3

Maaari Akong Manalangin sa Ama sa Langit

Pambungad para sa Guro

Para espirituwal na maihanda ang inyong sarili sa pagtuturo ng araling ito, basahin at pag-isipan ang sumusunod:

Sa panalangin makakausap natin ang ating Ama sa Langit. Sinasabi natin sa Kanya na mahal natin Siya, pinasasalamatan natin Siya sa mga biyaya, at humihingi tayo ng tulong para sa atin at sa mga ibang nangangailangan. Winawakasan natin ang ating mga panalangin sa pangalan ni Jesucristo. Ang panalangin ay isa sa mga pinakadakilang biyaya sa atin habang narito tayo sa lupa. (Tingnan sa Mateo 6:9–13; Alma 34:18–27; 3 Nephi 18:19–21.)

Paghahanda

• Magdala ng ilang maliliit na bagay o larawang kumakatawan sa mga bagay na pinasasalamatan natin (tulad ng damit, pagkain, mga banal na kasulatan, at kung anu-ano pa) sa isang malaking bag. Isulat sa bag ang “Nagpapasalamat po kami.” Magdala ng isa pang bag na may mga bagay o larawang kumakatawan sa mga bagay na maaari nating hilingin sa panalangin (tulad ng masayang pamilya, malakas na pangangatawan, pagmamahalan, at iba pa). Isulat sa bag na ito ang “Biyayaan Po Ninyo Kami.”

• Markahan ang pahina 106 sa manwal na ito para madali ninyo itong mabuklat.

Mga Aktibidad sa Pag-Aaral

Magsimula sa isang aktibidad sa pagtitipon. Para sa mga ideya, tingnan sa pahina 3.

Panalangin

Pag-alayin ng pambungad na panalangin ang isang bata.

Mga Larawan

Ipakita ang larawan ng batang si Jesus na nagdarasal (pahina 18). Sabihin sa mga bata na ito ay larawan ni Jesus na nagdarasal noong Siya ay bata pa. Ipakita ang larawan ng isang batang nagdarasal (pahina 18). Ipaliwanag na kausap natin ang Ama sa Langit kapag nagdarasal tayo; nagsisimula tayo sa pagsambit ng, “Ama namin sa Langit.” Ipasambit sa mga bata ang, “Ama namin sa Langit.”

boy Jesus praying

children praying

Sabihin sa mga bata na pasasalamatan naman natin Siya para sa ating mga biyaya. Papiliin ang isang bata ng isang bagay mula sa bag na may nakasulat na “Nagpapasalamat Po Kami.” Sambitin ang, “Nagpapasalamat po kami para sa [bagay na napili ng bata].” Ipasambit sa mga bata ang, “Nagpapasalamat po kami.” Ulitin ang aktibidad na ito hanggang sa mapili ang lahat ng bagay. Pagkatapos ay sabihin sa mga bata na hihiling naman tayo sa Ama sa Langit ng mga biyaya, at ulitin ang aktibidad sa bag na may nakasulat na “Biyayaan Po Ninyo Kami.” Ipasambit sa mga bata ang, “Biyayaan po ninyo kami.”

Ipakita ang larawan ni Jesus sa pahina 106. Sabihin sa mga bata na winawakasan natin ang ating panalangin sa, “Sa pangalan ni Jesucristo, amen.” Pasabayin sa inyo ang mga bata sa pagsambit nito.

Jesus Christ

Activity Verse

Bigkasin ang sumusunod na activity verse at pasabayin sa inyo ang mga bata:

Nagsisimula ako sa pagsasabi ng “Mahal na Ama sa Langit”; (itaas ang isang daliri—panatilihing nakataas ang mga daliri sa buong activity verse)

Pinasasalamatan ko siya sa mga biyayang ipinagkakaloob niya; (itaas ang pangalawang daliri)

At mapakumbaba akong humihiling ng mga bagay na kailangan ko, (itaas ang pangatlong daliri)

Sa pangalan ni Jesucristo, Amen. (itaas ang pang-apat na daliri)

[“I Pray in Faith,” Children’s Songbook, 14]

Katapusan

Ipaalala sa mga bata na kausap nila ang Ama sa Langit kapag nagdarasal sila. Magpatotoo na dinidinig ng Ama sa Langit ang ating mga dalangin.

Panalangin

Pag-alayin ng pangwakas na panalangin ang isang bata.

Mga Tip sa Pagtuturo

Panalangin: Malaki ang maitutulong ninyo para magpitagan ang mga bata habang naghahanda para sa panalangin. Halimbawa, ipaalala sa kanila na maupo nang tahimik at humalukipkip. Maituturo din ninyo ang wika ng panalangin, sa pagtulong sa kanila na gumamit ng mapitagang mga salita tulad ng “Kayo, Ninyo, at Inyo sa halip na ikaw, mo, at iyo. Matuturuan ninyo silang magdasal hanggang matuto silang gumamit ng sarili nilang mga salita.

Paghingi ng sagot: Mahalaga ang tono ng boses, pagtingin sa mata, at galaw kapag nagtuturo. Kapag humihingi ng sagot, tingnan ang mga bata, at sa nanghihikayat na boses ay sabihing, “Masasabi mo bang, ‘Pinasasalamatan namin Kayo’?” Purihin ang mga bata sa paglahok.

Patotoo: Magpatotoo sa simple at maikling paraan; halimbawa: “Alam ko na dinidinig ng Ama sa Langit ang ating mga dalangin.”

Opsyonal na Mga Aktibidad

Paghahanda

• Para sa aktibidad sa flip-book: Kopyahin ang larawang guhit sa pahina 19. Kulayan kung gusto ninyo. Gumawa ng flip book sa paggupit sa tuwid na mga linya at pagtupi sa tulduk-tuldok na mga linya.

  coloring page, prayer flip book

  Nagsisimula ako sa pagsasabing, “Ama namin sa Langit.”

  Pinasasalamatan ko Siya para sa mga biyaya.

  Hinihilingan ko Siya ng mga biyaya.

  Sa pangalan ni Jesucristo, amen.

  Maaari Akong Manalangin sa Ama sa Langit

• Para sa kuwento sa banal na kasulatan: Basahin ang Enos 1:1–8 at maghandang ibuod ang kuwentong ito sa mga bata. Magdala ng isang kopya ng Aklat ni Mormon. Markahan ang Enos 1 para madali ninyo itong mabuklat.

• Para sa aktibidad sa pagkukulay: Kopyahin ang larawang guhit sa pahina 19 para makulayan ng bawat bata. Gupitin sa tuwid na mga linya bago magsimula ang nursery.

Flip Book

Ulitin ang mga tagubilin sa pahina 16 kung ano ang sasambitin natin sa panalangin, gamit sa pagkakataong ito ang flip book na inihanda ninyo. Habang ipinaliliwanag ninyo ang bawat bahagi ng panalangin, angatin ang angkop na flap o ipaangat ang mga flap sa isang bata. Magagamit din ninyo ang flip book habang binibigkas ninyo ang activity verse sa pahina 16. Maaari ninyong itago ang flip book para magamit sa klase ng nursery sa darating na mga linggo.

flip book diagram

Kuwento sa Banal na Kasulatan

Buklatin ang Aklat ni Mormon sa Enos 1 at ikuwento sa mga bata ang pagdarasal ni Enos. Nasa ibaba ang isang halimbawa:

Isang araw nagpunta si Enos sa gubat (ipataas sa mga bata ang kanilang mga bisig at pagkunwariin silang mga puno) para mangaso (pagkunwariin silang nagpapana). Habang nasa gubat, nagdasal siya sa Ama sa Langit (paluhurin ang mga bata na parang nagdarasal; tapusin ang kuwento habang sila ay nakaluhod). Sinagot ng Ama sa Langit ang kanyang dalangin, at natuwa si Enos. Batid niyang pagpapalain siya ng Ama sa Langit.

Sabihing, “Maaari akong manalangin sa Ama sa Langit.” Pasabayin sa inyo ang mga bata sa paguulit nito, nang dahan-dahan.

Pagkukulay

Pakulayan sa mga bata ang isang kopya ng larawang guhit sa pahina 19. Pagkatapos nila, itupi sa tulduk-tuldok na mga linya.

Mga Tip sa Pagtuturo

Nakatatandang mga bata: Magpatulong sa nakatatandang mga bata sa pagtuturo ng pagdarasal sa mga batang musmos. Magandang paraan ito para mapagtibay ang inyong naituro.

Mga kuwento: Kapag isinasadula ng mga bata ang mga kaganapan sa isang kuwento, mas nauunawaan at naaalala nila ito. Tandaan na hindi dapat pagampanan ang papel ng Diyos Ama kapag nagsasadula ng isang kuwento. Huwag pagampanan ang papel ni Jesucristo maliban sa tagpo ng Kanyang pagsilang. (Tingnan sa Pagtuturo, Walang Higit na Dakilang Tungkulin, 219–20.)

Pagkukulay: Habang nagkukulay ang mga bata, repasuhin ang mga alituntuning itinuro sa aralin. Ituro ang mga detalye sa mga larawan, at ipaliwanag sa mga bata ang kanilang kinukulayan. Basahin sa kanila ang mga salita sa larawang guhit.