Anga Reirei, Reireii, ao Karaoi Nanon Rongorongo ake man te Maungatabu ni Kabuta

Aia kooram unimwaane ao te Bootaki n Aine iai tabeia ae kakawaki n te mwakuri ni kamaiu ao ni karietataaki. N tain aia bootaki n te Tabati, a maroroakinna bwa a na kanga ni karaoi nanon reirei man taian rongorongo ake a tibwa nako n te maungatabu ni kabuta n aia waaki n te mwakuri aei. Beretitentii n te kooram n unimwaane ao te Bootaki n Aine a rinei marooro man te maungatabu n reiakinaki mai iai n tain te bootaki n te Tabati, ni kaineti ma kainanoia membwa ao n ana kairi te Tamnei. N taai tabetai, te bitiobi ke te beretitenti n te titeiki e kona naba n rinea te rongorongo. N ae tabangaki, taan kairiiri a riai n rinei rongorongo mai irouia kaain te Moan Beretitentii ao te Kooram n Abotoro n te Tengaun ma Uoman. E ngae n anne, taian rongorongo ake aitibwa ngkai man te maungatabu ni kabuta a kona ni maroroakinaki.

Taan reirei a na katuruturu riki bwa a na kangaa ni buokiia membwa ni karaoa nanon te reirei man rongorongo n te maungatabu ni kabuta inanon maeuia. Taan kairiiri ao taan reirei a kakaei kawai ni kaungaia membwa ni kamatebwai rongorongo ake a rineaki imwaain te bootaki.

Ibukin rongorongon riki aia bootaki te kooram n unimwaane ao Botaki n Aine, taraa Aeniboki ni Kabuta: Te Beku inanon Ana Ekaretia Iesu Kristo ibukiia Aika Itiaki ni Boong aika Kaitira, 8.2.1.2, 9.2.1.2, ChurchofJesusChrist.org.

Babairean te Reirei

Titiraki aika imwiina a kona ni buokiia taan reirei ngkai a baireia bwa a na kabonganai rongorongon te maungatabu ni kabuta n reirei. Ngkana e riai, taan reirei a na marooro ma te beretitentii n aia kooram unimwaane ke te Bootaki n Aine ngkai a iangoi titiraki aikai.

Bukin tera te beretitentii n te kooram ni unimwaane ke te Bootaki n Aine a rinei marooro aikai bwa a na maroroakinaki? Teraa ae a kantaningaia bwa membwa a na ataia ao ni karaoia imwiin maroroakinan te rongorongo aei?
Teraa ae e tangiria te tia taetae bwa a na mataata iai membwa? Teraa reirein te euangkerio ae e reirei iaona teuanne ke neienne? A kanga reirei aikai ni bongana nakon ara kooram n unimwaane ke ara Botaki n Aine?
Teraa boki aika a tabu ae kabonganai te tia taetae ni boutoka ana rongorongo teuanne ke neienne? Iai riki koroboki aika a tabu ae a kona ni warekia membwa are a na kona ni karakaa riki mataataia iai? (Ko kona ni kunei tabeua rongorongo man te endnotes ke inanon te Guide to the Scriptures [scriptures.ChurchofJesusChrist.org].)
Teraa titiraki aika I kona n anga ake a na buokiia membwa n iangoi ao ni karaoa nanona man te rongorongo? Teraa titiraki aika a na buokiia n noora rekereken reirei aikai inanon maeuia, n aia utu, ao ana mwakuri te Uea?
Teraa ae I kona ni karaoia ni kaoa te Tamnei nakon ara bootaki? Teraa ae I kona ni kabongana ni kanakoraoa te marooro, n aron karaki, kabootau, katangitang, ao korobanna? Teraa ae e karaoia te tia taetae ni buokiia membwa bwa a na mataata nakon ana rongorongo teuanne ke neienne?
Iai te kakao ae E kanakoa te tia taetae? N na kanga ni buokiia membwa n namakina te nano ni kan karaoi nanon kakao akanne?

Iango iaon Waaki ni Kakukurei

A mwaiti kawai ae taan reirei a kona iai ni buokiia membwa n reireii ao ni karaoi nanon rongorongo man te maungatabu ni kabuta. Aikai tabeua katooto; a kona taan reirei ni karekei iango tabeua are a na mwakuri raoi riki n aia kooram ke te Bootaki n Aine.

Karaoi nanon taian koaua inanon maeura. Kaoiia membwa bwa a na rinanon te rongorongo man te maungatabu n ukorii koaua ake a kona ni buokiia ni kakoroa nanon ana mwakuri te Atua are e a tia n anganiia i bon irouia n tatabemaniia ke n te kooram n unimwaane ke te Bootaki n Aine. N aron aei, teraa ae ti reiakinna ae e kona ni buokiira ngkai ngaira taan ibuobuoki? ngkai kaaro? ngkai membwa aika mitinare? E na kanga te rongorongo aei ni iai ana kairoro nakon ara iango, namakin, ao mwakuri?
Maroro inanon te kurubu. Kamaenakoia membwa inanon kurubu aika a uarereke, ao katabeia kurubu akanne ni mwakoro aika a kakaokoro man rongorongon te maungatabu bwa a na warekia ao ni maroroakinna. Ngkanne tuangiia kurubu nako bwa a na tibwa te koaua are a kunea ao a na kanga ni kakoroa nanona. Ke ko kona ni katei kurubu mairouia aomata aika a kamatebwai mwakoro aika a kakaokoro ao anganiia bwa a na tibwai imarenaia bwaai ake a kunei.
Kakaai kaekaan titiraki. Kaoia membwa bwa a na kaekai titiraki n aron aikai iaon rongorongo man te maungatabu. Tera koaua man te euangkerio aika ti kunei man te rongorongo aei? Ti na kanga ni karaoi nanon koaua aikai? Baikara kakao ao berita ni kakabwaia aika a anga? Tera ae e reireiniira te rongorongo aei ibukin ana mwakuri te Atua are e tangiria bwa tina karaoi? Ke katei tabeua titiraki ake ko bon karioi are e na kaungaia membwa ni iangoi nanon rongorongo n ae e nano riki ke ni karaoi nanon koaua ake e reirei. Kariaia membwa bwa a na rinea teuana man titiraki aikai ao ni kakaea kaekaana inanon te rongorongo.
Tibwai taeka man rongorongo. Kaoia membwa bwa a na tibwa te rongorongo man te maungatabu are e kaungaia bwa a na kakoroi bukin tibwangaia n te mwakuri ni kamaiu ao te karietataaki. Kaungaia bwa a na iangoia bwa a na kanga n tibwai rongorongo aikai ni kakabwaia temanna, n raonaki ma naake ti tangiriia ao aomata ake a ibuobuoki nakoia.
Tibwa te bwai teuana iaon te reirei. Imwain taina, kaoia tabeman membwa bwa a na uoti bwaai man mweengaia ake a kona ni kabonganai n reirei iai rongorongo man te maungatabu. N tain te boowi, tuangiia membwa bwa a na kabwarabwara bwa a kanga bwaai akanne n irekereke nakon te rongorongo ao e kanga te rongorongo anne ni kaineti nakon maeuia.
Katauraoa te reirei n reiakinna n te mweenga. Tuangiia membwa bwa a na mwakuri ni kakauoman ni bairea te reirei n te tairiki ae boboto iaon te rongorongo man te maungatabu. A kona ni kaekai titiraki n aron aikai: Tina kanga ni karaoa te rongorongo bwa e na irekereke nakoia ara utu? Tina kanga n tibwa te rongorongo aei ma aomata ake ti buokiia?
Tibwa te bwai ae ko rinanona. Ikotaki ni wareki tabeua kibuntaeka man rongorongo man te maungatabu. Tuangiia membwa bwa a ana tibwai katoto man koroboki aika a tabu ao man maeuia ake a kaotii ke ni kaungai reirei ake a reiakin man rongorongo aikai.
Kakaea te kibu n taeka. Kaoia membwa bwa a na kakaai rongorongo n te maungatabu n taratarai kiibu ake a nano irouia. Tuangiia bwa a na tibwai kiibu ao tera ae a reiakinna mai iai. Tuangiia bwa a na tibwaia bwa a kanga reirei aikai ni buokiia ni kakoroa nanon ana mwakuri te Uea.

Ibukin iango riki iaon aron te kamatebwai ao te anga reirei man marooro n te maungatabu ni kabuta, taraa “Ideas for Learning and Teaching from General Conference.” (Taona “Iango ibukin te Kamatebwai” iaan “General Conference” n te Gospel Library.)