10-р хичээлийн багшийн материал

Есүс Христийн хүлцэнгүй байдлын үлгэр жишээг дагах нь

Есүс Христ Эцэгийнхээ тааллыг гүйцэлдүүлэхийн тулд дэлхийд ирсэн (Иохан 5:19-ийг үзнэ үү). Энэ хичээлээр суралцагчид Аврагчийн хүлцэнгүй байдлын төгс жишээ нь даруу, номхон дөлгөөн байдал гэсэн бурханлаг зан чанаруудтай хэрхэн холбогддогийг авч үзэх боломжтой. Мөн суралцагчид Бурханыг амьдралдаа илүү бүрэн дүүрэн ялуулахын тулд юу хийж болох талаар бодох болно.

Заах зөвлөмж

Есүс Христ бүх зүйлд Тэнгэрлэг Эцэгийн тааллыг дуулгавартай дагадаг.

Дараах жишээг хуваалцах талаар бодож үз.

Лукас ахлагчдын чуулгын ерөнхийлөгчөөр дуудагдаад удаагүй байв. Дуудлагаа хүлээн авсныхаа дараа тэрээр бишопоос “Хүмүүс дагахыг хүсдэг үнэхээр хүчирхэг удирдагч байхын тулд би юу хийж болох вэ?” гэж асуужээ. Бишоп хэсэг чимээгүй зогссоноо, дараа нь “Даруу, номхон дөлгөөн бай” гэж хэлэв. Лукас бишопын зөвлөгөөнд талархсан ч даруу, номхон дөлгөөн байх нь түүнийг сул дорой удирдагч мэт харагдуулах вий хэмээн санаа зовсоор гарч явав.

• Лукас даруу, номхон дөлгөөн зан чанарын талаар ямар буруу ойлголттой байж болох вэ?

• Хэрэв Лукас бишопын зөвлөгөөг үл тоомсорловол тэр ямар төрлийн удирдагч болох магадлалтай вэ?

Ахлагч Дэвид А.Бэднарын даруу, номхон дөлгөөн байдлын тухай хэлсэн дараах тодорхойлолтуудыг харуулж, тэдгээр нь өөрсдийн хүслийг Бурханд нийцүүлэхтэй ямар холбоотой талаар ярилцаж болно.

Даруу байдлыг ерөнхийдөө Бурханаас хамааралтай бөгөөд Түүний удирдамж дэмжлэг байнга хэрэгтэй гэдгээр тайлбарладаг. …

Номхон дөлгөөн байдал нь … зөв шударга хариу үйлдэл хийдэг, өөрийн хүслээр захирагддаг, тэсвэр тэвчээртэй байх гэдгээр тодорхойлогддог. (“Зүрх сэтгэлдээ номхон дөлгөөн,” 2018 оны 4-р сарын Ерөнхий чуулган, 39)

Есүс Христийн Гетсеманийн цэцэрлэгт залбирч байгаа зургийг үзүүлэхийг бод. Суралцагчдыг Лук 22:39–44-ийг уншаад, энэ түүх бидэнд хүлцэнгүй байдлын тухай юу зааж байгааг олж мэдэхэд урь. Мөн доорх асуултыг тавьж болно.

• Даруу, номхон дөлгөөн, хүлцэнгүй байдлын талаар бидэнд заадаг Аврагчийн амьдралын өөр ямар жишээнүүд байдаг вэ? (Хэрэв суралцагчдад тустай гэж үзвэл, хүлцэнгүй байдалтай холбоотой Аврагчийн амьдралын нэмэлт зургуудыг үзүүлж болно. Та бэлтгэх материалын 1-р хэсэг дэх Ахлагч Дэвид А.Бэднарын мэдэгдлийг уншаад ярилцаж болно.)

• Есүс Өөрийн хүслийг Эцэгийнхтэй нийцүүлсний ачаар бид ямар арга замаар адислагдсан бэ? (Та дараах үнэнийг харуулж болно. Есүс Христ “эхлэлээс бүх зүйлийн хувьд Эцэгийн тааллыг хүлц[сэн]” (3 Нифай 11:11).)

• Бурханы таалалд илүү хүлцэнгүй байснаар та болон таны амьдрал дахь хүмүүс хэрхэн адислагдах вэ? (Та суралцагчдыг Бурханы таалалд илүү хүлцэнгүй байхын тулд хийж болох нэг зүйлээ хувь хувьдаа тодорхойлон бичихэд хэдэн хором зарцуулахад урьж болно.)

Лукасын тухай түүхийг товчхон эргэн хараад, даруухан, номхон дөлгөөн удирдагч байх тухай бишопын зөвлөгөөг дагаснаар Лукас болон түүний чуулга хэрхэн адислагдах боломжтойг хуваалцахад суралцагчдыг урих нь тустай байж болох юм.

Гэрээт хүмүүс Бурханыг амьдралдаа ялуулах боломжийг олгодог.

Суралцагчид бэлтгэх материалын 3-р хэсэг дэх ерөнхийлөгч Рассэлл М.Нэлсоны мэдэгдлийг уншаад, бэлэн байх гэдэг үгийн ач холбогдлын талаар товч ярилцаж болно. Бид амьдралдаа Бурханыг ялуулах сонголтыг хийхэд бэлэн байх үедээ Их Эзэний хүмүүс болдог гэдгийг та гэрчилж болно.

Заах, суралцах чадвараа сайжруулах

Суралцагчдыг сурч байгаа зүйлээ хуваалцахад урамшуул. Суралцагчдад өөрсдийн бодол, мэдрэмж, сэтгэгдлийг бусадтай хуваалцах боломжийг олгосноор тэдэнд ойлголтоо гүнзгийрүүлэх, гэрчлэлээ бэхжүүлэх, сайн мэдээний үнэнийг илэрхийлэх чадвараа мөн янз бүрийн нөхцөл байдалд сайн мэдээний талаар ярих итгэлээ нэмэгдүүлэхэд тусалж чадна.

Суралцагчдад амьдралдаа Бурханыг ялуулах янз бүрийн арга замуудын талаар бодоход нь туслахын тулд та дараах зааварчилгааг үзүүлж эсвэл тараах материал болгон өгч болно.

Бурхан ялах болтугай

Есүс Христ ба Түүний үүрдийн сайн мэдээ: Багшийн материал—10-р хичээл

Дараагийн хэдэн хормыг Бурханы таалалд захирагдах тухай товчхон санаа бэлтгэхэд зарцуул. Таны санаа судрын юм уу таны амьдралын, аль эсвэл таны таньдаг хэн нэгний амьдралын хүлцэнгүй байх жишээг агуулсан байх ёстой. Мөн уг жишээг амьдралдаа хэрхэн хэрэгжүүлэхийг багтааж болно. Бэлтгэх явцдаа дараах эх сурвалжуудын нэгийг ашиглах талаар бодож үз.

• Бэлтгэх материалын 2-р хэсэг нь гэрээ байгуулж, сахих талаар байх болно

• Бэлтгэх материалын 3-р хэсгээс судрын түүхүүдийн нэгийг (Нааман, Мариа, Енохын) олж болно

© 2023 by Intellectual Reserve, Inc. Бүх эрх хамгаалагдсан.

Бурхан ялах болтугай

Есүс Христ ба Түүний үүрдийн сайн мэдээ: Багшийн материал—10-р хичээл

Суралцагчдад бэлтгэх хангалттай хугацаа гаргаж өгсний дараа, тэднийг жижиг бүлгүүд болоход урь. Хичээлийн үлдсэн хугацааг харгалзан, бүлгийн хэмжээг шийд. Үлдсэн хугацаа бага байх тусам бүлгийн хэмжээг багасга. Энэ нь бүх суралцагч санаа бодлоо хуваалцах боломжтой байхад тустай.

Хичээл дуусахаас өмнө та суралцагчдад бэлтгэх материалын 3-р хэсэгт байгаа Та амьдралдаа Бурханыг илүү бүрэн дүүрэн ялуулахын тулд юу хийж эхлэх эсвэл юу хийхээ болих ёстой гэж бодож байна вэ? гэсэн асуултын талаар чимээгүй тунгаан бодож, бодож буй зүйлээ тэмдэглэхэд зориулан хэдэн хором өгч болно.

Дараагийн хичээлээр

Суралцагчдыг дараагийн хичээлд бэлтгэхэд нь урамшуулахын тулд долоо хоногийн дундуур дараах зурвасыг илгээх талаар бодож үзээрэй. Тэргүүн зөвлөлийн ерөнхийлөгч Даллин Х.Өүкс “Сүмд явах, идэвхтэй байх нь бидэнд илүү сайн хүмүүс болж, бусдын амьдралд илүү сайн нөлөө үзүүлэхэд маань тусалдаг” гэж хэлсэн. (“Сүмд явах хэрэгцээ,” Лиахона, 2021 оны 11-р сар, 24). Та 11-р хичээлд бэлтгэх материалыг судлах явцдаа, Сүмд явснаар өөрийн болон гэр бүл, найз нөхдийн тань амьдрал адислагдаж болох хэд хэдэн арга замыг хайж ол.