Lakanga Taulaʻeiki Faka-ʻĒloné

Ko hono maʻu ʻa e ngaahi kī ʻo e ongoongolelei ʻo e fakatomalá mo e papitaisó ki he fakamolemoleʻi ʻo e ngaahi angahalá

ʻI he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku feinga ai ʻa e kau muimui ʻo e ʻOtuá ke tokoni kiate Ia ʻi he ngāue ʻo e fakamoʻuí mo e hākeakiʻí. Kuo fakafoki mai ki māmani ʻa e lakanga fakataulaʻeikí, pe ko e mālohi mo e mafai taʻengata ʻo e ʻOtuá, ke tokoniʻi e fānau ʻa e ʻOtuá ke nau foki hake kiate Ia ʻaki ʻenau fakahoko mo tauhi ʻa e ngaahi fuakava toputapu mo Iá.

ʻOku fokotuʻutuʻu ʻa e lakanga fakataulaʻeikí ki ha konga ʻe ua, ʻo takitaha ʻi ai hono fatongia ki he ngaahi tafaʻaki mahuʻinga ʻo hono moʻui ʻaki ʻo e ongoongoleleí. Ko e Lakanga Taulaʻeiki Faka-ʻĒloné ko e lakanga fakataulaʻeiki “teuteuʻanga” pe “maʻulalo angé” ia. ʻOkú ne maʻu ʻa e ngaahi kī ʻo e tauhi mai ʻa e kau ʻāngeló, ʻo e ongoongolelei ʻo e fakatomalá, pea mo e papitaiso ʻi he fakauku ke fakamolemoleʻi ʻa e ngaahi angahalá (vakai, Tokāteline mo e Ngaahi Fuakava 13:1). ʻOku teuteuʻi, tāpuakiʻi, mo tufaki ʻe he kau maʻu Lakanga Taulaʻeiki Faka-ʻĒloné ʻa e mā mo e vai ʻo e sākalamēnití. ʻOku nau toe ngāue foki ʻi he ngaahi tafaʻaki fakatuʻasino ʻo e Siasí, hangē ko e tokangaʻi hono kāingalotú mo e tānaki ʻa e ngaahi foaki ʻaukaí.

Ko e Hā ʻa e Lakanga Taulaʻeiki Faka-ʻĒloné?

Ko e lakanga fakataulaʻeikí ko e mālohi mo e mafai taʻengata ia ʻo e ʻOtuá. ʻOku tokoni ʻa e kau maʻu lakanga fakataulaʻeikí ki he ʻOtuá ʻi hono fakahoko ʻa e fakamoʻui mo e hākeakiʻi ʻo ʻEne fānaú ʻaki ʻenau fakahoko ʻa e ngaahi fuakava mo e ngaahi ouau toputapú. Ko e Lakanga Taulaʻeiki Faka-ʻĒloné ko ha konga ia ʻo e Lakanga Taulaʻeiki Faka-Melekisēteki māʻolunga angé (vakai, Tokāteline mo e Ngaahi Fuakava 107:1, 6, 13–14). ʻOku lava ke maʻu ʻe he kau mēmipa tangata moʻui taau kotoa pē ʻo e Siasí ʻi he ʻahó ni ʻa e Lakanga Taulaʻeiki Faka-ʻĒloné ʻo kamata ʻi Sānuali ʻo e taʻu ʻoku hoko ai honau taʻu 12. ʻOku kau ʻi he ngaahi tuʻunga ʻo e Lakanga Taulaʻeiki Faka-ʻĒloné ʻa e tīkoni, akonaki, taulaʻeiki, mo e pīsope.

Vakai fakalūkufua ki he tefitó: Lakanga Taulaʻeiki Faka-ʻĒloné

Ngaahi fakahinohino ʻoku fekauʻaki mo e ako ʻo e ongoongoleleí: Ko Hono Fakafoki Mai ʻo e Lakanga Fakataulaʻeikí, Lakanga Taulaʻeiki Faka-Melekisētekí, Ngaahi Kī ʻo e Lakanga Fakataulaʻeikí

Konga 1

Naʻe Fakafoki Mai ʻe Sione Papitaiso ʻa e Lakanga Taulaʻeiki Faka-ʻĒloné ki he Palōfita ko Siosefa Sāmitá mo ʻŌliva Kautele

Ko e foaki ʻe Sione Papitaiso ʻa e lakanga fakataulaʻeikí kia Siosefa Sāmitá

Talu mei he kuonga ʻo ʻĀtamá ʻo aʻu kia Mōsese, mo hono maʻu ʻe he kau palōfitá ʻa e Lakanga Taulaʻeiki Faka-Melekisētekí. Ka ʻi he lolotonga ʻo e ngāue ʻa Mōsesé, naʻe fakasītuʻaʻi he kau ʻIsilelí ʻa e ngaahi tāpuaki ʻa Sihová pea naʻe toʻo ai ʻa e lakanga fakataulaʻeiki māʻolunga ange ko ʻení mei he kakaí fakalūkufua. Naʻe hokohoko atu pē ke kei maʻu ʻe he kau palōfitá ʻa e Lakanga Taulaʻeiki Faka-Melekisētekí. Naʻe foaki ki he kau mēmipa tangata ʻo e faʻahinga ʻo Līvaí, kau ai ʻa e hako ʻo ʻĒloné, ʻa e Lakanga Taulaʻeiki Faka-ʻĒloné. (Vakai, Tokāteline mo e Ngaahi Fuakava 84:23–27).

Koeʻuhí ko Sione Papitaisó ko e hako ia ʻo ʻĒlone pea ko e foha lahí ia, naʻá ne maʻu ʻa e Lakanga Taulaʻeiki Faka-ʻĒloné (vakai, Tokāteline mo e Ngaahi Fuakava 68:16–18; 84:26–27). Hili ʻa e pekia ʻa Sīsū mo ʻEne Kau ʻAposetoló, naʻe fai ʻe he kakaí ha ngaahi liliu taʻe-fakamafaiʻi ki he ngaahi ouau ʻo e lakanga fakataulaʻeikí pea mo e Siasí. Koeʻuhí ko e hē ko ʻeni mei he moʻoní, naʻe ʻave ai mei māmani ʻa e Lakanga Taulaʻeiki Faka-ʻĒloné, fakataha mo e lakanga fakataulaʻeiki māʻolunga ange ʻa ia naʻe foaki kia Pita, Sēmisi, Sione, mo e kau ākonga kehe ʻa Kalaisí (Luke 9:1–2). ʻI he 1829, naʻe hā ai ʻa Sione Papitaiso kuo toetuʻú kia Siosefa Sāmita mo ʻŌliva Kautele ʻo foaki kiate kinaua ʻa e Lakanga Taulaʻeiki Faka-ʻĒloné, ʻo fakafoki mai ʻa e mafaí ni ki māmani (vakai, Tokāteline mo e Ngaahi Fuakava 13:1; 27:7–8; Siosefa Sāmita—Hisitōliá 1:68–72).

Ngaahi meʻa ke fakakaukau ki ai

ʻE lava ke hoko ʻa e moʻui mo e ngāue ʻa Sione Papitaisó ko ha maʻuʻanga tataki fakalaumālie ki he kau maʻu Lakanga Taulaʻeiki Faka-ʻĒlone ʻo e ʻaho ní. Lau ʻa e Mātiu 11:7–13; Luke 7:24–30; mo e Sione 5:32–35. Ko e hā ʻokú ke ako mei he ngaahi veesi ko ʻení fekauʻaki mo e ongo ʻa e ʻEikí kia Sione Papitaisó? ʻOkú ke pehē ko e hā naʻe fakamatalaʻi peheni ai ʻe Sīsū ʻa Sioné? ʻE lava fēfē nai ke faʻifaʻitaki ʻa e kau ākonga ʻa Sīsū Kalaisi ʻi he ʻaho ní ki he sīpinga ʻa Sione Papitaisó?
Naʻe akoʻi ʻe Palesiteni Kōtoni B. Hingikelī ʻi heʻene lea “Ko e Lakanga Taulaʻeiki Faka-ʻĒloné—ko ha Meʻaʻofa mei he ʻOtuá,” ʻo pehē, “Ko e fatongia ia ʻo e [kau tīkoní, kau akonakí, mo e kau taulaʻeikí], ke tokangaʻi ʻa e Siasí mo fakapapauʻi ʻoku ʻikai ha angahala pea fakaafeʻi ʻa e taha kotoa ke haʻu kia Kalaisi.”¹ ʻI he Siasí ʻi he ʻahó ni, ʻoku tokolahi ha kau maʻu Lakanga Taulaʻeiki Faka-ʻĒlone ko ha kau talavou. ʻE lava fēfē nai ke ʻuhingamālie hono fakahoko ʻe he kakai kei talavoú ni ʻa e ngaahi fatongia ko ʻení ʻi honau uōtí mo e koló ʻi he ʻahó ni?

ʻEkitivitī ki he ako mo e niʻihi kehé

ʻOku tānaki mai ʻe he fakamatala ʻa ʻŌliva Kautele ki hono fakafoki mai ʻo e Lakanga Taulaʻeiki Faka-ʻĒloné ha puipuituʻa mo e fakaʻāuliliki ke mahino kiate kitautolu ʻa e meʻa naʻe hoko ʻi he ʻaho ko iá. Lau ʻene fakamatalá ʻoku maʻu ʻi he ngataʻanga ʻo e Siosefa Sāmita—Hisitōliá. Fakaafeʻi ʻa e kau mēmipa ʻo e kulupú ke nau vahevahe pe ko e fē ʻa e fakaikiiki ʻoku mātuʻaki ʻuhingamālie kiate kinautolú. Pea toki fakaafeʻi leva ʻa e kau mēmipa ʻo e kulupú ke nau fakakaukau pe naʻe mei fēfē nai kapau naʻa nau ʻi ai mo Siosefa pea mo ʻŌliva ʻi he ʻaho ko iá. ʻOkú ke pehē ko e hā naʻe mahuʻinga ai ʻa e meʻa ko ʻeni naʻe hokó ki he Fakafoki mai ʻo e ongoongoleleí?

Ako lahi ange

ʻEkesōtosi 28:1–4; Levitiko 8:1–13; Tokāteline mo e Ngaahi Fuakava 84:18
Thomas S. Monson, “Ko e Lakanga Fakataulaʻeikí—ko ha Meʻaʻofa Toputapu,” Liahona, Mē 2015, 88–90
“The Restoration of the Priesthood Authority and Organization” (vitiō), Gospel Library
Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, vōliume 1, Ko e Fuka ʻo e Moʻoní, 1815–1846 (2018), 65–75
Ngaahi Akonaki ʻa e Kau Palesiteni ʻo e Siasí: Siosefa Sāmita (2011), 91–100

Konga 2

ʻOku ʻOmi ʻe he Lakanga Taulaʻeiki Faka-ʻĒloné ha Ngaahi Kī mo ha Ngāue Mahuʻinga

ongo talavou ʻokú na talanoa ki ha fefine

ʻOku faʻa ʻiloa ʻa e Lakanga Taulaʻeiki Faka-ʻĒloné ʻi he taimi ʻe niʻihi ko e lakanga fakataulaʻeiki “siʻi angé” pea ʻoku ui ia ʻi he folofolá “ko e konga ʻo e” Lakanga Taulaʻeiki Faka-Melekisētekí (Tokāteline mo e Ngaahi Fuakava 107:14). Ka ʻoku maʻu ʻe he Lakanga Taulaʻeiki Faka-ʻĒloné ʻa e mālohi mo e mafai mahuʻinga ke fakahoko ʻa e ngaahi fuakava mo e ngaahi ouau toputapu ʻoku fiemaʻu ki he fakamoʻuí mo e hākeakiʻí.

Ko e Lakanga Taulaʻeiki Faka-ʻĒloné ʻoku kau ai ʻa e ngaahi kī ʻo e tauhi mai ʻa e kau ʻāngeló, ongoongolelei ʻo e fakatomalá, pea mo e papitaiso ʻi he fakauku ke fakamolemole ʻa e ngaahi angahalá (vakai, Tokāteline mo e Ngaahi Fuakava 13:1; 107:20).

Ngaahi meʻa ke fakakaukau ki ai

Naʻe teuteuʻi ʻe Sione Papitaiso ʻa e hala ke tali ai ʻe māmani ʻa Sīsū Kalaisí. Naʻá ne akoʻi ʻa e ongoongolelei ʻo e fakatomalá pea mo e papitaiso ki he fakamolemole ʻo e ngaahi angahalá, pea naʻá ne papitaiso foki mo e Fakamoʻuí (vakai, Maʻake 1:1–11; Sione 1:15–34). ʻOkú ke pehē ko e hā naʻe lau ai ʻa e ngaahi tefitoʻi moʻoni mo e ngaahi ouau ko ʻení ko ha teuteu mahuʻinga ki he hāʻele mai ʻa Kalaisí? ʻOku teuteuʻi fēfē nai ʻe he fakatomalá mo e papitaisó ʻa e kau ākonga ʻa Kalaisí ʻi he ʻahó ni ke nau maʻu ʻa e ngaahi ouau ʻo e temipalé pea fakahoko mo tauhi ʻa e ngaahi fuakava ʻoku fekauʻaki mo iá?
ʻI ha lea ʻa Palesiteni Kōtoni B. Hingikelī ki he kau maʻu Lakanga Taulaʻeiki Faka-ʻĒloné fekauʻaki mo e Tokāteline mo e Ngaahi Fuakava 13, naʻá ne naʻinaʻi ai ʻo pehē: “ʻOku ou naʻinaʻi atu ke mou fakaava ʻa e Tokāteline mo e Ngaahi Fuakavá … pea lau ʻa e ngaahi leá ni mo ako maʻuloto kinautolu. Ko e totonu kinautolu ʻo e lakanga fakataulaʻeikí. … Ko ha fakamoʻoni ia ʻoku ʻaonga mo moʻoni ʻa e lakanga fakataulaʻeiki ko ʻení ʻi he tapa kotoa.”² ʻE tataki fēfē ʻe he Tokāteline mo e Ngaahi Fuakava 13 ʻa e tokanga mo e tōʻonga ʻa ha talavou maʻu lakanga fakataulaʻeiki? ʻE tokoni fēfē nai ʻa e mahino ʻo e ngaahi moʻoni ko ʻeni fekauʻaki mo e Lakanga Taulaʻeiki Faka-ʻĒloné ke mahino ki he kotoa ʻo e kāingalotu ʻo e Siasí ʻa e mahuʻinga ʻo e ngaahi ouau hangē ko e papitaisó mo e maʻu fakauike ʻo e sākalamēnití pea mo e ngaahi fuakava ʻoku fekauʻaki mo kinautolú?

ʻEkitivitī ki he ako mo e niʻihi kehé

ʻOku mahuʻinga ke mahino ki he kāingalotu kotoa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e ngaahi fatongia mo e ngaahi tāpuaki ʻo e Lakanga Taulaʻeiki Faka-ʻĒloné, ka ʻoku tokolahi ha kau mēmipa ʻo e Siasí ʻoku ʻikai ke nau fakatokangaʻi hono mahuʻinga ʻo e ngaahi ouau mo e ngaahi fatongia ʻo e Lakanga Taulaʻeiki Faka-ʻĒloné. ʻE lava ke ako hoʻomou kulupú ki he ngaahi totonu mo e ngaahi fatongia ʻo e Lakanga Taulaʻeiki Faka-ʻĒloné ʻaki haʻanau ako ʻa e ngaahi maʻuʻanga tokoni ko ʻení, fakafoʻituitui pe ʻi ha fanga kiʻi kulupu iiki:
- Ko e Lakanga Taulaʻeiki Faka-ʻĒloné: Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, vahe 10, Gospel Library; Tokāteline mo e Ngaahi Fuakava 107:85–88
- Ko e ngaahi kī ʻo e tauhi mai ʻa e kau ʻāngeló: Tokāteline mo e Ngaahi Fuakava 13:1; 84:26; 107:20
- Ko e ongoongolelei teuteuʻangá: Tokāteline mo e Ngaahi Fuakava 13:1; 84:26–27; 107:20
- Ko e mālohi ʻi he fakahoko ʻo e ngaahi ouau ki tuʻá: Tokāteline mo e Ngaahi Fuakava 84:26–27; 107:20; Fakahinohino ki he Ngaahi Folofolá, “Lakanga Taulaʻeiki Faka-ʻĒloné”

Ko e ʻosi pē hono lau ʻe he kau mēmipa ʻo e kulupú ʻa e ngaahi fakamoʻoni folofola ʻi ʻolungá, fakaafeʻi ke nau vahevahe mo e toenga ʻo e kulupú ʻa e meʻa ne nau akó.

Ako lahi ange

Mātiu 3; Luke 3:1–22
Dallin H. Oaks, “The Aaronic Priesthood and the Sacrament,” Ensign, Nov. 1998, 37–40
Dale G. Renlund, “Ko e Lakanga Fakataulaʻeikí mo e Mālohi ʻo e Fakalelei ʻa e Fakamoʻuí,” Liahona, Nōvema 2017, 64–67
“Keys of the Aaronic Priesthood” (vitiō), ChurchofJesusChrist.org

Konga 3

Ko e Lakanga Taulaʻeiki Faka-ʻĒloné ko e Lakanga Fakataulaʻeiki Teuteuʻangá ia

Naʻe teuteuʻi ʻe he Lakanga Taulaʻeiki Faka-ʻĒloné ʻa e fānau ʻo ʻIsilelí ʻi ha ngaahi toʻu tangata lahi, ki he fono māʻolunga ange naʻe fāifai pea foaki ʻe Sīsū Kalaisí. Ko e misiona ʻo Sione Papitaisó ke teuteuʻi ʻa māmani ki he hāʻele mai ʻa Kalaisí. Ko ia, naʻe ʻiloa ai ʻa e Lakanga Taulaʻeiki Faka-ʻĒloné ko e “lakanga fakataulaʻeiki teuteuʻanga.” ʻOku akoʻi foki ʻe he folofolá ʻoku maʻu ʻe he Lakanga Taulaʻeiki Faka-ʻĒloné ʻa e ngaahi kī ʻo e ongoongolelei teuteuʻangá, ʻa ia ʻoku kau ai ʻa e fakatomalá mo e papitaiso ki he fakamolemole ʻo e ngaahi angahalá (vakai, Tokāteline mo e Ngaahi Fuakava 84:26–27).

ʻI he ʻaho ní, ʻoku tokoni ʻa e kau maʻu Lakanga Taulaʻeiki Faka-ʻĒloné ki hono teuteu ʻo e māmaní ki he Hāʻele ʻAnga Ua Mai ʻa Sīsū Kalaisí. ʻOku nau tokoni ki he kakaí ke nau teuteu ke fakahoko mo tauhi ʻa e ngaahi fuakavá mo maʻu ʻa e ngaahi ouau ʻi he fale ʻo e ʻEikí ʻaki ʻenau fakatomala mei he angahalá pea papitaiso. Pea ʻoku teuteuʻi foki ʻe hono maʻu ʻo e Lakanga Taulaʻeiki Faka-ʻĒloné ʻa e kau muimui ʻo Sīsū Kalaisí ke nau ngāue ʻi he kotoa ʻo e moʻuí ʻi he Lakanga Taulaʻeiki Faka-Melekisētekí.

Ngaahi meʻa ke fakakaukau ki ai

ʻE ala tokoni ʻa e kaveinga ʻa e kōlomu ʻo e Lakanga Taulaʻeiki Faka-ʻĒloné ke mahino ki he talavou takitaha hono tuʻunga fakalangí mo ʻene taumuʻa ko ha taha maʻu lakanga fakataulaʻeikí. Lau ʻa e kaveingá, ʻoku maʻu ʻi he Tohi Tuʻutuʻuni Fakakātoá, 10.1.2. ʻOkú ke pehē ʻoku tataki fakalaumālie fēfeeʻi nai ʻe he kaveinga ko ʻení ʻa e kau talavoú ke nau fai ha ngaahi fili māʻoniʻoni? Ko e hā ha ngaahi tafaʻaki ʻo e kaveinga ʻa e kōlomu ʻo e Lakanga Taulaʻeiki Faka-ʻĒloné te ke lava ʻo fakakau lelei ange ki ho tuʻunga fakaākonga ʻoʻoú?
ʻOku teuteuʻi kitautolu ʻe he ngaahi ouau mo e ngaahi fuakava ʻoku maʻu ʻi he Lakanga Taulaʻeiki Faka-ʻĒloné ki he ngaahi meʻa ʻoku fekauʻaki mo e Lakanga Taulaʻeiki Faka-Melekisētekí. ʻOku teuteuʻi fēfeeʻi koe ʻe he fakatomalá, papitaiso ʻi he fakauku ke fakamolemoleʻi ʻa e ngaahi angahalá, sākalamēnití, mo hono moʻui ʻaki ʻa e ngaahi fuakava fekauʻaki mo iá, ke ke fakahoko mo tauhi ʻa e ngaahi fuakavá mo maʻu ʻa e ngaahi ouau ʻo e fale ʻo e ʻEikí?

ʻEkitivitī ki he ako mo e niʻihi kehé

Ko e Lakanga Taulaʻeiki Faka-ʻĒloné ko ha konga mahuʻinga ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní fakalūkufua, ka ʻokú ne toe tāpuakiʻi foki mo e kau maʻu lakanga fakataulaʻeikí fakafoʻituitui. Mamataʻi ʻa e vitiō: “Let Every Man Learn His Duty: Aaronic Priesthood” (3:34). ʻOkú ke pehē ʻoku tākiekina fēfē nai ʻe he maʻu ʻo e lakanga fakataulaʻeikí ʻa e fili ʻa e kau talavou ko ʻení? ʻI he fanongo ko ia hoʻomou kulupú ki he vahevahe ʻe ha kau talavou kehekehe ʻa e mahuʻinga ʻo e mālohi mo e mafai ʻo e lakanga fakataulaʻeikí kiate kinautolú, fakaafeʻi ʻa e kau mēmipa ʻo e kulupú ke vahevahe ʻenau ngaahi ongó mo e fakakaukaú.

Ako lahi ange

Henry B. Eyring, “Ko e Lakanga Fakataulaʻeiki Teuteuʻangá,” Liahona, Nōvema 2014, 59–62
Gary E. Stevenson, “Ko Hoʻo Tohi Fakahinohino ʻo e Lakanga Fakataulaʻeikí,” Liahona, Mē 2019, 47–50
“Aaronic Priesthood Shining Forth” (vitiō), Gospel Library
Ngaahi Akonaki ʻa e Kau Palesiteni ʻo e Siasí: Hāloti B. Lī (2011), 105–117