai aika uarereke man beebete, inanon nakoraoin maiuakinana n te bong koraki.12
Ni katoa miniti bon te tai n reirei. Taeka ao mwakuri nako a kona n riki bwa te kairiiri ibukin karaoan rinerine.13
Ko kona n aki noora mwiin am mwakuri. Ma tai bwara n nano. “Bwaai ni kabane a na koro bukiia inanon taina,” e taku te Uea. “Ma ngaia are, tai kua ni karaoan ae raoiroi, bwa kam kawenea aan te mwakuri ae korakora.”14 Tera te mwakuri ae korakora riki nakon buokaia natin te Atua aika a kakaawaki n ataia bwa antai ngaiia ao ni katea aia onimaki iroun Iesu Kristo, Ana euangkerio, ao Ana Ekaretia? Iesu Kristo e na kakabwaia ao e na karakai riki am mwakuri aika a teimatoa.
E Anga Kaotioti
Teuana naba te kawai ae korakora ae te Uea e boutokaia iai kaaro bon rinanon te bwaintangira ni karekean oin am kaotioti. Te Uea e ingainga nanona ni kabwaroa Tamneina ni kairiia karo.
Ngkai ko bwaina te tataro ao ni kai namakina te Tamnei, E na kauringko kangaanga aika raba mairoura.15 E na kaoti aia tarena natimi, korakoraia, ao tabeianga aika tuai taekinaki.16 Te Atua e na buokiko n nooria natim n aroia ngke E nooriia—iaon riki taraakiia mai itinanikuia ao n rin inanoia.17
Man ana ibuobuoki te Atua, ko kona n reireiniko ni kinaia natim n te aro ae itiaki ao n teina mai karawa. I kaoi ngkami bwa kam na butimwaea ana anganano te Atua ni kairiia ami utu man ami kaotioti ae onoti I bon iroumi. Ukoukoroa Ana Kairi inanon ami tataro.18
Te Bitaki ae Moan te Korakora
Tao te ibuobuoki ae anga Iesu Kristo ae moan te kakaawaki nakoia kaaro bon te “bitaki ae korakora” n te nano.19 Bon te kakai are ti kainnanoia ngaira n tatabemaniira.
N te tai aei, iangoa te aro aei: Ko mena n te taromauri n ongora te maroro iaon te utu. Te tia taetae e kabwarabwara mweengan te utu ae kororaoi ao riki te utu ae kororaoi. Buumwane ao buuaine aki kona n uneaki. Ataei a ti katoka warekan aia boki ae tabu ngkana e boo aia tai ni karaoa aia kamatebwai. Ao te anene ae “Love One Another”20 e katangaki mai buki. Imwain are e roko te tia taetae n te mwakoro are ni kabane a ikotaki ma te kukurei ni kaitiaka te roki n tebotebo, koa tia n iangoia, “A kabwaranano au utu.”
Tariu ao mwaaneu aika tangiraki, karau nanomi! Ni kabane kain te taromauri a iangoa naba anne! Te koaua bwa, ni kabane kaaro a raraoma n aroia n aki tau.
Te kakukurei, iai te buoka mai karawa ibukiia kaaro: Bon Iesu Kristo. Bon Ngaia buokara ibukin bitakin nanora ae korakora.
Ngkai ko kauka nanon nakon te Tia Kamaiu ao Ana reirei, E na kaoti nakoim mamaaram. Ngkana ko onimakina Iesu Kristo ma te nanorinano, E na karaoi bwaai aika a mamaara bwa a na riki ni korakora.21 Bon Atuan te kakai.
Tao e nanonaki n anne ibukim ma am utu bwa kam na tara ni kororaoi? Bon tiaki. Ma kona kamarurungaki. Rinanon ana nanoanga te Tia Kamaiu, teutana imwiin teutana, kona karikirakei riki anua are a kainnanoia kaaro: tangiran te Atua ao Natina, taotaonakinnano, kakeaki, nimamannei, ao te ninikoria ni karaoan ae eti.
Iesu Kristo E Anga Boutoka rinanon Ana Ekaretia
Te beku ni katean te onimaki iroun Iesu Kristo e boboto n te mweenga, ni kaineti nakon temanna ma temanna. Ao e boutokaaki n te Ekaretia. Irarikin katauraoan koroboki aika a tabu ao aia taeka burabeti, ana Ekaretia te Tia Kamaiu e anga buoka aika a mwaiti ni buokiia kaaro ao ataei ni karaoi rinerine aika raraoi:
-
Ibukin Kakorakoraia Kairake: Te Kairi ibukin Karaoan Rinerine e aki anganiko rinanin bwaai aika ko na karaoi ke ko na aki. E reirei taekan koaua aika akea tokina ni buoka karaoan rinerine ae boboto iaon maiun ao ana reirei Iesu Kristo. Warekia ma natim. Anganiia bwa a na maroroakinna. Buokiia bwa a na karekei koaua aika akea tokina mairon te Atua ibukin kairan aia rinerine.22
-
Maungatabu Ibukin Kakorakoraia te Roronrikirake bon te bwai n ibuobuoki naba ae tamaroa. Au kaantaninga bwa kairake ni kabane a iria. I kaoia kairake ake a tuai iein bwa a na iri maungatabu aikai bwa taan reirei ao kauntira. I kaoia kaaro bwa a na karikirakea maiun tamneia aia roronrikirake are a na uotia rikaaki man te maungatabu n te FSY.
-
Ataei ao te roronrikirake n Ana Ekaretia Iesu Kristo ibukiia Aika Itiaki ni Boong aika Kaitira iai taan reirei, taan kairiiri, ao taan ibuobuoki. N taainako ko riinga maiun te aomata n te tai ae moan te kakaawaki ni kateitei ao ni boutoka te onimaki ao te koaua. Tabeman mai ibuakomibon kairake aika akea buuia. Tabeman a tuai n reke natiia. Kimwareireimi ni beku ibukiia natin te Atua e bon tabu i matan te Atua.23
Tai Bwarannano man Kakai
Raou aika kam tangiraki, tariu ao mwaneu aika kam tangiraki, unikan te onimaki inanon te ataei kanga ai aron buokakin te uee bwa e na rikirake. Ko aki kona ni kena botona bwa e na rietata riki. Ko aki kona ni karaurea te uee ae maki bwa e na waekoa n raure. Ao ko aki kona n totokoa te uee ao ni kantaningaia bwa e na rikirake ke n raure ibon irouna.
Tera ae kona riai ni karaoia ibukin te roro ae tabe n rikirake ni mwaiti, kamwarakea n te bon, ni karekea raangan te ran mai karawa. Kouti uteute ao bwaai ni kabane ake a na tuuka te ota mai karawa. Karekeii anua aika kabanea n tamaroa ibukin te rikirake. N tataninga ni kariaia te roro ae tabe n rikirake bwa a na karaoi rinerine aika a kairaki mai karawa, ao kariaia bwa te Atua e na karaoi Ana kakai. E na rang tamaroa man kakanikan ao ni kakukurei mwiina riki nakon te bwai are ko kona ni katiaa bon ti ngkoe.
N ana babaire Tamara are I Karawa, reitaki n te utu’ a kananonaaki bwa ena akea tokiia. Aio bukina, ngkai te karo, ko riai n aki taekinaki, riki ngkana ko aki kakatia ni bwai aika tia n riki mai imwaina.
Ma Iesu Kristo, ara Tia Katoki Aoraki e na iai n tainako te moan bobou; e na iai te kaantaninga iroura n taainako.
Iesu Kristo bon kakorakoraia utu.
Iesu Kristo bon kakorakoraia kairake.
Iesu Kristo bon kakorakoraia kaaro.
Man aei ao I kakokaua n aran Iesu Kristo, amen.