Otanna nakon te Atua ae Moan te Rietata
Tokanikain Iesu Kristo n rin i Ierutarem ao bwaai aika riki n te wiiki anne e kaotii reirei aika ti kona ni karaoi ni maiura n te bong aei.
N te bong aei, n aron are e a tia n taekinaki, ti reitaki ma Kiritian ni kabuta te aonaaba ni karinea Iesu Kristo n Tabatin te Palm. E kaniia 2,000 te ririki n nako, bongin Tabatin te Palm are e mwakena moan kabanean wiikin ana mwakuri Iesu Kristo iaon te aba. Bon te wiiki ae moan te kakawaki n rongorongon te aomata.
Tera ae moanaki ma butimwaeakin Iesu bwa te Mesia are beritanaki n Tokanikaina n rinnako i Ierutarem ni kaaniaki ma Taurakina iaon te Kaibangaki ao Mangautina.1 Man te babaire mai ieta, Ana anga karea ni kamaiu e katoka Ana mwakuri n te maiu ae mamate, ae ngaia are ti a kona iai ni maeka ma Tamara are i Karawa n akea tokina.
A tuangiira booki aika tabu bwa e moanaki te wiiki ma aomata aika mwaiti n tei imatan mataroan te kaawa n taraa “Iesu are te burabeti mai Natareta are i Kariraia.”2 A “anai mwangan kaai aika baam, ao a nako ni kaitibo mangaia, ao a takarua ni kangai: Otanna: E na karaoiroaki ae nako mai n aran Iehova, ae aia Uea Iteraera.”3
Rongorongon te Baibara n taai ake ngkoa e kauringai ni katabeau n te Ekaretia i Takoradi, Ghana. Ma te bwai ae kamimi, bwa I mena ikekei n Tabatin te Palm.
N na bwenaua te Takoradi Ghana Titeiki ni katea te Mpintsin Ghana Titeiki. N te bong aei, ao e raka iaon 100,000 kaain te Ekaretia i Ghana.4 (Ti butimwaea Ga Mantse, Mimitongin te Uea ae Nii Tackie Teiko Tsuru II mai Accra, Ghana, ae raoniira n te bong aei.) Ni kaitibou ma aomata Aika Itiaki aikai, I namakina aron aia tangira ao nanoia ae korakora nakon te Uea. I kaota au tangira ae korakora ibukiia ao te Beretitenti n te Ekaretia e tangiriia naba. I taekina ana taeka te Tia Kamaiu are e koreaki iroun Ioane: “Aio au tua bwa kam na i tangitangiri, n ai arou ngkai I tangiri ngkami.”5 A kakoaua ao aki toki ni kangai “I tangiriko te maungatabu.”6
Ngke I taraa eta ao naano n aia rinan ni kaintekateka tariu ao mwaneu ao aia utu aika tangiraki inanon te umwantabu, I kona n noria ni mataia korakoran aia kakoaua ao aia onimaki iroun Iesu Kristo. I namakina nanoia bwa a kan warekaki bwa mwakoron Ana Ekaretia are e kabutaa te aonaaba. Ao ngke e anene te kuaea, anene n aroia anera.
N aron are n Tabatin te Palm ngkekei, aikai bon ana reirei Iesu Kristo ngke a ikotaki n anga aia kakaitau Nakoina n aron are a karaoia naake imatan mataroan Ierutarem are, ma banni ni baia, a takarua ni kangai, “Otanna …: E na karaoiroaki Teuae nakomai n aran te Uea.”7
Ma kaain aaro n te kaawa ae a ua kaan a karinea naba Tabatin te Palm. Ngke I taetae man te tabo n taetae, I noria i tinanikun te winto bwa a bane n nakonako ma te kimwareirei n te kaawa ni katiotioi baan taian baam ni baia, ae kanga ti tebo ma ake a oti n te tamnei aei. Bon te bwai ae N na aki kona ni mwaninga—ngaira ni kabane n te bong anne ake ti taromauriia aia King king.
E a tia Beretitenti Russell M. Nelson ni kauringiira bwa ti na karaoa Tabatin te Palm bwa te bong ae “tabu man ururingaki, tiaki ti baanikai ake a katiotioaki ni karinea rinin Iesu i Ierutarem, ma man ururingakin ikuakin nanon Baina.” Imwiina Beretitenti Nelson e taekina ana taeka Itaia, are e taetae iaon ana berita te Tia Kamaiu, “N na bon aki kona ni mwaninga taekami,’ ma taeka aikai, ‘Noria, I a tia ni korea aram i nanon baiu.’”8
E ataia te Uea bwa e matoatoa aron te maiu aei. E kauringiira ikoakina ae E “a tia n rinanon ae buakaka … riki”9 are E na buokiira ngkana ti rawawata ao n riki bwa ara banna ni katooto n “taua kawaim,”10 Kawaina, bwa te “Atua e na mena [iroura] n aki totoki.”11
Tabatin te Palm tiaki ti te bwai ae na ururingaki, ma bon te tai teuana n rongorongon te aonaaba ae oti iai bongin namwakaina, te tai, ao te tabo. Tokanikain Iesu Kristo n rin i Ierutarem ao bwaai aika riki n te wiiki are e irianaki ma banna n reirei aika ti kona ni karaoi ni maiura n te bong aei.
Ti na tarai tabeua reirei aika akea tokiia ake a riki rinanon banen Ana mwakuri i Ierutarem.
Te moan, taetae ni burabeti. Te katooto, te burabeti n Te O Tetemanti ae Tekaria e taetae ni burabetiia rinin Iesu Kristo i Ierutarem, e kabwarabwara naba ae na toka iaon te ati te teii.12 E taekina naba Mangautina Iesu ngke E a tauraoi n rin n te kaawa, ao e taku:
“Noria, ae ti a nako Ierutarem ngkai; ao ane E na kamwaneaki Natin te aomata nakoia ibonga ake a kakanato ma taani koroboki, ao ane a na motika taekana ba te mate,
“Ao ane a na angania Tientaire ba a na bainikirinaki, ao ba a na kataereaki, ao ba a na kamatea n te kaibangaki: ao e na manga uti n te kateni bong.”13
Te kauoua, ana iraorao te Tamnei ae Raoiroi. E reirei Iotebwa Timiti, “Akea te aomata ae kona n ataia ae Iesu bon te Uea, ma ti mairoun te Tamnei ae Raoiroi.”14 E berita te Tia Kamaiu nakoia Ana reirei15 n te Kabanea n Amwarake16 n te ruu are mai ieta,17 “I bon aki kitani ngkami ni motiki taekami.”18 Ana bon aki maroa n tataekina koauan te euangkerio ma e na iai ana iraorao te Tamnei ae Raoiroi ae na kairiia. “I katuka te rau i roumi, I anganingkami au rau,” E berita; I aki anganingkami n ai aron te aba, ngkana e anga.”19 Ma ana bwaintituaraoi te Tamnei ae Raoiroi, iai te kakoaua naba anne iroura—bwa “e aonga ni memena Tamneina [iroura]”20 ao “man mwaakan te Tamnei are e Raoiroi ao [ti] na kona n atai koauan bwaai ni kabane.”21
Te kateniua, ana reirei Iesu. Te riki bwa Ana reirei ni koaua bon te motinnano ae aki bwaka, te ongotaeka nakon tuua aika akea tokiia, ao tangiran te Atua, a bon rang ni kakawaki. Akea te nanokokoraki. Aomata ake a karinea ma te baam a Neboia bwa te Mesia. Anne raoi bon Ngaia. A bane ni kairaki Nakoina, Ana kakai, ao Ana reirei. Ma kamoamoaia irouia aika mwaiti e aki teimaan. Tabeman ake a takarua mai imwaina ni kangai, “Otanna”22 a manga rairaki ao n takarua, “Kamatea n te Kaibangaki.”23
Te Kaua, ana Mwakuri ni Kamaiu Iesu Kristo.24 N Ana kabanea ni bong, imwaain Tabatin te Palm, E karaoa Ana Mwakuri ni Kamaiu ae moan te kamiimi, man te rawawata i Ketetemwane nakon Katakina ae aki eti iaan te tua, Kamateana iaon te kaibangaki, ao Taunakina n te ruanimate ae tangoaki. Ma e aki toki ikanne. Ma mimitongin Ana mwakuri bwa te Tia kabooi maiuia Natin Tamana ni kabane, teniua te bong imwiina E teirake man te ruanimate, ni mangauti25 n aron are E a tia n taetae ni burabetiia.
Ti teimatoa ni kakaitau ibukin Ana mwakuri ni kamaiu Iesu Kristo ae akea kabotauana? Ti namakina mwaakana ae itiaki, ngkai? Anne bukina ngkai Iesu Kristo, te Tia Karika ao te Tia Kakoroa nanon te Mwakuri ni Kamaiu, e nako Ierutarem, bwa e na kamaiura ni kabane. Tao taeka aika inanon Aramwa ko namakina koaua: Ngkana kam a tia n rinanon te bitaki n nano, ao ngkana kam a tia n namakina te kan anenea kunan te tangira ni kabomwi, I kan titirakiningkami, kam kona n namakinna ngkai?”26 I kona n taekinna ni koaua, bwa te kuaea i Takoradi n Tabatin te Palm anne a nenea “anenen te tangira ni kabomwi.”
Ni kabanean te wiiki ae korakai iai n Ana mwakuri iaon te aba, e anga te taetae ni kaikonaki Iesu Kristo iaoia tengaun kibono.27 E anga reirei iaon Okina nakoia ake a tauraoi ni Butimwaia, tiaki ma baam inanon baia ma otan te euangkerio inanoia. E kabonganai bannan otan taura ao uraia, ma teutana te oera ni bwaana te taura, bwa kangaa kabwarabwaraan te nano ni kan maiuakin Kawaina, Ana koaua, ao n tibwaua Otana.
Ko ataa te karaki. Kibono ake tengaun a tei ibukiia kaain te Ekaretia, ao te tia mare te mwaane e tei ibukin Iesu Kristo.
Kibono ake tengaun a anai aia taura ao a “oti nako ni butimwaea te tia iein.”28 Niman a wanawana, a tauraoi ma te bwaa inanon aia taura ao teutana tatarana, ao niman a nanobaba, e uramweere aia taura ao akea tataran aia bwaa. Ngke e a roko te wewete, “Noria, te tia iein; kam na otinako ni butimwaia,”29 niman ake a “wanawana ao [a] tia ni karekea te koaua, ao [a] tia n ana te Tamnei ae Raoiroi ibukin kairaia,”30 a tauraoi ibukin “aia uea ao aia tia anga te tua”31 bwa e aonga “mimitongina [ni] memena iaoia.”32 A biriaitua ake niman ni kataia ni kakaea te oera. Ma e a oimwii. E waaki nako te mwakuri n akea ngaiia. Ngke a karebwerebwe ao ni bubuti ibukin kaukana, e kaeka te Uea, “I aki kinaingkami.”33
E na kanga aron ara namakin ngkana E kangai nakoira, “I aki kinaingkami!”
Ngaira, n aroia tengaun kibono, iai ara taura, ma iai ara bwaa? I maaku bwa iai tabeman aika a bon waaki ma aia orea ae aki tau, a rang n tabetabe ma bwain te aonaaba aei ni katauraoia raoi. E roko te bwaa man kakoauan ao ni mwakuri iaon taeka ni burabeti ao aia taeka burabeti aika maiu, riki Beretitenti Nelson, ana Kauntira, ao Abotoro ake Tengaun ma Uoman. A kaon tamneira taian bwaa ngkana ti ongo ao n namakina te Tamnei ae Raoiroi ao ni mwakuri iaon te kairi mairoun te Atua anne. E bwaro te bwaa nako nanora ngkana ara rinerine a kaotia ae ti tangira te Uea ao ti tangira te bwai ae E tangiria. E roko te bwaa man te rairannano ao ukoran te kamaiu n Ana Mwakuri ni Kamaiu Iesu Kristo.
Ngkana ko iangoia ni kanoa te bwai ae atongnga tabeman bwa “rinanin bwaai aika a na karaoaki,” ngaia aio: Kanoa am bwaketi ma te bwaa n tein Ana ran ae maiu Iesu Kristo,34 are e bon tei ibukin Maiuna ao Ana reirei. Ni kaaitaraana, katian te bwai ae ko tangiria ni karaoi ae aaki kakawaki ni maiun tamneim e na aki angan tamneim marurungina ke n rauaki iai; ngkai ko maiuakina te reirei are e reirei iaona Iesu Kristo. I taekinna mai imwaina: anai taeka ni burabeti ao aia reirei burabeti, mwakuri iaon ana wirikiriki te Tamnei ae Raoiroi, riki bwa ana reirei Iesu ni koaua, ao ukora te mwaaka ni kamaiu n Ana Mwakuri ni Kamaiu ara Uea. E na uotiko nako te bwaketi anne nakon te tabo are ko tangiria n nako iai—n oki nakon Tamam are i Karawa.
Tabatin te Palm i Takoradi bon te taneiai ae rang n onoti ibukiu bukina bwa I tibwaia ma ainen ao mwaanen te taromauri aika kakaonimaki. Ngaia ae a tia n riki aekaki aikai iaon kaontenanti ao aaba ni kabutaa te aonaaba. Nanou ao Tamneiu, n aromii, a kariaria n takaruaa, “Otanna nakon te Atua ae Moan te Rietata.”35
E ngae ngke tiaki tei imatan mataroan Ierutarem n te bong aei ma baan taian baam ni baira, e na roko te tai ngkana, n aron are e taetae ni burabetiaki n te Kaotioti, “te koraki ae uanao, ae e aki kona temanna ni warekia, mai buakoia botanaomata ma taian taetae ni bane, [a na tei] i nanoaan te kaintokanuea, ao i matan te Tibutetei, ao a kunnikaiia n ninira aika mainaina, ao baan baam i nanoni baia.”36
I katikua iroumi au kakabwaia ae ngai ana Abotoro Iesu Kristo bwa kam na kona ni maiuakina te maiu ae raoiroi ao ni mena ibuakoia naake, iai baanni inanon baia, a na butimwaea Natin te Atua, te tia Kabooi Maiura ni kabane. N aran Iesu Kristo, amen.