Ana Anga Reirei Iesu Kristo
Ti anganaki koroboki aika a tabu bwa kairan maiura. Au rongorongo n te bong aei bon ana taeka ara tia Kamaiu—tera are E taekinna.
Ti kakoaua iroun Kristo. Ngkai kaain Ana Ekaretia Iesu Kristo Ibukiia Aika Itiaki ni Boong aika Kaitira, ti taromauria ao n iriira Ana reirei inanon koroboki aika a tabu.
Imwain te Bwaka, e taetae Tamara are i Karawa nakon Atam ao Ewa. Imwiin te tai anne, te Tama e a manga kabwarabwara Natina ae Ana Riki Temanna, ae Iesu Kristo, bwa ara Tia Kamaiu ao te tia Kabooi Maiura ao n tua nakoira bwa ti na “ongo Irouna”1 Man te kairiiri aei ti kamatoa bwa taeka ake a taekinaki mairoun te “Atua” ke te “Uea” man koroboki aika a tabu ake a tauaki mwiina bwa bon ana taeka n taainako Iehova, ara Uea are e a tia n uti, ae Iesu Kristo.2
Ti anganaki koroboki aika a tabu bwa kairan maiura. N aron are e reireiniira te burabeti Nibwaai, ti riai ni “kakukurei n ana taeka Kristo; bwa taraia, a na tuangko ana taeka Kristo bwaai aika ko riai ni karaoi.”3 Ake a kaota ana mwakuri iaon te aba Iesu n koroboki aika a tabu bon kabwarabwaraan ake e karaoi. Kanoan au reirei n te bong aei bon ana taeka ara tia Kamaiu—tera are e taekinna. Aikai taeka ake a koreaki n te Nu Tetemanti (ni ikotaki ma ana karinrin Iotebwa Timiti ake e karekei) ao n ana Boki Moomon. Angiin aika a rineaki aikai a karinanaki n aron are e taekinii te tia Kamaiu.
“E boni, koaua ae I tuangko, bwa ngkana e aki bungiaki te aomata n te ran ma te Tamnei ao e aki kona n rin n uean te Atua.”4
“Ao a na kakabwaia … akana [a] baki ma n taka ibukin te raoiroi, bwa a na kaonaki n te Tamnei ae Raoiroi.”5
“Ao a na kakabwaiaki taan raoi: bwa a na aranaki bwa natin te Atua”6
“Kam ongo bwa e atongaki ae kangai, Ko na tai wenenibure:
“Ao ngai I taku nakoimi, bwa ane e taratara te aine bwa e na kaitaataan nako ina, ao e a tia ni wene ni bure ma ngaia i nanona.”7
“Kam ongo bwa e atongaki ae kangai, Ko na tangira raom, ao riba ami kairiribai.
“Ao ngai I taku nakoimi, Kam na tangiriia ami kairiribai, ao tataro i bukiia akana bainikirini ngkami, karaoa ae raoiroi nakoia akana ribai ngkami;
“Bwa kam aonga n riki bwa natin Tamami are i karawa: bwa e karaoa taai bwa e na oota i aoia aika a raoiroi ao ake a buakaka ao E kabwaka te karau i aoia akana atataiaomata ma akana babakanikawai.”8
“Ma ngkana kam kabwarai aia bure akana a bure nakoimi, ao Tamami are i karawa e na kabwarai naba ami bure:
“Ma ngkana kam aki kabwarai aia bure aomata, ao Tamami e na bon aki kabwarai naba ami bure.”9
“Ngkana tao ana bwai te aba ngkami, ao e bon tangiriia ana bwai: ma e ribaingkami te aba ba tiaki ana bwai te aba ngkami, ma I rineingkami mai buakon te aba, ma e ribaingkami te aba.”10
“Mangaia are, tai ukoukori bwain te aonaba aei ma ukoukora moa katean uean te Atua, ao ni kateimatoa ana raoiroi, ao baikai ni kabane a na raonaki nakoim.”11
“Ma ngaia aei bwa bwaai ni kabane aika kam tangiri bwa a na karaoaki nako imi irouia aomata, ao kam na karaoi naba nakoia: bwa aei te tua ma aia taeka burabeti.”12
Kam na kawakiningkami nakoia burabeti ni kewe, akana nako imi ni baka n tiibu, ma boni kameanti aika kaakang uakekei i nanoia.
“Ane kam na kinaia n uaaia. A anaki kurebe ma akanta, ao biiku man teriboro?
“Ao ai aron aba kaai ni kabane aika raraoi, a kariki uaa aika raraoi; ao kaai ni kabane aika bubuaka.”13
“A aki bane n rin n uean te Atua akana kangai nako Iu, Te Uea, Te Uea; ma e na rin iai ane taua ana taeka Tamau are i Karawa.14
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; ba I nimamanei ao i nanorinano: ao e na reke i roumi iai motikan rawaia tamneimi.
“Ba e aoraoi amou, ao e bebetee uotau.”15
“Ane e kan rimwiu, ao ke e kaakeaa n taona nanona, ao ke e tabeka ana kaibangaki ao ke e irirai.
“Ao ngkai ibukin te aomata ae tabeka ana kaibangaki, e na kaakea mai irouna ae tiaki aro n atua ni kabane, ao kaibwabwarun te aonaba ni kabane, ao ni kawakin au tua nako.”16
“Ngaia are, kaakea te aonaba, ao kamaiua tamneimi; bwa tera kabwaian te aomata, ngkana e karekea te aonaba ae bwanin, ao e kabua oin tamneina? Ke tera ae e na anga te aomata bwa boon mwin tamneina?”17
“Ngkana e kan toua mwin ana taeka Teuarei te aomata, ao e na ata te reirei, bwa tao mairoun te Atua, ke tao I taetae mai Rou.”18
“Ao I taku nakoimi, Bubuti ao kam na anganaki; ukeuke, ao kam na karekea; karebwerebwe ao e na kaukaki nakoimi.
Bwa ane bubuti, ao e na anganaki; ao ane e ukeuke ao e na karereke; ao ane karebwerebwe ao e na kaukaki nako ina.”19
“Ao bon iai au tiibu tabemwaang, ake tiaki kaain te nne aei: ao e riai bwa N na kairiia, ao a na ongo bwanaau; ao ana ti te nanaina, ao ti temanna te tia kawakintiibu.”20
“‘E taku Iesu nakoina, Boni Ngai te manga-uti, ao te maiu: ane e onimakinai, ngkana tao e boni mate, ao e na boni manga maiu:
“Ao ane maiu ma n onimakinai ao e na bon aki mate.”21
“[Te tua ae korakora ibuakoia taian tua bon aio:] Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.
“Moa te tua aei ao e korakora.
“Ao ai aron naba are te kauoua, are kangai, Ko na tangira raom n ai aron tangiram i bon iroum.
“E bane te tua ma aia taeka burabeti nako n tauraki n tuua aika uoua aikai.”22
“Ane iai i rouna au tua nako, ane e tau, ao bon ngaia ane e tangirai: ao ane e tangirai ao e na tangiraki i roun Tamau, ao Ngai N na tangiria, ao N na kaotai nako ina.”23
“I katuka te rau i roumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi, ao a na tai maku.”24
“Aio au tua, Bwa kam na i tangitangiri, n ai arou ngkai I tangiringkami.”25
“Kam na tarai baiu ma waeu, bwa boni Ngai: kam na ringai, ao tarai; bwa akea irikon te tamnei ao rina, n ai aron aika kam nori iRou ngkai”26
“Ma ngaia ae kam na nako ni kakiritiania botanaomata ni kabaneia, ni babetitoia nako nanon aran te Tama ma te Nati ma te Tamnei ae Raoiroi:
“Reireia bwa a na kabane baike I tuangkami n tauu: ao noria, I a memena naba iroumi ni boongi ni kabane ni karokoa tokin aonaaba.”27
Imwiin ana mwakuri n te Aba ae Tabu, E kaoti nakoia aika a raoiroi i aban Amerika. Aikai taeka tabeua ake E taekinna ikekei:
Nooria, bon Ngai Iesu Kristo, Natin te Atua. I karika karawa ma aonaba, ao bwaai ni kabane ake a mena iai. Bon raou te Tama mai i moana. I mena iroun te Tama, ao te Tama e mena irou; ao e mimitong aran te Tama irou.”28
“Ngai te oota ao maiun te aonaba. Ngai te Arebwa ao te Omeka, te mon ao te kabane.
“Ao kam na aki manga oki n uota kawawaean te raraa nakoiu; eng, ami karea ao ami bwaintangira aika a kabuokaki a riai n toki, bwa N na bon aki butimwaea ami anga karea ao ami bwaintangira aika a kabuokaki.
“Ao kam na anganai bwa ami karea te nano ae uruaki ao te tamnei ae raraoma. Ao ane e kawarai ma te nano ae uruaki ao te tamnei ae raraoma, ao N na bwabetitoia n te ai ao te Tamnei ae Raoiroi. …
Nooria, I roko nakon te aonaba n uota te kabomwi nako te aonaba, bwa N na kamaiua te aonaba man te bure.”29
“Ao riki I taku nakoimi, kam riai n rairinanomi, ma ni bwabetitoaki n arau, ma n riki bwa aiaron te teei ae uarereke, bwa kam rawa n aki karekea uean te Atua.”30
“Mangaia are I tangiria bwa kam na kororaoi n arou, ke Tamami are i karawa ngkai e kororaoi.”31
“E koaua, e koaua, I taku nakoimi, kam riai n taratara man tataro n taai nako, bwa mwiina ao kam kaririaki iroun te riaboro, ao kam kairaki nako ni kabureaki irouna.”32
“Ngaia are kam na aki toki n tataro nakon te Tama n Arau”33
“Ngaia are, ane kam na karaoia, ao kam na karaoia n arau; ngaia are kam na arana te ekaretia n arau.”34
“Nooria I a tia n angani ngkami au euangkerio, ao aio te euangkerio are I a tia n angani ngkami—bwa I roko nakon te aonaba ni karaoa nanon tamau, ibukina bwa e kanakomaiai Tamau.
“Ao e kanakomaiai Tamau bwa I aonga n tabekaki rake iaon te kaibangaki; ao i mwina ngkanne I tabekaki rake iaon te kaibangaki, N na burimaunia aomata nakoiu … ni motikaki taekaia man aia mwakuri, bwa a raoiroi ke a buakaka.”35
“Ao ngkai aio te tua: Rairinanomi ngkami tokin aonaba, ao nako mai nakoiu ma ni bwabetitoaki n arau, bwa kam aonga ni katabuaki ngkana kam butimwaea te Tamnei ae Raoiroi, bwa kam aonga n tei n akea barekami imatau n te kabanea ni bong.”36
Ti kakoaua iroun Kristo. I kainiin ma are E taekinna ibukin arora ae ti riai n ataia n iriira Ana anga reirei:
“Ma te tia Buobuoki, are te Tamnei ae Raoiroi, are E na kanakomaia te Tama n arau, E na reireiningkami bwaai ni kabane, ao E na kaururing i nanomi bwaai ni kabane ake I atongi nakoimi.”37
I kamatoai koaua n reirei aikai n aran Iesu Kristo, amen.