Bwanaan te Kukurei!
Kateakin taian tembora ai te moanibwai ae moan te kakawaki irouia burabeti man ana tai te Burabeti Iotebwa Timiti.
“Ngkai, tera ae ti ongo n te euangkerio are ti a tia ni karekea? Bwanaan te kukurei! Bwanaan te nanoanga mai karawa; ao bwanaan te koaua mai aontano; … bwanaan te kukurei ibukiia ake a maiu ao ake a mate; rongorongo aika raraoi ae moan te kakimwareirei.”1
Tariu ao mwaneu, e bon kangaanga ae ko na ongo taeka aika mai iroun te Burabeti Iotebwa Timiti ao e na aki rotiko te wingare!
Ana bwaebwaeti n tokanikai Iotebwa e kaota raoi bwaninin ao mimitongin te kimwareirei are e kuneaki n Ana babaire ae kakukurei te Atua ae Tamara are i Karawa, bwa E a tia kaotia nakoira, “A riki aomata bwa aonga ni karekea te kimwareirei.”2
Ti bane ni botaki n anene ni kimareirei3 n tain maiura imwain te maiu aei ngke ti ongo Ana babaire ae kakukurei te Atua, ao ti reitinako n anene ni kimwareirei ikai ngkai ti maiu ni kaineti nakon Ana babaire. Ma te raa raoi ae e riki ae karika katanoatakin te kukurei aei mairoun the Burabeti? Tera ae e kauekea te namakin ae moan te nano aei inanora?
E a tia te Burabeti Iotebwa n reirei iaon te bwabetito ibukiia maate. Aio bon te kaotioti ae mimitong are e butimwaeaki ma te kimwareirei ae bati. Ngke kaain te Ekaretia a moan reiakina ae a kona ni bwabetitoaki ibukiia aia mate ake a tangiraki, a kimwareirei. E taku Wilford Woodruff, “Ngke I moan ongo taekana, e kibakiba tamneiu [ibukin] te kimwareirei!”4
Te bwabetito ibukiia ara maate bon tiaki tii te koaua ae E na kaotia ao ni kaokia te Uea. A mwaiti riki bwaintutuaraoi, ke entaumente, ae te Atua bwa E na katokai iaoia Natina mwaane ao aine.
Bwaintutuaraoi aika tabeua aikai bon te kariaiakaki n te nakoanibonga, berita aika tabu ao otenanti, te mare ae e kona n teimatoa n aki toki, kabaeakiia ataei nakoia aia karo inanon te utu n Atua, ao oina raoi te kakabwaia n oki nakon mweengara iroun te Atua, Tamara are i Karawa, ao Natina, Iesu Kristo. Ni kabane kakabwaia aikai a kona n riki rinanon Ana Mwakuri ni Kamaiu Iesu Kristo.
Ibukina bwa te Atua e baireikakabwaia aikai bwa bon mai ibuakon ana kakabwaia aika rietaata ao ni mimitong,5 E tua bwa kateitei aika a tabu a na kateaki bwa E aonga n anga kakabwaia aika a kakawaki aikai nakoia Natina.6 Kateitei aikai a na riki bwa Mweengana iaon te aba. Kateitei aikai bon tembora ike ake a kabaeaki ke ni kamatoaaki iaon te aba n Arana, ao man Ana taeka, ao n Ana kariaia a na kabaeaki i karawa.7
Ngkai ngaira kaain te Ekaretia ni boong aikai, tabeman mai ibuakora a na kunea bwa e bebete anakin koaua aika mimitong ao n akea tokiia aikai n akea iangoana. A tia n riki bwa kauoua ni bwai nakoira. N tabetai e ibuobuoki ngkana ti tarai bwaai aikai rinanon aia taratara te koraki ake a reiakin bwaai aikai n te moan tai. E reke koauan aei irou rinanon te bwai ae I a tibwa rinanona.
N te ririki ae nako, bon imwaain manga katabuan te Tokyo Tiabaan Tembora, a mwaiti irua aika tiaki kaain ara onimaki aika a neweabaa te tembora. N teuana te kaneweaba iai ibuakona te tia kairiiri ae kakauiango man te aro teuana. Ti reireiia ara irua taekan Ana babaire ae kakukurei Tamara are i Karawa, mwiokon Iesu Kristo ae tabu n te babaire anne, ao te tua ae e kona utu ni katiteuanaaki n akea tokina rinanon te otenanti ni kabaebae.
N tokin te kaneweaba, I kaoiia raraora bwa a na tibwai aia namakin. Ni kaineti nakon kabaeakiia utu—ake ngkoa, ngkai, ao n ae na roko—te mwaane ae tamaroa aei e titiraki ma nanona ni koaua, “A bon ota raoi ni kakawakin te tua aio raom n onimaki n am ekaretia?”” E reitia, “Tao bon aio teuana mai ibuakon reirei ae e kona ni katiteuana te aonaaba ae e a rangi ni maenako.”
Ai korakorara te nonori aei. Te mwaane aei e aki rotaki man rianakon bwai aika tamaroa inanon te tembora ma bon man kamiimiin ao koauan te reirei ae te utu a katiteuanaaki ao ni kabaeaki nakon Tamara are i Karawa ao Iesu Kristo n aki toki.8
Ti na aki kubanako, ngkana, tao temanna ae tiaki man ara onimaki e ataa mimitongin te bwai ae e riki inanon te tembora. Te bwai ae ti rangi n taneiai ke ai bon waakin arora n tabetai e noraki n rangi n tamaroa ao ni mimitong irouia tekoraki ake a ongo ke n namakinna n te moan tai.
E ngae ngke a kaman karaoaki tembora ma ngkoa, ma Kaokakin ana euangkerio Iesu Kristo, kateakin taian tembora e a tia n riki bwa teuana te moanibwai irouia burabeti ni moa man ana tai te Burabeti Iotebwa Timiti. Ao e bebete te mataata iai bwa bukin tera.
Ngke e reirei te Burabeti Iotebwa iaon te bwabetito ibukiia maate, e kaota manga te koaua teuana ae korakora. E reirei: “N na kakoaua nakoimi bwa tuua aikai a kaineti nakoia mate ao ake a maiu ake a aki kona n tarariaoaki, ngkai a kaineti ma kamaiuara. Bwa kamaiuaia e kainnanoaki ao e kakawaki ibukin kamaiuara, … bwa a na aki kona ni kakororaoaki raoi ngkana akea ngaira—tiaki kona naba ngaira ni kakororaoaki n akean ara mate.”9
Ae ti kona n nooria, kainnanoan taian tembora ao te mwakuri are e karaoaki ibukiia aika a maiu ao ake a mate e riki n rangi ni mataata.
Te tia kakaitara e a rangi n taratara. E a kaitaraaki mwaakana n taian otenanti ao berita aika tabu ake a karaoaki n tembora, ao e karaoa are e konaa ni katoka te mwakuri. Bukin tera? Ibukina bwa e ataa te mwaaka ae e roko man te mwakuri ae tabu aei. Ngkai a katabuan tembora n tatabeua nako, e a raka riki mwaakan te Atua nakon te aonaaba ni kabooira ao ni kaitarai ana waaki teuare buakaka ngkai ti nako Ina. Ngkai a rikirake mwaitin tembora ao taan kawakini aia berita, e a tabe ni mamaara te tia kakaitara.
Ni moan tein te Ekaretia ngkoa, tabeman a raraoma bwa ningai ae e na taekinaki iai tein te tembora, bwa a na kangai, “Ti aki kona ni moana katean te tembora n akean te kakaitara mai moone n tabe n roko.” Ma e ninikoria Brigham Young n taekinna, “I tangiria bwa a na manga roko riki”10
N te maiu ae mamate aei, ti aki kona ni birinako man te buaka, ma ti kona ni karekea te mwaaka iaon te tia kakaitara. Te mwaaka ao te korakora anne e roko mairoun Iesu Kristo ngkai ti karaoi ao ni kawakin berita aika tabu.
E reirei Beretitenti Russell M. Nelson: “E a roko te tai are naake aki ongeaaba nakon te Uea a na kaokoroaki ma naake a ongoaaba. Kamanoara ae moan te mano bon reitinakoan te kororaoi n tau n rin n Ana auti ae tabu.”11
Aikai riki tabeua ana kakabwaia te Atua are E a tia ni berita nakoira rinanoia Ana burabeti:
Ko kainanoa te kakai? E a tia n taku ara burabeti: “I berita nakoimi bwa te Uea e na karokoi kakai ae E atai bwa kam kainanoia ngkai kam kakorakorai ngkami ni ibuobuoki ao n nebonebo inanon Ana tembora.”12
Ko kainanoa mwaakan te Tia Kamaiu Iesu Kristo ni kamarurung ao ni kakorakora? E kamatataira Beretitenti Nelson bwa “bwaai ni kabane ake a reiakinaki n te tembora … e karikirakea ara atatai ibukin Iesu Kristo. … Ngkai ti kawakin ara berita aika tabu, E kabaeira ma ngaira Ana kamaiu, ao ni kakorakora. Ao eng, ti rangi ni kainnanoa mwaakana inanon boong aika imwaaira.”13
Ni moani bongin Tabatin te Bwaam, ngke e rin Iesu Kristo n tokanikai i Ierutarem, ana reirei Iesu Kristo aika bati a “[tia] ni kakatonga ao n [tia] ni karaoiroa te Atua ma te bwana ae korakora … ao a kangai, E na karaoiroaki te Uea ae nako mai n aran Iehova.”14
Ai roko raoira Tabatin te Palm n 1836, ma katabuan te Tembora I Kirtland. N te tai anne a kimwareirei naba ana reirei Iesu. Inanon te tataro are e katabuaki anne, E katanoatai taeka n nebonebo te Burabeti ae Iotebwa Timiti e katanoata:
“O te Uea ae te Atua ae Moan te Mwaaka, ongo n ara … ao kaekaira mai karawa, … ike ko tekateka i aon am kai n tokanuea, ma te mimitong, te karineaki, te mwaaka, ueana, [ao] te korakora. …
“… Buokiira ni mwaakan Tamneim, bwa ti aonga ni ikotii bwanara ma taian terabim aika a oota mwaaka, n raneanea ni katobibiaa am kai n tokanuea, ma bwana ni kamoamoaa, n anenea Otanna nakon te Atua ao te Tiibu te Teei!
“Ao kariaia, am … aomata aika itiaki a takarua ni kimwareirei.”15
Tariu ao mwaneu, n te bong aei ae Tabatin te Palm, ngaira aika ana reirei Iesu Kristo ti na kamoamoa naba Atuara ae tabu ao n kimwareirei n Ana raoiroi nakoira. “Yera ae ti ongo n te euangkerio are ti a tia ni karekea?” Ni koauana “bwanaan te kukurei!”16
I kakoaua bwa ko na namakina te kimwareirei n ae mwaiti ngkai ko rin n Ana auti ae tabu te Uea. I kakoaua bwa ko na rinanon te kimwareirei are E e katauraoia ibukim, n aran Iesu Kristo, amen.