7-р хичээлийн багшийн материал

Бурханы шударга ёс, нигүүлсэл, хайранд талархах нь

Итгэлийн тухай лекцүүдээс бид Бурханд итгэх итгэлээ хэрэгжүүлэх нь “Түүний зан ааш, зан чанарын талаар зөв санаатай” ([1985], 38) байхыг шаарддаг гэж мэдэж авдаг. Энэ хичээлээр суралцагчид Бурханы шударга ёс, нигүүлсэл нь Түүний бурханлаг хайрыг хэрхэн илтгэдэг болохыг тайлбарлах боломжтой болно. Мөн тэд Бурханы төгс хайр, Аврагчийн цагаатгагч золиосонд талархдагаа харуулахын тулд юу хийж болох талаар эргэцүүлэн бодох болно.

Заах зөвлөмж

Енох, Алма хоёр шударга ёс, нигүүлсэл, хайр гэсэн бурханлаг зан чанаруудын тухай заадаг.

Та энэ хичээлийг дараах мэдэгдлүүдийг танилцуулснаар эхлүүлж болно.

• Хуучин Гэрээнд Иехова хатуу чанга, яг таг шударга зарчим баримталдаг. Шинэ Гэрээнд Есүс Христ өршөөнгүй, нигүүлсэнгүй байдаг. Би Хуучин Гэрээний Бурханаас илүү Шинэ Гэрээний Бурханд итгэхийг илүүд үзэж байна.

• Та энэ мэдэгдлээс ямар асуудал олж харж байна вэ?

• Шударга ёс, нигүүлсэл хоёр хоёулаа бурханлаг зан чанар гэдгийг ойлгож, хүлээн зөвшөөрөх нь яагаад чухал вэ?

• Хэрэв бид шударга ёсыг анхаарч, нигүүлслийг үл тоож эсвэл нигүүлсэлд төвлөрч, шударга ёсыг үл тоовол өөрсөд дээрээ ямар ямар асуудал үүсгэж болох вэ?

Самбар дээр шударга ёс, нигүүлсэл, хайр гэж бичиж болно. Суралцагчдыг жижиг бүлгүүдэд хуваагдахад урь. Тэдэнд Бурханы шударга ёс, нигүүлсэл, хайр гурвын хоорондын харилцааны талаарх ойлголтыг нь нэмэгдүүлэхэд туслах заавар бүхий тараах материал өгөхөө тайлбарла.

Бурханы шударга ёс ба хайр

Есүс Христ ба Түүний үүрдийн сайн мэдээ: Багшийн материал—7-р хичээл

Бүлгийн ярилцлагыг эхлүүлэхээсээ өмнө дараах ярилцлагын санаануудыг хамтдаа унш.

Бүлгийн ярилцлагаа сайжруулах

Тэгш оролцоотой байхыг эрмэлз. Бид бүлгийн зөвхөн нэг юм уу хоёрын биш, бүх гишүүний үгийг сонссоноор хамгийн сайн суралцдаг. Хэрэв та угийн нүүрэмгий, яриасаг бол ярилцлагыг гартаа авч, бусдын яриаг тасалдуулж, бусадтай зэрэг ярихгүй байхад анхаар. Хэрэв та угийн дуу муутай, бага ярьдаг бол зоригтой байж, санаагаа илэрхийлээрэй. Бусад тань танаас суралцах болно. Өөрийнхөө бодол санааг хамаагүй гэж боддогоо боль.

Дараах үйл явдлыг хамтдаа чанга унш.

Бурханы хууль, зарлигууд Зэйнд халширмаар санагддаг. Тэрээр удаан хугацаанд өөрийгөө хангалттай сайн биш, хэзээ ч санасандаа хүрдэггүй гэж бодож байгаа бөгөөд “өсөж хөгжихгүй” байгаадаа сэтгэлээр унаж, сүүлийн үед ноцтой алдаа зөрчил гаргах болжээ. Тэр Сүнснээс холдож байгаагаа мэдэрч байлаа. Тэрээр ариун сүмийн эрхийн бичиг авахуйц зохистой байхаа болив. Муу сонголтуудынх нь улмаас Бурхан түүнд хайртай хэвээрээ эсэхэд эргэлзэнэ. Тэр саяхан найз Маяадаа “Миний амьдрал ямар ч үнэ цэнгүй. Бурхан миний төлөө байхаа больж, бууж өгсөн байх гэдэгт би итгэлтэй байна” гэж хэлжээ. Хариуд нь Маяа “Битгий санаа зовоорой. Биднийг хайрлах Бурханы хайранд нөхцөл байдаггүй. Юу хийснээс чинь хамаарахгүйгээр Тэр чамайг аврах болно. Есүс Христийн Цагаатгалын зорилго нь тэр шүү дээ” гэжээ.

Үер болоход хүргэсэн нөхцөлүүдийг товчхон ярилц. Дараа нь Мосе 7:28–29, 32–33, 37-г уншаад, Бурхан дуулгаваргүй хүүхдүүдээ зовохыг харж байгаагаас Түүний мөн чанарын талаар Енох юу сурсныг олж хараарай. Тэгээд дараах асуултуудыг ярилц.

• Эдгээр шүлгээс ямар үнэн Зэйн зарлигуудыг зөрчсөн ч гэсэн Тэнгэрлэг Эцэг түүнд хайртай гэдгийг ойлгоход нь тусалж болох вэ? Энэхүү мэдлэг Зэйний Тэнгэрлэг Эцэгтэй харилцах харилцаагаа сайжруулахад хэрхэн туслах вэ? (Та энэ ярилцлагын нэг хэсэг болгон бэлтгэх материалын 1-р хэсэг дэх ахлагч Жэффри Р.Холландын мэдэгдлийг уншиж болно.)

• Заримдаа уур хилэн, дургүйцлээр илэрхийлэгддэг Бурханы шударга ёс ямар арга замаар Түүний хайрын нотолгоо болдог вэ? (Бэлтгэх материалын 1-р хэсэг дэх ерөнхийлөгч Даллин Х.Өүксийн мэдэгдлийг хамтдаа унших талаар бодож үз.) Хэрэв Бурхан шударга биш байсан бол Түүнд итгэх бидний итгэлийг хэрхэн мохоох байсан бэ?

• Бурханы хайрын талаарх Маяагийн үзэл бодолд буруу ойлголт төрүүлэх юу байна вэ? (1-р хэсэг дэх ахлагч Д.Тодд Кристоффэрсоны мэдэгдлийг унших нь тустай байж болох юм.) Бурханы хайрыг дүрслэн хэлэх илүү сайн арга зам юу байж болох вэ? Та Бурханы хайрыг ямар арга замаар мэдэрсэн бэ?

© 2023 by Intellectual Reserve, Inc. Бүх эрх хамгаалагдсан.

Бурханы шударга ёс ба хайр

Есүс Христ ба Түүний үүрдийн сайн мэдээ: Багшийн материал—7-р хичээл

Багшийн тараах материал

Бүлгээрээ ярилцах хангалттай цаг гаргаж өгсний дараа суралцагчдыг бүлгээр ярилцахад хамгийн чухал гэж мэдрэгдсэн үнэнүүдийг эсвэл ойлгосон зүйлээ хуваалцахад урь.

Кориантоны номлолд үйлчилж байх үеийн сонголтын талаар цухас дурдан, Бурханы талаарх Зэйн, Маяа хоёрын бодлын талаар үргэлжлүүлэн ярилцаж болно (Алма 39:1–5-ыг үзнэ үү). Алма 42:15, 22, 24–25-ыг уншаад, Алма Кориантонд шударга ёс, нигүүлсэл болон Есүс Христийн талаар юу гэж заасныг олж мэд.

• Есүс Христийн Цагаатгалын талаар зөв ойлголттой байх нь Зэйнд хангалтгүй байдал, алдаа дутагдал, гэм нүглийнхээ талаар өөрөөр бодоход хэрхэн туслах вэ? Зэйн “үнэнээр гэмшигч” байх гэдэг нь ямар утгатайг олж мэдвэл хандлага, үйлдэл нь хэрхэн өөрчлөгдөж болох вэ? (Алма 42:24-ийг үзнэ үү).

• Есүс Христийн Цагаатгалын талаарх Маяагийн үзэл бодолд буруу ойлголт өгч болох юу байна гэж та бодож байна вэ? Алмагийн заасан зүйлтэй илүү уялдаа холбоотой болгохын тулд түүний үзэл бодолд ямар залруулга хийх вэ?

• Хэрэв Зэйн өөрийнхөө алдаанд анхаарал бага хандуулж, хоёр дахь боломж олгохыг хүсдэг Аврагчийн хүсэлд илүү төвлөрвөл амьдрал нь хэрхэн өөрчлөгдөж болох вэ? (Та бэлтгэх материалын 2-р хэсэг дэх ерөнхийлөгч Дийтр Ф.Угдорф, ахлагч Линн Г.Роббинс нарын хэлсэн мэдэгдлийг уншиж болно.) Аврагчийн тэвчээр, нигүүлсэлд анхаарлаа төвлөрүүлэх нь таны амьдралыг хэрхэн адисалсан бэ?

Хичээлийн төгсгөлд дараах үнэнүүдийг холбоотой асуултуудтай нь танилцуулж болно. Суралцагчдыг эдгээр үнэнээс нэгийг сонгож, асуултын хариулт болох бодол, мэдрэмжээ бичиж тэмдэглэхэд урь.

• Бурхан биднийг дуулгаваргүй байдлаасаа болж зовж шаналахад гүнээ харуусдаг. (Мосе 7:37-г үзнэ үү.)

• Таныг дуулгаваргүй байснаасаа болж шаналах үед Тэнгэрлэг Эцэг гашууддаг тухай бодоход танд ямар бодол, сэтгэгдэл төрж байна вэ? Түүний төгс хайранд болон санаа тавьсанд нь талархаж байгаагаа харуулахын тулд та юу хийж болох вэ?

• Есүс Христ Өөрийн Цагаатгалаар дамжуулан, шударга ёсны шаардлагыг хангаснаар бид наманчилж, нигүүлслийг хүртэх боломжтой болсон. (Алма 42:24-ийг үзнэ үү.)

• Биднийг наманчилж, нигүүлсэл хүлээн авдаг болгохын тулд Есүс Христ шударга ёсны шаардлагыг хангасан талаар бодоход танд ямар сэтгэгдэл, мэдрэмж төрж байна вэ? Түүний таны төлөө гаргасан гэтэлгэгч золиослолд талархаж байгаагаа харуулахын тулд та юу хийж чадах вэ?

Дараагийн хичээлээр

Долоо хоногийн дундуур дараах зурвасыг эсвэл өөрийн санаж бодсон зүйлийг суралцагчид руу илгээж болно. Бэлтгэх хичээлийн 8-р хэсгийг уншиж байхдаа, Есүс Христийн танд болон таны хайртай хүмүүст тусалж (тусалж дэмжих) болох өөр өөр арга замын талаар бод.