N Ningai Karekean Am Kakabwaia n Tamanuea
Ngkana ko karekea am kakabwaia, ko na ataia ao n namakina aron Aia tangira Tamara are i Karawa ao Iesu Kristo ao Aroia ni kabanea aia tai iroum.
Ngkoananoa ao e taetae raraou ae tangiraki ae Unimwaane Randall K. Bennett iaon te kakabwaia n tamanuea. Bon te rongorngo ae rangi n tamaroa ao ni ringii nanora ni kabane. Tariu ao mwaneu aika kam tangiraki, tao N na taetae naba iaon te kakabwaia n tamanuea? Tamanuea, ana rikirake mwaitia n tangiran kakabwaia n tamanuea, I tataro bwa e na kakabwaiai ngkami te Uea ngkai kam kateimatoa karaoan raoi weteam.
Ngkana I nanakon taian maungatabu n titeiki, I aki toki ni kakawara te tamanuea n te titeiki ma buuna. A rangi n maamannei Tamanuea, a ongotaeka, ao taan kairiiri aika a bane aroia aika a weteaki mairoun te Atua. A tuangai taneiei n tamnei aika a bati aika a kamiimi. I titirakiniia aia ririki aomata are te kabanea n uarereke ao te kabanea n ikawai are a tia n anganiia te kakabwaia. Ae noraki te kabanea n uarereke 11 ana ririki ao te kabanea n ikawai bon 93.
I karekea au kakabwaia n tamanuea ngke I moan kaaina te Ekaretia, ngke 19 au ririki, uoua te ririki imwiin bwabetitoakiu. E a rangi ni kara au tamanuea. E kaaina te Ekaretia n 1916, ao bon te bwaeoniia n te Ekaretia i Tiaban. E korakora kukurein nanou ni karekea au kakabwaia n tamanuea mairoun ana reirei te Uea ae rangi ni tamaroa aei. Ana taetae n Tiaban e tara ni kanganga irou bwa na oota iai, ma e rangi ni korakora mwaakana.
A tuangai tamanuea ake I a tia ni kaitibo ma ngaia bwa a mwaiti aomata ake a karekei aia kakabwaia n tamanuea tabeua te tai imwain aia mwakuri ni mitinare. Ataeinimwaane, ao ataeinaine aika kam tangiraki, kaaro, ao bitiobi, kakabwaia n tamanuea tiaki ti ibukin te katauraoi nakon te mwakuri ni mitinare. Membwa ake a tau ake a tia ni bwabetitoaki a kona ni karekea aia kakabwaia n tamanuea n te tai ae nakoraoi ibukia.1
Nakoia membwa aika ikawai aika kam tangiraki, tabeman mai buakoami kam tuai karekea ami kakabwaia n tamanuea. Uringnga, akea tian te ririki.
Tinan kaainabau bon te aine ae rangi ni marurung n te Ekaretia, e beku bwa te tia reirei n te Bootaki n Aine ni karokoa ae toki maiuna n ana ririki ae 91. I rangi n nanokawaki n ataia bwa e aki reke irouna ana kakabwaia n tamanuea. E rinanon kangaanga aika a mwaiti i nanon maiuna, ao bukina bwa akea te nakoanibonga n mweengana, e aki mwaiti karekean kakabwaia man te nakoanibong irouna. Te kakabwaia n tamanuea e na kona n anganna te raunnano are e rangi ni kainnanoia riki.
Ikawai, ngkana kam tuai karekei ami kakabwaia n tamanuea, taiaoka tai raraoma! Te tai n taamnei ibukia aomata ni kabane a bon kakaokoro. Ngkana 35 ke 85 am ririki ao iai nanom ae korakora, marooro ma am bitiobi ibukin karekeam am kakabwaia.
Kaain te Ekaretia aika kam boou, kam a tia n ongoongo taekan te kakabwaia n tamanuea? I aki ataa ngkoa aron karekeana ngke I kaaina te Ekaretia, ma e tuangai au bitiobi ae tangiraki ibukin te kakabwaia n tamanuea ao ni kaungaai ni katauraoi ni karekea au kakabwaia imwiin au bwabetito. Membwa aika kam boou n te Ekaretia, kam kona ni karekei ami kakabwaia n tamanuea naba. E na buokiko te Uea ni katauraoiko ibukin te tai ae tabu aei.
Ti na tarai uoua kaantaninga ibukin te kakabwaia n tamanuea:
-
Iai i nanon te kakabwaia n tamanuea te reirei nakon temanna mairoun te Uea nakoim.2
-
Te kakabwa n tamanuea e taekina rikim n te bata are Iteraera.
Am kakabwaia n tamanuea bon te rongorongo mairoun Tamam are i Karawa ao e na bon iai inanona berita ao reirei aika a roko mai irouna bwa kairam inanon maium ni kabane. Te kakabwaia n tamanuea e naaki kaota kawaim ke ni kaekai ni kabane am titiraki. Ngkana e aki taekini taai aika a kakawaki ni maium, tai taku iroum bwa e na aki reke te tai anne iroum. N aron naba anne, e aki kaantaningaaki bwaai ni kabane n am kakabwaia bwa ana roko inanon maium. Te kakabwaia n tamanuea a roko mai karawa, ao ngkana e itiaki maium, berita ake a tuai koro nanoia n te maiu aei ana manga reke iroum n te maiu are imwiina.3
Ngke ko kareka taekan rikim, ko na ataia bwa ko nako man te bata are Iteraera ao kanoan Aberaam.4 Bwa ko na ota n kakawakin aei, kabanea am iango n berita ake e karaoi te Uea nakon te bata are Iteraera rinanon Aberaam.
Berita akanne ni ikotaki ma:
-
“Ana kabatiaaki ana kariki (taraa Karikani Baai 17:5–6; Aberaam 2:9; 3:14).
-
“Ana kariki, ke kanoana, ana karekea te euangkerio ao ni uota te nakoanibonga (taraa Aberaam 2:9).
-
“Rinanon kanoam, ‘a na bane utun te aonaba [ni] kabwaia, man taian kakabwaia n te euangkerio, ake bon kakabwaia n te kamaiu, are te maiu ae akea tokina’ (Aberaam 2:11),”5
Ngkai kaain te Ekaretia, ngaira bon naati n te berita aika a tabu.6 Ti karekei kakabwaia man ana berita ae tabu Aberaam ngkai ti ongotaeka nakon tuua ao otenanti n te euangkerio.
Te katauraoi ibukin am kakabwaia n tamanuea e na buokiko ni karikirakea am onimaki iroun Tamara are i Karawa ao Iesu Kristo. Ngkana ko karekea am kakabwaia n tamanuea ao ni warekia ao ni iangoia raoi, ko kona ni kabanea am iango ae bati nako iai.
E kabwarabwaraa Beretitenti Thomas S. Monson, “Te Uea naba anne are e anga te Riaona ibukin Riaai e katauraoia ibukim ao ibukiu n te bong aei te bwai n tangira ae kaangaanga ao ni kakawaki n anga kaetieti nakon maiura, ni mwaakeni te kangaanga nakon kamanoakira, ao ni kaota te kawai, ao kawai aika a mano—tiaki nakon te aba ni berita, ma nakon mweengara i karawa.”7
Nakoimi bitiobi aika kam tangiraki, kaaro, beretitenti n aia kooram unimwaane ao Bootaki n Aine, taan kairiiri n te uoote mition, taari mwaane ao aine n te mwakuri ni ibuobuoki, taiaoka ma kaungaia ataeinimwaane ao ataeinaine, membwa ake a ikawai, ao ake a boou ake a tuai karekea aia kakabwaia n tamanuea n ukora ana kairiiri te Uea ao n ibuobuoki ni katauraoia bwa a na karekea.
I teimatoa n tataroakina warekean au kakabwaia n tamanuea; e aki toki n angaangai te kaunganano. I kina are e kaantaningaia te Uea mai irou, ao e a tia ni buokai n raira nanou ao n nanorinano. Ngkana I warekia ao ni iangoia raoi, E unga nanou bwa N na maiuakina te itiaki ni karekei ana kakabwaia ake a beritanaki.
N aron wawarekan koroboki aika a tabu n te tai ae mwaiti a karekei bwaai aika a boou nakoira imwiina, ara kakabwaia n tamanuea e na anganira nanona ae kaokoro n taai aika a kakaokoro. Au kakabwaia e bati nanona ae kaokoro ngkai nakon are ngkoa ngke 30 au ririki ao ngke 50 au ririki. Tiaki n ae tao e bitaki taekana, ma ti nooria n aanga aika a kaokoro.
E taekinna Beretitenti Dalin H. Oaks bwa te kakabwaia n tamanuea “e taekinaki iaan ana kairi te Tamnei ae Raoiroi ao n riai ni warekaki ao ni kabwaraaki nanona iaan ana kairiiri te Tamnei ae Raoiroi naba. Nanon ao kakawakin te kakabwaia n tamanuea e na reiakinaki teutana imwiin teuana i nanon taina man mwaakan te Tamnei naba anne ao [e] bon kairia.”8
Tariu ao mwaneu, I kaota au kakoaua bwa a maiu Tamara are i Karawa ao Ana riki Temanna, te Uea ae Iesu Kristo. A tangirira. Kakabwaia n Tamanuea bon bwaain tangira aika a tabu mai Irouia. Ngkana ko karekea am kakabwaia, ko na tibwa ataia ao n namakina aron Aia tangira ibukim ao Aroia ni kabanea aia tai iroum.
Ana Boki Moomon bon kakouan taekan Iesu Kristo. I kakaitau ngkai I kairaki iroun te burabeti ae maiu, Beretitenti Russell M. Nelson.
I kakaitau ibukin ara tia Kamaiu, Iesu Kristo. N Tabatin te Itita aio Na kabanea au iango Irouna ao Manga Utina ao n Neboia ao n anga au kakaitau ibukin Ana mwakuri n anga karea. I ataia E rangi ni korakai ibukina bwa E rangi ni bubura ana tangira ibukira. I ataia E a tia n manga uti ibukina bwa E tangirira. E boni koaua. Aikai au koaua n aran Iesu Kristo, amen.