Te Burabeti ae Maiu ibukin Boong aika Kaitira

Iroun Unimwane Allen D. Haynie

Man te Itingaun

Tamara ae i Karawa e a tia ni rinea te baeten ni kaokan te koaua nakoia Natina rinanon te burabeti.

Ngke te ataeinimwaane Ngai, I tatangira te bong ae te Kaonobong ibukina bwa bwaai ni kabane ae I karaoi n te bong anne a taraa ni kakukurei. Ma e aki kakawaki bwa tera are I karaoia, aki toki n rimoan te bwai ae moan te kakawaki—matakuakinan cartoon n te terewition. Ni moaningabongin te Kaonobong teuana, ngke I teitei irarikin te terewition ao n tabe n ibibita te channel, I kunea bwa te cartoon are I kantaningaia e a tia n oneaki imwiina n te kanakobwana n te maungatabu ni kabuta n Ana Ekaretia Iesu Kristo ibukiia Aika Itiaki ni Boong aika Kaitira. Inanon taraakin te terewiton ao n nanokawaki ngkai e nang aki oti tamnein te cartoon, I a noora tamnein te mwaane ae mainaina irana ao ni bwainna n te kooti ma ana neketai ae e tekateka iaon te kaintekateka ae kan taraakina.

Iai te bwai ae rangi n okoro taraakina iai, ngaia are I a titirakina tariu te ikawai,“Antai arei?”

E taku, “Anne bon Beretitenti David O.McKay; boni ngaia te burabeti.”

I uringa te bwai are I namakinna ao n ataia bwa boni ngaia te burabeti. Ngkanne, ibukina ngkai te ataeinimwaane Ngai ae I kan mamataku n te cartoon, I a bita te channel. Ma I aki te roko ni mwaninga te bwai are I namakinna ngke e reken te kaotioti ae e aki kantaningaaki n te tai ae uarereke anne. Ngkana te burabeti, n tabetai bon te tai naba anne ao ko ataia naba.¹

N ataakina man te kaotioti bwa iai te burabeti ae maiu iaon te aba e bitii bwaai ni kabane.² E karika temanna bwa a na akea nanona ni kan kauntaeka ibukina ngke e taetae te burabeti ngkai te burabeti ngaia ke tao ngkana temanna ae karaoiroia man waaki n totoko man aia reirei burabeti.³ N aron te atatai ae kaotaki aei e kaoa temanna n onimakina ana taeka n reirei te burabeti ae maiu, e ngae ngke e aki rangi ni bwanin ara atatai iai.⁴ Ma, Tamara are i Karawa ae kororaoi man tangira e a tia n rinea te banna ni kaota ana koaua nakoia natina rinanon te burabeti, temanna are e aki ukoukora te wewete ae tabu ao temanna ae aki kainnanoa ara ibuobuoki bwa ti na ataa kabwakana.⁵ Te burabeti bon temanna are e a tia ni katauraoaki iroun te Atua, ni weteaki, ni kaetaki, ni kairaki, n reireiaki, ni katabuaki, ao ni kamatoaaki.⁶ Anne bukina ngkai aki kona n rootaki maiura n tamnei man iriiran aia reirei burabeti.

Ngkana ti tangiria ke ti aki, ti bane n rineaki ni kabane n te anga teuana n te maiu i mwain te maiu n te aonaaba ni bungiaki ni boong aika kaitira. Iai baika uoua aika a koaua are a irekereke ma boong aika kaitira. Te moan koaua bwa ana Ekaretia Kristo e na manga moan kateaki iaon te aba. Te kauoua ni koaua bwa bwaai a na taraa n rangi ni kangaanga riki. E kaotaki ni booki aika tabu bwa ni boong aika kaitira e na iai “te karau ae te aiti mai karawa aika korakora aika a karokoaki ni kamaunai kaai n amwarake n te aonaba,”⁷ aoraki,⁸ taian buaka ao rongorongon buaka, ao te aonaba ni kabane e na mangaongao, … ao e na korakora te buakaka.”⁹

Ngke I uarereke, taetae ni burabeti akanne ibukin boong aika kaitira a kakamaakai ao e karika ae N na tataro bwa e na aki roko te Kauaoki inanon au tai ni maiu—ni kaairia ma tabeua tokanikaiu ni karokoa te tai aei. Ma ngkai I tataro ibukin kaitaraana, e ngae ngke kangaanga ake a tataetae ni burabetiaki a na bon riki,¹⁰ ibukina bwa ngkana e oki Kristo n tautaeka, Ana karikibwai ni kabane a na “kaweneaki raoi.”¹¹

Bwaai aika a riki ngkai n te aonaaba a karika maakuia tabeman. Ngkai naati ni berita iroun te Atua, ti aki riai ni ririmwin baikai ke n ataia bwa ti na kanga ni borauakina kawaira rinanon taai ni kangaanga. Ti riai n aki maaku.¹² Te tua ao reirei ake ti riai ni iriiri bwa ti aonga ni kamauaki n tamneira ao n teimatoa n te maiu n rabwata a kuneaki n ana taeka te burabeti ae maiu.¹³ Anne bukina ngkai e kabwarabwara Beretitenti M. Russell Ballard bwa “tiaki te bwai ae bebete … karekean Ana burabeti te Atua ni mena ibuakora.”¹⁴

E kaota ana koaua Beretitenti Russell M. Nelson bwa “ana banna te Atua ae e a kaman baireaki ibukin reiakinaia natina bon rinanoia burabeti e kakoaua nakoira bwa E na kakabwaiaia burabeti n tatabemaniia ao E na kakabwaiaia naake a ongo ana reirei te burabeti.”¹⁵ Ngaiar are oin te kantaninga bwa ko na iriira te burabeti ae maiu.¹⁶ Tariu ao mwaaneu, tiaki n aron booki n rimoa ni kamanga ao taian kaa aika a tamaroa, taeka ni burabeti aki raka riki kakawakiia ibukina bwa a rangi ni maan. Anne bukina ngkai ti riai n aki ukeria ni kabonganai aia taeka burabeti ake ngkoa ni kaakeai aia reirei burabeti aika a maiu.¹⁷

E bwaka nanou nte taetae ni kaikonaki are e kabongana Iesu Kristo n reiakina reirein te euangkerio. I kan tibwaua te bwai ae e bon riki ae kanga te kaikonaki n te moaningabong aei.

Te bong teuana I rianna nakon te tabo n amwarake n ana etekuata te Ekaretia bwa N na katawanou. Imwiin reken te turee ae kanoana te amwarake, I a rin n te tabo n amwarake ao I a noora te taibora are a tekateka iai teniman kaain te Moan Beretitentii, ma teuana te kaintekateka ae akea kaaina. Arou n aki mweengaraoi e a karika waekoau n nako mai irarikin te taibora arei, ao ngkanne I a ongo bwanaan ara burabeti, e taku Beretitenti Russell M. Nelson, “Allen, e mwaawa te kaintekateka aei bwa akea kaaina. Nakomai tekateka irarikira.” Ao ngaia are I a nako.

Ngke ti nang roko n tokin ara katawanou, I rangi ni miimi ngke I a ongo tangin te bwai ae kamwakerukeruaki, ao ngke I tararake, I a noora Beretitenti Nelson ngke e katea ana rabwa n ran ao imwiina e a kamakirauaa ao n onea bonotan matana.

Ngkanne e a tabeka ana titiraki Beretitenti Dallin H. Oaks are I kan titiraki iaona, “Beretitenti Nelson, bukin tera ngkai ko kamakirauaa am rabwa n ran anne?”

E kaeka, “E a bebete irouia naake a karaoa te kaoki maange ibukina bwa e aki karibwaa nanon te kaonteina ni kaoki maange.”

Ngke I tabe n iangoa te kaeka anne inanou, I a manga ongo naba te aekaki ni karongooa anne. I taraa angataiu, ao e a kume ni kamakirauaa ana rabwa n ran Beretitenti Oaks n aron are e karaoia Beretitenti Nelson. Ngkanne I a manga ongo te aekaki ni karongoa anne n angamaingiu, ao Beretitenti Henry B. Eyring e tabe ni kamakirauaa ana rabwa n ran, e ngae ngke e kataa te anga ae kaokoro bwa e karaoia ngke e wene te rabwa ni bangaki, are e anaa riki te korakora nakon te bwatoro are e tei n ineti rake. N noran aio, Beretitenti Nelson e kaotia nakoina bwa te anga are e tei te bwatoro n ineti rake e a kabebete riki aron kamakirauaan te bwatoro.

N te tai anne, I rara nakon Beretitenti Oaki ao ni karaurau n titiraki, “Ni kamakirauaan am rabwa n aron anne ai te kaetieti ngkai man te tabo n amwarake ibukin te kaokimaange?”

E kaeka Beretitenti Oak, ma moangarena ae oti iaon ubuna, “Eng, Allen, ko riai n iriira te burabeti.”

I kakoaua bwa Beretitenti Nelson e aki kabwarabwara iaon manga kabouan moan reirei n te tabo n amwarake n te bong arei. Ma ti kona n reiakinaki man aia kaeka¹⁸ Beretitenti Oaks ao Beretitenti Eyring nakon ana katooto Beretitenti Nelson ao nanon Beretitenti Nelson n reireiniia naake a irekereke n te kawai ae tamaroa aei.¹⁹

Tabeua te ririki n nako, Unimwaane Neal A. Maxwell e tibwai tabeua nonori ao reirei ake taeka ni burabeti ni kaineti ma ara bong:

“N namwakaina ao ririki aika imwaaira, ni bwaai aika a riki e na kainanoa ae membwa ni kabane a na rineia bwa tao teuanne [ke neienne] e na ira ke e na aki ira te Moan Beretitentii. A na kunea membwa bwa e na rangi ni kangaanga te tiku ni maan imarenan iango aika uoua aikai …

“… Ti na katuka te rekooti bwa e mataata te rinerine, ni kariaia aomata bwa a na karaoia ngkana a butimwaea aia reirei burabeti. …

“E taku Iesu bwa ngkana a riki baan te biiku, ‘e nang roko tain te kabuebue.’ … N aron ae ti kauringaki bwa e a kaan roko tain te kabuebue, ti na aki ngurengure ibukin te kabuebue!”²⁰

Te roro ae rikirake a tabe n ikawairake n te tai are a mwaiti riki iai baan te biiku ao e a korakora riki te kabuebue. Te koaua anne e a katokaa riki te rawata n te mwioko iaoia te roro ae rikirake, riki n iriiran aia reirei burabeti. Ngkana kaaro aki mutiakin ana reirei te burabeti ae maiu, a na aki ti kabuai kakabwaia ake a beritanaki ibon ibukiia ma ae e kananokawaki riki reireinaia natiia bwa baike e taekin te burabeti aki kakawaki ke a na ti rineia bwa tera aia reirei burabeti ae a na iria ke a na aki n akea te tabeianga ibukin bakitaian tamneia.

E nooria n tetaina Unimwaane Richard L. Evans: “Tabeman kaaro a kairua n aia namakin bwa a kona ni motirawa teutana n aia kairii ao ni iran kainibaire … n aki rangi ira nanon reirei n taku bwa e na akea rootakin aia utu ke baika ena reke irouia aia utu n taai aika ana roko. Ma, ngkana e bwaka te karo man touamwiin ana reirei te euangkerio, e na korakora rootakia ataei man aia katooto kaaro.”²¹

Ngkai ngaira te roro ae iai tabera ae tabu ni katauraoiia te roro ae rikirake n tabeia are e a tia n taetae ni burabetiaki ni boong aika kaitira,²² ae te tabe ae e riai ni koro bukina inanon te tai ae e rangi ni korakoran iai ana kairoro teuare e buakaka,²³ ti na aki riki bwa taan kamangaoa kakawakin iriiran aia reirei burabeti. Bon anne raoi te reirei are e na kona ni butimwaaia te roro ae rikirake n noora “te tia kairiribai ngkai [e] bon mena i kiiraroa; ao ngkanne [a kona] ni katauraoi” n tuuka te tia kairiribai man uruan oona.²⁴ Arora n tionako ae uarereke, n aki mutiakin, ke ni maningongo n tiribure ni kaeka nakon aia reirei burabeti e na karika ae ti naaki toua raoi kawain te berita; ma ngkana a kakorakoraaki iroun teuare e buakaka ni maiua te roro ae rikirake, mwakuri aikai e na rooti maiua ao a na bane ni kitana kawain te berita. Baika a na reke man aio bon rootakia n te aro ae aki tamaroa te roro teuana ma teuana.²⁵

Tabeman ibuakomi a namakinna bwa a tia ni bwaka n aia kekeiaki n aki iriira ana reirei Beretitenti Russell M. Nelson. Ngkana bon anne te bwai ae e riki, ngkanne rairannanom; manga moan waaki n iriira ana reirei ana burabeti te Atua are e rineaki. Kararoai aekan nako aia tamnei ataei aika a kairikonako ao onimakiniia ana aomata te Uea ae a tia ni kabiraki. Kimwareirei bwa ngkai “boni iai te burabeti i buakoia Iteraera.”²⁶

E ngae ngke ko aki rangi ni koaua raoi, I kakoaua nakoimi bwa ti kona ni kaitara kabubuen boong aikai ao n rikirake inanona. Ngaira Aomata Aika Itiaki ni boong aikai, ao aikai boong aika a kakannato. A ingainga nanora ni kan roko nakon te aonaaba n te tai aei, ma te onimaki bwa ti na bon aki katukaki ni bwaka ngkana ti kaitaraaki ma te roo ao ana kamangaongao teuare e buakaka²⁷ ma ti na anaa ana reirei ao ana kaetieti temanna are e a tia n anganaki te kariaia n taekina nakoira ao te aonaaba ae bwanin, “E kangai ana taeka te Uea ae Iehova.”²⁸ N aran ana burabeti te Atua are e kateirakea, Atuan Iteraera ae Tabu,²⁹ ae Iesu Kristo, amen.

Bwaai aika a na taraaki

1. Beretitenti Russell M. Nelson n te tai ae nako e kaoiia ataein te reirei ae Brigham Young University bwa a na karekea te aeka n taneiai naba anne ni bon oin am kaotioti: “Butiia Tamam are i Karawa ngkana bon ngaira raoi ana abotoro ao ana burabeti te Uea. Butiia ngkana ti a tia ni karekea te kaotioti iaon aei ao iaon bwaai riki tabeua” (“The Love and Laws of God” [Brigham Young University devotional, Sept. 17, 2019], speeches.byu.edu). Taraa naba Neil L. Andersen, “Ana Burabeti te Atua,” Riaona, Meei 2018, 26–27: “Iai tibwangara ngaira Aika Itiaki ni Boong aika Kaitira bwa ti na karekea ara kakoaua ae onoti bwa wetean Beretitenti Nelson bon mairoun te Atua.” Rongorongon rairakin Aramwa man ongoraara iroun te Burabeti ae Abinataai e moan karekea te kakoaua bwa te kaotioti ni kaineti ma te burabeti e tauraoi nakoira ni kabane (taraa Motiaea 13:5; 17:2).

2. “Bwa a na iai ara burabeti ke akea te bwai ae tina karekea; ao karekean te burabeti, a reke iroura bwaai ni kabane” (Gordon B. Hinckley, “We Thank Thee, O God, for a Prophet,” Ensign, Jan. 1974, 122).

3. “A moanna n aki kakoaua tamnein te taeka ni burabeti ao tamnein te kaotioti; ao e bon kaaitarai moaia ana motikitaeka te Atua” (Ereman 4:23; taraa naba Reirei ao Bertia aika Tabu 11:25). “Ti aneneia ao ti kakaraoia n taainako, ‘Ti karabwako te Atua, ibukn am Burabeti ae kairiira ni boong aikai.’ Iai aika moan te mwaiti ake [a na riai n] katokaa te beeba ae korobokiaki aona ae kangai: ‘E katauraoaki ibukin kairiirakira bwa e na bootau ma are ti tangiria ke ni bitii ara iango n te tai ae tawe’” (Teachings of Presidents of the Church: Heber J. Grant [2002], 80).

4. “N taai tabetai ti na kona ni karekei taeka n reirei are ti aki oota iai ke a taraa n aki kaineti nakoira, e ngae ngke imwiin raoi ara tataro ao ara iango ma te karaurau. Tai kakeaa te taeka n reirei, ma taua kamatoa inanom. Ngkana iai temanna ae ko rangi n onimakinna ao e anganiko te bwai ae akea bonganana nakon te tano ma te berita ae kanoana te koora, ko na bae n taua ibaim n te tai ae uarereke, ni karaua n ioioia. Ni katoa tai are I karaoa anne n nanon ana taeka n reirei te burabeti, imwiin te tai naba anne ao a moanna ni kaoti tamrurun te koora ao I rangi ni kakaitau” (Henry B. Eyring, “Finding Safety in Counsel,” Ensign, Meei 1997, 26; taraa naba 3 Nibwaai 1:13; Reirei ao Berita aika Tabu 1:14).

5. Taraa 2 Nibwaai 4:17–18. “Tai kabuakakai ibukin au aki kororaoi, ao tamau naba ibukin ana aki kororaoi, … ma karabwarabwa nakon te Atua bwa e a tia ni kaota ami aki kororaoi nakoimi, bwa kam aonga n reireinaki riki bwa kam na wanawana nakoira” (Moomon 9:31).

6. Taraa Reirei ao Berita aika Tabu 3:6–8; taraa naba Reirei ao Berita aika Tabu 93:47.

7. Reirei ao Berita aika Tabu 29:16.

8. Taraa Reirei ao Berita aika Tabu 84:97; taraa naba Reirei ao Berita aika Tabu 87:6.

9. Reirei ao Berita aika Tabu 45:26, 27.

10. Taraa Reirei ao Berita aika Tabu 1:38.

11. Otea 2:18. “Bwa N na kaotai mai karawa ma te mwaaka ao te mimitong ae korakora, ma kaain karawa ni kabane, ao ni maeka inanon te raoiroi ma aomata n te aonaba tenga te ririki, ao a na aki kona n tei naake a buakaka” (Reirei ao Berita aika Tabu 29:11).

12. Taraa 1 Nibwaai 22:16–17; taraa naba Reirei ao Berita aika Tabu 59:23.

13. Bwa noria, a tia n aki butimwaai aia taeka burabeti. Mamgaia ae, ngke arona bwa e teimatoa ni maeka tamau iaon te aba i mwin b tuangana bwa e na kitana te aba, noria, e na bon mate naba.” (1 Nibwaai 3:18; taraa naba 2 Nibwaai 26:3; Reirei ao Berita aika Tabu 90:5).

14. M. Russell Ballard, “His Word Ye Shall Receive,” Riaona, July 2001, 65.

15. Russell M. Nelson, “Ask, Seek, Knock,” Liahona, Nov. 2009, 82. “Akea te aomata ae kona ni karekea riki te kukurei ma tii man te ongoeaba n aia reirei burabeti aika a maiu” (The Teachings of Lorenzo Snow, ed. Clyde J. Williams [1996], 86).

16. “Kabanea nanomi iaoia naake a tararua te Ekaretia n te bong aei, ke ningabong, ao katotongi maiuia nakon are kam na tiku iaon aron aia nonori ke aia iango ke are a taekinna burabeti n taai ake ngkoa” (The Teachings of Harold B. Lee [1996], 525).

17. E taekinna Beretitenti W. Kimball n tetaina bwa “naake a karinei aia taeka burabeti ake a tia ni mate a katamaroai ruan mateia burabeti ake a tia ni mate a kataia ni kabonganai taeka akanne n tiribureia burabeti aika a maiu” (The Teachings of Spencer W. Kimball, ed. Edward L. Kimball [1982], 462). “Te kabanea ni kakawaki n taeka ae ti kona n ongo, iangoia inanom, ao n toumwiin ake a kaotaki rinanoia ara burabeti aika a maiu” (Ronald A. Rasband, “Bwaai ake a Kaineti ma Tamneiu,” Riaona, Nobembwa. 2021, 40).

18. “Ngkana ti ongo ana reirei te Uea ae e kabwarabwaraaki rinanon aia taeka Beretitenti n te Ekaretia, a riai n tamaroa ara kaeka ao ni kaungaaki n te tamnei” (M. Russell Ballard, “His Word Ye Shall Receive,” Riaona, Turai 2001, 65).

19. “Ana Ekaretia Iesu Kristo e a tia ni kairaki n tainako irouia burabeti aika a maiu ao abotoro. E ngae ngke a mamate ao iai kairuaia n rikiia n aomata, ana toro te Uea a kaungaaki bwa a na buokiia n totokoi kanganga ake a kakamaku n te maiu n tamnei ao ni buokiira n rin ma te kamanoaki rinanon te aki mamate ni kabanean ao n tokin kawaira ” (M. Russell Ballard, “God Is at the Helm,” Riaona, Nob. 2015, 24).

20. Neal A. Maxwell, “A More Determined Discipleship,” Ensign, Feb. 1979, 69, 70.

21. Richard L. Evans, “Foundations of a Happy Home,” in Conference Report, Oct. 1964, 135–36.

22. Taraa Reirei ao Berita aika Tabu 123:11; taraa naba Robert D. Hales, “Our Duty to God: The Mission of Parents and Leaders to the Rising Generation,” Riaona, Meei 2010, 95–98.

23. Taraa Reirei ao Berita aika Tabu 52:14.

24. Reirei ao Berita aika Tabu 101:54.

25. Taraa Motiaea 26:1–4.

26. 2 Uea 5:8.

27. “Kam na ongo nakon ana a taeka ma tua ni kabane ake e na anga nakoimi n te tai are e karekei, … bwa man karaoakin bwaai aikai … ao te Uea ae te Atua e na kamaenakoa mwaakan te roo mai moami, ao ni ioioa karawa ibukin kabwaiami, ao mimitongin arana” (Reirei ao Berita aika Tabu 21:4, 6). “ Bon akea temanna ae e irii ana angareirei ke ni kabonganai ana taeka n reire ke ana reirei temanna are e riki bwa te tia tei ibukin te Uea ao e na tionako man te kawai” (Doctrines of Salvation: Sermons and Writings of Joseph Fielding Smith, ed. Bruce R. McConkie [1998], 243).

28. Etekiera 3:27. “Bwa ana taeka kam na karekei, n aron ae bon man oin wiiu, ma te taotaonakin nano ao te onimaki ni kabanea” (Reirei ao Berita aika Tabu 21:5).

29. Taraa 1 Nibwaai 22:20–21taraa naba 3 Nibwaai 20:23.