Karekean Te Rau Ibon Ibukim
I tataro bwa kam na kunea te rau, buokiia aika mwaiti ni kunea, ao tibwauaia.
Tariu ao mwaaneu aika kam tangiraki, ti a tia ni kakabwaiaaki n taian reirei aika a kairaki iroun te tamnei ao tangiraoin te anene aika a tia n riingi nanora n te moan tetere n te maungatabu ni kabuta aei. Ti kaitau ngkami ibukin irimi ao ami onimaki.
N te bong aei N na taetae iaon te kakai ni karekean te rau ibukim, n aki taraaki te bwai ae ti mena inanona. E ataia te Tia Kamaiu bwa natin ni kabane Tamara are i Karawa a kakantaninga ibukin te rau, ao E taku bwa E kona n anganiira. Ko uringa ana taeka Iesu Kristo ae koreaki n ana boki Ioane: “I katuka te rau i roumi, I anganingkami au rau: I aki angani ngkami n aiaron te aba, ngkana e anga. A na tai rawawata nanomi, ao a na tai maku.”1
Tera are E nanona n te rau ao E na kanga n anga a bon kaotaki man te bwai are a rinanona naake a ongo Irouna ngke E taekina taeka akanne. Ongora nakon rongorongona ni Ioane iaon tootokin Ana mwakuri Kristo. Korakoran rawawatan te buakaka e a toka Iaona ao e na roko naba iaoia Ana reirei.
Aika ana taeka te Tia Kamaiu:
“Ngkana kam tangirai, ao kam na tou mwiin au tua.
“Ao N na butia te Tama, ao ngaia E na anganingkami te tia Ibuobuoki temanna, ba E na memena i iroumi n taainako;
“Are te Tamnei ni koaua; are e aki konaki n anganaki akana ana b’ai te aba, ba a aki noria, ao a aki ataia: kam ataia; ba E maeka i roumi; ao E na memena i nanomi.
“I bon aki kitaningkami ni motiki romi; I a okiringkami.
“Ai ti teutana ao e aki norai riki te aba, ma kam norai, ngkai I maiu ao kam na maiu naba.
“N te bong arei ao ane kam na ataai ba I mena inanon tamau, ao ngkami inanou, ao Ngai i nanomi.
“Ane iai i rouna au tua nako, ane e tau, ao bon ngaia ane e tangirai: ao ane e tangirai ao e na tangiraki i roun Tamau, ao Ngai N na tangiria, ao N na kaotai nako ina.
“E taku nako Ina Iuta are tiaki Itekariota, Te Uea, tera ae riki ngkai Ko na kaotiko nako ira, ao tiaki nakon te aba?
“E kaeka Iesu ni kangai, Ngkana e tangirai te aomata, ao e taua au taeka: ao E na tagiria Tamau, ao Ti na nako ina, ao Ti na maeka i rouna.
“Ane aki tangirai ao e aki tau au taeka nako: ao te taeka are kam ongo bon tiaki au taeka, ma bon ana taeka te Tama are kanakomaiai.
“Bwaai aikai ae I a tia n taekin nakoimi, a kaman mena iroumi.
“Ma te Tia Karaunano, are te Tamnei ae Raoiroi, are E kanakoa te Tama n arau, E na reireiningkami bwaai ni kabane, ao E na kaururing i nanomi bwaai ni kabane ake I atongi nakoimi.
“I katuka te rau i roumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi, ao a na tai maku.”2
I a tia n reiakin tao nimaua te koaua man Ana reirei te Tia Kamaiu anne.
Te moan, te bwaintutuaraoi ae te rau e reke imwiin ae iai ara onimaki ni kawakina Ana tua. Irouia naake membwa ni berita n Ana Ekaretia te Uea, te ongotaeka bon te bwai ae ti a kaman berita iai bwa ti na karaoia.
Te kauoua, te Tamnei ae Raoiroi e na roko ao n tiku iroura. E taku te Uea bwa ngkana ti reitinako n onimaki, e na tiku iroura te Tamnei ae Raoiroi. Aio bon te berita n tataron te toa bwa te Tamnei e na raoniira ao ti na namakinna, inanora ao n ara iango, Ana rau.
Te katenua, e berita te Tia Kamaiu bwa ngkai ti kawakin ara berita, ti kona n namakina ana tangira te Tama ao te Nati imarenaia ao ibukira. Ti kona n namakinna bwa a Kaaniira ni maiura ae mamate aei, n aron ae e na riki iroura ngkana ti kakabwaiaaki ni maeka ma Ngaiia n aki toki.
Te kaaua, kawakinan Ana tua te Uea e kainnanoa ae raka riki iaon ae ti te ongotaeka. Ti na tangira te Atua ma nanora ni kabane, korakorara, ara iango, ao tamneira.3
Te koraki ake aki Tangiria aki kawakina Ana tua. Ngaia are a na bon aki karekea te bwaintutuaraoi ae te rau n te maiu aei ao n te aonaaba ae na roko.
Te kanimaua, e mataata bwa te Uea e tau Ana tangirira ibukira ni kabwaka boon ara bure bwa ti aonga—rinanon ara onimaki Irouna ao ara rairannano, rinanon mwiin Ana Mwakuri ni kamaaiu—ti na karekea te bwaintituaraoi ae te rau are “aki konaki n ataki teutana”4 n te maiu aei ao ma Ngaia n aki totoki.
Tabeman mai ibuakomi, ke tao a mwaiti, aika aki namakina te rau are e beritanna te Uea. Tao ko a tia n tataro ibukin karekean te rau ibukim ao te mweraoin maiun tamneim. E ngae n anne ko na bae n namakina ae e aki ongo karawa nakon am bubuti ibukin te rau.
Iai ana kairiribai tamneim are e aki tangiriko ao naake ko tangiriia ni kunea te rau. E aki kukurei n anne. E mwakuri n totokoiko bwa ko na tangiria ni kunea te rau are te Tia Kamaiu ao Tamara are i Karawa a tangiria ibukim.
Ana mwakuri Tatan ni karika te kairiribai ao te itabaraaraa n taabo nako e a taraa n rikirake. Ti nora koauan aei n riki ibuakoia aba ao kaawa, inanon komuniti, ni bwaai n reitaki, ao ni kabuta e aonaaba.
E ngae n anne iai bukin ae ti na karia te tamaroa n taai aika imwaaira: bwa Otan Kristo e mena inanoia ni kabane ataei aika a tibwa bungiaki. Ma te bwaintituaraoi ae tabangaki anne e roko n te nano n ata ae tera ae eti, te nano n tangira ao n tangiraki. Iai te nano ni momotiraoi ao te nano ni kokoaua inanoia natin te Atua ngkana a roko nakon te maiu aei.
Kariaan te tamaroa n taai aika imwaaira n te rau ibukiia ataaei akanne e tiku iaoia aomata ake a tararuaiia. Ngkana te koraki ake a kaikawaiia ao ni buokiia a tia ni mwakuri ni karekea te bwaintutuaraoi n te rau maiiroun te Tia Kamaiu, a na kona, n oin bannaia ao aia mwakuri, ni kaunga ana onimaki te ataei bwa e na tau ibukin te bwaintituaraoi n te rau ae mai ieta.
Akanne ae e berita iaona koroboki aika tabu: “Reireia te tei aroarona ae riai, ao ngkana e a unimane ao e bon aki kitanna.”5 E kainnanoia bwa te aomata are bukinaki ibukin tararuakin te ataei ao ribanakiia bwa e na tau nakon te bwaintituaraoi ae te rau.
Te kananokawaki, ti a bane n tia n namakina te maraki ngkana ataei aika a kaikawaaki irouia kaaro aika a kairaki iroun te tamnei—n tabetai ti temanna te karo—a rineia, imwiin maiuia n te onimaki ao te rau, a toua te kawai ae kananokawaki.
E ngae ngke e riki te bwai ae kananokawaki anne, nanou n tarai taai aika tamaroa rimwi e tiku iaon teuana riki te bwaintangira mairoun te Uea. Bon aei bukina: ae E kateirakeia taan karika te rau aika mwaiti ibuakoia Ana reirei aika a onimakinaki. A tia n namakina te rau ao Ana tangira te Atua. A tia ni karekea te Tamnei ae Raoiroi inanoia, ao te Uea e kona ni kairiia n kawariia tiibu ake a titionako.
I a tia n noria inanon maiu ao ni kabutaa te aonaaba. Ko a tia naba n noria. N taai tabetai, ngkana ko a kairaki ni kawariia, e na taraa n ae manennanti.
N te taina, I titirakin temanna te aomata ae I kaitibo ma ngaina n au tai ni mwamwananga, “Ko kona n tuangai teutana aroia am utu?” Te marooro e kairai bwa N na butiia bwa N na nora tamnein natina te aine ae e a ikawai, are e taku bwa e rinanon te kangaanga. I bon rotaki n noran te kukurei iaon ubun te ataeimnaine are n te tamnei. I namakinna bwa N a tuangnga ngkana I kona ni karekea ana imeeri. N te tai anne natina te aine e tionako ao n iangoia ngkana iai ana rongorongo te Atua ibukina. Bon iai. Bon aio: E tangiriko te Uea. E teimatoa n tangiriko. Te Uea e tangiriko bwa ko na oki. Kakabwaia ibukim a bon tiku n tataninga.”
Membwa ni kabutaa te Ekaretia a tia n namakina te rau ibon ibukiia ae ana bwaintituaraoi te Uea. E kaungaia aomata nako ni buokiia aomata riki tabeman bwa e na reke aia tai n roko Nakoina ao n tau ni karekea te rau naba anne ibon ibukiia. Ngaiia, imwiina, a na rineia n ukora te kairi mai ieta n ataia bwa a na kanga n uota te bwaintituaroaoi anne nakoia tabeman.
Te roro ae rikirake e na riki bwa te tia ribanaia roro ake imwiina. Te bwai ae e na riki imwiin kataotiranakoana e na karika te kakai. E na rababa nako ao n rikirake inanon taina, ao abanuean te Uea iaon te aba e na barongaaki ao n tauraoi ni butimwaea te Uea ma te bwanaa n nebonebo. E na riki te rau iaon te aonaaba.
I kaota au koaua bwa te Tia Kamaiu e maiu ao E kaira te Ekaretia aei. I a tia n namakina Ana tangira inanon maiu ao Ana tangira ao raraomana ibukiia natin ni kabane Tamara are i Karawa. Ana kakao te Tia Kamaiu n nakomai Nakoina bon ibukin anganakira te rau.
Beretitenti Russell M. Nelson bon ana burabeti te Atua ae maiu ibukin te aonaaba ni kabane. E a tia ni kangai, “I taekinna nakoim ma te koaua bwa irarikin bwaai aika a riki n te aonaaba, ao ni bon oin maium, ko kona ni kaitarai boong aika a na roko ma kariaan bwaai aika a tamaroa ao te kimwareirei.”6
I kaota au tangira nakoimi. Ami onimaki ao tangira ae korakora a rotiia aomata ao ni kariaia te Uea ni bitii naano ao ni karekea te nano n anganiia aomata tabeman te bwaintutuaraoi ae te rau ae aki konaki n ataki teutana.
I tataro bwa kam na kunea te rau, buokiia aika mwaiti ni kunea, ao tibwauaia. E na iai te ngaa n ririki n rau ngkana e a manga roko te Uea. I kakoauaa ma te kimwareirei ao n aran Iesu Kristo, amen.